Lucas 5 - Porciones del Nuevo Testamento

Bꞌeda bio jidadꞌapeadꞌa

¹ Ewari abꞌa Jesús bꞌʉta Genesaret dota jedꞌea õbꞌʉ doya bꞌʉdꞌe, izhira kꞌabanaba pẽũsua erubarabꞌesia Daizeze bedꞌeata ũrĩnaĩ kꞌarea.

² Maʉ̃ne izha ũdusia jãbata ũme doya õpanʉta. Bꞌeda beabadara jãbadꞌeba ãĩ wãnape ãzhi atarraya sʉgʉ duanasia.

³ Mawũẽ maʉ̃ abꞌaʉdꞌe edꞌa bꞌaribʉrʉta Simón jãbadꞌe bꞌaripe jarasia doyauba wĩka nabuaedꞌa ededꞌamarẽã. Mobe jewedꞌape jãbadꞌeba ũrãgꞌasia kꞌabanata.

⁴ Ma bedꞌeape Simoũã mawũãsia: Nabuaedꞌa wigui ededua, mobe mazhi atarraya doidꞌu bꞌaribueudua bꞌeda beaita.

⁵ Mawũãĩ Simónbara panaʉ̃ mawũãsia: Miã Ũrãgꞌabari, daira diamase dobꞌari ʉ̃nadrʉdꞌamina daibara miã kꞌãrẽta beadꞌa ẽbasia. Mawũãmina bʉ bedꞌeadꞌeba mʉãrã bꞌaribueya atarraya.

⁶ Aramaʉ̃ne bꞌaribuebʉdadꞌera bꞌeda bio edꞌa bꞌaebʉrʉba zʉgʉaba atarraya tʉdꞌʉzoa bʉsadꞌewasia.

⁷ Mawũẽ dewarau jãbadꞌe kꞌobꞌeta juwua tũẽ trʉ̃sidꞌa ãzhita kꞌarebadꞌe zedꞌamarẽã. Zebʉdadꞌera jãba ũmewedꞌa birabʉrʉba ta wãde basia.

⁸ Maʉ̃ta Simón Pedroba ũdui Jesús kĩrãbita sãkꞌokꞌodꞌe kꞌobꞌepe mawũãsia: Nokꞌó, mʉ maẽbara ãĩ wãrũã, mʉrã kꞌazhirua omiãta bꞌʉa.

⁹ Bꞌedata mawũã jidabʉdaba nitbia perasia izhi bawara kꞌobꞌe bawara.

¹⁰ Abꞌarika Jacobo Juan ũme perasidꞌa Zebedeo warrarãta, bꞌeda kꞌaudꞌa panʉta Simón bawarabemata panasia. Jesúsbara Simoũã mawũãsia: Perarãrũã, mʉnebemata ĩjãnamarẽã idꞌidꞌeuba bʉra zhãrã ũrãgꞌabarita bꞌaya.

¹¹ Jãbara drua wedꞌape ne jõma idu ãmaẽnape wãsidꞌa Jesús kꞌaidꞌu.

Jesúsba bꞌebidꞌa aidꞌaba kꞌaya bꞌʉta

¹² Ewari abꞌa Jesús pʉwʉrʉdꞌe bꞌʉdꞌe ũmakĩrãta zesia aidꞌaba bira bꞌʉta. Maʉ̃bara Jesústa ũdui sãkꞌokꞌodꞌe kĩrã egoroma tʉ kꞌobꞌepe zuburia bedꞌea mawũãsia: Nokꞌó, bʉa krĩñabʉrʉ mʉrã nene ẽã bꞌebirua.

¹³ Mawũãĩ Jesúsbara juwuaba tõbꞌari mawũãsia: Mʉãrã krĩña bꞌʉa, mawũẽ bʉra nene ẽã bꞌidꞌa. Audre ẽãne aidꞌara nebasia.

¹⁴ Mobebʉrʉ Jesúsbara mawũãsia: Bʉ kꞌãwũã bꞌebʉrʉta miõã jararãrũã, awuarabʉrʉ wãpe sacerdotea ũdubirua, mobe bʉzhi nene ẽã bꞌedꞌabari nendʉwʉrʉta babuedꞌamarẽã diadua, Moiséba jaradꞌa kĩrãkꞌa odua bʉ bꞌebʉrʉta ãzha kꞌawuadꞌamarẽã.

