Lucas 23 - Porciones del Nuevo Testamento

Jesús ededꞌapeadꞌa Pilato kĩrãbita

¹ Mobebʉrʉ jõma piradrʉdꞌape Jesús edesidꞌa nokꞌo Pilatoma.

² Mobe ji mawũãsidꞌa: Naʉ̃ daibara ũdusidꞌa zhãrãta nokꞌorã bawara kĩrũbiga bꞌʉta. Jara bꞌʉa rey César plata diabadara diadꞌa ẽbaita, jara bꞌʉa izhira zhãrã Ẽdrʉbita Reyta.

³ Mawũãnaĩ Pilatobara widꞌi mawũãsia: ¿Bʉra Rey judíorãneka? Mawũãĩ izhara panaʉ̃ mawũãsia: Ara bʉzha jarabʉrʉa.

⁴ Mawũãĩ Pilatobara sacerdoterã nokꞌorãta kꞌobꞌea, zhãrã kꞌobꞌea mawũãsia: Mʉma ũmakĩrã naʉ̃ bedꞌea ne ẽã.

⁵ Mawũãĩ ãzhara wuaabʉrʉ mawũãsidꞌa: Zhãrãta nokꞌorã bawara kĩrũbiga bꞌʉta miã ũrãgꞌa bꞌʉa Judea drua jõma, Galilea druadꞌeba erujʉ̃drʉdꞌata naĩnu ba.

Jesús ededꞌapeadꞌa Herode kĩrãbita

⁶ Mawũã Galilea jarabʉdata Pilatoba ũrĩĩ widꞌisia Galileadꞌebema kꞌawuaita.

⁷ Jarabʉdaba mamabemata kꞌawuape rey Herodeba kꞌawua oita bꞌʉdꞌeba edebigasia Herodema. Maʉ̃ ewadera maʉ̃sidꞌa bꞌasia Jerusalénne.

⁸ Aramaʉ̃ne Herodeba Jesús ũdubʉrʉdꞌera kꞌãbãẽã sobiasia ũdu krĩña bꞌʉta ewari dããrã basi baera. Izhi ʉ̃rʉ̃bemata ne bio ũrĩ bꞌasi baera ũdu krĩñasia ũdudꞌakꞌata obʉrʉta.

⁹ Mawũẽ ne bio widꞌisia, mawũãmina Jesúsbara panaʉ̃ ẽbasia.

¹⁰ Maʉ̃nerã sacerdoterã nokꞌorãta, ũrãgꞌa Moisédꞌe jarabadata kꞌopanasia biodꞌe ji kꞌobꞌeta.

¹¹ Mobebʉrʉ Herodebara soldaorã izhidꞌe bawarauba kꞌãrẽ ẽãne edabʉdata ãzhima sewakꞌau bꞌʉdꞌeba reyba jʉ̃bari kĩrãkꞌa wua kĩrãwãrẽãta jʉ̃bisidꞌa, mobe wakusa edebisidꞌa Pilatoma.

¹² Maʉ̃ ewadera Pilato Herode ũme ibiadꞌe bꞌasidꞌa naara zhi jurata pananata.

Jaradꞌapeadꞌa Jesús beabimarẽã

¹³ Mobebʉrʉ Pilatobara ãba trʉ̃kuasia sacerdoterã nokꞌorãta, zhãrã nokꞌorãta, zhãrã bawara.

¹⁴ Mobe mawũãsia: Marãbara ũmakĩrã naʉ̃ mʉma wesidꞌa zhãrãta nokꞌorã bawara kĩrũbiga bꞌʉ baera, mawũãmina mʉã mazhi kĩrãbita widꞌibʉrʉba mʉma naʉ̃ bedꞌea ne ẽã marãba maʉ̃ne ji kꞌobꞌedꞌera.

¹⁵ Miã Herodema bedꞌea ne ẽãba wakusa zokꞌasia mʉma. Mawũẽ izhi beadꞌaidꞌebema o ẽbasia naʉ̃bara.

¹⁶ Mawũẽ mʉãrã ẽnetaya ubigape.

¹⁷ Pilatobara cárceldꞌe bꞌeta abꞌa ẽdrʉbi bꞌasia Egiptodꞌeba ẽzoadꞌata krĩcha fiesta obada ewade.

¹⁸ Maʉ̃ne kꞌabanabara jõmaʉ̃ba nemi jĩgua mawũãsidꞌa: ¡Kꞌãʉ̃ beabirua, mobe daiitara ẽnadua Barrabáta!

¹⁹ Maʉ̃ Barrabára cárceldꞌe bꞌʉsidꞌa pʉwʉrʉdꞌe zhãrãta nokꞌorã bawara kĩrũbigadꞌa kꞌarea, miã beadꞌa kꞌarea.

²⁰ Pilato wakusa bedꞌeasia Jesús ẽna krĩñaba.

²¹ Mawũãmina ãzhara wakusa nemi jĩgua mawũãsidꞌa: ¡Cruzdꞌe kꞌachibirua! ¡Cruzdꞌe kꞌachibirua!

²² Pilato bedꞌeama ũbeata mawũãsia: ¿Kꞌãrẽ bia ẽãta osi naʉ̃bara? Mʉma naʉ̃bara izhi beadꞌaidꞌebema o ẽbasia. Mawũẽ mʉãrã ubigape ẽnetaya.

