Lucas 7 - Porciones del Nuevo Testamento

Jesúsba bꞌebidꞌa nezokꞌata soldaorã nokꞌodꞌeta

¹ Izhi bedꞌeata ũrĩ kꞌobꞌea ma bedꞌeabʉrʉdꞌera Jesús wãsia Capernaúm pʉwʉrʉedꞌa.

² Maʉ̃ne soldaorã nokꞌodꞌe nezokꞌata izha bio kʉãgꞌata kꞌayata beubodꞌo basia.

³ Soldaorã nokꞌoba Jesús jarabʉdata ũrĩbʉrʉdꞌera, ʉ̃kʉrʉ izhima zokꞌakuasia nokꞌorã judíorãta, aramaʉ̃ne zuburia bedꞌeasia zepe bꞌebimarẽã izhi nezokꞌata.

⁴ Mawũẽ ãzhira Jesúsma zekuape zuburia bedꞌea mawũãsidꞌa: Bʉara soldaorã nokꞌora kꞌarebaidꞌe bꞌʉa.

⁵ Izhara dazhirã judíorã kʉãgꞌa bꞌʉba daiita pãrãsia de zhi jʉrebadata.

⁶ Mawũãnaĩ Jesús wãsia ãzhi bawara. Mawũãmina de kꞌaita babʉdadꞌera soldaorã nokꞌobara izhi bawara zhibiata ʉ̃kʉrʉ izhima zokꞌabʉrʉta jarabuesia mawũãnamarẽã: Nokꞌó, mʉrã biata bꞌʉ ẽã bʉ mʉ dedꞌa deidꞌu zeira.

⁷ Maʉ̃ba mʉrã bʉma wã ẽbasia. Mawũãmina bꞌei bedꞌeata jaradua, mawũãrã mʉ nezokꞌara bꞌeya.

⁸ Aramaʉ̃ kĩrãkꞌa mʉãrã aribꞌae bꞌʉa nokꞌoba jarabʉrʉta. Mʉãbidꞌa soldaorãta jʉre bꞌʉa mʉã jarabʉrʉdꞌe bꞌeta. Mʉã iabꞌaʉa wãrũã abʉrʉdꞌera wãbaria. Iabꞌaʉa zerua abʉrʉdꞌera zebaria. Mʉ nezokꞌaa naʉ̃ta odua abʉrʉdꞌera obaria.

⁹ Maʉ̃ta ũrĩbʉrʉdꞌera Jesús izhi kꞌarea sobiape izhi kꞌaidꞌu erjiranuta akʉ mawũãsia: Mʉã wãrĩnu marãã jaraya, mʉãrã miã Israel bꞌedꞌebema ũdu ẽã kꞌãwũã soidꞌu kꞌobꞌʉra.

¹⁰ Zokꞌakuadꞌata jẽrũya dedꞌaa zebʉdadꞌera nezokꞌara zhi bꞌemata ũdusidꞌa kꞌaya nʉmanata.

Jesúsba piradrʉbidꞌa pẽdra wauta

¹¹ Maʉ̃ tẽã Naín abada pʉwʉrʉedꞌa Jesús wãbʉrʉdꞌera, izha jʉrʉkuadꞌata bio wãne dewara wãsidꞌa kꞌabanata.

¹² Pʉwʉrʉdꞌe edꞌa wãbada kꞌaita zebʉrʉdꞌera, joudꞌe akꞌopanasia beuwãrãta, zhi papadꞌera wau maʉ̃trʉ abꞌabai bꞌasia, izhira pẽdra basia. Izhi bawara zhãrã bio kꞌopanasia pʉwʉrʉdꞌebemata.

¹³ Nokꞌo Jesúsba ũdui sozuburiape mawũãsia: Jẽgarãrũã.

¹⁴ Mobe orrape barkuata tõbꞌaribʉrʉdꞌera zhi akꞌopanʉ pi kꞌopanesia. Mawũẽ mawũãsia: ¡Kũrã, mʉã bʉaa jaraya, piradrʉrua!

¹⁵ Beudꞌara aramaʉ̃ta piradrʉpe bedꞌeasia. Aramaʉ̃ne Jesúsbara diasia zhi papaa.

¹⁶ Mawũẽ jõma peradꞌape Daizeze ibia jara mawũãsidꞌa: Naʉ̃ Jesús Daizezeba bedꞌeata jarabibarita zhi zromata piradrʉbʉrʉa dazhirãne edꞌa. Daizezera zebʉrʉa izhidꞌerãta kꞌarebadꞌe.

¹⁷ Jesúsba mawũã obʉrʉta trʉ̃poasia Judea drua jõma, drua kꞌaita tabꞌe jõma.

Juan Burukꞌoemiãba zokꞌakuadꞌa

¹⁸ Juanba jʉrʉkuadꞌabara Jesúsba mawũã onʉmʉta jõma jarasidꞌa. Mawũẽ Juanbara ũme trʉ̃sia izha jʉrʉkuadꞌadꞌebemata.