¹⁵ Aramaʉ̃ne Jesús wuaabʉrʉ trʉ̃poa wãsia. Zhãrã bio bʉredrʉ toto nʉmasia izhi bedꞌeata ũrĩnaĩta, aramaʉ̃ne bꞌebikuamarẽã ãzhi kꞌaya bꞌeta.

¹⁶ Mawũãmina izhira miõ ne ẽã maẽ wã bazhia zhiwidꞌiita.

Jesúsba bꞌebidꞌa kꞌakua pira ẽã kꞌaya bꞌʉta

¹⁷ Ewari abꞌa Jesús miã ũrãgꞌa nʉmʉne jewedꞌa duanasia fariseorãta ũrãgꞌa Moisédꞌe jarabada bawara. Ãzhira pʉwʉrʉ zaketa tabꞌe maẽba zekuasia Galilea druadꞌeba, Judea druadꞌeba, Jerusalénneba. Maʉ̃nerã Daizeze zareara Jesú ũme nʉmasia zhãrã bꞌebiita.

¹⁸ Maʉ̃ne ũmakĩrãrã ʉ̃kʉrʉba ũmakĩrãta jirabꞌadꞌe wesidꞌa kꞌakua pira ẽã kꞌaya bꞌʉta, edꞌa ede krĩña panasia Jesús kĩrãbita bꞌʉdꞌaita.

¹⁹ Mawũãmina kꞌabanata nʉmʉba bꞌedꞌa ẽbaera de ʉ̃rʉ̃ wãrĩzedꞌape ewadꞌape jirabꞌadꞌeba zhãrã ẽsadra ʉra bꞌaebisidꞌa Jesús kĩrãbita.

²⁰ Ãzhi soidꞌu kꞌobꞌeta Jesúsba ũdui kꞌakua pira ẽã kꞌaya bꞌʉa mawũãsia: Bʉra kꞌazhiruata biodꞌebara mʉãrã bedꞌea ne ẽã bꞌidꞌapʉa.

²¹ Maʉ̃nerã ũrãgꞌa Moisédꞌe jarabadara fariseorã bawara krĩcha mawũãsidꞌa: ¿Naʉ̃ kꞌaipe mawũã Daizezema mitia bedꞌeaira? ¿Kꞌazhiruata biodꞌebara zhãrã kꞌaiba bedꞌea ne ẽã bꞌʉ bꞌeipe? Awuarabʉrʉ bꞌeya Daizezebʉrʉ.

²² Jesúsbara ãzhi mawũã krĩcha kꞌobꞌeta kꞌawuape mawũãsia: ¿Kꞌãrẽta krĩcha kꞌobꞌe marã sodꞌera?

²³ ¿Kꞌãrẽta audre borekea jaraidꞌe bꞌʉ: Kꞌazhiruata biodꞌebara bedꞌea ne ẽã bꞌidꞌapʉa aita, o piradrʉpe nimibarua aita?

²⁴ Kꞌawuaudua, mʉ Beubari Bape bꞌʉbara naʉ̃ druadꞌera zareata erubꞌʉa kꞌazhiruata biodꞌebara zhãrã bedꞌea ne ẽã bꞌʉita. Mobebʉrʉ kꞌakua pira ẽã kꞌaya bꞌʉa mawũãsia: Mʉã bʉaa jaraya: Piradrʉrua, bʉzhi jirabꞌa jiraedarua, mobe dedꞌaa wãrũã.

²⁵ Audre ẽãne ãzhi kĩrãbita piradrʉpe jirabꞌa izhi tabꞌadꞌata jiraedape dedꞌaa wãsia Daizeze ibia jara.

²⁶ Mawũẽ jõmaʉ̃ba bia akʉdrua Daizeze ibia jarasidꞌa. Kꞌãbãẽã pera kꞌobꞌeidꞌu mawũãsidꞌa: Idꞌi ũdubʉda ne biata.

Jesúsba jʉrʉdꞌa Leví

²⁷ Maʉ̃ tẽã Jesús wãbʉrʉdꞌera ũdusia impuesto widꞌibarita Leví abadata, jewedꞌa bꞌʉta rey Romanebemaĩta impuesto diabada maẽ bꞌasia, maʉ̃ne mawũãsia: Mʉ kꞌaidꞌu bꞌadua.

