Lucas 9 - Porciones del Nuevo Testamento

Kꞌãrẽ obigadꞌa doce jʉrʉkuadꞌata

¹ Jesúsbara izha jʉrʉkuadꞌa doceta ãba jʉrepe zareata dedꞌekasia jai jõmaʉ̃ ʉ̃rʉ̃, aramaʉ̃ne bꞌebidꞌamarẽã kꞌayarãsidꞌa.

² Mobebʉrʉ jaradꞌe zokꞌakuasia Daizezeta Nokꞌodꞌebemata, aramaʉ̃ne bꞌebidꞌamarẽã kꞌayarãsidꞌa.

³ Maʉ̃nerã mawũãsia: Odꞌera miã kꞌãrẽta ederãũdua, miã barrata, miã talegota, miã zhikota, miã platata, miã wua trokꞌa jʉ̃ĩta.

⁴ Baridu maẽ deidꞌu wãbʉdadꞌera mama duanedua mamaʉ̃ba wãnañeẽna.

⁵ Baridu maẽ marãta bia edadꞌa ẽbʉrʉ maʉ̃ pʉwʉrʉdꞌebara ãĩ wãbʉdata egoro jarra marã jẽrũnebema niãweudua. Aramaʉ̃ne kꞌawuabidꞌaya ãzhira Daizezebara pua kꞌawua oita.

⁶ Ãzhi wãbʉrʉdꞌera pʉwʉrʉ zake tabꞌeza berabꞌari wãnata bedꞌea biata jarakꞌa kꞌayarãta bꞌebikua wãsidꞌa baridu maẽ.

Juan Burukꞌoemiã beabidꞌadꞌebema

⁷ Rey Herodebara jõma ũrĩsia Jesúsba onʉmʉta, mawũẽ kꞌawua ẽã krĩcha bꞌasia. Ʉ̃kʉrʉbara mawũãsidꞌa: Juan beudꞌata piradrʉsia.

⁸ Waya ʉ̃kʉrʉbara mawũãsidꞌa: Elíata ibꞌaria. Ʉ̃kʉrʉbara mawũãsidꞌa: Daizezeba bedꞌeata jarabibari bꞌeadꞌata beudꞌata iabꞌa piradrʉbʉrʉa.

⁹ Mawũẽ Herodebara mawũãsia: Juan mʉãrã otatubisia. ¿Mawũẽ maʉ̃ kꞌaipe maʉ̃nebemata mʉã ũrĩ nʉmʉrã? Aramaʉ̃ne ũdu krĩña bꞌasia.

Nekꞌobigadꞌa cinco mil

¹⁰ Jesúsba zokꞌakuadꞌata wakusa zebʉdadꞌera jõma nebʉrʉsidꞌa ãzha odꞌapeadꞌata. Maʉ̃nerã bari ãzhitrʉ jʉre edesia miõ ne ẽã maẽ Betsaida pʉwʉrʉ kꞌaita.

¹¹ Zhãrãbara kꞌawuadꞌape kꞌaidꞌu wãsidꞌa. Mawũẽ izhara bia edabʉrʉta jarakꞌasia Daizezeta Nokꞌodꞌebemata, bꞌebikuasia zhi bꞌei bara bꞌera.

¹² Maʉ̃ne ewari keudꞌe izha jʉrʉkuadꞌata docebara orradꞌape mawũãsidꞌa: Zhãrã kꞌobꞌera wãbigarua wãnamarẽã pʉwʉrʉ zake tabꞌema, meã arakꞌaita bꞌema, maʉ̃za kꞌãĩguebʉdaba ũdudꞌamarẽã zhikota. Dazhirã namarã kꞌobꞌea kꞌãrẽ ne ẽã maẽ.

¹³ Mawũãnaĩ Jesúsbara mawũãsia: Marãba nekꞌobigaudua. Mawũãĩ ãzhara mawũãsidꞌa: Daibara eruduanuã pan juesoma, bꞌeda ũme, daita wãbʉda ẽbʉrʉ zhiko edadꞌe naʉ̃ jõmaʉ̃ kꞌabanaĩta.

¹⁴ Maʉ̃nerã zhũmakĩrãrãta nʉmasia cinco mil. Mawũẽ izha jʉrʉkuadꞌaa mawũãsia: Awuara awuarakꞌa jewedꞌabigaudua cincuentadꞌe.

¹⁵ Mawũãĩ mawũã jewedꞌabisidꞌa jõma.

