1 لَامِيبٜٔ 1 - دٜڢْتٜرٜ اَللَّه ڢُلْڢُلْدٜ عَدَمَوَعَبِسَغْ حُووَنِ دَاوُدَ 1 لَامِيطٛ دَاوُدَ ندٛتِّدِ مَسِنْ، دُوࢡِ مَاکٛ طُوطِ؞ ࢡٜشُدِّمٛ بٜى لِمْشٜ، عَمَّا عٛمَاتَايْ غُلْطُمْ؞ 2 ندٜنْ جَغِّيࢡٜ مَاکٛ مبِعِمٛ: «بَرْکَامَ مِنْ نجَحَنْ مِنْ طَࢡِّتَنٜ ݠَاࢩٛ دٜبّٛ مٛ مٜىٰطَايْ عَنْدُغٛ غٛرْکٛ سَمْ نغَمْ عٛحُووَنٜ عٜ عٛحَکِّلَنٜ، عٛوَالٛ حَا کٛمْبِ مَ نغَمْ عَمَاتَ غُلْطُمْ؞» 3 ࢡٜطَࢡِّتِ ݠَاࢩٛ دٜبّٛ نغَرْنِيطٛ ندٜرْ مَرَلْ إِسْرَاءِيلَ ڢُو؞ ࢡٜتَوِ عَبِسَغْ سُنٜمِيجٛ، ࢡٜنغَدِّمٛ حَا لَامِيطٛ؞ 4 ݠَاࢩٛ دٜبّٛ عٛو، عٛ نغَرْنِيطٛ مَسِنْ؞ عٛلَاتِ کَکِّلَنٛووٛ لَامِيطٛ، عٛطٛنْ حُووَنَ مٛ؞ عَمَّا لَامِيطٛ مٜىٰطَايْ عَنْدُغٛ مٛ؞ عَدٛنِيَ جَࢡْتِ لَامُ 5 عَدٛنِيَ ࢡِي دَاوُدَ مٛ حَغِّتْ دَࢩَنِمٛ مَوْنِتِ، وِعِ: «مِنْ مِلَامٛتٛ؞» نٛنْ عٛتَاسْکَنِ حٛورٜ مَاکٛ مٛوتَاجِ ݠُشِّ عٜ وَعِّيࢡٜ عٜ وٛرْࢡٜ شَݠَّنْطٜ نجٛوٛ دٛغَّنْࢡٜ يٜىٰسٛ مَاکٛ؞ 6 بَابَ مَاکٛ مٜىٰطَايْ ڢٜلُغٛ مٛ سَمْ، ࢨَمَايْ مٛ: «کٛنِ مبَطَتَ طُمْ؟» عَدٛنِيَ عٛ نغَرْنِيطٛ، دَادَ مَاکٛ دَࢩْنٛ مٛ ࢡَاوٛ عَبْسَلٛمْ؞ 7 عَدٛنِيَ سَرْوٛتِرِ بٜى يٛعَبْ ࢡِي سٜرُيَتُ عٜ عَبِيَتَرْ لِمَنْجٛ؞ ࢡٜمبَلِّ عَدٛنِيَ، ࢡٜتٛکِّمٛ؞ 8 عَمَّا شَدٛکْ لِمَنْجٛ عٜ بٜنَيَ ࢡِي يٛيَدَ عٜ اَلنَّبِي نَتَنْ عٜ سِمْعِ عٜ رٜىٰعِ عٜ يِمْࢡٜ دَاوُدَ سُوسْࢡٜ، ࢡٜ ڢُو ࢡٜتٛکَّاکِ عَدٛنِيَ؞ 9 ࢩَنْدٜ ڢٜىٰرٜ عَدٛنِيَ تَاسْکِ جُولْدٜ مَوْندٜ، عٛحِرْسِ دَمّٛوجِ عٜ غَعِ عٜ ࢩَلْبِ ݠَيْطِ حَا حَيْرٜ سٛحٜلٜتْ بَنغٜ عٜنْ-رٛغٜلْ؞ عٛعٜوْنِ دٜىٰرْطِرَاࢡٜ مَاکٛ، ࢡِࢡّٜ لَامِيطٛ ڢُو عٜ جَغَّنِيࢡٜ لَامِيطٛ يَحُودُعٜنْ ڢُو؞ 10 عَمَّا عٛعٜوْنَاکِ اَلنَّبِي نَتَنْ عٜ بٜنَيَ عٜ عَيْنٛوࢡٜ عٜ لَامِيطٛ سُلَيْمَـٰنُ، دٜىٰرْطِيکٛ؞ 11 ندٜنْ نَتَنْ وِعِ بَتْ-سٜىٰبَ، دَادَ سُلَيْمَـٰنُ: «عَنَنَايْ حَبَرُ عَدٛنِيَ ࢡِي حَغِّتْ لَامَکٜ نَ؟ جَاغٛرْطٛ مٜنْ دَاوُدَ بٛو عَنْدَا طُمْ؞ 12 کَدِ نَنْ کٛ مِسَرْوٛتٛ مَ، نغَمْ حَا عَحِسْنَ يٛنغْکِ مَ عٜ کِ ࢡِيَ سُلَيْمَـٰنُ؞ 13 يَحْ، نَسْتُ سُودُ لَامِيطٛ دَاوُدَ؞ وِعْ مٛ: يَا جَوْمَمْ لَامِيطٛ، عَنْ عَحُنَنِ يَمْ، مِنْ کٛرْطٛ مَ، عَوِعِ: ࢡِيَ سُلَيْمَـٰنُ لَامٛتٛ ࢡَاوٛ عَمْ، کَنغْکٛ عٛجٛوطٛتٛ دٛوْ لٜىٰسٛ لَامُ عَمْ؞ کَدِ، نغَمْ طُمٜ عَدٛنِيَ لَامِ جٛنْتَ؟» 14 نَتَنْ ࢡٜسْدِ وِعُغٛ: دِغَ عَطٛنْ وٛلِدَ بٜى لَامِيطٛ تَوٛنْ، مِنْ بٛو مِوَرَنْ، مِسٜمْبِطِنَ بٛلّٜ مَ؞ 15 بَتْ-سٜىٰبَ يٜحِ، نَسْتِ سُودُ لَامِيطٛ، لَامِيطٛ ندٛتِّدِ مَسِنْ؞ عَبِسَغْ سُنٜمِيجٛ بٛو طٛنْ حُووَنَ مٛ؞ 16 بَتْ-سٜىٰبَ تُرِ، تُغِّ کٛݠِّ يٜىٰسٛ لَامِيطٛ؞ لَامِيطٛ وِعِ: کٛ وَدُّ مَ؟ 17 عٛجَابِمٛ: «يَا جَوْمَمْ، ڢَکَتْ عَحُنٛرَنِ کٛرْطٛ مَ بٜى اَللَّه جَوْمِرَاوٛ مَاطَ، عَوِعِ: ࢡِيَ سُلَيْمَـٰنُ لَامٛتٛ ࢡَاوٛ عَمْ، کَنغْکٛ عٛجٛوطٛتٛ دٛوْ لٜىٰسٛ لَامُ عَمْ؞ 18 عَمَّا ندَا جٛنْتَ، عَدٛنِيَ لَامَکٜ، عَنْ بٛو، جَوْمَمْ، عَعَنْدَا طُمْ؞ 19 عٛلِيعِ غُلٜتٜىٰطِ غَعِ عٜ ࢩَلْبِ ݠَيْطِ عٜ دَمّٛوجِ طُوطِّ؞ عٛعٜوْنِ ࢡِࢡّٜ مَ ڢُو عٜ عَبِيَتَرْ لِمَنْجٛ عٜ يٛعَبْ مَوْطٛ حٛنٛوࢡٜ، عَمَّا عٛعٜوْنَاکِ سُکَ مَ سُلَيْمَـٰنُ؞ 20 عَمَّا عَنْ، يَا جَوْمَمْ لَامِيطٛ، غِتٜ إِسْرَاءِيلَ ڢُو طٛنْ ندَارَ غَلْ مَاطَ، حَا عَعَنْدِنَ ࢡٜ مٛ جٛوطٛتٛ دٛوْ لٜىٰسٛ لَامُ مَ ࢡَاوٛ مَاطَ؞ 21 تٛ نَا نٛنْ، سَاعِ جَوْمَمْ لَامِيطٛ مَايِ، مِنْ عٜ ࢡِيَمْ سُلَيْمَـٰنُ مِنْ لَاتٛتٛ بَنَ تُورْتُࢡٜ؞» 22 سَاعِ عٛطٛنْ وٛلِدَ بٜى لَامِيطٛ تَوٛنْ، اَلنَّبِي نَتَنْ وَرِ؞ 23 ࢡٜعَنْدِنِ لَامِيطٛ: اَلنَّبِي نَتَنْ طٛنْ طٛ؞ عٛنَسْتِ، عٛتُرِ، حِݠِّ يٜىٰسٛ مَاکٛ حَا لٜسْدِ يٜىٰسٛ لَامِيطٛ؞ 24 نَتَنْ وِعِ: «بَرْکَامَ، عَنْ وِعِ عَدٛنِيَ لَامٛتٛ ࢡَاوٛ عَمْ، عٛجٛوطٛتٛ دٛوْ لٜىٰسٛ لَامُ عَمْ نَ؟ 