Mateo 15 - Porciones del Nuevo Testamento

Dazhi sãwũã mitiabaridꞌebema

¹ Mobebʉrʉ Jesús orrasidꞌa ũrãgꞌa Moisédꞌe jarabadaba ʉ̃kʉrʉba fariseorãba ʉ̃kʉrʉba, ãzhira zekuasia Jerusalénneba, maʉ̃rãbara mawũãsidꞌa:

² ¿Kꞌãrẽã bʉa jʉrʉkuadꞌabara aribꞌaedꞌa ẽpe zõrãrãba okꞌawa bꞌeadꞌara? Mitia ne ẽã obʉdata juwuara surrua odꞌa ẽã nekꞌobʉdadꞌera.

³ Mawũãnaĩ izhara panaʉ̃ mawũãsia: ¿Kꞌãrẽã marãbidꞌa aribꞌaedꞌa ẽpe Daizezeba aribꞌaemarẽã jara bꞌʉra, mazhidꞌeta aribꞌaedꞌai kꞌarea ẽka?

⁴ Daizezebara mawũãsia: Wawiarua bʉ zezera bʉ papara. Zezeta o papata ikꞌazhirua jarabʉrʉra beadꞌaibara.

⁵ Mawũãmina marãbara mawũãbada: Bariduba zhi zezea o zhi papaa mawũãsia bꞌʉa: Mʉãrã jõma Daizezea diasia bʉ kꞌarebaita mʉã erubꞌadꞌara.

⁶ Mawũãbʉrʉba marãma ya kꞌarebaidꞌe bꞌʉ ẽã zhi zezera o zhi papara. Daizezeba aribꞌaemarẽã jara bꞌʉra aramaʉ̃ne seribidꞌa ẽã mazhidꞌeta aribꞌaedꞌai kꞌarea.

⁷ Marã sewa bibaʉta bꞌea, bia marãẽnabemata Daizezedꞌeba Isaíabara mawũãsia:

⁸ Za bꞌebara bari iba mʉrã wawidea, aramaʉ̃ne ãzhi sora wawara nʉmʉã mʉnebara.

⁹ Mʉrã bari ibia jara bꞌeba mʉ ũrãgꞌa kĩrãkꞌa jaradia bꞌea aribꞌaemarẽã jara bꞌeta beubari bꞌeba. (Isaías 29:13)

¹⁰ Maʉ̃ jarape Jesúsbara kꞌabanata trʉ̃pe mawũãsia: Mʉã jaraita ũrĩũdua, mobe sãwũãta kꞌawuaudua.

¹¹ Zhikota yedꞌa wãbʉrʉbara dazhira mitia o ẽã, mawũãmina yedꞌauba ze bꞌʉbara Daizeze kĩrãbitara dazhira mitia obꞌʉa.

¹² Mawũãĩ izha jʉrʉkuadꞌabara orradꞌape mawũãsidꞌa: ¿Bʉara kꞌawuasika fariseorã bĩ ẽãbʉdara ũrĩbʉdaba maʉ̃ bedꞌeata?

¹³ Mawũãnaĩ izhara panaʉ̃ mawũãsia: Nekꞌarra kĩrãkꞌa bꞌedꞌeba nekꞌarra mʉ Zeze ʉ̃trebemaba u ẽbadꞌara izha ẽũkuaya.

¹⁴ Idaribiudua, jipa ededꞌa ẽã Daizezedꞌebema kꞌawuadꞌa ẽãba daʉbꞌerrea bꞌe kĩrãkꞌa bꞌera. Daʉbꞌerrea bꞌʉba daʉbꞌerrea bꞌʉta erbꞌari edera abꞌarika bꞌaedꞌaya zobꞌeadꞌe.

¹⁵ Mobebʉrʉ Pedroba mawũãsia: Sãwũãta daia jaradua bʉa jarabʉrʉta.

¹⁶ Mawũãĩ Jesúsbara mawũãsia: ¿Marãbidꞌa sãwũãta kꞌawuadꞌa ẽka?

¹⁷ ¿Kꞌawuadꞌa ẽka jõma kꞌãrẽ yedꞌa wãbʉrʉra bꞌitaedꞌa wãpe ãĩ wã bꞌʉra?

¹⁸ Mawũãmina yedꞌauba ze bꞌʉra sodꞌeba ze bꞌʉa, Daizeze kĩrãbitara dazhira maʉ̃ba mitia obꞌʉa.

¹⁹ Sodꞌebara ze bꞌʉa krĩchata bia ẽãta, miã beaita, kĩma ẽãta erukꞌãĩta, nezrʉgaita, sewa nebʉrʉita, zhãrã ikꞌazhirua jaraita.

²⁰ Daizeze kĩrãbitara maʉ̃ jõmaʉ̃ba dazhira mitia obꞌʉa. Mawũãmina juwua surrua o ẽã nekꞌobʉrʉbara dazhira mitia o ẽã.

Soidꞌu kꞌobꞌadꞌa wũẽrã Canaán bidꞌata

²¹ Jesús mamaʉ̃ba wãbʉrʉdꞌera wãsia Tiro druaedꞌa Sidón druaedꞌa.