¹⁹ Mobe Jesúsma zokꞌakuasia widꞌi mawũãnamarẽã: ¿Bʉka zhãrã Ẽdrʉbiita zeita bꞌadꞌara, o daibara wadꞌi awʉrʉta jʉ̃ãnaĩ?

²⁰ Aramaʉ̃ne maʉ̃rã Jesúsma zedꞌape mawũãsidꞌa: Daira Juan Burukꞌoemiãba bʉma zokꞌakuasia widꞌi mawũãnamarẽã: ¿Bʉka zhãrã Ẽdrʉbiita zeita bꞌadꞌara, o daibara wadꞌi awʉrʉta jʉ̃ãnaĩ?

²¹ Maʉ̃nerã bio bꞌebikuasia kꞌaya bꞌeta, pua bꞌeta, jaiba wawa bꞌeta, daʉbꞌerrea bꞌeta bio ne ũdubikuasia.

²² Jesúsbara panaʉ̃ mawũãsia: Wãũdua, mobe Juanʉã kꞌawuabiudua mazha ũrĩbʉdata mazha ũdubʉdata. Daʉbꞌerrea bꞌera ne ũdu tupudꞌea audua, wã bꞌe ẽã bꞌera wã tupudꞌea, aidꞌaba kꞌaya bꞌera nene ẽã tupudꞌea, ne ũrĩ ẽã bꞌera ne ũrĩ tupudꞌea, beudꞌapeadꞌara piradrʉ tupudꞌea, zuburia bꞌea jara bara bꞌʉa ẽdrʉdꞌaidꞌebemata bedꞌea biata.

²³ Sobia bꞌaya mʉnebemata ĩjã ẽã nʉmʉ ẽãrã.

²⁴ Juanba zokꞌakuadꞌata wãbʉdadꞌera Jesúsbara Juan jarabʉrʉta zhãrã kꞌobꞌea mawũãsia: ¿Drua drudrua tabꞌʉidꞌura marãbara kꞌãrẽta akʉdꞌe jũẽsidꞌa? ¿Bariduta bꞌʉta akʉdꞌe jũẽsidꞌakꞌa?

²⁵ ¿O kꞌãrẽta akʉdꞌe jũẽsidꞌa? ¿Ũmakĩrã wua biaba zho bꞌʉta akʉdꞌe jũẽsidꞌakꞌa? Wua biaba zho ne biata erubꞌera reyrã dedꞌabʉrʉ bꞌea.

²⁶ ¿Kꞌãrẽta akʉdꞌe jũẽsidꞌa? ¿Daizezeba bedꞌeata jarabibarita akʉdꞌe jũẽsidꞌakꞌa? Izhia, mʉã marãã jaraya, kꞌãʉ̃ Daizezeba bedꞌeata jarabibarita audre zhi zroma.

²⁷ Kꞌãʉ̃ẽnabemata zhi bꞌʉmata mawũã bꞌʉa: Mʉ bedꞌeata jarabarita mʉã bʉ na zokꞌaya, bia ẽãrã ãmabʉdaba maʉ̃bara bʉ zei ota araa obʉrʉkaya bʉ na. (Malaquías 3:1)

²⁸ Mʉã marãã jaraya, wũẽrãba tobʉdara Daizezeba bedꞌeata jarabibarira audre zhi zroma ne ẽã Juan Burukꞌoemiã kꞌãñabara. Mawũãmina Daizezeta Nokꞌodꞌebemata zhi zroma ẽãta bꞌʉra zhi zroma izhi kꞌãñabara.

²⁹ Maʉ̃ jarabʉrʉta zhãrã jõmaʉ̃ba ũrĩbʉdadꞌera, rey Romanebemaĩta plata widꞌibadabidꞌa ũrĩbʉdadꞌera jarasidꞌa Daizezeba Juanneba ũrãgꞌa nʉmʉrã bigata, ãzhira aramaʉ̃ne zhi buru kꞌoema basia Juanba.

³⁰ Mawũãmina fariseorãbara, ũrãgꞌa Moisédꞌe jarabadabara seribidꞌa ẽbasia Daizezeba ãzhibari biata okrĩña bꞌʉra, ãzhira aramaʉ̃ne zhi buru kꞌoema ẽbasia Juanba.

³¹ Jesúsbara mawũãsia: ¿Zhãrã idꞌi ewadebema mʉã kꞌãrẽ ũme abꞌarika jaraipe kꞌãrẽ ũme abꞌarika bꞌe?

³² Pʉwʉrʉdꞌe warrarã jẽmene jewedꞌabada kĩrãkꞌa bꞌea, ãzhirãĩnu nemi jĩgua mawũãbada: Daiba chiruta zabʉdadꞌera marã bairadꞌa ẽbasia, dai miã sopua trʉ̃ãbʉdadꞌera marã jẽgadꞌa ẽbasia.

³³ Marã aramaʉ̃ kĩrãkꞌa bꞌeta Juan Burukꞌoemiã zedꞌara nekꞌo ẽã, vino do ẽã bꞌʉ baera jaita erubꞌʉa abꞌea.

³⁴ Waya mʉ Beubari Bape bꞌʉta zedꞌara nekꞌo, vino do bꞌʉ baera nekꞌomiã, vino domiã abꞌea. Aramaʉ̃ne jara bꞌea zhibiata bꞌʉta rey Romanebemaĩta plata widꞌibada bawara dewaraurã kꞌazhirua omiãrã bawara.

³⁵ Mawũãmina Daizeze krĩchara bigata kꞌawua bꞌea izhidꞌebemata ĩjã bꞌeta bia nʉmeba.

Jesús jũẽna Simón fariseo maẽ

³⁶ Fariseorãnebema abꞌaʉba Jesúa jarasia izhi ũme nekꞌomarẽã. Mawũẽ fariseo dedꞌa wãpe nekꞌo bꞌesia.

³⁷ Maʉ̃ne wũẽrã pʉwʉrʉdꞌebemata kꞌazhirua omiãba, Jesús mawũã fariseo dedꞌa nekꞌo bꞌʉta kꞌawuai botelladꞌe wesia kerata.

³⁸ Mobe izhi jẽrũ kꞌaita bꞌepe jẽrũ daubꞌaba surruabipe põãsã jaresia izhi budꞌaba. Mobe jẽrũ nigape ʉ̃rʉ̃ weasia kerata.

³⁹ Fariseo Jesús trʉ̃naba maʉ̃ta ũdui izhikusa mawũãsia: Naʉ̃ta Daizezeba bedꞌeata jarabibarita bꞌʉbʉrʉ kꞌawua kꞌausia wũẽrã sãwũã bꞌʉba izhi tõbꞌari kꞌobꞌʉta, kꞌazhirua omiãta bꞌʉta.

⁴⁰ Maʉ̃ne Jesúsbara mawũãsia: Simón, mʉã bʉaa ne jaraya. Mawũãĩ izhara mawũãsia: Jaradua Miã Ũrãgꞌabari.

⁴¹ Mawũãĩ Jesúsbara mawũãsia: Plata prestabariba erubꞌasia ũme debe panʉta. Trabajodꞌera abꞌa ewari quiniento deweta dewe basia denario quiniento, dewarabemata cincuenta.

⁴² Ãzhara kꞌãrẽba pagꞌaita ne ẽãba ãzhi ũmewedꞌa bedꞌea ne ẽã panʉsia deweta panʉta. ¿Kꞌõbe bʉa mʉãã jaradua, plata prestadꞌara ãzhidꞌebemabara sãʉ̃ba audre kʉãgꞌaipe?

⁴³ Mawũãĩ Simónbara panaʉ̃ mawũãsia: Mʉmaãrã audre diaita bꞌadꞌaba. Mawũãĩ Jesúsbara mawũãsia: Bʉa arimaẽ jarabʉrʉa.

⁴⁴ Mobebʉrʉ wũẽrãta akʉpe Simoũã mawũãsia: ¿Bʉara akʉ kꞌobꞌʉ ẽka naʉ̃ wũẽrã? Mʉ bʉ dedꞌa deidꞌu zebʉrʉdꞌera bʉara mʉãã baniã dia ẽbasia mʉ jẽrũĩtara. Mawũãmina naʉ̃ wũẽrãbara mʉ jẽrũrã daubꞌaba surruabipe põãsã jarebʉrʉa izhi budꞌaba.

⁴⁵ Bʉara mʉrã kĩrãma niga ẽbasia. Maʉ̃ne naʉ̃ wũẽrãbara mʉ deidꞌu zedꞌadꞌebemata niga tau ẽã mʉ jẽrũrã.

⁴⁶ Bʉara mʉ burura nendragꞌabara chiratʉ ẽbasia. Maʉ̃ne naʉ̃ wũẽrãbara kerata weabʉrʉa mʉ jẽrũne.

⁴⁷ Mawũẽ mʉã bʉaa jaraya, kꞌazhirua biodꞌebara mʉãrã bedꞌea ne ẽã bꞌidꞌapʉa, mawũẽ mʉrã bio kʉãgꞌa. Mawũãmina iabꞌa izhima kꞌazhirua bio ne ẽãta bedꞌea ne ẽã bꞌʉra maʉ̃bara bio kʉãgꞌa ẽã.

⁴⁸ Mobe wũẽrãã mawũãsia: Bʉra kꞌazhiruata biodꞌebara mʉãrã bedꞌea ne ẽã bꞌidꞌapʉa.

⁴⁹ Mawũãĩ ãba nekꞌo kꞌobꞌebara ãzhirãĩnu mawũãsidꞌa: ¿Naʉ̃ kꞌaipe mawũã kꞌazhiruata biodꞌeba zhãrã bedꞌea ne ẽã bꞌʉira?

⁵⁰ Maʉ̃ne Jesúsbara wũẽrãã mawũãsia: Bʉzhi soidꞌu kꞌobꞌʉba ẽdrʉbʉrʉa, wãrũã adu-a.