25 نغَمْ عٛيٜحِ حَنْدٜ، عٛتَاسْکِ جُولْدٜ، عٛلِيعِ غُلٜتٜىٰطِ غَعِ عٜ ࢩَلْبِ ݠَيْطِ عٜ دَمّٛوجِ طُوطِّ؞ عٛعٜوْنِ ࢡِࢡّٜ مَ ڢُو عٜ عَرْدِيࢡٜ حٛنٛوࢡٜ حٛورٜعٜنْ سٛوجٜعٜنْ عٜ عَبِيَتَرْ لِمَنْجٛ؞ ندَا، ࢡٜطٛنْ ࢩَامَ، ࢡٜطٛنْ نجَرَ يٜىٰسٛ مَاکٛ، ࢡٜطٛنْ مبِعَ: لَامِيطٛ عَدٛنِيَ يٜىٰطَ حَا ڢٛرٛيْ! 26 عَمَّا مِنْ عٜ شَدٛکْ لِمَنْجٛ عٜ بٜنَيَ ࢡِي يٛيَدَ عٜ ࢡِيَ سُلَيْمَـٰنُ، عَدٛنِيَ عٜوْنَاکِ مِنْ؞ 27 حُوندٜ ندٜعٜ عِوِ حَا مَاطَ نَا بَرْکَامَ؟ عَيٜشَّايْ مِنْ، مِنِنْ جَغَّنِيࢡٜ مَ مٛيْ جٛوطٛتٛ دٛوْ لٜىٰسٛ لَامُ مَ ࢡَاوٛ مَاطَ نَ؟» سُلَيْمَـٰنُ حٜࢡِ لَامُ 28 ندٜنْ لَامِيطٛ دَاوُدَ وِعِ: عٜوْنَنٜىٰطَمْ بَتْ-سٜىٰبَ! بَتْ-سٜىٰبَ وَرِ، عٛدَرِ يٜىٰسٛ لَامِيطٛ؞ 29 لَامِيطٛ حُنِ، وِعِ: ڢَکَتْ بَنَ جَوْمِرَاوٛ عٛ غٜىٰتٛ، مٛ حِسْنِ يٛنغْکِ عَمْ عٜ ࢡِلَّارٜ ڢُو، 30 حَنْدٜ مبَطَنْمِ کٛ مِحُنِ يٜىٰسٛ مَ بٜى جَوْمِرَاوٛ، اَللَّه إِسْرَاءِيلَ: ࢡِيَ سُلَيْمَـٰنُ لَامٛتٛ ࢡَاوٛ عَمْ، کَنغْکٛ جٛوطٛتٛ دٛوْ لٜىٰسٛ لَامُ عَمْ حَا ݠٜلّٜلْ عَمْ! 31 بَتْ-سٜىٰبَ تُرِ، حِݠِّ يٜىٰسٛ مَاکٛ حَا لٜسْدِ يٜىٰسٛ لَامِيطٛ، وِعِ: جَوْمَمْ، لَامِيطٛ دَاوُدَ يٜىٰطَ حَا ڢٛرٛيْ! 32 ندٜنْ لَامِيطٛ دَاوُدَ وِعِ: عٜوْنَنٜىٰطَمْ شَدٛکْ لِمَنْجٛ عٜ اَلنَّبِي نَتَنْ عٜ بٜنَيَ ࢡِي يٛيَدَ؞ ࢡٜنَسْتِ، ࢡٜنغَرِ يٜىٰسٛ لَامِيطٛ؞ 33 لَامِيطٛ وِعِ ࢡٜ: کٛوعٜ سَرَاکِعٜنْ عَمْ، نجٜحٜ، مبَعِّنٜ ࢡِطّٛ عَمْ سُلَيْمَـٰنُ دٛوْ عَلْڢَدَرِيرٜ عَمْ، نجَحْرٜ مٛ حَا سٜىٰࢡٛورٜ غِحٛنْ؞ 34 تٛنْ شَدٛکْ لِمَنْجٛ عٜ اَلنَّبِي نَتَنْ مٛيْتَ مٛ حَا عٛلَاتٛ لَامِيطٛ إِسْرَاءِيلَ؞ ندٜنْ عٛنْ ݠُوڢَ لُوَلْ، عٛنْ مبِعَ: لَامِيطٛ سُلَيْمَـٰنُ يٜىٰطَ حَا ڢٛرٛيْ! 