Amos 1 - Chol: I T’an Dios

Dios mi caj i cha'len meloñel ti' tojlel colem tejclum tac

¹ Jiñʌch i t'an Amós cha'an Israel. Jini Amós xcʌnta tiñʌme' che' bajche' i pi'ʌlob ti Tecoa. An chuqui tsa' pʌsbenti ti espíritu che' woli ti yumʌntel Uzías ti Judá yic'ot Jeroboam i yalobil Joás ti Israel. Anto yom cha'p'ejl jab cha'an mi' tilel i yujquel lum.

² Tsa' caji' yʌl: Lac Yum mi' cha'len t'an ya' ti Sion che' bajche' i t'an bajlum. Mi' cha'len c'am bʌ t'an ti Jerusalén. Jini cha'an obol i bʌ jini potrero tac. Tsa' caji ti tiquin i pam wits i c'aba' Carmelo, che'en.

³ Lac Yum woli' yʌl: Cabʌlix i jontolil Damasco. Tsa' cʌlʌx ñumi i p'isol i jontolil. Mach chʌn cujchix c cha'an. Come tsi' tsʌnsayob jini año' bʌ ti Galaad. Tsi' bajbeyob ti tsucul taq'uin mu' bʌ i c'ʌñob i jats' loq'uel i bʌc' jam.

⁴ Jini cha'an mi caj c pulben i yotot Hazael jini rey ya' ti Damasco. Mi caj c laj pulben jini wen melbil tac bʌ i yotot jini rey Benadad.

⁵ Mi caj c jemben i ts'ajquil Damasco. Mi caj c laj tsʌnsan jini chumulo' bʌ ti joctʌl i c'aba' Avén. Mi caj c tsʌnsan jini yumʌlob ti Bet edén. Jini año' bʌ ti Siria cʌchʌlob mi caj i pʌjyelob majlel ti Kir, che'en lac Yum.

⁶ Lac Yum woli' yʌl: Cabʌlix i jontolil Gaza. Tsa' cʌlʌx ñumi i p'isol i jontolil. Mach chʌn cujchix c cha'an, come tsi' wersa pʌyʌyob majlel winicob x'ixicob cha'an mi' choñob ti majtan e'tel ti Edom.

⁷ Jini cha'an mi caj c choc tilel c'ajc ti' ts'ajquil Gaza. Mi caj c laj pulben jini wen melbil tac bʌ i yotot.

⁸ Mi caj c laj tsʌnsan jini chumulo' bʌ ti Asdod, yic'ot jini yumʌlob ti Ascalón. Mi caj j contrajin jini año' bʌ ti Ecrón c'ʌlʌl mi' laj jilelob jini filisteojob mu' bʌ i cʌytʌlob, che'en lac Yum Dios.

⁹ Lac Yum woli' yʌl: Cabʌlix i jontolil Tiro. Tsa' cʌlʌx ñumi i p'isol i jontolil. Mach chʌn cujchix c cha'an, come tsi' choñoyob cabʌl winicob x'ixicob ti majtan e'tel ya' ti Edom. Che' jini tsi' jemeyob i trato yic'ot israelob.

¹⁰ Jini cha'an mi caj c choc tilel c'ajc ti' ts'ajquil Tiro. Mi caj c laj pulben jini wen melbil tac bʌ i yotot, che'en.

¹¹ Lac Yum woli' yʌl: Cabʌlix i jontolil Edom. Tsa' cʌlʌx ñumi i p'isol i jontolil. Mach chʌn cujchix c cha'an, come tsi' yajñesayob i pi'ʌlob ti espada. Ma'anic tsi' p'untayob i pi'ʌlob. Tsi' lotoyob i mich'ajel ti' pusic'al. Ma'anic tsa' lajmi i mich'ajel.

¹² Jini cha'an mi caj c choc tilel c'ajc ti Temán. Mi caj c laj pulben jini wen melbil tac bʌ i yotot ya' ti Bosra, che'en.

¹³ Lac Yum woli' yʌl: Cabʌlix i jontolil Amón. Tsa' cʌlʌx ñumi i p'isol i jontolil. Mach chʌn cujchix c cha'an, come tsi' p'o'oyob x'ixicob cʌntʌbil bʌ i cha'añob alʌl cha'an mi' ñuq'uesañob i lum ya' ti Galaad.

¹⁴ Jini cha'an mi caj c choc tilel c'ajc ti' ts'ajquil Rabá. Mi caj c laj pulben jini wen melbil tac bʌ i yotot. Cabʌl winicob mi' cajelob ti oñel ti guerra. Mi caj i yubiñob wen p'ʌtʌl bʌ ic'.

¹⁵ Cʌchbil mi caj i pʌjyel majlel i rey ti yambʌ lum, yic'ot año' bʌ i ye'tel, che'en lac Yum.