Mateo 1 - Porciones del Nuevo Testamento

Jesucristo urudꞌebemata bꞌeadꞌa

¹ Jesucristo urudꞌebemata bꞌeadꞌa trʉ̃ta naʉ̃ne bꞌʉ tabꞌʉa. Jesucristora rey Davidꞌeba uruta Abrahamneba urua.

² Abraham warra Isaac, Isaac warra Jacobo, Jacobo warra Judá, dewara zhi mebẽrãta.

³ Judá warra Fare, dewara Zara, ãzhi papa Tamar basia. Fare warra Esrom, Esrom warra Aram.

⁴ Aram warra Aminadab, Aminadab warra Naasón, Naasón warra Salmón.

⁵ Salmón warra Booz, zhi papa Rahab basia. Booz warra Obed, zhi papa Rut basia. Obed warra Isaí.

⁶ Isaí warra rey David, David warra Salomón, zhi papara Uría kĩma basia.

⁷ Salomón warra Roboam, Roboam warra Abía, Abía warra Asa.

⁸ Asa warra Josafat, Josafat warra Joram, Joram warra Uzía.

⁹ Uzía warra Jotam, Jotam warra Aca, Aca warra Ezequía.

¹⁰ Ezequía warra Manasé, Manasé warra Amón, Amón warra Josía.

¹¹ Josíara Jeconíaba dewara zhi mebẽrãba ãzhi zezeta bꞌasia, maʉ̃ ewadera israelitarã jidakuape edesidꞌa Babilonia druaedꞌa.

¹² Mawũã Babiloniaẽna ededꞌapeadꞌa tẽãne Jeconía warra barasia, mawũẽ Jeconía warra Salatiel, Salatiel warra Zorobabel.

¹³ Zorobabel warra Abiud, Abiud warra Eliaquim, Eliaquim warra Azor.

¹⁴ Azor warra Sadoc, Sadoc warra Aquim, Aquim warra Eliud.

¹⁵ Eliud warra Eleazar, Eleazar warra Matán, Matán warra Jacobo.

¹⁶ Jacobo warra José, Joséra María kĩma basia, Jesúra Maríaba todꞌata zhãrã Ẽdrʉbia abada.

¹⁷ Mawũã Abrahamneba urura rey David bitabai nʉmasia catorce. Rey Davidꞌeba urura Babilonia druaedꞌa jidakua ededꞌapeadꞌa bitabai nʉmasia catorce. Babiloniaẽna jidakua ededꞌapeadꞌadꞌeba urura zhãrã Ẽdrʉbi bitabai nʉmasia catorce.

Jesucristo todꞌa

¹⁸ Jesucristo todꞌara kꞌãwũã basia: Zhi papa Maríara José ũme zhi edadꞌaita bedꞌeape panʉne, zhi edadꞌa ẽwedꞌa bꞌiogꞌoasia Jawurebiadꞌeba.

¹⁹ Joséra biata bꞌʉba zhãrã ji ẽbaita maʉ̃ kꞌarea chupea idu bꞌʉ krĩñasia.

²⁰ Izhi mawũã krĩchabʉrʉdꞌera ángel Daizezedꞌeta kꞌãĩmokꞌaradꞌe zhi ũdubipe mawũãsia: José, bʉra rey Davidꞌeba uruta bꞌʉa, María edaira perarãrũã, izhira bꞌiogꞌoasia Jawurebiadꞌeba.

²¹ Maríabara zhũmakĩrãta toya, maʉ̃ bʉara Jesústa trʉ̃gadua, trʉ̃ mawũã bꞌaya izhidꞌerãta ẽdrʉbigai baera ãzhi kꞌazhiruadꞌeba.

²² Maʉ̃ jõma Daizezeba jaradꞌata arimaẽ berabꞌarisia izha bedꞌeata jarabibaridꞌeba mawũãnata:

²³ Ãwũẽrã zhi aduagꞌaita bꞌiogꞌoape zhũmakĩrãta toya, maʉ̃ Emanuelta trʉ̃gadꞌaya. Maʉ̃ trʉ̃bara mawũã bꞌʉa: Daizezera dazhirã ũme bꞌʉa. (Isaías 7:14)

²⁴ Joséra kꞌãĩmokꞌara nʉmanata ʉ̃rʉ̃mape ángel Daizezedꞌeba jaradꞌata aribꞌaesia, mawũẽ Maríara edasia.

²⁵ Mawũãmina erukꞌãĩ ẽbasia, aramaʉ̃ne zhi wau ãwũẽrã wũãwũãta tobʉrʉdꞌera Josébara Jesústa trʉ̃gasia.