Mateo 18 - Porciones del Nuevo Testamento

¿Kꞌaita audre zhi zromape?

¹ Jari ewadera izha jʉrʉkuadꞌabara Jesús orradꞌape mawũãsidꞌa: ¿Kꞌaita audre zhi zromape Daizezeta Nokꞌodꞌebemanerã?

² Mawũãnaĩ Jesúsbara wũãwũãta trʉ̃pe ãzhi ẽsadra kꞌobꞌʉpe,

³ mawũãsia: Mʉã wãrĩnu marãã jaraya, bia ẽãrã idu bꞌʉdꞌape marãta wũãwũãrã kĩrãkꞌa zhi zroma ẽãne duanu ẽbʉrʉ, edꞌa wãna ẽã ʉ̃tre Daizezeta Nokꞌo maẽrã.

⁴ Aramaʉ̃nerã naʉ̃ wũãwũã kĩrãkꞌa zhi zromane bꞌʉ ẽãta zhi zroma Daizezeta Nokꞌodꞌebemanerã.

⁵ Mʉnebemata ĩjã bꞌʉdꞌeba bariduba naʉ̃ wũãwũã kĩrãkꞌa bꞌʉta bia edabʉrʉra mʉta bia edabʉrʉa.

Zhãrãta bꞌaebibʉrʉdꞌebema

⁶ Bariduba iabꞌa kꞌazhiruadꞌe bꞌaebibʉrʉta za zhi zromarã ẽãta mʉnebema ĩjã bꞌeta mawũã ora, maʉ̃ Daizezebara pua kꞌawua oya. Mawũẽ biga bakꞌausia osidaudꞌe yuta tãjʉ̃nape tabuedꞌaita pusa nabuadꞌe.

⁷ ¡Naʉ̃ ẽjũãne bꞌera zuburia bꞌea kꞌazhiruadꞌe bꞌaebibadata nʉmʉneba! Kꞌazhiruadꞌe bꞌaebibadara nʉmaña, mawũãmina Daizezebara zuburia oya zhãrãta kꞌazhiruadꞌe bꞌaebibʉrʉra.

⁸ Maʉ̃ba bʉ juwuaba o bʉ jẽrũba bʉta kꞌazhiruadꞌe bꞌaebiidꞌebema orãrũã, aramaʉ̃ne bꞌʉatukuape bʉdꞌebara pepekuabʉrʉkꞌarua. Audre biga Daizeze ũme bꞌai jõ ẽã maẽ edꞌa wãĩta juwua abꞌa o jẽrũ abꞌa bꞌʉta, juwua ũme jẽrũ ũme bꞌʉta bꞌaribuedꞌai kꞌãñabara tebʉ kikꞌadꞌe.

⁹ Bʉ dabʉba bʉta kꞌazhiruadꞌe bꞌaebiidꞌebema orãrũã, aramaʉ̃ne bʉ dabʉra ẽũtape bʉdꞌebara bꞌaribuebʉrʉkꞌarua. Audre biga Daizeze ũme bꞌai jõ ẽã maẽ edꞌa wãĩta dabʉ abꞌa bꞌʉta, dabʉ ũme bꞌʉta bꞌaribuedꞌai kꞌãñabara tebʉdꞌe.

Oveja aduadꞌadꞌebema

¹⁰ Seri ẽãne edarãũdua iabꞌabidꞌa za wĩka kedꞌeta, mʉã marãã jaraya, ángelerã ãzhi akʉ bꞌera ʉ̃trera baridua bꞌea mʉ Zeze ʉ̃tre bꞌʉ kĩrãbita.

¹¹ Mʉ Beubari Bape bꞌʉra zesia adua bꞌeta ẽdrʉbigaita.

¹² ¿Marãma sãwũãpe? Iabꞌaʉba oveja cien erubꞌʉta abꞌa aduara, ¿zhi noventa y nueve kꞌatumane ãzhi duanubada maẽ ãmaẽpe aduadꞌata meã jʉrʉ wã ẽka?

¹³ Mʉã wãrĩnu marãã jaraya, ũdura maʉ̃ kꞌarea audre sobiaya noventa y nueve aduadꞌa ẽbadꞌa kꞌãñabara.

¹⁴ Aramaʉ̃ kĩrãkꞌa marã Zeze ʉ̃tre bꞌʉbara krĩña ẽã iabꞌa aduaira za wĩka kedꞌeta.

Mebeata bedꞌea ne ẽãne edaidꞌebema

¹⁵ Bʉ mebeaba bʉta bĩ ẽã obʉrʉba kꞌazhiruata ora wãpe dobꞌaʉdꞌe ũrãgꞌarua, bʉ bedꞌeata ũrĩrã Daizezeita ganabʉrʉa bʉ mebeara.

¹⁶ Mawũãmina bʉ bedꞌeata ũrĩ ẽbʉrʉ, mʉnebemata abꞌa o ũme ededua, aramaʉ̃ne ũmeba o ũbeaba wãrĩnuã adꞌamarẽã bʉa jara kꞌobꞌʉ bedꞌeara jõma.

