1 ݠِيٜرْ 1 - دٜڢْتٜرٜ اَللَّه ڢُلْڢُلْدٜ عَدَمَوَ

کٛوڢْنغٛلْ

¹ مِنْ سِمٛنْ ݠِيٜرْ، نٜلَاطٛ عِيسَى اَلْمَسِيحُ، مِطٛنْ وِنْدَنَ عٛنْ، عٛنٛنْ سُࢡَاࢡٜ اَللَّه، لَاتِيࢡٜ جَنَنْࢡٜ سَنغْکِتِيࢡٜ حَا لٜسْطٜ ݠٛنْتُسْ عٜ غَلَاتِيَ عٜ کَݠَّدٛسِيَ عٜ عَسِيَ عٜ بِتِنِيَ؞

² عٛنْ لَاتِ سُࢡَاࢡٜ نغَمْ اَللَّه بَابِرَاوٛ مُويِ طُمْ دِغَ ࢡٛويْمَ؞ رُوحُ مَاکٛ سٜنِ عٛنْ، حَا عٛنْ طٛوْتَنٛ عِيسَى اَلْمَسِيحُ، حَا ࢨِيࢨَمْ مَاکٛ لَࢡِّنَ عٛنْ؞ مٛعّٜرٜ عٜ سَلَامَنْ طُوطَنَ عٛنْ‏!

تَمُّندٜ غٛونغَارٜ

³ نغٜتّٜنْ اَللَّه، بَابِرَاوٛ جَوْمِرَاوٛ مٜىٰطٜنْ عِيسَى اَلْمَسِيحُ‏! عٛوَطَنِ عٜنْ عٜنْطَمْ طُوطَّمْ، عٛلَاتِنِ عٜنْ دَࢩَاࢡٜ حٜسْࢡٜ بَرْکَ عُمِّتِنٜىٰکِ عِيسَى اَلْمَسِيحُ دِغَ مَايْدٜ؞ طُمْ حٜبِّنِ ࢡٜرْطٜ مٜىٰطٜنْ بٜى تَمُّندٜ غٛونغَارٜ؞

⁴ عٜنْ طٛنْ تَمّٛ حٜࢡُغٛ ندٛنْنغُ نغُ عٛسِغَنِ يِمْࢡٜ مَاکٛ حَا عَسَمَ؞ نغُ ࢩٛلَتَا، نغُ وٛنَّتَاکٛ، نغُ عُسْتَتَاکٛ بٛو؞

⁵ عٛنْ طٛنْ نُطِّنِمٛ؞ نغَمْ مَاجُمْ عٛطٛنْ عَيْنَ عٛنْ بٜى بَاوْطٜ مَاکٛ؞ ندٜرْ بَلْطٜ رَغَرٜىٰجٜ، عٛوَنغِنَنَنْ عٛنْ کِسْندَمْ طَمْ عٛتَاسْکَنِ عٛنْ؞

⁶ شٜيٜ مَسِنْ، کٛو تٛ طُمْ کَاندُطُمْ بٛنٜىٰجِ ڢٜىٰرٜ ڢٜىٰرٜىٰجِ طٛنْ شُنَ عٛنْ وَکَّتِ سٜطَّ؞

⁷ بٛنٜىٰجِ طِعِ ݠٛونْدَنْ نُطِّنْکِ مٛوطٛنْ تٛ کِ غٛونغَحِ؞ کٛو کَنغّٜىٰرِ وٛنّٛتٛوندِ مَا ࢡٜطٛنْ ݠٛونْدَ ندِ ندٜرْ يِيتٜ، سَکّٛ نُطِّنْکِ مٛوطٛنْ؞ کِ ࢡُرِ کَنغّٜىٰرِ سَمَنْ ݠِوْ، سٜيْ کِ ڢٛونْدٜ؞ ࢡَاوٛ ݠٛونْدٛلْ مَنْ، عٛنْ کٜࢡَنْ مَنٛوجٜ عٜ تٜدُّنغَلْ عٜ مَنغُ، ࢩَنْدٜ عِيسَى اَلْمَسِيحُ وَنغَنْتَ يِمْࢡٜ ڢُو؞

