Lucas 24 - Porciones del Nuevo Testamento

Jesús beudꞌata piradrʉdꞌa

¹ Semana ewarita nabemata domingodꞌe diapedꞌa Jesús wuagꞌadꞌapeadꞌaidꞌu zebʉdata, wũẽrãrãbara wesidꞌa beuwãrã chiratʉdꞌaita ãzha kera odꞌapeadꞌata. Wũẽrãrã awʉrʉrãsidꞌa zesidꞌa ãzhi bawara.

² Maʉ̃nerã mongꞌara ãña ʉratʉ kꞌobꞌʉta ũdusidꞌa peña zobꞌeata tapa kꞌobꞌadꞌata.

³ Mawũẽ edꞌa wãbʉdadꞌera ũdudꞌa ẽbasia Nokꞌo Jesús kꞌakuara.

⁴ Maʉ̃ba kꞌawua ẽã krĩcha kꞌobꞌedꞌe, ũmakĩrã ũme ãzhi kꞌaita barabꞌesia wua uruzhiderrea jʉ̃ panʉta.

⁵ Wũẽrãrã perabʉdaba kĩrã bꞌarrudꞌai mawũãsidꞌa: ¿Kꞌãrẽã beuwãrã maẽ jʉrʉ panʉ zokꞌai bꞌʉra?

⁶ Nama ne ẽã, awuarabʉrʉ beudꞌata piradrʉsia. Bude baudua marãã jaradꞌata wadꞌi bꞌasidꞌe Galileadꞌe.

⁷ Mawũãsia: Mʉ Beubari Bape bꞌʉra chãbꞌaridꞌaya kꞌazhirua omiãrã juwuadꞌe, maʉ̃nerã cruzdꞌe kꞌachidꞌaya, maʉ̃ta beudꞌata piradrʉya ewari ũbeadꞌe.

⁸ Mobebʉrʉ ãzhara bude basidꞌa Jesúsba maʉ̃ta jaradꞌata.

⁹ Peña zobꞌeata nʉmʉ maẽbara jẽrũya wãnape maʉ̃ bedꞌea biata jõma jarasidꞌa Jesúsba jʉrʉkuadꞌata once duanuã, jõmaʉ̃ã jarasidꞌa zhi wuaabemarããbidꞌa.

¹⁰ Ãzhira panasia María Magdalenata, Juanata, María Jacobo papata, awʉrʉrãsidꞌa ãzhi bawara panasia, maʉ̃rãba maʉ̃ta jarasidꞌa Jesúsba jʉrʉkuadꞌaa.

¹¹ Mawũãmina ãzhima kĩrãne kꞌopana ẽbasia wũẽrãrã maʉ̃ jara kꞌopanʉrã, mawũẽ ĩjãna ẽbasia.

¹² Mawũãmina Pedro piradrʉpe wãẽba wãsia peña zobꞌeata nʉmʉĩnu. Edꞌa akʉbʉrʉdꞌera ũdusia bari burubꞌata. Mawũã berabꞌaribʉrʉba kꞌawua ẽã krĩcha dedꞌaa wãsia.

Odꞌe tebadꞌapeadꞌa Emaús pʉwʉrʉedꞌa

¹³ Maʉ̃nerã ãzhirãta ũme abꞌaʉ ewade tebasidꞌa pʉwʉrʉ zake Emaús abadaedꞌa. Maʉ̃ zhi wawarata bꞌasia once kilómetro Jerusalénneba.

¹⁴ Ãzhirãĩnu bedꞌea taidꞌata jara tebasidꞌa jõma mawũã berabꞌaribʉrʉta.

¹⁵ Mawũã ãzhirãĩnu bedꞌea taidꞌadꞌe Jesúsbara orrape tebasia ãzhi bawara.

¹⁶ Mawũãmina ãzhara akʉ kꞌopanʉta ũdukꞌawadꞌa ẽbasia.

¹⁷ Maʉ̃ne mawũãsia: ¿Mazhirãĩnurã kꞌãrẽta jara taidꞌa, kꞌãrẽã sopua panʉ?

¹⁸ Mawũãĩ abꞌaʉba panaʉ̃bʉrʉta Cleofas abadaba mawũãsia: ¿Bʉtrʉ abꞌabai Jerusalénne ãĩbemata kꞌobꞌʉka, kꞌawua ẽbʉrʉ mama sãwũã berabꞌarita naʉ̃ ewade?

