Mateo 6 - Porciones del Nuevo Testamento

Zuburia bꞌʉta nebari diaidꞌebema

¹ Kĩrãkuitaudua, marãba biata obʉdara zhãrã kĩrãbita orãũdua bari zhãrãba ũdudꞌamarẽã. Bari maʉ̃ kꞌarea odꞌaibʉrʉ kꞌãrẽ dia ẽã marã Zeze ʉ̃tre bꞌʉbara.

² Maʉ̃ba zuburia bꞌeta bʉa nebari diabʉrʉra jõmaʉ̃ã jarakꞌarãrũã, sewa bibaʉta bꞌeba obꞌe kĩrãkꞌa orãrũã, de zhi jʉrebadata nʉme maẽ, pʉwʉrʉdꞌe odꞌe zhãrã berabꞌari nʉme maẽ maʉ̃ kꞌaudꞌa bꞌea zhãrãba bia jaradꞌamarẽã. Mʉã wãrĩnu marãã jaraya, maʉ̃ kꞌareara Daizezebara kꞌãrẽ dia ẽã.

³ Mawũãmina zuburia bꞌeta bʉa nebari diabʉrʉra miõã kꞌawuabirãrũã.

⁴ Zuburia bꞌeta bʉa nebari diabʉrʉra chupea diadua. Mawũãrã bʉ Zezebara bʉ chupea maʉ̃ kꞌaudꞌa bꞌʉta akʉ bꞌʉra maʉ̃bari kꞌãrẽ diaya jõmaʉ̃ daidꞌu.

Jesúsba jaradiadꞌa zhiwidꞌiita

⁵ Bʉ zhiwidꞌibʉrʉdꞌera sewa bibaʉta bꞌe kĩrãkꞌa bꞌarãrũã. Ãzhira ʉ̃ta zhiwidꞌi krĩñadea, de zhi jʉrebadata nʉme maẽ, pʉwʉrʉdꞌe odꞌe zhãrã berabꞌari nʉme maẽ maʉ̃ kꞌaudꞌa bꞌea bari zhãrãba ũdudꞌamarẽã. Mʉã wãrĩnu marãã jaraya, maʉ̃ kꞌareara Daizezebara kꞌãrẽ dia ẽã.

⁶ Mawũãmina bʉ zhiwidꞌibʉrʉdꞌera miõ ne ẽã maẽ wãpe zhiwidꞌidua bʉ Zezea, izhira chupea bʉ ũme nʉmʉã. Mawũãrã bʉ Zezebara bʉ chupea maʉ̃ kꞌaudꞌa bꞌʉta akʉ bꞌʉra maʉ̃bari kꞌãrẽ diaya jõmaʉ̃ daidꞌu.

⁷ Bʉ zhiwidꞌi nʉmʉnerã abꞌaʉ bedꞌeata jarama bio jararãrũã, Daizezedꞌebemata kꞌawuadꞌa ẽkĩrãkꞌa bꞌarãrũã. Krĩcha bꞌea abꞌaʉ bedꞌeata jarama bio jaratrʉ Daizezebara ũrĩ bꞌʉta.

⁸ Marãbara orãũdua ãzhidꞌe kĩrãkꞌara, marã Zezebara kꞌawua bꞌʉ baera marãba kꞌãrẽ nesidꞌa bꞌera, marãba kꞌãrẽ widꞌidꞌai nawedꞌa.

⁹ Marã zhiwidꞌibʉdadꞌera mawũãũdua: Bʉra Daizezeta ʉ̃tre bꞌʉa, bʉra wawiadꞌaidꞌe bꞌʉa.

¹⁰ Dai Nokꞌota nʉmadua. Bʉa krĩñata odꞌaidꞌe bꞌʉa ʉ̃tre obꞌe kĩrãkꞌa, mawũã odꞌaidꞌe bꞌʉa druadꞌebidꞌa.

¹¹ Zhiko ewarizabema daia diadua idꞌira.

¹² Daiba bia ẽãta odꞌadꞌebara daira bedꞌea ne ẽã duanebirua, daiba bedꞌea ne ẽãne edabada kĩrãkꞌa dai bĩ ẽã obʉdata.

¹³ Daita idu wãẽãbirãrũã, awuarabʉrʉ daira kꞌarebarua ãtõmiã bia ẽãnebara. Reyta nʉmaĩrã bʉrea, zareara bʉrea, zhi zromata nʉmaĩrã bʉrea ewari nʉmʉ jõma. Amén.

¹⁴ Marã bĩ ẽã obʉdata marãba bedꞌea ne ẽãne edadꞌara, marãba bia ẽãta odꞌadꞌebara marãsidꞌa bedꞌea ne ẽã bꞌʉkuaya marã Zeze ʉ̃trebemabara.

¹⁵ Mawũãmina marã bĩ ẽã obʉdata marãba bedꞌea ne ẽãne edadꞌa ẽbʉrʉ, marã Zezebidꞌa bedꞌea ne ẽã bꞌʉkua ẽã marãba bia ẽãta odꞌadꞌebara.

Nekꞌo ẽã zhiwidꞌibaridꞌebema

¹⁶ Marã nekꞌo ẽã zhiwidꞌi bꞌedꞌera kĩrã sopua duanarãũdua, sewa bibaʉta bꞌe kĩrãkꞌa duanarãũdua. Nekꞌo ẽã zhiwidꞌi bꞌeta zhãrãba kꞌawuadꞌamarẽã kĩrã sopua duaĩnabaria. Mʉã wãrĩnu marãã jaraya, mawũã bꞌebarira Daizezebara kꞌãrẽ dia ẽã.