¹⁶ Mobebʉrʉ jirakua edasia pan juesomata, bꞌeda ũmeta, mobe ʉ̃taa akʉ maʉ̃bari zhiwidꞌipe bꞌʉekuape diasia izha jʉrʉkuadꞌaa, jedꞌekadꞌamarẽã zhãrã kꞌobꞌea.

¹⁷ Jõma jãwũã nekꞌosidꞌa. Adꞌubadꞌapeadꞌata jamara doce jʉrepesidꞌa zhi bꞌʉgʉzoamata.

Jesús zhãrã Ẽdrʉbita jaradꞌa Pedroba

¹⁸ Ewari abꞌa Jesús zhãrã maẽbara ãĩ zhiwidꞌi bꞌʉdꞌe, izha jʉrʉkuadꞌata izhi bawara kꞌopanʉne widꞌi mawũãsia: ¿Zhãrãbara mʉrã kꞌaita jara panʉ?

¹⁹ Mawũãĩ ãzhara panaʉ̃ mawũãsidꞌa: Ʉ̃kʉrʉbara jarabada bʉra Juan Burukꞌoemiãta. Ʉ̃kʉrʉbara jarabada bʉra Elíata. Ʉ̃kʉrʉbara jarabada bʉra Daizezeba bedꞌeata jarabibarirã bꞌeadꞌata beudꞌata iabꞌa piradrʉsita.

²⁰ Mawũãnaĩ izhara mawũãsia: ¿Kꞌõbe marãma mʉrã kꞌaipe? Mawũãĩ Pedroba panaʉ̃ mawũãsia: Bʉra zhãrã Ẽdrʉbita Daizezedꞌea.

Jesúsba jaradꞌa izhi beadꞌaita

²¹ Jesúsbara maʉ̃ta miõã jaradꞌa ẽbamarẽã zarea jarakꞌabʉrʉta,

²² mawũãsia: Mʉ Beubari Bape bꞌʉra ne biodꞌe zuburiaya, seribidꞌa ẽbaya nokꞌorãba, sacerdoterã nokꞌorãba, ũrãgꞌa Moisédꞌe jarabadaba. Aramaʉ̃ne beabʉdadꞌera piradrʉya ewari ũbeadꞌe.

²³ Mawũãpe jõmaʉ̃ã mawũãsia: Iabꞌaʉba mʉta pẽwã krĩña bꞌʉbʉrʉ bʉzha krĩñata aribꞌaerãrũã, awuarabʉrʉ bebudꞌe basiidꞌu ewariza mʉrã pẽwãdua.

²⁴ Mʉ kꞌarea beu krĩña ẽãrã aduaya, mawũãmina mʉ kꞌarea beubʉrʉra ẽdrʉya.

²⁵ ¿Zhãrãĩtara kꞌãrẽ biata bꞌaipe ẽjũãne nʉmʉta jõma izhidꞌeta nʉmʉbʉrʉdꞌe izhi jawureta aduara?

²⁶ Iabꞌa mʉ kꞌarea mʉ bedꞌea kꞌarea pera bꞌaibʉrʉ, maʉ̃ mʉãrã mʉrẽ ẽã aya mʉ Beubari Bape bꞌadꞌata zarea bara zebʉrʉdꞌera mʉ Zeze zareaedꞌa ángelerã zareaedꞌa.

²⁷ Mʉã wãrĩnu marãã jaraya, ʉ̃kʉrʉ nama kꞌobꞌebara beudꞌai nawedꞌa ũdudꞌaya Daizezeta Nokꞌodꞌebemata.

Jesús awuaradꞌa

²⁸ Maʉ̃ta jaradꞌa tẽã ewari ocho babʉrʉdꞌe Jesúsbara jʉre edesia Pedrota, Juanta, Jacobota, aramaʉ̃ne kꞌatumaĩnu wãrĩzesia zhiwidꞌidꞌe.

²⁹ Zhiwidꞌi nʉmʉne kĩrã awuarasia, izhi wuara totroa ʉ̃nasia.

³⁰ Maʉ̃ne ũmakĩrã ũme izhi ũme bedꞌea kꞌopanasia Moiséta, Elíata.

³¹ Maʉ̃rã zhi ũdubisidꞌa ʉ̃na kĩrãwãrẽã. Jara kꞌopanasia izhi beuidꞌebema Jesúsbara aribꞌaeita Jerusalénne.