⁸ کٛو ندٜ عٛنْ نغِعَايْ مٛ، عٛنْ نغِطِمٛ؞ کٛو ندٜ عٛنْ نغِعَتَا مٛ جٛنْتَ، عٛنْ نُطِّنِمٛ؞ نغَمْ مَنْ عٛنْ طٛنْ شٜيٛ بٜى سٜيٛ تٜدُّنغٛ، طُوطْنغٛ، نغٛ ࢡُرِ وٛلْوٜىٰغٛ،

⁹ نغَمْ عٛنْ کٜࢡَنْ کٛ عٛنْ تَمّٛتٛ ندٜرْ نُطِّنْکِ مٛوطٛنْ، کَنْجُمْ وٛنِ کِسْندَمْ يٛنغْکِيجِ مٛوطٛنْ؞

^10-11 اَلنَّبِعٜنْ مبَطِ عَنَّبَاکُ دٛوْ مٛعّٜرٜ ندٜ اَللَّه تَاسْکِتِنَنِ عٛنْ دِغَ ڢُطَّمْ، رُوحُ اَلْمَسِيحُ وٛنْدِ بٜى مَࢡّٜ، حٛلِّ ࢡٜ اَلْمَسِيحُ تَمِّ يَرُغٛ بٛنٜ، ࢡَاوٛطٛنْ عٛتَمِّ حٜࢡُغٛ تٜدُّنغَلْ؞ اَلنَّبِعٜنْ غٛ تٜڢِ ڢَامُغٛ حَالَ کِسْندَمْ طَعَمْ مَسِنْ، لِࢩِ کَ بٜى حَکِّيلٛ نغَمْ ࢡٜکٜࢡْتَ ندٜيْ کَ وَطَتَ عٜ نٛيْ کَ لَاتٛرْتٛ؞

¹² اَللَّه وَنغِنَنِ ࢡٜ کُبَرُوٛلْ نغٛلْ عٛحَلْڢِنَنِ ࢡٜ، نغٛلْ لَاتَاکِ نغَمْ مَࢡّٜ، عَمَّا نغَمْ مٛوطٛنْ؞ نٜلَاࢡٜ وَازِنْࢡٜ عٛنْ لِنْجِيلَ نغٜشِّ عٛنْ غٛونغَاجِ طِعِ؞ ࢡٜنغَازِ عٛنْ طِ بٜى بَاوْطٜ رُوحُ شٜنِيطٛ عِوْطٛ دِغَ عَسَمَ؞ مَلَاعِکَعٜنْ مَا نغِطِ ڢَامُغٛ حَالَ کَعَ؞

يٜىٰطُغٛ ندٜرْ سٜنَارٜ

¹³ نغَمْ مَاجُمْ، سٜيْ نُمٛوجِ مٛوطٛنْ تَاسْکَنٛ کُوغَلْ‏! کَکِّلٜ، نجٛعِّنٜ تَمُّندٜ مٛوطٛنْ ڢُو حَا مٛعّٜرٜ ندٜ کٜࢡٛتٛنْ سَاعِ عِيسَى اَلْمَسِيحُ وَنغَتَ؞

¹⁴ بَنَ ࢡِکّٛيْ طٛوْتِيکٛيْ، تَا تٛکّٜ سُونٛوجِ مٛوطٛنْ طِ تٛکِّنٛوطٛنْ يَاکٜ عٛنْ عَنْدَانٛ غٛونغَ؞

¹⁵ عَمَّا بَنَ اَللَّه عٜوْنِيطٛ عٛنْ عٛ شٜنِيطٛ، لَاتٜ عٛنٛنْ بٛو عٛنْ سٜنَاࢡٜ ندٜرْ کٛ مبَطٛتٛنْ ڢُو؞

¹⁶ نغَمْ دٜڢْتٜرٜ وِعِ‏: «لَاتٜ عٛنْ سٜنَاࢡٜ نغَمْ مِنْ مِ شٜنِيطٛ؞»

