Fəlimaŋw 1 - Ma Majawa Waya

¹ Leeter nesey e dek de vereyey, Pawl nda maɓəzla dapa daŋgay mafay te mezlər te Yesu Kəristi. Anda vində leeter ana nesey ava malamaŋ tandakwa Timawtey. Leeter nesey mavinda kad kaa, Fəlimaŋw, guula taciya masa anda waya elehey, nda majənandaw dapa mezlər ta Zlavay.

² Mavinda saya kad makəsparav hay makwasa da way takaa va kad dəmaŋ tandakwa Apiya va malamaŋ tandakwa Arkip, nda majənandakwa dapa cəv te Yesu ara nda majəna nda dapa vəram.

³ Da lada sə, Zlav Papaŋ tandakwa va Bay Mazlakava Yesu Kəristi ac da vakwar mapəsma va metehey.

⁴ Cəɗem cəɗem masa ya cə mbahw kad Zlavay sə, ya sənafa mezel takaa Fəlimaŋw. Ya ŋgana wasay mafay takaa,

⁵ afa ya ka cəna ka wal ndah ta Zlav fakwanay. Asaya, ya ka cəna ma da yaŋ makəsparav takaa da yaŋ Bay Mazlakava Yesu.

⁶ Dapa macə mbahw taaɗaw kad Zlavay sə, ya nəkafa a da jənandakwa ta macəna ma da yaŋ mapəsma tata fakwanay masa anda ta ŋgatakwa jaka vara Kəristi, mafay ta masa andakwa makəsparav hay metehwe ana macama ava aŋga.

⁷ Malama, mawal nda takaa nesey sə, ke weslədeyey, ke və gədaŋ macəkuma bay, afa ka ke vec gədaŋ mabay kad ndah ta Zlavay.

⁸ Ara nesey, kwa andakwa macama ava Kəristi, ya zlafa magwaɗakaa ma hay fakwanay da yaŋ jə masa ka ta ŋgiya.

⁹ Amaa ya tatəkakaa aabay, ya wal maŋguzdakaɗ manək jene taaɗaw ana sə, dapa mawal vaw. Yey Pawl, nda marndaw masa majawa dapa daŋgay, mafay ta mabəzad ma te Yesu Kəristi.

¹⁰ Ya kəɗakaa ha mafay ta Awnesim. Aŋga sə, ka tərata ara wat aɗaw fana dapa daŋgay.

¹¹ Zleezle sə, Awnesim ana ka jənakaa aabay, amaa təlam nesey, a ta jənakaa mabay ara masa aŋga te jəniyey fana.

¹² Təlam nesey sə, ya vahda kad varakaa saya, aŋga ŋgesey sə, leŋgesl aɗaw va mawal nda taaɗaw aca də amta ava tata.

¹³ Yey, nda masa majawa dapa daŋgay mafay ta mabəzad Labara mambəla ana. Ya wal sə, a lada da njah da cak taaɗaw cəɗem cəɗem dapa masa ya dapa daŋgay fana, afa e de jəniyey pa slam takaa.

¹⁴ Amaa ya wal mandəvda ma da yaŋ Awnesim ana pal ya amta bay, say ka ta kəs mawulak yaŋ aɗaw da yaŋ ana ɗagay. Ya wal matatəkakaa te meŋgə jene mambəla ana na bay, amaa ya wal sə, a lada ka ta wulakiya dapa leŋgesl takaa.

¹⁵ Awnesim ana ka gərdakaa dapa manah kusetke, afa gəla ava dəɓa ana, akwar ta njah ava aŋga katar ka midakw kwa.

¹⁶ Təlam nesey, kwa aŋga ɓel takaa, amaa aŋga ara ɓel babəla sabay, afa ka tərata ka malamaŋ tandakwa dapa Yesu Kəristi. Yey sə, ya waya mabay, amaa ya səniya, kaa sə, ka ta waya ke fəniyey saya. Ka ta waya ana sə, afa aŋga ɓel takaa bay, amaa afa aŋga malamakw dapa makəsparav.

¹⁷ Ara nesey, daha ka ke weleyey ara guula takaa eve metehwe ana dapa Yesu Kəristi sə, mbahw kəsaw ara ke te kəsiyey may.

¹⁸ Daha ka ŋgakaa jene e teh bay, gəla duwa takaa da vara vaw ɓa, ŋgesey, ma ana aŋga da yaŋ yey.

¹⁹ Aha, ya vindakaɗ ma ana nesey ava ha taaɗaw, yey Pawl, ya ta pəlakaɗ duwa takaa ana. Kaa may, duwa aɗaw varakaa ɓa. Mahwadaɗakaa pa makəsparav mafay ta maŋgat mesfen katar ka midakw nesey sə, yey ana sə, ka sənafa biba!

²⁰ Mbahw malama, ŋgawa mezlərey ana nesey mafay ta mawal nda ta Bay tandakwa Mazlakava Yesu. Taslawa rav aɗaw dapa macam vaw tandakwa ava Yesu Kəristi.

²¹ Dapa masa ya vində leeter ana sə, ya səniya eve metehwe ana, ka ta ŋgawa mezlərey ana ara masa ya ta waya. Asaya, ya səniya ka ta ŋgawa mezlərey ana a fəna masa ya ta nəkafakaa.

²² Ya nəkafakaa jene amta saya, ləmediyey way ta manahay da way takaa, afa ya wulakiya sə, Zlav a ta cəna macə mbahw takwar, e te vehdeyey kad varakwar saya.

²³ Epafəras masa andaw ava aŋga fana dapa daŋgay mafay te Yesu Kəristi, a gwaɗafakwar.

²⁴ Ara aŋga ana, ndah masa anda ŋgə mezlər ta Zlavay eve eceŋ fa slam ana, aca gwaɗafakwar may. Ara Markwas, Aristarkus, Demas va Lukas.

²⁵ A lada meteh ta Bay Mazlakava Yesu Kəristi da njah ava akwar.