Mateo 10 - Porciones del Nuevo Testamento

Doceta jʉrʉkuadꞌa zokꞌakuaita

¹ Mobebʉrʉ Jesúsbara izha jʉrʉkuadꞌa doceta trʉ̃pe zareata dedꞌekasia jaita ãĩ jʉrekuadꞌamarẽã, bꞌebidꞌamarẽã ne bariduba kꞌaya bꞌeta, ne bariduba pua bꞌeta.

² Doce zokꞌakuadꞌa trʉ̃rã naʉ̃rãã: Simón, Pedro abadata, Andrés zhi mebeata, Jacobo Zebedeo warrata, Juan zhi mebeata.

³ Felipeta, Bartolomé, Tomás, Mateo impuesto widꞌi bꞌadꞌata, Jacobo Alfeo warrata, Lebeo ijaramiã trʉ̃ta Tadeota.

⁴ Simón Canaán bidꞌata, Juda Iscariote Jesús chupea jidabidꞌata.

Zokꞌakuadꞌa doceta

⁵ Jesúsbara doce maʉ̃rãta zokꞌabʉrʉta mawũãsia: Judíorã ẽãta bꞌema wãrãũdua, Samaria druadꞌebema pʉwʉrʉdꞌera edꞌa wãrãũdua.

⁶ Awuarabʉrʉ wãũdua oveja adua bꞌe kĩrãkꞌa bꞌema Israel bꞌema.

⁷ Jarakꞌa wãbʉdata mawũãũdua: Daizezeta Nokꞌodꞌebema kꞌaita basia.

⁸ Kꞌaya bꞌera bꞌebiudua, aidꞌaba kꞌaya bꞌera nene ẽã bꞌebiudua, beudꞌapeadꞌara piradrʉbiudua, jaira ãĩ jʉrekuaudua. Maʉ̃ zareara marãbara bari jidasidꞌa, mawũẽ bari maʉ̃ kꞌaudꞌa bꞌeaudua.

⁹ Ederãũdua orota, miã platata.

¹⁰ Miã odꞌera talegora ederãũdua, miã wua trokꞌa jʉ̃ĩta, miã sandalia trokꞌa jʉ̃ĩta, miã barrata ederãũdua. Traja bꞌʉra zhiko diadꞌaidꞌe bꞌʉa.

¹¹ Pʉwʉrʉ zromane o pʉwʉrʉ zakedꞌe marã edꞌa wãbʉda maẽ mazhi bia edai bꞌʉta jʉrʉudua, mobe mama kꞌãĩũdua mamaʉ̃ba wãnañeẽna.

¹² Mama deidꞌu wãbʉdadꞌera mawũãũdua: Daizezedꞌeba marã adu-a bꞌeaya.

¹³ Mama dedꞌa bꞌeta mawũã bꞌeaidꞌe bꞌebʉrʉ, marãba adu-a bꞌaidꞌebema jarabʉdara ãzhima wãña. Mawũãmina mawũã bꞌeaidꞌe duanu ẽbʉrʉ, maʉ̃ adu-a bꞌaidꞌebema mazhima zeya.

¹⁴ Iabꞌaʉba marãta bia eda ẽbʉrʉ, miã marã bedꞌeata ũrĩ ẽbʉrʉ, maʉ̃ dedꞌaubara o maʉ̃ pʉwʉrʉdꞌebara ãĩ wãũdua, egoro jarra marã jẽrũnebema niãweudua. Aramaʉ̃ne kꞌawuabidꞌaya ãzhira Daizezebara pua kꞌawua oita.

¹⁵ Mʉã wãrĩnu marãã jaraya, Daizezeba kꞌawua obʉrʉ ewadera Sodoma pʉwʉrʉdꞌe, Gomorra pʉwʉrʉdꞌe bꞌeadꞌara yarebai zuburia bꞌeabiya maʉ̃ pʉwʉrʉdꞌe bꞌe kꞌãñabara.

Jesús kꞌarea zuburia odꞌaidꞌebema

¹⁶ Mʉã marã zokꞌabʉrʉa ovejarãta zokꞌabʉrʉ kĩrãkꞌa usa pãta bꞌedꞌe edꞌa. Mawũẽ krĩcha bara bꞌeaudua dãma kĩrãkꞌa, adu-a bꞌeaudua pusirã kĩrãkꞌa.

¹⁷ Aramaʉ̃ne kĩrãkuita bꞌeaudua zhãrã kꞌarea, marã chãbꞌaridꞌaya nokꞌorã wagꞌaurãã, de zhi jʉrebadata nʉme maẽ marã udꞌaya.

¹⁸ Nokꞌorã kĩrãbita, reyrã kĩrãbita marã ededꞌaya mʉ kꞌarea, aramaʉ̃ne marãbara mʉnebemata maʉ̃rãã jaradꞌaya, judíorã ẽãta bꞌeabidꞌa jaradꞌaya.

¹⁹ Mawũãmina marãta nokꞌorãã chãbꞌaribʉdadꞌera sopuarãũdua sãwũã bedꞌeadꞌai kꞌareara, maʉ̃nerã Daizezeba marãã diaya sãwũã bedꞌeadꞌaita.

²⁰ Aramaʉ̃nerã marãta bedꞌea ẽã, awuarabʉrʉ Jawurebia marã Zezedꞌeta bedꞌeaya marãneba.

²¹ Mebeabara beadꞌamarẽã chãbꞌariya zhi mebeata, zezebara zhi warrata, warrarã bĩ ẽãdꞌaya ari ãzhi zhibarirã bawara, aramaʉ̃ne beakuabidꞌaya.

²² Jõmaʉ̃ba marã juradꞌaya mʉ kꞌarea, mawũãmina mʉta pẽwã zuburiata jõñiĩnu nʉmʉrã ẽdrʉya.

