Mateo 16 - Porciones del Nuevo Testamento

Jarasidꞌa ũdubimarẽã ũdudꞌakꞌata

¹ Fariseorãta saduceorã bawara zesidꞌa Jesús wãẽãbidꞌaita, mawũẽ jarasidꞌa ũdudꞌakꞌata ũdubimarẽã Daizezedꞌeba nʉmʉbʉrʉ.

² Mawũãnaĩ izhara panaʉ̃ mawũãsia: Keubʉrʉdꞌera marãbara mawũãbada: Ewari biata nʉmaña bãjãrã purba nʉmʉã.

³ Waya diapedꞌara mawũãbada: Idꞌira nangu baya bãjãrã purba jãrãtouga nʉmʉã. ¡Sewakꞌau bꞌea, marãbara bãjãnebema sãwũãta kꞌawua bꞌea, mawũãmina ũdudꞌakꞌata idꞌidꞌe mʉã onʉmʉrã sãwũãta kꞌawua bꞌedꞌa ẽã!

⁴ Marã bia ẽãba Daizezedꞌebema ĩjã ẽã bꞌeta jara bꞌea ũdubimarẽã ũdudꞌakꞌata, mawũãmina mʉãrã ũdudꞌakꞌara ũdubiga ẽã, awuarabʉrʉ ũdubigaya Daizezeba bedꞌeata jarabibarita Jonás berabꞌaridꞌa kĩrãkꞌabʉrʉ. Mawũãpe ãmaẽkuabʉrʉta wãsia.

Ne oreguea fariseorãne

⁵ Jesúsba jʉrʉkuadꞌara jũẽkuasia kĩrãrẽ, mawũãmina kĩrãduasidꞌa pan ededꞌaira.

⁶ Maʉ̃ne Jesúsbara mawũãsia: Kĩrãkuita bꞌeaudua ne oregueata fariseorãne kꞌarea saduceorãne kꞌarea.

⁷ Mawũãĩ ãzhirãĩnu bedꞌeabʉdata mawũãsidꞌa: Maʉ̃ta jarabʉrʉa pan wedꞌa ẽbasi baera.

⁸ Jesúsbara maʉ̃ta kꞌawuape mawũãsia: ¿Kꞌãrẽã mazhirãĩnu bedꞌea kꞌobꞌe, marã soidꞌu kꞌobꞌaita wãẽã bꞌeba pan ne ẽãta jara kꞌobꞌe ẽka?

⁹ ¿Sãwũãta kꞌawuadꞌa ẽka, miã bude badꞌa ẽka pan juesomaba mʉã nekꞌobidꞌara zhũmakĩrãrãta cinco mil, zhi bꞌʉgʉzoamata jamara sõmbe jʉrepesidꞌa?

¹⁰ ¿Miã bude badꞌa ẽka pan sieteba mʉã nekꞌobidꞌara cuatro mil, zhi bꞌʉgʉzoamata jamara sõmbe jʉrepesidꞌa?

¹¹ ¿Kꞌawuadꞌa ẽka pan kꞌarea mʉã jarabʉrʉ ẽãta kĩrãkuitadꞌamarẽã ne oregueata fariseorãne kꞌarea saduceorãne kꞌarea?

¹² Mobebʉrʉ kꞌawuasidꞌa kĩrãkuitadꞌamarẽã jarabʉrʉ ẽãta ne oregueata pannebema kꞌarea, awuarabʉrʉ kĩrãkuitadꞌamarẽã jarasia ũrãgꞌata jãpeta fariseorãne kꞌarea saduceorãne kꞌarea.

Pedroba jaradꞌa Jesús zhãrã Ẽdrʉbita

¹³ Cesarea Filipo druaedꞌa Jesús zebʉrʉdꞌera, izha jʉrʉkuadꞌaa widꞌi mawũãsia: ¿Zhãrãbara kꞌaita jara panʉ mʉ Beubari Bape bꞌʉra?

¹⁴ Mawũãĩ ãzhara mawũãsidꞌa: Ʉ̃kʉrʉbara jarabada bʉra Juan Burukꞌoemiãta, ʉ̃kʉrʉbara jarabada bʉra Elíata, ʉ̃kʉrʉbara jarabada bʉra Jeremiata, o jarabada bʉra Daizezeba bedꞌeata jarabibarirãta iabꞌaʉdꞌebemata.