¹⁷ Mawũãmina bʉta nekꞌo ẽã zhiwidꞌi bꞌʉdꞌera buru erudua, kĩrã sʉgʉdua.

¹⁸ Mawũãrã zhãrã bꞌea kꞌawuabi ẽbaya bʉ nekꞌo ẽã zhiwidꞌi bꞌʉra, awuarabʉrʉ bʉ Zezea kꞌawua nʉmabiya, izhira chupea bʉ ũme nʉmʉã. Bʉ Zezeba bʉ chupea maʉ̃ kꞌaudꞌa bꞌʉta akʉ bꞌʉra maʉ̃bari kꞌãrẽ diaya jõmaʉ̃ daidꞌu.

Ne biata ʉ̃tre tʉdꞌaidꞌebema

¹⁹ Ne biata tʉrãũdua naʉ̃ druadꞌe, namarã zhi muĩba ãrĩbaria, ne uyezoa jõ bꞌʉa, namarã nezrʉgamiãrãta edꞌa wãpe zrʉgabada.

²⁰ Maʉ̃ba awuarabʉrʉ Daizezeba krĩñata obʉdaba ne biara ʉ̃tre tʉudua, maĩnurã zhi muĩba ãrĩ ẽã, miã ne uyezoa jõ ẽã, maĩnurã nezrʉgamiãrã edꞌa wãpe zrʉgadꞌa ẽã.

²¹ Mawũã ne biata marãneta bꞌʉ maẽ nʉmaña marã sora.

Ĩbĩrã kꞌakuadꞌebema

²² Ĩbĩrã kꞌakuadꞌebema dabʉa. Mawũẽ bʉ dabʉta bigabʉrʉ bʉ kꞌakuara jõma ʉ̃na bꞌaya.

²³ Mawũãmina bʉ dabʉta biga ẽbʉrʉ bʉ kꞌakuara jõma pãrĩguadꞌe bꞌaya. Aramaʉ̃ kĩrãkꞌa bʉa obꞌʉta bʉma bigata bia ẽbʉrʉ, ¿bʉra jipadꞌe pãrĩguadꞌe nʉmʉ ẽka?

Daizezeta platata sãwũãnebema

²⁴ Miõba zhãrã ũme aribꞌae nʉma bꞌe ẽã. Manebʉrʉ abꞌa jurape abꞌa kʉãgꞌaya, o abꞌa zhi zromane edape abꞌa zhi zroma ẽãne edaya. Aramaʉ̃ kĩrãkꞌa Daizezedꞌebema aribꞌae ẽã platadꞌebemata aribꞌae nʉmʉbara.

Sopua nʉma ẽbaidꞌebema

²⁵ Maʉ̃neba mʉã marãã jaraya: Sopuarãũdua mazhi bꞌaidꞌebema kꞌarea, kꞌãrẽta kꞌoidꞌe o kꞌãrẽta doidꞌe, miã mazhi kꞌakuaita kꞌãrẽta jʉ̃ĩne sopuarãũdua. ¿Dazhi bꞌʉra audre vale bꞌʉ ẽka zhiko kꞌãñabara, kꞌakuara audre vale bꞌʉ ẽka wua kꞌãñabara?

²⁶ Ibana ewaradꞌe wũãbꞌari bꞌeta akaudua, ne udꞌa ẽã, miã ne ewadꞌa ẽã, miã ne wuagꞌabari maẽ ne kuadꞌa ẽã. Maʉ̃ta marã Zeze ʉ̃trebemabara ne dedꞌeka bꞌʉa. ¿Marã audre vale duanu ẽka ibana bꞌe kꞌãñabara?

²⁷ ¿Marãnebemabara kꞌaiba izhi bio sopua nʉmʉba izhira ewari wueta bꞌabi bꞌeipe?

²⁸ ¿Wua kꞌarea kꞌãrẽã sopua bꞌe? Krĩchaudua nepono meã nʉmeta sãwũã wari bꞌeta. Trajadꞌa ẽã, miã wua kꞌasudꞌa ẽã.

²⁹ Mʉã marãã jaraya, rey Salomón kĩrãwãrẽã zho bꞌasimina kĩrãwãrẽã zho bꞌa ẽbasia nepono abꞌaʉdꞌebema kĩrãkꞌabidꞌa.

³⁰ Chirua idꞌi meã takeradꞌata nunebai tebʉdꞌe babuebadata Daizezeba mawũã zhobi bꞌʉra, ¿marã audre zhobigai ẽka, awuarabʉrʉ soidꞌu bꞌeaita wãẽã duanu ẽka?

³¹ Mawũẽ sopua mawũãrãũdua: ¿Kꞌãrẽta kꞌodꞌaipe, kꞌãrẽta dodꞌaipe, kꞌãrẽta jʉ̃naĩpe?

³² Daizezedꞌebema kꞌawua ẽã bꞌera maʉ̃ jõmaʉ̃ kꞌarea sopua bꞌea. Mawũãmina marã Zeze ʉ̃trebemabara kꞌawua bꞌʉa marãbara maʉ̃ jõma nesidꞌa bꞌeta.

³³ Maʉ̃ba naara jʉrʉdua Daizezeta Nokꞌodꞌebemata, aramaʉ̃ne izha jara bꞌʉta odua, mobedꞌeba izhara maʉ̃ jõma diaya.

³⁴ Mawũẽ ewari nubema kꞌarea sopuarãũdua, ewari nubemabara sopua nʉmaĩrã we bꞌʉa. Ewariza nʉmʉã bĩ ẽã sopua nʉmaĩrã.