²³ Pʉwʉrʉ abꞌaʉdꞌe marã pẽwã jirpanebʉdadꞌera merũ wãũdua awʉrʉ pʉwʉrʉedꞌa. Mʉã wãrĩnu marãã jaraya, Daizezedꞌebema jara bꞌeta marãbara ma pʉrrʉadꞌa ẽã Israeldꞌe pʉwʉrʉ tabꞌe jõmarã mʉta zei nawedꞌara mʉ Beubari Bape bꞌadꞌata.

²⁴ Ne kꞌawa bꞌʉra audre bꞌʉ ẽã izhi ne jaradia nʉmʉ kꞌãñabara, miã nezokꞌara audre bꞌʉ ẽã izhi nokꞌo kꞌãñabara.

²⁵ Biga ne kꞌawa bꞌʉta nʉmʉbʉrʉ izhi ne jaradia bꞌʉ kĩrãkꞌa, biga nezokꞌata nʉmʉbʉrʉ izhi nokꞌo kĩrãkꞌa. Aramaʉ̃ kĩrãkꞌa mʉ zhidekʉta Beelzebú apanʉbʉrʉ, ¡audre jaradꞌaya marã mʉ dedꞌabema!

Kꞌaita wawiaita barape

²⁶ Zhãrãta wawiarãũdua, kꞌãrẽ chũwẽã nʉmʉta kꞌawuadꞌa ẽã nʉmaĩrã ne ẽã, miã kꞌãrẽ merã bꞌʉta kꞌawuadꞌa ẽã nʉmaĩrã ne ẽã.

²⁷ Mʉã mazhi dobꞌaʉa jarabʉrʉra jõmaʉ̃ã jaraudua, mʉã kʉwʉrʉ kꞌawa jarabʉrʉra jĩgua jaraudua de ʉ̃rʉ̃ba.

²⁸ Wawiarãũdua kꞌakua bea bꞌeta, maʉ̃rãbara jawurera bea bꞌedꞌa ẽã. Awuarabʉrʉ Daizezeta wawiaudua, izhara jawureta kꞌakuata zuburiabi bꞌeya tebʉdꞌe.

²⁹ ¿Nendobada ẽka ibana zake ũmeta plata pichi abꞌaʉbari? Maʉ̃ta miã abꞌabidꞌa egorodꞌe beu bꞌae ẽã marã Zezeba idaribi ẽãrã.

³⁰ Marãẽnabema mazhi budꞌasidꞌa jõma juacha nʉmʉkꞌãrĩã.

³¹ Mawũẽ perarãũdua, Daizezema marã audre vale bꞌea ibana zaketa bio kꞌãñabara.

³² Bariduba zhãrã kĩrãbita mʉ pẽwã bꞌʉa ara, mʉãbidꞌa mʉ pẽwã bꞌʉa aya mʉ Zeze ʉ̃tre bꞌʉ kĩrãbita.

³³ Bariduba zhãrã kĩrãbita mʉ pẽwã bꞌʉ ẽã ara, mʉãbidꞌa mʉ pẽwã bꞌʉ ẽã aya mʉ Zeze ʉ̃tre bꞌʉ kĩrãbita.

Jesúsdꞌebema juradꞌaya

³⁴ Krĩcharãũdua mʉrã zesita druadꞌe zhãrã adu-a bꞌeabiita, mʉrã zesi ẽã zhãrã adu-a bꞌeabiita, awuarabʉrʉ mʉ kꞌarea zhõnaña.

³⁵ Mʉ zebʉrʉbara mʉnebemata juradꞌaya, zhãrãbara juraya zhi zezeta, kꞌaubara juraya zhi papata, ãĩgubara juraya zhi pakꞌõrẽta.

³⁶ Mawũẽ ãzhi juraira zhãrãnerã ãzhi dedꞌabema baya.

³⁷ Iabꞌaʉba zhi zezeta zhi papata mʉ audre kʉãgꞌabʉrʉ mʉrẽta bꞌaidꞌe bꞌʉ ẽã, iabꞌaʉba zhi warrata zhi kꞌauta mʉ audre kʉãgꞌabʉrʉ mʉrẽta bꞌaidꞌe bꞌʉ ẽã.

³⁸ Iabꞌaʉba bebudꞌe basiidꞌu mʉta pẽwã ẽbʉrʉ mʉrẽta bꞌaidꞌe bꞌʉ ẽã.

³⁹ Mʉ kꞌarea beu ẽãrã aduaya, mawũãmina mʉ kꞌarea beubʉrʉra ẽdrʉya.

Daizezeba kꞌãrẽ diaidꞌebema

⁴⁰ Iabꞌaʉba marãta bia edabʉrʉra mʉta bia edabʉrʉa, mʉta bia edabʉrʉra bia edabʉrʉa mʉ zokꞌadꞌata.

⁴¹ Iabꞌaʉba bia edabʉrʉta Daizezeba bedꞌeata jarabibarita bꞌʉ baera bia edara, Daizezebara maʉ̃ã ne biata diaya izha bedꞌeata jarabibaria diai kĩrãkꞌa. Iabꞌaʉba bia edabʉrʉta Daizezedꞌeta biata bꞌʉ baera bia edara, Daizezebara maʉ̃ã ne biata diaya izhidꞌeta biata bꞌʉa diai kĩrãkꞌa.

⁴² Bariduba maʉ̃rãnebema abꞌa zhi zroma ẽã arigu baniã kũrãsãta dobira, mʉta pẽwã bꞌʉ baera mawũã dobira, mʉã wãrĩnu marãã jaraya, Daizezebara maʉ̃barira kꞌãrẽ diaya.