35 ندٜنْ تٛکّٜ مٛ، نغَرْتٜ حَا طٛ؞ عٛوَرَ، عٛجٛوطٛ دٛوْ لٜىٰسٛ لَامُ عَمْ؞ کَنغْکٛ عٛلَامٛتٛ حَا ݠٜلّٜلْ عَمْ، مِدَرْنِمٛ عٛ عَرْدِيطٛ إِسْرَاءِيلَ عٜ يَحُودَ؞ 36 بٜنَيَ ࢡِي يٛيَدَ جَابِ لَامِيطٛ: عَامِينَ! طُمْ جَوْمِرَاوٛ، اَللَّه مَاطَ وٛلْوِنْمَ طُمْ بَرْکَامَ؞ 37 بَنَ جَوْمِرَاوٛ وٛنْدُنٛ بٜى مَاطَ بَرْکَامَ، بَنَ نٛنْ عٛوٛنْدَتَ بٜى سُلَيْمَـٰنُ بٛو؞ عٛمَوْنِنَ لَامُ مَاکٛ کٛ ࢡُرِ نغُ مَاطَ؞ 38 شَدٛکْ لِمَنْجٛ عٜ اَلنَّبِي نَتَنْ عٜ بٜنَيَ ࢡِي يٛيَدَ عٜ کٜرٜتِعٜنْ عٜ ݠٜلٜتِعٜنْ نجٜحِ، ࢡٜمبَعِّنِ سُلَيْمَـٰنُ دٛوْ عَلْڢَدَرِيرٜ لَامِيطٛ دَاوُدَ، ࢡٜنجَحْرِمٛ حَا غِحٛنْ؞ 39 شَدٛکْ حٛوعِ لُوَلْ بٜى نٜبَّمْ حَا لَيْمَارُ ڢٛتِّرْدٜ، عٛمٛيْتِ سُلَيْمَـٰنُ بٜى مَاجَمْ؞ ࢡٜݠُوڢِ لُوَلْ، يِمْࢡٜ وٛنْࢡٜ تٛنْ ڢُو مبِعِ بٜى سَوْتُ: «لَامِيطٛ سُلَيْمَـٰنُ يٜىٰطَ حَا ڢٛرٛيْ!» 40 يِمْࢡٜ ڢُو تٛکِّمٛ وَرْتُغٛ عُرُسَلِيمَ، ࢡٜݠُوڢِ شِيدٜ، ࢡٜشٜيِ بٜى سٜيٛ مَنغٛ حَا لٜسْدِ ࢡَدَکٜ سٜىٰکُغٛ نغَمْ حٛولٛ مَࢡّٜ؞ 41 ندٜ عَدٛنِيَ عٜ عٜوْنَاࢡٜ وٛنْدُࢡٜ بٜى مَاکٛ تِمِّنِ ࢩَامُغٛ، ࢡٜنَنِ حٛولٛ، يٛعَبْ ڢَامِ طُمْ حٛولٛ لُوَلْ، عٛࢨَمِ: «نغَمْ طُمٜ حَرَکَ وَطِ حَا بٜرْنِوٛلْ نغٛعٛلْ؟» 42 دِغَ عٛطٛنْ وٛلْوَ تَوٛنْ، يٛنَتَنْ ࢡِي عَبِيَتَرْ لِمَنْجٛ وَرِ؞ عَدٛنِيَ وِعِ: وَرْ، عَنْ مَرْطٛ دَرَجَ، عَطٛنْ وَدَّنَ مِنْ کُبَرُوٛلْ بٛوطْنغٛلْ سِکٜ؞ 43 يٛنَتَنْ جَابِ عَدٛنِيَ: نَا نٛنْ سَمْ! جَاغٛرْطٛ مٜنْ لَامِيطٛ دَاوُدَ حٛکِّ سُلَيْمَـٰنُ لَامُ؞ 44 لَامِيطٛ نٜلْدِ شَدٛکْ لِمَنْجٛ عٜ اَلنَّبِي نَتَنْ عٜ بٜنَيَ ࢡِي يٛيَدَ عٜ کٜرٜتِعٜنْ عٜ ݠٜلٜتِعٜنْ بٜى مَاکٛ، ࢡٜمبَعِّنِمٛ دٛوْ عَلْڢَدَرِيرٜ لَامِيطٛ؞ 45 شَدٛکْ لِمَنْجٛ عٜ اَلنَّبِي نَتَنْ مٛيْتِمٛ حَا غِحٛنْ، مبَطِمٛ لَامِيطٛ؞ ندٜنْ ࢡٜلٛرِ بٜى سٜيٛ، بٜرْنِوٛلْ ڢُو طٛنْ وَطَ حٛولٛ سٜيٛ؞ کَنْجُمْ عُمِّنِ حٛولٛ نغٛ نَنْطٛنْ؞ 46 سُلَيْمَـٰنُ بٛو، طٛنْ جٛوطِ دٛوْ لٜىٰسٛ لَامُ؞ 47 سُکَاࢡٜ لَامِيطٛ بٛو نغَرِ وَطُغٛ بَرْکَ حَا جَاغٛرْطٛ مٜنْ، لَامِيطٛ دَاوُدَ؞ ࢡٜمبِعِ: اَللَّه مَاطَ ࢡُرْنَ عِنْدٜ سُلَيْمَـٰنُ دٛوْ عِنْدٜ مَاطَ، عٛمَوْنِنَ لَامُ مَاکٛ کٛ ࢡُرِ نغُ مَاطَ؞ لَامِيطٛ بٛو، سُجِدِ دٛوْ بٜعِّتّٜ مُوطُمْ، 48 ندٜنْ عٛوِعِ بٛو: «يٜتّٛورٜ لَاتَنٛ جَوْمِرَاوٛ، اَللَّه إِسْرَاءِيلَ دٛکُّطٛ يَمْ حَنْدٜ جٛوطِيطٛ دٛوْ لٜىٰسٛ لَامُ عَمْ، دِغَ مِ غٜىٰتٛ تَوٛنْ حَا غِتٜ عَمْ نغِعَ طُمْ؞» 49 عٜوْنَاࢡٜ عَدٛنِيَ ڢُو کُلْتٛرِ، طٛنْ ندِوْنَ؞ ࢡٜعُمِّ، کٛو مٛيْ مَࢡّٜ نَنغِ لَاوٛلْ مُمْ، دِلِّ؞ 50 عَدٛنِيَ بٛو حُلِ سُلَيْمَـٰنُ، عٛعُمِّ، عٛيٜحِ، عٛنَنغِ لُوٜ حِرْسِرْدٜ؞ 51 سُلَيْمَـٰنُ عَنْدِنَامَ: ندَا، عَدٛنِيَ طٛنْ حُلَ لَامِيطٛ سُلَيْمَـٰنُ؞ عٛنَنغِ لُوٜ حِرْسِرْدٜ، عٛوِعِ: لَامِيطٛ سُلَيْمَـٰنُ حُنَنَمِّ جٛنْتَ، عٛمبَرَتَا يَمْ بٜى کَاڢَحِ؞ 52 سُلَيْمَـٰنُ وِعِ: تٛ عٛوَنغِ عٛ غٛونغَاجٛ ندٜرْ يَحْدُ مَاکٛ، کٛو غَاسَاوٛلْ مَاکٛ سٛلَتَا سَمْ؞ عَمَّا تٛ حَلّٜىٰندٜ تَوَامَ حَا مَاکٛ، عٛمَايَنْ؞ 53 ندٜنْ لَامِيطٛ نٜلِ، ࢡٜنغَدِّمٛ دِغَ حِرْسِرْدٜ؞ عٛوَرِ، عٛتُرِ يٜىٰسٛ لَامِيطٛ سُلَيْمَـٰنُ، سُلَيْمَـٰنُ وِعِمٛ: «حٛوتُ؞» |
Fulfulde Bible Ajamiya © Bible Society of Cameroon, 2016.
Bible Society of Cameroon