1 يُحَنَّ 1 - دٜڢْتٜرٜ اَللَّه ڢُلْڢُلْدٜ عَدَمَوَ

وٛلْدٜ نغٜىٰندَمْ

¹ مِنْ طٛنْ مبِنْدَنَ عٛنْ دٛوْ وٛلْدٜ حٛکَّنْدٜ نغٜىٰندَمْ، وٛنّٛوندٜ دِغَ ڢُطَّمْ، کٛ مِنْ نَنِ، کٛ مِنْ نغِعِ بٜى غِتٜ عَمِنْ، کٛ مِنْ ندَارِ عٜ کٛ مِنْ مٜىٰمِ بٜى جُوطٜ عَمِنْ؞

² نغَمْ نغٜىٰندَمْ مَنْ وَنغِ، مِنْ نغِعِ طَمْ، مِنْ طٛنْ شٜىٰدٛ طَمْ، مِنْ طٛنْ عَنْدِنَ عٛنْ نغٜىٰندَمْ ندُومِيطَمْ نغٛنّٛوطَمْ کٛمْبِ بَابِرَاوٛ عٜ طَمْ وَنغَنِ مِنْ؞

³ کٛ مِنْ نغِعِ عٜ کٛ مِنْ نَنِ، کَنْجُمْ مِنْ عَنْدِنْتَ عٛنْ، عٛنٛنْ بٛو، نغَمْ حَا عٛنْ کَوْتَ بٜى عَمِنْ ندٜرْ کَوْتَلْ عَمِنْ بٜى بَابِرَاوٛ عٜ بٜى ࢡِطّٛ مُمْ عِيسَى اَلْمَسِيحُ؞

⁴ کَنْجُمْ مِنْ طٛنْ مبِنْدَنَ عٛنْ طُمْ نغَمْ حَا سٜيٛ مٜىٰطٜنْ حٜىٰوَ؞

اَللَّه عٛ أَلنّٛورَ

⁵ ندَا کُبَرُوٛلْ نغٛلْ مِنْ نَنِ حَا عِيسَى اَلْمَسِيحُ، کَنغٛلْ مِنْ عَنْدِنْتَ عٛنْ‏: اَللَّه عٛ أَلنّٛورَ، وَلَا ࢩِࢡْرٜ ندٜرْ مَاکٛ کٛو سٜطَّ؞

⁶ تٛ عٜنْ مبِعِ عٜنْ طٛنْ ندٜرْ کَوْتَلْ بٜى مَاکٛ، عَمَّا عٜنْ طٛنْ نغٜىٰطَ ندٜرْ ࢩِࢡْرٜ، ندٜنْ کَمْ عٜنْ ݠٜوِ، عٜنْ کُووَايْ بَنَ نٛ غٛونغَ يِطِ؞

⁷ عَمَّا تٛ عٜنْ طٛنْ نغٜىٰطَ ندٜرْ أَلنّٛورَ بَنَ اَللَّه بٜى حٛورٜ مُمْ طٛنْ ندٜرْ أَلنّٛورَ، ندٜنْ کَمْ عٜنْ نغٛودِ کَوْتَلْ شَکَ مٜىٰطٜنْ عٜ ࢨِيࢨَمْ عِيسَى، ࢡِطّٛ مَاکٛ بٛو لَࢡِّنَنْ عٜنْ دِغَ حَکّٜىٰجِ ڢُو؞

⁸ تٛ عٜنْ مبِعِ عٜنْ نغَلَا حَکّٜ، عٜنْ ݠٜوَنِ کٛعٜ مٜىٰطٜنْ، غٛونغَ وَلَا ندٜرْ مٜىٰطٜنْ؞

⁹ عَمَّا تٛ عٜنْ مبَنغِنِ حَکّٜىٰجِ مٜىٰطٜنْ يٜىٰسٛ اَللَّه، کَنغْکٛ عٛ کٛولَاطٛ، عَدِلِيجٛ، عٛيَاڢَنْتٛ عٜنْ حَکّٜىٰجِ مٜىٰطٜنْ، عٛلَࢡِّنَنْ عٜنْ دِغَ سٛويْندٜ عَدِلَاکُ مٜىٰطٜنْ ڢُو؞

¹⁰ تٛ عٜنْ مبِعِ عٜنْ مبَطَايْ حَکّٜ، عٜنْ ݠٜوْنِ اَللَّه، وٛلْدٜ مَاکٛ وَلَا ندٜرْ مٜىٰطٜنْ؞