¹⁷ Maʉ̃rã bedꞌeata ũrĩ ẽbʉrʉ mebẽrã bꞌea jaradua, mebẽrã bedꞌeata ũrĩ ẽbʉrʉ Daizezedꞌebema ĩjã ẽã bꞌʉ kĩrãkꞌa edarua, o rey Romanebemaĩta plata widꞌibarita kꞌazhirua omiã kĩrãkꞌa edarua.

¹⁸ Mʉã wãrĩnu marãã jaraya, naʉ̃ druadꞌe marãba kꞌãrẽ idaribidꞌa ẽãrã Daizezebidꞌa idaribi ẽã ʉ̃treuba. Naʉ̃ druadꞌe marãba kꞌãrẽ idaribibʉdara Daizezebidꞌa idaribiya ʉ̃treuba.

¹⁹ Dewara mʉã marãã jaraya, marãnebemata ũme naʉ̃ druadꞌe krĩcha abꞌarika zedꞌape ne bariduta widꞌidꞌara, aribꞌaeya mʉ Zeze ʉ̃tre bꞌʉbara.

²⁰ Mawũã aribꞌaeya mʉ pẽwã panʉta ũme o ũbea ãba kꞌopanʉ maẽrã mʉrã mama ãzhidꞌe edꞌa bꞌʉ baera.

²¹ Jesúsba mawũãĩ Pedroba orrape mawũãsia: ¿Nokꞌó, mʉãrã sõmbeidꞌu bedꞌea ne ẽãne edaipe mʉ mebeaba mʉta bĩ ẽã obʉrʉba kꞌazhiruata ora? ¿Wagꞌa sieteidꞌuka?

²² Mawũãĩ Jesúsbara mawũãsia: Mʉã bʉaa jara ẽã sietebai, awuarabʉrʉ setenta bama sietea.

Nezokꞌaba iabꞌa bedꞌea ne ẽã bꞌʉ ẽbadꞌa

²³ Mawũãneba Daizezeta Nokꞌora reyta bꞌadꞌa kĩrãkꞌa bꞌʉa, maʉ̃bara deweta widꞌisia nokꞌorã izhi edre bꞌea.

²⁴ Mawũã widꞌibʉrʉdꞌera abꞌa wesidꞌa millon bio deweta.

²⁵ Maʉ̃bara pagꞌa bꞌe ẽãba reybara nendodꞌamarẽã jarasia izhita, zhi kĩmata, zhi warrarãta, izha ne erubꞌʉta jõma, aramaʉ̃ne izhaa deweta pagꞌamarẽã.

²⁶ Mawũẽ maʉ̃ nezokꞌara sãkꞌokꞌodꞌe kꞌobꞌepe zuburia bedꞌea mawũãsia: Nokꞌó, jʉ̃ãdua, mʉãrã bʉaa jõma pagꞌaya.

²⁷ Mawũãĩ maʉ̃ nezokꞌa nokꞌobara sozuburiape enebuesia, aramaʉ̃ne bedꞌea ne ẽã bꞌʉsia deweta.

²⁸ Mawũãmina nezokꞌa maʉ̃ta wãbʉrʉdꞌera ũdusia abꞌarika nezokꞌata abꞌa izhaa wĩka deweta, mawũẽ ojʉ̃ãbara jidape mawũãsia: Mʉãã dewera pagꞌadua.

²⁹ Mawũãĩ abꞌarika nezokꞌara izhi jẽrũ kꞌaita sãkꞌokꞌodꞌe kꞌobꞌepe zuburia bedꞌea mawũãsia: Jʉ̃ãdua, mʉãrã bʉaa jõma pagꞌaya.

³⁰ Mawũãĩ izhara mawũãrã krĩña ẽbasia, awuarabʉrʉ wãpe cárceldꞌe edꞌa bꞌʉsia deweta pagꞌayeedꞌa.

³¹ Abꞌarika nezokꞌarãbara maʉ̃ta ũdudꞌape kꞌãbãẽã sopuasidꞌa. Mawũẽ wãnape izhi nokꞌoa maʉ̃ta jõma nebʉrʉsidꞌa.

³² Mawũẽ izhi nokꞌobara trʉ̃pe mawũãsia: Bʉra nezokꞌata biata bꞌʉ ẽã. Mʉãrã deweta jõmaʉ̃nebara bedꞌea ne ẽã bꞌʉsia mʉãã zuburia bedꞌeasi baera.

³³ ¿Abꞌarika nezokꞌara bʉabidꞌa sozuburiaidꞌe bꞌasi ẽka mʉã bʉta sozuburiadꞌa kĩrãkꞌa?

³⁴ Aramaʉ̃ne izhi nokꞌora kĩrũpe zhãrã zuburia obadaa chãbꞌarisia izhaa deweta jõma pagꞌayeedꞌa.

³⁵ Mʉ Zeze ʉ̃tre bꞌʉbara marãta aramaʉ̃ kĩrãkꞌa oya, marã abꞌa abꞌaʉba soidꞌu bedꞌea ne ẽãne edadꞌa ẽbʉrʉ marã mebẽrã marã bĩ ẽã obʉdata.