²² Maʉ̃ne wũẽrã Canaán druadꞌebemaba nemi jĩgua mawũãsia: ¡Nokꞌó, bʉra rey Davidꞌeba uruta bꞌʉba mʉta sozuburiarua! Mʉ kꞌauta kꞌãbãẽã zuburia bꞌʉa jaiba.

²³ Jesúsbara panaʉ̃ ẽbasia, mawũẽ izha jʉrʉkuadꞌabara orradꞌape zuburia bedꞌea mawũãsidꞌa: Wãmarẽã jaradua, bꞌia taia dazhirã kꞌaidꞌu.

²⁴ Mawũãnaĩ izhara panaʉ̃ mawũãsia: Daizezebara mʉrã awuarabʉrʉ zokꞌasia Israel adua bꞌema.

²⁵ Aramaʉ̃ne wũẽrã zepe izhi kĩrãbita sãkꞌokꞌodꞌe kꞌobꞌepe mawũãsia: ¡Nokꞌó, mʉrã kꞌarebarua!

²⁶ Mawũãĩ izhara panaʉ̃ mawũãsia: Mʉã bʉta kꞌarebaira biga ẽã, mawũãrã zhiko warrarãneta jiraedape diabʉrʉkaya usarãã.

²⁷ Mawũãĩ izhara mawũãsia: Ããjã Nokꞌó, mawũãmina usarãbidꞌa ãzhi zhibarirã mesadꞌeba zhiko jarra bꞌaedꞌata kꞌobada. Mawũẽ mʉrã judía ẽmina kꞌarebarua.

²⁸ Mawũãĩ Jesúsbara panaʉ̃ mawũãsia: Wũẽrã, bʉra kꞌãbãẽã soidꞌu kꞌobꞌʉdꞌeba aribꞌae nʉmaẽdaya bʉa krĩñane. Izhi kꞌaura bꞌesia aramaʉ̃ta.

Jesúsba bꞌebikuadꞌa bio

²⁹ Jesús mamaʉ̃bara doyaa wãsia Galilea dota jedꞌea õbꞌʉidꞌu. Mobe kꞌatumaĩnu wãrĩzepe mama jewedꞌasia.

³⁰ Zhãrã bioba orrasidꞌa zhi wedꞌapeadꞌaba wã bꞌe ẽã bꞌeta, daʉbꞌerrea bꞌeta, bedꞌea bꞌe ẽã bꞌeta, juwua dorrabꞌari bꞌeta, dewara bio wesidꞌa kꞌayarãta. Maʉ̃ta Jesús jẽrũ kꞌaita bꞌʉkuasidꞌa, mawũẽ bꞌebikuasia.

³¹ Maʉ̃ta kꞌabanaba bia akʉdrua ũdubʉdara bedꞌea bꞌe ẽã bꞌera bedꞌeasidꞌa, juwua dorrabꞌari bꞌera bꞌesidꞌa, wã bꞌe ẽã bꞌera wãsidꞌa, daʉbꞌerrea bꞌera ne ũdusidꞌa. Mawũẽ ibia jarasidꞌa Daizeze Israel bꞌedꞌera.

Nekꞌobigadꞌa cuatro mil

³² Jesúsbara izha jʉrʉkuadꞌata trʉ̃pe mawũãsia: Mʉãrã zhãrã sozuburia kꞌobꞌʉa, mʉ bawara bꞌeta ewari ũbea babʉrʉta kꞌãrẽ kꞌoi ne ẽã bꞌea. Mʉãrã krĩña ẽã nekꞌo ẽã wãbigaira, manebʉrʉ nomadrʉdꞌaya odꞌe.

³³ Mawũãĩ izha jʉrʉkuadꞌabara mawũãsidꞌa: ¿Miõ ne ẽã maẽrã dazhirãbara zhiko sãma ũdudꞌaipe mawũã nekꞌobigaira kꞌãbãẽã kꞌabanata?

³⁴ Mawũãnaĩ Jesúsbara mawũãsia: ¿Marãbara pan sõmbe erubꞌe? Mawũãĩ ãzhara mawũãsidꞌa: Erupanʉã pan siete, bꞌeda zakerãta ʉ̃kʉrʉ.

³⁵ Mawũãnaĩ kꞌabanata kꞌobꞌea jarasia jewedꞌa duanemarẽã egorodꞌe.

³⁶ Mobebʉrʉ jiraedasia pan sieteta, bꞌeda zakerãta, mobe Daizezea zhibia jipe bꞌʉekuape diasia izha jʉrʉkuadꞌaa, mawũẽ izha jʉrʉkuadꞌabara jedꞌekasidꞌa kꞌabanata kꞌobꞌea.

³⁷ Jõma jãwũã nekꞌosidꞌa, adꞌubadꞌapeadꞌa zhi bꞌʉgʉzoamata jʉrepesidꞌa jamara siete bira.

³⁸ Zhi nekꞌodꞌapeadꞌara zhũmakĩrãrãta nʉmasia cuatro mil, wũẽrãrãta wũãwũãrãta juacha ẽã.

³⁹ Zhãrã wãbigape jãbadꞌe bꞌaripe wãsia Magdala druaedꞌa.