³² Maʉ̃ẽna Pedrora izhi bawara kꞌopanʉ bawara kꞌãbãẽã dapea kꞌopanasia. Mawũãmina ʉ̃rʉ̃ma kꞌopanebʉdaba ũdusidꞌa Jesús ʉ̃na kĩrãwãrẽã nʉmʉta, ũdusidꞌa ũmakĩrã ũme kꞌopanʉta izhi bawara.

³³ Maʉ̃rãta Jesús maẽba ãĩ wãbʉdadꞌera Pedrobara Jesúa mawũãsia: Miã Ũrãgꞌabari, biga dazhirã nama kꞌobꞌera. De kꞌãĩdeta ũbea odꞌaya abꞌa bʉita, abꞌa Moiséita, abꞌa Elíaita. Pedrobara sãwũãta kꞌawua ẽãta mawũã bedꞌeasia.

³⁴ Mawũã bedꞌea kꞌobꞌʉdꞌe jãrãrã zebʉrʉba ãnabꞌarikuasia. Mawũẽ ãzhira perasidꞌa jãrãrãne edꞌa dogꞌoba.

³⁵ Maʉ̃ne Daizezeta jãrãrãneba bedꞌeabʉrʉta mawũãsia: Naʉ̃ mʉ Warra mʉãrã kʉãgꞌa, izhi bedꞌeara ũrĩũdua.

³⁶ Mawũã bedꞌea chũbʉrʉdꞌera Jesús kꞌobꞌasia abꞌa. Ãzhira chupeasidꞌa, maʉ̃ ewadera miõã jaradꞌa ẽbasia ãzha ũdudꞌapeadꞌara.

Jesúsba bꞌebidꞌa kũrã wawa bꞌʉta

³⁷ Nrũẽma kꞌatumaneba zebʉdadꞌera daucha zesia kꞌabanata.

³⁸ Maʉ̃ne ũmakĩrã abꞌaʉba kꞌabananeba nemi jĩgua mawũãsia: Miã Ũrãgꞌabari, mʉ biata odua mʉ warrata akʉdua mʉã abꞌabai erubꞌʉta.

³⁹ Jaiba jidabʉrʉdꞌera kꞌawua ẽãne jʉrabibaria, abꞌaedꞌa wawabibaria, mobe ibꞌa kꞌopepea zebibaria, aramaʉ̃ne puo bꞌʉra kenabꞌari ẽã.

⁴⁰ Mʉrã bʉa jʉrʉkuadꞌaa zuburia bedꞌeasia ãĩ jʉretadꞌamarẽã, mawũãmina bꞌeda ẽbasia.

⁴¹ Mawũãĩ Jesúsbara panaʉ̃ mawũãsia: ¡Marã soidꞌu duanu ẽãta bia ẽãta bꞌea! ¿Mʉrã sõmbeedꞌa marã bawara bꞌaipe, mʉãrã sõmbeedꞌa zrogꞌa nʉmaĩpe? Naĩnu wedua bʉzhi warra.

⁴² Kũrãta urudꞌera jaibara bꞌaebipe abꞌaedꞌa wawabisia. Mawũãmina Jesúsbara jaira kẽãsia, aramaʉ̃ne kũrã bꞌebipe diasia zhi zezea.

⁴³ Jõmaʉ̃ba bia akʉdruasidꞌa zhi zroma baera Daizezera. Ne jõma obꞌʉ kꞌarea bia akʉdrua nʉmene Jesúsbara izha jʉrʉkuadꞌaa mawũãsia:

Jesúsba wakusa jaradꞌa izhi beadꞌaita

⁴⁴ Bude badꞌaita mʉã jaraita bia ũrĩũdua. Mʉ Beubari Bape bꞌʉra chãbꞌaridꞌaya zhãrã juwuadꞌe.

⁴⁵ Maʉ̃ta jarabʉrʉra ãzhara sãwũãta kꞌawuadꞌa ẽbasia sãwũãta kꞌawuabiga ẽãba. Perasidꞌa maʉ̃ bedꞌeata widꞌidꞌaira.

¿Kꞌaita audre zhi zromape?

⁴⁶ Mawũẽ izha jʉrʉkuadꞌara bĩ ẽã bedꞌeasidꞌa ãzhirãnebema kꞌaita audre zhi zroma ʉ̃rʉ̃.

