Mateo 2 - Porciones del Nuevo Testamento

Chĩdaudꞌeba ne arimaẽ jarabadata zedꞌapeadꞌa

¹ Judea druadꞌe Belén pʉwʉrʉdꞌe Jesús tosidꞌera, maʉ̃ druadꞌera Herodeta reyta bꞌasia, maʉ̃ne ʉ̃madau ʉ̃tʉ zebariareba Jerusalén pʉwʉrʉedꞌa zesidꞌa chĩdaudꞌeba ne arimaẽ jarabadata.

² Mobe widꞌi mawũãsidꞌa: ¿Sãma bꞌʉ Rey judíorãne todꞌara? Chĩdau izhidꞌebemata ʉ̃madau ʉ̃tʉ zebariare ũdubʉdaba daira zebʉda ibia jaradꞌaita.

³ Maʉ̃ta ũrĩpe rey Herodera bĩ ẽãsia Jerusalénne bꞌe bawara.

⁴ Mawũẽ Herodebara jõma trʉ̃bigasia sacerdoterã nokꞌorãta, ũrãgꞌa Moisédꞌe jarabada bawara, mobe widꞌisia sãma toi basita Daizezeba Rey zokꞌaita jaradꞌara.

⁵ Mawũẽ ãzhara mawũãsidꞌa: Belén pʉwʉrʉdꞌe toya Judea druadꞌe. Maʉ̃ẽnabemata zhi bꞌʉmata Daizezeba bedꞌeata jarabibariba mawũãsia:

⁶ Belén, bʉra Judá druadꞌebema, Judá druadꞌe pʉwʉrʉ wagꞌauta tabꞌe kꞌãñabara bʉra wĩka bꞌʉ ẽã. Nʉmape bʉdꞌeba Nokꞌota ʉ̃tʉ zeya, maʉ̃bara erunʉmaña mʉrẽrã Israel bꞌeta. (Miqueas 5:2)

⁷ Mobebʉrʉ Herodebara chũwẽã trʉ̃kuasia chĩdaudꞌeba ne arimaẽ jarabadata, Jesús todꞌa ewarira maʉ̃rãneba bia kꞌawuasia chĩdau ʉ̃tʉ zedꞌa ewaridꞌeba.

⁸ Mobe Belén pʉwʉrʉedꞌa zokꞌakuabʉrʉta mawũãsia: Belén pʉwʉrʉidꞌu wãnape bia widꞌiudua wũãwũãnebemata. Ũdubʉdadꞌera mʉãã kꞌawuabiudua mʉsidꞌa wãpe ibia jaraita.

⁹ Ãzhara rey bedꞌea ũrĩnape wãsidꞌa. Maʉ̃ne ʉ̃madau ʉ̃tʉ zebariare chĩdau ũdudꞌapeadꞌara ãzhi na wãsia, jũẽbʉrʉdꞌera ʉ̃rʉ̃ jirabꞌesia wũãwũã bꞌarizhiru maẽ.

¹⁰ Chĩdauta mawũã ũdudꞌai kꞌãbãẽã sobiasidꞌa.

¹¹ Deidꞌu wãbʉdadꞌera wũãwũã zhi papa María ũme ũdusidꞌa, mawũẽ sãkꞌokꞌodꞌe bꞌadape ibia jarasidꞌa. Mobe ne biata ewadꞌape wũãwũãã diasidꞌa orota, incienso kerata, mirra kerata.

¹² Maʉ̃ tẽã Daizezeba kꞌãĩmokꞌaradꞌe jarasia wakusa wãna ẽbamarẽã rey Herodema, mawũẽ ãzhi druaedꞌa jẽrũya jʉ̃drʉsidꞌa o awʉrʉdꞌe.

Egipto druaedꞌa merũnapeadꞌa

¹³ Chĩdaudꞌeba ne arimaẽ jarabadata wãnapeadꞌa tẽãne, ángel Daizezedꞌeta kꞌãĩmokꞌaradꞌe Joséa zhi ũdubipe mawũãsia: Piradrʉrua, wũãwũã zhi papa ũme edebʉrʉta Egipto druaedꞌa merũ wãrũã, mobe mʉã jarayeedꞌa maĩnu bꞌadua. Kꞌawuarua, Herodebara wũãwũã beaita jʉrʉya.

¹⁴ Aramaʉ̃ne José ʉ̃rʉ̃mape diamase wũãwũã zhi papa ũme edebʉrʉta wãsia Egipto druaedꞌa.

¹⁵ Maĩnu bꞌʉdꞌe Herode beusia. Mawũẽ Daizezeba jaradꞌata arimaẽ berabꞌarisia izha bedꞌeata jarabibaridꞌeba mawũãnata: Mʉãrã mʉ Warra trʉ̃sia Egiptodꞌeba zemarẽã. (Oseas 11:1)

Warra zakerã beakuadꞌapeadꞌa

¹⁶ Chĩdaudꞌeba ne arimaẽ jarabadaba izhi sewabʉdata kꞌawuape Herodera kꞌãbãẽã kĩrũsia, mawũẽ warra zakerã año ũmeneba edꞌaa bꞌeta Belénne kedꞌeta, Belén kꞌaita kedꞌeta jõma beakuadꞌamarẽã jarasia. Izhima maʉ̃ añota arimaẽ basia Jesús todꞌa ewarita kꞌawuadꞌadꞌebara chĩdaudꞌeba ne arimaẽ jarabadadꞌeba.

¹⁷ Mawũẽ arimaẽ berabꞌarisia ãzhi papa jẽgadꞌaidꞌebemata Daizezeba bedꞌeata jarabibariba Jeremiaba mawũãnata:

¹⁸ Ramá pʉwʉrʉdꞌe nemita ũrĩbʉdata kꞌãbãẽã bꞌia jẽgadꞌaya, ʉ̃ĩ-ʉ̃ĩã jẽgadꞌaya. Raquelta jẽgaya zhi warrarã kꞌarea, zhi kĩrãtũmabi ẽbaya beukuasi baera. (Jeremías 31:15)

Jẽrũya zedꞌapeadꞌa Egiptodꞌeba

¹⁹ Herode beubʉrʉdꞌera ángel Daizezedꞌeta Egiptodꞌe Joséa kꞌãĩmokꞌaradꞌe zhi ũdubipe,

²⁰ mawũãsia: Piradrʉrua, wũãwũã zhi papa ũme edebʉrʉta Israel druaedꞌa wãrũã, ya beukuasia wũãwũã beaita bꞌeadꞌara.

²¹ Mobebʉrʉ José piradrʉpe wũãwũã zhi papa ũme edebʉrʉta wãsia Israel druaedꞌa.

²² Mawũãmina Arquelao Judeadꞌe reyta bꞌʉta, zhi zeze Herode bꞌadꞌabari bꞌʉta ũrĩpe maĩnu wãĩrã perasia. Maʉ̃ne Daizezeba kꞌãĩmokꞌaradꞌe jarape wãsia Galilea druaedꞌa.

²³ Mawũã wãpe pʉwʉrʉ Nazaret abada maẽ bꞌesia, mawũẽ arimaẽ berabꞌarisia Jesúsdꞌebemata Daizezeba bedꞌeata jarabibarirãba mawũãnapeadꞌata: Izhira Nazaredꞌebema adꞌaya.