Mateo 4 - Porciones del Nuevo Testamento

Ãtõmiãba wãẽãbiya nʉmana Jesús

¹ Jesús mobebʉrʉ Jawurebia Daizezedꞌeba drua drudrua tabꞌʉidꞌu edesia ãtõmiãba wãẽãbiya nʉmaĩma.

² Nekꞌo ẽã zhiwidꞌi bꞌʉta ewarita cuarenta diamaseta cuarenta babʉrʉdꞌe jarrasia.

³ Maʉ̃ne wãẽãbii kꞌarea ãtõmiã izhima zepe mawũãsia: Bʉta Daizeze Warrabʉrʉ mongꞌara za tabꞌea jaradua pan bakuamarẽã.

⁴ Mawũãĩ Jesúsbara panaʉ̃ mawũãsia: Maʉ̃ẽnabemata zhi bꞌʉmata mawũã bꞌʉa: Zhãrã bari zhikoba bꞌa ẽã, awuarabʉrʉ Daizezeba jara bꞌʉta jõma aribꞌae bꞌʉba bꞌaya. (Deuteronomio 8:3)

⁵ Mobebʉrʉ ãtõmiãbara edesia Jerusalén pʉwʉrʉedꞌa, mobe Daizeze deta audre ʉ̃tʉ nʉmʉĩnu edepe,

⁶ mawũãsia: Bʉta Daizeze Warrabʉrʉ edꞌaa pinandrʉrua. Maʉ̃ẽnabemata zhi bꞌʉmata mawũã bꞌʉa: Daizezebara izhi ángelerãta bʉma zokꞌakuaya, bʉra ãzhi juwuadꞌe edadꞌaya bʉ jẽrũta puo ẽbamarẽã mongꞌaraba. (Salmos 91:11-12)

⁷ Mawũãĩ Jesúsbara mawũãsia: Maʉ̃ẽnabemasidꞌa zhi bꞌʉmata mawũã bꞌʉa: Kꞌãrẽ orãrũã kꞌarebai kꞌawuaita bʉ Nokꞌo Daizezeba. (Deuteronomio 6:16)

⁸ Mobebʉrʉ ãtõmiãbara edesia kꞌatuma ʉ̃tʉ nʉmʉĩnu, mobe jõma ũdubisia ẽjũãne drua nʉmʉta ne kĩrãwãrẽã edꞌa nʉmʉta.

⁹ Mobe mawũãsia: Mʉã naʉ̃ jõma bʉaa diaya sãkꞌokꞌodꞌe kꞌobꞌepe mʉta ibia jarara.

¹⁰ Mawũãĩ Jesúsbara mawũãsia: Ãtõmiã wãrũã, maʉ̃ẽnabemata zhi bꞌʉmata mawũã bꞌʉa: Bʉ Nokꞌo Daizezetrʉ ibia jaradua, izhi bedꞌeatrʉ aribꞌaedua. (Deuteronomio 6:13)

¹¹ Mobebʉrʉ ãtõmiãbara Jesús ãmaẽsia. Maʉ̃ne ángelerãta ʉ̃kʉrʉ zepe izhira aribꞌaesidꞌa.

Jesús miã ũrãgꞌa jʉ̃drʉdꞌa

¹² Juan cárceldꞌe nʉmʉta Jesúsba ũrĩbʉrʉdꞌera jẽrũya wãsia Galilea druaedꞌa.

¹³ Nazaret pʉwʉrʉra idaribipe wãpe bꞌesia Capernaúm pʉwʉrʉdꞌe, maʉ̃ pʉwʉrʉra do jedꞌea õbꞌʉ kꞌaita tabꞌʉa, Zabulónneba uruta bꞌeadꞌa druadꞌe, Neftalídꞌeba uruta bꞌeadꞌa druadꞌe tabꞌʉa.

¹⁴ Mawũẽ arimaẽ berabꞌarisia Daizezeba bedꞌeata jarabibariba Isaíaba mawũãnata:

¹⁵ Marã Zabulón druadꞌe, Neftalí druadꞌe bꞌera, do jedꞌea õbꞌʉ doya odꞌe bꞌera, Jordán do kĩrãrẽ bꞌera, Galilea druadꞌe judíorã ẽãta bꞌera,

¹⁶ marã pãrĩguadꞌe bꞌeta Daizezedꞌebema kꞌawuabʉdaba ũdudꞌaya ʉ̃na zromata. Mawũẽ aduaita beuita bꞌeadꞌaitara ʉ̃nata uruzhaya. (Isaías 9:1-2)

¹⁷ Maʉ̃ ewaridꞌeba Jesús miã ũrãgꞌa jʉ̃drʉbʉrʉta mawũãsia: Kꞌazhiruara ãmape Daizezeta pẽwãũdua, Daizezeta Nokꞌodꞌebema kꞌaita basia.

Jesúsba kĩmarẽ jʉrʉkuadꞌa bꞌeda beamiãrãta

¹⁸ Galileadꞌebemata do jedꞌea õbꞌʉ doya Jesús taidꞌe, ũme mebẽrãta panʉta ũdusia, abꞌa Simónta Pedro basia, zhi mebea Andrés basia. Do jedꞌea õbꞌʉ maẽ atarrayata bꞌari panasia bꞌeda beamiãta panasi baera.

¹⁹ Maʉ̃ne Jesúsbara mawũãsia: Mʉ kꞌaidꞌu panadua, mʉnebemata ĩjãnamarẽã mʉã marã zhãrã ũrãgꞌabarita panabiya.

²⁰ Mawũãĩ ãzhara audre ẽãne atarraya kenabꞌaridꞌape kꞌaidꞌu jʉ̃drʉsidꞌa.

²¹ Mamaʉ̃ba Jesús wãbʉrʉdꞌera dewara awʉrʉrãta ũme mebẽrãta panʉta ũdusia, Jacobota zhi mebea Juanta ũdusia, Zebedeo warrarãta ãzhi zeze Zebedeo bawara jãbadꞌe bꞌeta, ãzhi atarrayata tʉdꞌʉzoadꞌata araa jʉ̃kua duanasia, Jesúsbara maʉ̃ne jʉrʉkuasia.

²² Mawũẽ ãzhara audre ẽãne jãbata ãzhi zezeta ãmaẽbʉdata kꞌaidꞌu jʉ̃drʉsidꞌa.

Jesúsba ũrãgꞌadꞌa kꞌabanata

²³ Aramaʉ̃ne Galilea drua jõma Jesús pʉrrʉa wãbʉrʉta de zhi jʉrebadata nʉme maẽ miã ũrãgꞌa wãsia, bedꞌea biata jarakꞌa wãsia Daizezeta Nokꞌodꞌebemata. Kꞌaya bꞌeta, pua bꞌeta jõma bꞌebi wãsia pʉwʉrʉ tabꞌe maẽ.

²⁴ Aramaʉ̃ne izhira Siria drua jõma trʉ̃poabʉrʉba jõma wesidꞌa pua bꞌeta, nekĩrãtõnoãba kꞌaya zuburia bꞌeta, kĩrãnema bꞌeta, jai abꞌeta, kꞌakua pira ẽã kꞌaya bꞌeta webʉdata bꞌebikuasia.

²⁵ Zhãrã bio Jesús kꞌaidꞌu nʉmasia Galilea druadꞌebemata, Decápoli pʉwʉrʉdꞌebemata, Jerusalén pʉwʉrʉdꞌebemata, Judea druadꞌebemata, Jordán dodꞌe kĩrãrẽbemarãta.