²⁸ Mawũãĩ izhira ne jõma ãmaẽkua piradrʉpe kꞌaidꞌu wãsia.

²⁹ Mobebʉrʉ Levíbara Jesúita kꞌãbãẽã ne obigasia izhi dedꞌa. Maʉ̃nerã impuesto widꞌibadata bio kꞌobꞌedꞌe awʉrʉrãsidꞌa kꞌobꞌeasia ãzhi bawara nekꞌo.

³⁰ Mawũẽ ũrãgꞌa Moisédꞌe jarabadabara fariseorã bawarauba Jesúsba jʉrʉkuadꞌata jara mawũãsidꞌa: ¿Marã kꞌãrẽã nekꞌo duanu impuesto widꞌibada bawara, dewaraurã kꞌazhirua omiãrã bawara?

³¹ Mawũãnaĩ Jesúsba panaʉ̃ mawũãsia: Bika bꞌebara nesidꞌa duanu ẽã zhãrã bꞌebi bꞌʉra, awuarabʉrʉ nesidꞌa bꞌea kꞌayarãbʉrʉ.

³² Aramaʉ̃ kĩrãkꞌa mʉãrã jʉrʉdꞌe ze ẽbasia ãzhikusa biata bꞌeta, awuarabʉrʉ ẽdrʉbigaita jʉrʉdꞌe zesia kꞌazhirua omiãrãta, kꞌazhiruara ãmape Daizezeta pẽwãnamarẽã.

Widꞌidꞌapeadꞌa nekꞌo ẽã zhiwidꞌi bꞌedꞌebemata

³³ Mawũẽ ãzhara Jesúa mawũãsidꞌa: ¿Kꞌãrẽneba Juanba jʉrʉkuadꞌara biodꞌe nekꞌo ẽã zhiwidꞌi duanu, abꞌarika bꞌea fariseorãnesidꞌa, mawũãmina bʉrera nekꞌo kꞌãrẽ do duanu ẽka?

³⁴ Mawũãnaĩ Jesúsbara mawũãsia: ¿Zhãrã juwua jida nʉmʉne duanurã marãbara nekꞌobidꞌa ẽã duanabidꞌaika zhũmakĩrãta wadꞌi bꞌʉdꞌera ãzhi bawara?

³⁵ Mawũãmina ewarita zeya zhũmakĩrã ãzhi maẽbara ededꞌaita, maʉ̃ ewadebʉrʉ nekꞌo ẽã zhiwidꞌi bꞌeaya. (Aramaʉ̃ kĩrãkꞌa mʉta edebʉdadꞌebʉrʉ mʉã jʉrʉkuadꞌara nekꞌo ẽã zhiwidꞌi bꞌeaya.)

³⁶ Mawũãpe ne jarakꞌa mawũãsia: Miõba wua zhiwidꞌita kꞌõ edape remenda ẽã wua soreta. Mawũã ora bari zhiwidꞌita kꞌõã ẽã, awuarabʉrʉ zhiwidꞌita kꞌõ edabʉrʉra bi-ia kꞌobꞌe ẽã zhi soredꞌera.

³⁷ Miõba vino zhiwidꞌi oma tʉdꞌa ẽã ne e omata zhi sorerãnerã. Mawũã ora vino zhiwidꞌi omabara ne e oma kꞌõgꞌozoabʉrʉba wea wãña, aramaʉ̃ne ne e oma ãrĩkuaya.

³⁸ Mawũãmina vino zhiwidꞌi oma ne e omata zhiwidꞌirãnerã tʉsia bꞌʉa. Mawũãtrʉ abꞌarika bia nʉmaña.

³⁹ Miõba vino oreguea zhi zõrãta dobʉrʉbara zhiwidꞌira do krĩña ẽã. Awuarabʉrʉ mawũãbaria: Vino zhi zõrãta audre biga. (Maʉ̃bara Jesúsbara jara krĩñasia izhi ũrãgꞌara zõrãrãwedꞌabema krĩcha ũme ãba jara ẽãta ãrĩ ẽbaita.)