¹⁵ Mawũãnaĩ izhara widꞌi mawũãsia: ¿Kꞌõbe marãma mʉrã kꞌaipe?

¹⁶ Mawũãĩ Simón Pedroba panaʉ̃ mawũãsia: Bʉra zhãrã Ẽdrʉbita Daizeze zokꞌai bꞌʉ Warra.

¹⁷ Mawũãĩ Jesúsbara mawũãsia: Bʉra Daizezeba bia nʉmʉkꞌãrĩã Simón, Jonás warra, maʉ̃ bʉaara beubariba kꞌawuabibʉrʉ ẽã, awuarabʉrʉ kꞌawuabibʉrʉa mʉ Zeze ʉ̃tre bꞌʉba.

¹⁸ Mʉãbidꞌa bʉaa jaraya Peñata bʉra Pedroa, bʉta mawũã peña ʉ̃rʉ̃ pãrã nʉmʉña mʉnebema ĩjã bꞌeta, aramaʉ̃ne ãtõmiãbara edre bꞌaebi ẽã.

¹⁹ Mʉãrã bʉaa zareata diaya Daizezeta Nokꞌodꞌebemata. Mawũẽ naʉ̃ druadꞌe bʉa kꞌãrẽ idaribi ẽãrã Daizezebidꞌa idaribi ẽã ʉ̃treuba. Naʉ̃ druadꞌe bʉa kꞌãrẽ idaribibʉrʉra Daizezebidꞌa idaribiya ʉ̃treuba.

²⁰ Mobebʉrʉ izha jʉrʉkuadꞌaa jarasia miõã jaradꞌa ẽbamarẽã Jesúra izhita zhãrã Ẽdrʉbita.

Jesúsba jaradꞌa izhi beadꞌaita

²¹ Maʉ̃ ewadeba Jesúsbara izha jʉrʉkuadꞌaa jarakꞌasia izhira Jerusalén pʉwʉrʉedꞌa wãĩta barata, jarasia biodꞌe zuburia odꞌaita nokꞌorãba, sacerdoterã nokꞌorãba, ũrãgꞌa Moisédꞌe jarabadaba. Jarasia aramaʉ̃ne beadꞌaita, maʉ̃ta piradrʉita ewari ũbeadꞌe.

²² Mawũãĩ Pedroba jãpe edepe kẽã mawũãsia: Nokꞌó, mawũã bedꞌearãrũã bʉzhita sozuburiarua, Daizezebara bʉra mawũãrã berabꞌaribi ẽã.

²³ Mawũãĩ Jesús pʉrʉwape Pedroa bedꞌeabʉrʉ kĩrãkꞌa mawũãsia: Ãĩ wãrũã mʉ kĩrãbitaubara ãtõmiã. Bʉara mʉrã bꞌaebiya nʉmʉã, bʉra krĩcha ẽã Daizeze kĩrãkꞌara, awuarabʉrʉ krĩcha bꞌʉa beubari bꞌe kĩrãkꞌa.

²⁴ Mobebʉrʉ Jesúsbara izha jʉrʉkuadꞌaa mawũãsia: Iabꞌaʉba mʉta pẽwã krĩña bꞌʉbʉrʉ bʉzha krĩñata aribꞌaerãrũã, awuarabʉrʉ bebudꞌe basiidꞌu mʉrã pẽwãdua.

²⁵ Mʉ kꞌarea beu krĩña ẽãrã aduaya, mawũãmina mʉ kꞌarea beubʉrʉra ẽdrʉya.

²⁶ ¿Zhãrãĩtara kꞌãrẽ biata bꞌaipe ẽjũãne nʉmʉta jõma izhidꞌeta nʉmʉbʉrʉdꞌe izhi jawureta aduara? ¿O zhãrãbara kꞌãrẽta dia bꞌeipe izhi jawureta ẽdrʉbiira?

²⁷ Mʉ Beubari Bape bꞌadꞌara mʉ Zeze zareaedꞌa zeya izhi ángelerã bawara, maʉ̃nerã abꞌa abꞌakꞌa kꞌawua obʉrʉta biata odꞌapeadꞌara bia bꞌʉya, bia ẽãta odꞌapeadꞌara zuburia bꞌʉya.

²⁸ Mʉã wãrĩnu marãã jaraya, ʉ̃kʉrʉ nama kꞌobꞌebara beudꞌai nawedꞌa ũdudꞌaya mʉ Beubari Bape bꞌadꞌara zebʉrʉta Rey baita.