Mateo 3 - Porciones del Nuevo Testamento

Juan Burukꞌoemiã miã ũrãgꞌadꞌa

¹ Jari ewadera Juan Burukꞌoemiã zepe Judea druadꞌe drua drudrua tabꞌʉ maẽ miã ũrãgꞌabʉrʉta,

² mawũãsia: Kꞌazhiruara ãmape Daizezeta pẽwãũdua, Daizezeta Nokꞌodꞌebema kꞌaita basia.

³ Juan mawũã bedꞌeaita jaradꞌata Daizezeba bedꞌeata jarabibariba Isaíaba mawũãsia: Iabꞌa nemi jĩgua bedꞌeabʉrʉta drua drudrua tabꞌʉ maẽ mawũãña: Bia ẽãrã ãmabʉdaba araa obʉdakꞌaudua Nokꞌo zei ota, jipa obʉdakꞌaudua izhi zei ota. (Isaías 40:3)

⁴ Juanbara jʉ̃ bꞌasia camello kꞌara omata, ne e omaba kʉrrʉ tãjʉ̃ bꞌasia, kꞌo bꞌasia adꞌichichita, do bꞌasia urrajõta.

⁵ Izhima ze nʉmasia Jerusalénne bꞌeta, Judea druadꞌe bꞌeta, Jordán do kꞌaita bꞌeta.

⁶ Jordán dodꞌe Juanʉã zhi buru kꞌoebisidꞌa ãzhi kꞌazhiruata jara.

⁷ Fariseorãta saduceorãta izha bio ũdubʉrʉta izha buru kꞌoemarẽã zebʉdadꞌera ʉ̃kʉrʉa mawũãsia: Marã bia ẽãta bꞌeba dãmata neãrã bara bꞌe kĩrãkꞌa bꞌea. ¿Mawũã bꞌeta kꞌaiba ẽdrʉdꞌaya asi Daizezeba kĩrũbiba pua kꞌawua okuaita ʉ̃rʉ̃ badꞌebara?

⁸ Mawũẽ dajada kꞌazhiruara ãmape bꞌeta Daizezeta pẽwã bꞌeaudua.

⁹ Mazhi sobitabaiba Daizezebara pua kꞌawua o ẽãta krĩchabʉdata Abrahamta mazhi zezeta erubꞌea arãũdua. Mʉã marãã jaraya, Daizezebara Abraham warrarã babi bꞌeya mongꞌara za tabꞌesidꞌa.

¹⁰ Daizezedꞌera zagꞌara ya zhi aribꞌaema bakuru kꞌarradꞌe tukuaita. Mawũẽ bakuru bia zaudꞌa ẽãrã tukuape pepekuaya tebʉdꞌe. (Aramaʉ̃ kĩrãkꞌa Daizezebara pua kꞌawua oya kꞌazhiruata obadara.)

¹¹ Mʉãrã wãrãnebai marã baniãba buru kꞌoe bꞌʉa kꞌazhiruara ãmape Daizeze pẽwãnamarẽã. Mawũãmina iabꞌa mʉ tẽã urua, maʉ̃ba jẽrũne jʉ̃ bꞌʉra mʉãrã izhima edeidꞌe bꞌʉ ẽã, izhira audre zhi zroma mʉ kꞌãñabara. Marã izhara Jawurebiata diaya, mawũãmina izhidꞌebemata ĩjãna ẽbʉrʉ pua kꞌawua okuaya tebʉba.

¹² Trigo ezoabarira izhi juwuadꞌe erubꞌʉa, trigora ezoape zhi tara zhi wuagꞌabari maẽ wuagꞌaya, mawũãmina zhi kꞌãbʉra baya tebʉ kikꞌata nʉmʉne. (Aramaʉ̃ kĩrãkꞌa izhidꞌebemata ĩjã bꞌera izhi maẽ bꞌʉkuaya, mawũãmina zhi ĩjãna ẽãrã pua kꞌawua okuaya.)

Jesús buru kꞌoedꞌa

¹³ Jesús Galileadꞌeba Juanma Jordán doidꞌu zesia Juanba buru kꞌoemarẽã.

¹⁴ Mawũãmina Juanbara buru kꞌoe ẽbaita mawũãsia: Bʉa mʉta buru kꞌoemarẽã bꞌʉdꞌera, ¿bʉra mʉmaãbʉrʉ ibꞌarika?

¹⁵ Mawũãĩ Jesúsbara panaʉ̃ mawũãsia: Mʉrã buru kꞌoedua, dazhara aramaʉ̃ne Daizezeba krĩñata aribꞌaedꞌaya. Mawũãĩ buru kꞌoesia.

¹⁶ Jesús buru kꞌoepe doedꞌauba drua wãta taidꞌe, bãjã ewa dogꞌoba Jawurebia Daizezedꞌeta ũdusia pusirã kĩrãkꞌa izhi ʉ̃rʉ̃ uruta.

¹⁷ Maʉ̃ne Daizezeta bãjãneba bedꞌeabʉrʉta mawũãsia: Naʉ̃ mʉ Warra mʉãrã kʉãgꞌa, mʉrã izhi kꞌarea sobia bꞌʉa.