¹⁹ Mawũãnaĩ izhara mawũãsia: ¿Kꞌãrẽta sãwũãsi? Mawũãĩ ãzhara mawũãsidꞌa: Jesús Nazaredꞌebemata Daizezeba bedꞌeata jarabibarita bꞌasia. Kꞌãrẽ oita bedꞌeata jaraita zhi zroma basia Daizeze kĩrãbita, zhãrã jõmaʉ̃ kĩrãbita.

²⁰ Maʉ̃ta sacerdoterã nokꞌorãba, dai nokꞌorãba beadꞌamarẽã chãbꞌarisidꞌa, mawũẽ beasidꞌa cruzdꞌe kꞌachi.

²¹ Daibara krĩcha bꞌeasia zhi jura juwuadꞌeba Israel izha ẽdrʉbigaita. Maʉ̃ta baribʉrʉ maʉ̃ jõmaʉ̃nebema idꞌi ewari ũbea babʉrʉa mawũã berabꞌaridꞌara.

²² Maʉ̃ta daira perabisidꞌa wũẽrãrã daidꞌebema ʉ̃kʉrʉba. Maʉ̃rã diapedꞌa jũẽkuasia Jesús wuagꞌadꞌapeadꞌaidꞌu.

²³ Jesús kꞌakuara ũdudꞌa ẽãba zebʉdadꞌera jarasidꞌa ángelerã ũdudꞌapeadꞌata, maʉ̃rãbara jarasidꞌabidꞌa Jesús zokꞌai bꞌʉta.

²⁴ Mawũẽ daidꞌebemata ʉ̃kʉrʉ jũẽsidꞌa Jesús wuagꞌadꞌapeadꞌaidꞌu, mawũẽ ũdusidꞌa wũẽrãrãba jaradꞌapeadꞌa kĩrãkꞌa. Mawũãmina Jesús ũdudꞌa ẽbasia.

²⁵ Mawũãnaĩ Jesúsbara mawũãsia: ¡Marã krĩcha ne ẽã bꞌea, marãbara sodꞌebara ĩñabasia jõma ĩjãĩta duanu ẽã Daizezeba bedꞌeata jarabibarirãba jaradꞌapeadꞌara!

²⁶ ¿Zhãrã Ẽdrʉbira mawũã zuburiaita bara basi ẽka ʉ̃tre Nokꞌota bꞌeira?

²⁷ Mobebʉrʉ Moiséba bꞌʉdꞌadꞌeba, Daizezeba bedꞌeata jarabibarirãba bꞌʉdꞌapeadꞌadꞌeba sãwũãta bia jarakꞌasia. Maʉ̃nerã zhi bꞌʉma jõmaʉ̃neba jarasia izhidꞌebemata jara tabꞌeta.

²⁸ Aramaʉ̃ne pʉwʉrʉ zake ãzhi wãma jũẽbʉdadꞌera, Jesús jipa totosia wawara wã kĩrãkꞌa.

²⁹ Mawũẽ ãzhara bꞌemarẽã zarea jara mawũãsidꞌa: Dai bawara bꞌedua, ewarira keuba pãrĩgu bʉsia. Mawũãnaĩ edꞌa wãsia bꞌeita ãzhi bawara.

³⁰ Ãzhi bawara nekꞌoita jewedꞌabʉrʉdꞌera pan jiraedape maʉ̃bari Daizezea zhibia jipe bꞌʉape dedꞌekasia.

³¹ Maʉ̃ daucha ũdukꞌawasidꞌa, mawũãmina izhira nebasia.

³² Mawũẽ ãzhirãĩnu mawũãsidꞌa: ¿Kꞌãwũẽ dazhira sobiasidꞌa ẽka odꞌe jarakꞌa tebasidꞌera Daizeze bedꞌea zhi bꞌʉmata?

³³ Aramaʉ̃ta piradrʉdꞌape jẽrũya wãsidꞌa Jerusalén pʉwʉrʉedꞌa, mawũẽ Jesúsba jʉrʉkuadꞌa onceta zhi jʉre duanuta ũdubʉdadꞌera ũdusidꞌa ãzhi bawara duanusidꞌa.

³⁴ Maʉ̃rãbara mawũãsidꞌa: Wãrĩnu Nokꞌora beudꞌata piradrʉsia. Zhi ũdubisia Simoũã.