¹⁷ تٛ عٛنْ طٛنْ مبَطَ دٛعَ، عٛنْ طٛنْ عٜوْنٛ اَللَّه، «بَابِرَاوٛ»؞ اَللَّه طٛنْ حِيتٛ يِمْࢡٜ، عٛسٜنْدِندِرْتَا ࢡٜ، عَمَّا عٛطٛنْ حِيتٛ ࢡٜ دٜيْدٜيْ کُوطٜ مَࢡّٜ؞ ندٜ نِي عٛنْ لَاتَکٜ حٛطْࢡٜ ندٜرْ دُنِيَارُ، تِمِّنٜ بَلْطٜ مٛوطٛنْ لُتُّطٜ ندٜرْ کُلٛلْ اَللَّه؞

¹⁸ عٛنْ شٛوتَّامَ دِغَ يَحْدُ حَلُّندُ ندُ عٛنْ ندٛنِ حَا کَاکِرَاࢡٜ مٛوطٛنْ؞ عٛنْ عَنْدِ عٛنْ شٛوتِّرَاکَ بٜى کُوجٜ طٜ سَمَنْ مَاجٜ عُسْتٛتٛ بَنَ کَنغّٜىٰرِ مَلَّ شَرْدِ،

¹⁹ عَمَّا عٛنْ شٛوتِّرَامَ بٜى ࢨِيࢨَمْ شَطَّمْ طَمْ اَلْمَسِيحُ، مٛ لَاتِ بَنَ جَوْغٜلْ لَاࢡْنغٜلْ نغٜلْ وَلَا عَيْبٜ؞

²⁰ اَللَّه سُࢡِمٛ دِغَ دُنِيَارُ تَغَاکَ تَوٛنْ، عٛوَنغِنِمٛ حَا مٛوطٛنْ ندٜرْ بَلْطٜ رَغَرٜىٰجٜ طٜعٜ؞

²¹ نغَمْ بَرْکَ مَاکٛ عٛنْ نُطِّنِ اَللَّه مٛ عُمِّتِنِمٛ دِغَ مَايْدٜ، تٜدِّنِمٛ؞ بَنَ نٛنْ نُطِّنْکِ مٛوطٛنْ عٜ تَمُّندٜ مٛوطٛنْ حَا اَللَّه تَبِتِرْتَ؞

²² جٛنْتَ ندٜ عٛنْ شٜنِ کٛعٜ مٛوطٛنْ بٜى طٛوْتَنَاغٛ غٛونغَ، نغِطٜ دٜىٰرْطِرَاࢡٜ ندٜرْ نُطِّنْکِ بِلَا نَاڢِکَارٜ؞ نغَمْ مَاجُمْ نغِطِنْدِرٜ بٜى تِينَارٜ عٜ ࢡٜرْطٜ لَاࢡْطٜ؞

²³ عٛنْ لَاتِ دَࢩَاࢡٜ حٜسْࢡٜ بٜى وٛلْدٜ اَللَّه؞ وٛلْدٜ ندٜعٜ لَاتَاکِ بَنَ عَاوْدِ ࢩٛلَنْدِ، عَمَّا ندٜ يٜىٰرٜ، ندٜ ࢩٛلَتَا عٜ ندٜ جِنَّتَا؞

²⁴ بَنَ کٛ وِنْدَ‏: «يِمْࢡٜ ڢُو طٛنْ بَنَ ڢُطْنغٛوجِ، تٜدُّنغَلْ مَࢡّٜ ڢُو طٛنْ بَنَ ݠِنْدِ مَاجِ؞ ڢُطْنغٛوجِ نجٛورَنْ، ݠِنْدِ بٛو شَامَنْ؞

²⁵ عَمَّا وٛلْدٜ جَوْمِرَاوٛ دُومٛتٛ؞» وٛلْدٜ ندٜعٜ وٛنِ کُبَرُوٛلْ شٜيْنٛووٛلْ نغٛلْ عَنْدِنَاطٛنْ؞