⁴⁷ Jesúsbara sodꞌeba sãwũã krĩcha kꞌobꞌeta kꞌawuape wũãwũãta jidape izhi kꞌaita kꞌobꞌʉpe,

⁴⁸ mawũãsia: Mʉnebema ĩjã bꞌʉdꞌeba bariduba wũãwũã kꞌãwũã bꞌʉta bia edara mʉta bia edabʉrʉa. Mʉta bia edabʉrʉra bia edabʉrʉa mʉ zokꞌadꞌata. Marã jõmaʉ̃nebema zhi zroma ẽãne bꞌʉta maʉ̃ta audre zhi zroma.

Dazhirãta jura ẽãrã dazhirã bawarabema

⁴⁹ Juanbara mawũãsia: Miã Ũrãgꞌabari, daibara iabꞌa ũdusidꞌa jai ãĩ jʉrekua nʉmʉta bʉ trʉ̃neba. Daibara maʉ̃ kꞌaudꞌa bꞌa ẽbamarẽã jarasidꞌa dazhirã bawara bꞌʉ ẽbaera.

⁵⁰ Mawũãĩ Jesúsbara mawũãsia: Maʉ̃ kꞌaudꞌa bꞌa ẽbamarẽã jararãũdua, dazhirãta jura ẽãrã dazhirã bawarabema.

Jesúsba kẽãna Jacobota Juanta

⁵¹ Jesús ʉ̃taa wãĩta ewarita arababʉrʉdꞌera wãnigua wãsia Jerusalén pʉwʉrʉedꞌa.

⁵² Maʉ̃nerã izhi naa ʉ̃kʉrʉ zokꞌakuasia. Mawũẽ maʉ̃rã wãpe pʉwʉrʉ zake Samariabidꞌarãne maẽ edꞌa wãsidꞌa de jʉrʉdꞌape kꞌãĩbidꞌaita.

⁵³ Mawũãmina bꞌaribidꞌa ẽbasia Jerusalén pʉwʉrʉedꞌa wãta kꞌawuadꞌape.

⁵⁴ Maʉ̃ta ũdudꞌai Jacobo Juan izha jʉrʉkuadꞌaba mawũãsidꞌa: Nokꞌó, ¿bʉma bigabʉrʉ bãjãneba tebʉta bꞌaemarẽã jaradꞌaika Elíaba odꞌa kĩrãkꞌa obʉdaba ãzhi ba wãmarẽã?

⁵⁵ Mawũãnaĩ Jesús pʉrʉwape ãzhi kẽã mawũãsia: Marãbara kꞌawuadꞌa ẽã marã kꞌãrẽ Jawurebiadꞌeta bꞌera.

⁵⁶ Mʉ Beubari Bape bꞌʉra ze ẽbasia zhãrã jawure aduabiita, awuarabʉrʉ zesia ẽdrʉbigaita. Aramaʉ̃ne wãsidꞌa pʉwʉrʉ zake awʉrʉedꞌa.

Jesús pẽwã krĩñanapeadꞌa

⁵⁷ Odꞌe wãnane abꞌaʉba Jesúa mawũãsia: Nokꞌó, mʉã bʉra pẽwãña bʉ wãbʉrʉma.

⁵⁸ Mawũãĩ Jesúsbara mawũãsia: Usa pã de bara bꞌʉa, ibanasidꞌa de bara bꞌʉa, mawũãmina mʉ Beubari Bape bꞌʉra ne ẽã sãma kꞌãĩ bꞌaira.

⁵⁹ Maʉ̃nerã awʉrʉa mawũãsia: Mʉ kꞌaidꞌu bꞌadua. Mawũãĩ maʉ̃bara mawũãsia: Nokꞌó, mʉrã naara idu wãbirua mʉ zeze joudꞌe.

⁶⁰ Mawũãĩ Jesúsbara mawũãsia: Aduaita beuya bꞌea idu joubigarua ãzhirãta beubʉdara. Mawũãmina bʉara jaradꞌe wãrũã Daizezeta Nokꞌodꞌebemata.

⁶¹ Maʉ̃nerã awʉrʉba mawũãsia: Nokꞌó, mʉã bʉra pẽwãña, mawũãmina mʉ wãta naara jaradꞌe wãbirua mʉ dedꞌa bꞌea.

⁶² Mawũãĩ Jesúsbara mawũãsia: Iabꞌaʉba trabajo jidabʉrʉta jipa ede ẽã jẽrũya akʉra, seri ẽã Daizezeta Nokꞌodꞌebemaĩtara.