³⁵ Mawũãnaĩ ãzhara nebʉrʉsidꞌa odꞌe sãwũã berabꞌaridꞌata, sãwũã ũdukꞌawasidꞌata pan bꞌʉabʉrʉdꞌe.

Jesús zhi ũdubidꞌa izha jʉrʉkuadꞌaa

³⁶ Maʉ̃nebemane bedꞌea kꞌobꞌedꞌe Jesús ãzhi ẽsadra edau nʉmepe mawũãsia: Marã adu-a bꞌeaudua.

³⁷ Maʉ̃ne kꞌãbãẽã perabʉdaba krĩchasidꞌa beuwãrãta ũdu kꞌobꞌeta.

³⁸ Mawũẽ Jesúsbara mawũãsia: ¿Kꞌãrẽã pera kꞌopanʉ, kꞌãrẽã erukꞌobꞌe marã sodꞌera kꞌãʉ̃ krĩchara?

³⁹ Akaudua mʉ juwuata mʉ jẽrũta, mʉrã mʉzhita bꞌʉa, tãũdua, akaudua, jawurera zhara ne ẽã, miã bꞌʉwʉrʉsidꞌa ne ẽã, maʉ̃ne marãbara akʉ kꞌopanʉã mʉãrã erubꞌʉta.

⁴⁰ Maʉ̃ta jara kꞌobꞌʉdꞌera kꞌachidꞌapeadꞌata akʉbigasia juwuata jẽrũta.

⁴¹ Ãzhara sobiaba wadꞌi ĩjã ẽã kꞌobꞌeba kꞌawua ẽã krĩcha kꞌobꞌedꞌe mawũãsia: ¿Marãbara nama eruduanuka kꞌãrẽ kꞌoira?

⁴² Mawũãĩ bꞌeda bamata pewa diasidꞌa, dewara diasidꞌa urrajõta.

⁴³ Izhara jidape kꞌosia ãzhi kĩrãbita.

⁴⁴ Mobe mawũãsia: Mʉ kꞌãwũã berabꞌaribʉrʉra mʉã marãã zhi jarama basia mʉ wadꞌi marã bawara bꞌʉdꞌe: Kꞌãwũã arimaẽ berabꞌariita bara basia jõma mʉnebemata zhi bꞌʉmata Moisé ũrãgꞌadꞌe tabꞌeta, Daizezeba bedꞌeata jarabibarirãba bꞌʉdꞌapeadꞌata tabꞌeta, Salmone tabꞌeta.

⁴⁵ Mobebʉrʉ krĩcha ewekuasia sãwũãta kꞌawuadꞌamarẽã Daizeze bedꞌeata zhi bꞌʉmata.

⁴⁶ Mobe mawũãsia: Mawũã zhi bꞌʉmaneba zhãrã Ẽdrʉbira beuita bara basia beudꞌata piradrʉita ewari ũbeadꞌe.

⁴⁷ Kꞌõbebʉrʉ mʉ trʉ̃neba jaradꞌaya kꞌazhiruara ãmape Daizezeta pẽwãnamarẽã, Daizezeba bedꞌea ne ẽã duanebimarẽã kꞌazhiruata biodꞌeba, drua jõmaʉ̃ maẽ mawũã jara erujʉ̃drʉdꞌaya Jerusalénneba.

⁴⁸ Marãba jaradꞌaya mʉ kꞌãwũã berabꞌaridꞌata.

⁴⁹ Wãrĩnu mʉã marãma zokꞌaya Jawurebia mʉ Zezeba diaya adꞌata. Mawũãmina Jerusalén pʉwʉrʉdꞌe duanedua zareata jidadꞌayeedꞌa ʉ̃treba zebʉrʉta.

Jesús wãna ʉ̃taa

⁵⁰ Mobebʉrʉ ãĩ jʉre edesia Betaniaĩnu, mobe Daizezeba bia jʉremarẽã juwua jirabꞌaripe ibia jarakꞌasia.

⁵¹ Mawũã ibia jarakꞌa kꞌobꞌʉdꞌe ãzhi maẽbara Daizezeba edesia ʉ̃taa.

⁵² Ãzhara ibia jaradꞌape jẽrũya Jerusalén pʉwʉrʉedꞌa wãsidꞌa kꞌãbãẽã sobia.

⁵³ Mobe Daizeze dedꞌa ewara maẽ ewariza ze bꞌeasia Daizeze ibia jara bꞌeta. Amén.