²³ Mawũãĩ ãzhara wuaabʉrʉ nemi jĩgua jarasidꞌa cruzdꞌe kꞌachibimarẽã. Sacerdoterã nokꞌorã bawara ãzhi mawũã nemi jĩgua bꞌiabʉdaba aribꞌaesia.

²⁴ Aramaʉ̃ne Pilatobara aribꞌaesia ãzha widꞌi bꞌera.

²⁵ Mobe zhãrãta nokꞌorã bawara kĩrũbigadꞌa kꞌarea, miã beadꞌa kꞌarea, Barrabá cárceldꞌe bꞌʉdꞌapeadꞌata ẽnetasia ãzha widꞌidꞌapeadꞌata. Mobe Jesús chãbꞌarisia ãzha krĩñane.

Cruzdꞌe kꞌachi beudꞌa Jesús

²⁶ Edebʉdadꞌera Simón Cirene pʉwʉrʉdꞌebemata jidasidꞌa meã bꞌadꞌata taita, mobe cruzta ataubisidꞌa edemarẽã Jesús kꞌaidꞌu.

²⁷ Maʉ̃nerã kꞌabanata pʉwʉrʉdꞌebemata kꞌaidꞌu kuataidꞌera wũẽrãrã ʉ̃kʉrʉ sopua jẽgasidꞌa izhi kꞌarea.

²⁸ Maʉ̃ne Jesúsbara ãzhi akʉpe mawũãsia: Wũẽrãrã Jerusalénnebema, jẽgarãũdua mʉ kꞌarea, awuarabʉrʉ jẽgaudua mazhi kꞌarea, mazhi warrarã kꞌarea.

²⁹ Ewarita zeya, maʉ̃nerã mawũãnaña: Sobiadꞌaidꞌe bꞌʉa todꞌakꞌara, bꞌiogꞌoadꞌakꞌara, wũãwũã ju dawuadꞌakꞌara.

³⁰ Maʉ̃nerã kꞌatuma nʉmeã mawũãnaña: Dai ʉ̃rʉ̃ bꞌaedua. Eya zake nʉmeã mawũãnaña: Dai ãnatʉrua.

³¹ Mʉ bedꞌea ne ẽãba bakuru onoã kĩrãkꞌa kꞌoabaidꞌe bꞌʉ ẽãta kꞌãwũã beabidꞌaira, ¿bedꞌea bara bꞌeba bakuru põ kĩriakꞌa kꞌoabasuta bꞌera audre odꞌai ẽka?

³² Jesús bawara dewara ũme edesidꞌa bia ẽã omiãrãta beadꞌaita.

³³ Aramaʉ̃ne Buru Bꞌʉwʉrʉ abadaidꞌu jũẽkuape Jesús mama cruzdꞌe kꞌachisidꞌa. Bia ẽã omiãrãsidꞌa kꞌachisidꞌa abꞌa juwua araare, abꞌa juwua ãkꞌaare.

³⁴ Maʉ̃nerã Jesúsbara mawũãsia: Zeze, bedꞌea ne ẽã bꞌʉkuadua ãzhara kꞌawuadꞌa ẽbaera kꞌãrẽ obꞌeta. Maʉ̃nerã soldaorãbara izhi wuara ãzhirãĩnu drasidꞌa sãwũã dradꞌaidꞌebemata odꞌape.

³⁵ Zhãrãbara Jesús akʉ duanasia, nokꞌorãbidꞌa ãzhima sewakꞌau bꞌʉdꞌeba mawũãsidꞌa: Awʉrʉrã kꞌarebakuasia. Mawũẽ izhikusa ẽdrʉibara naʉ̃ta zhãrã Ẽdrʉbita Daizezeba jʉrʉdꞌabʉrʉ.

³⁶ Soldaorãbidꞌa ãzhima sewakꞌau bꞌʉdꞌeba orradꞌape ne oregueata diabʉdata,

³⁷ mawũãsidꞌa: Bʉta judíorã Reybʉrʉ bʉzhikusa ẽdrʉrua.

³⁸ Kꞌãrẽã beadꞌaita izhi ʉ̃rʉ̃ bꞌʉ jirabꞌasia, maʉ̃ta griego bedꞌeadꞌe, latin bedꞌeadꞌe, hebreo bedꞌeadꞌe mawũã bꞌasia: Naʉ̃ Rey judíorãneã.

³⁹ Bia ẽã omiãrãta kꞌachi jirapanʉbara abꞌaʉba Jesús ijura jara mawũãsia: Bʉta zhãrã Ẽdrʉbibʉrʉ bʉzhikusa ẽdrʉrua, ẽdrʉbigarua daisidꞌa.

⁴⁰ Mawũãĩ dewarabemaba panaʉ̃ kẽã mawũãsia: ¿Bʉsidꞌa abꞌarika beuidꞌe bʉara wawia ẽka Daizezera?

⁴¹ Dazhira wãrãnebai bia zuburia barabꞌʉa, kꞌãwũã barabꞌʉa dazha bia ẽãta odꞌapeadꞌadꞌeba. Maʉ̃ne naʉ̃bara bia ẽãrã o ẽbasia.

⁴² Mawũãpe Jesúa mawũãsia: Mʉrã budebarua bʉta Rey babʉrʉdꞌera.

⁴³ Mawũãĩ Jesúsbara mawũãsia: Mʉã wãrĩnu bʉaa jaraya, idꞌi bʉra mʉ ũme kꞌobꞌaya ʉ̃tre.

⁴⁴ Ʉ̃matipauba drua jõma pãrĩgusia a las tres bayeedꞌa.

⁴⁵ Aramaʉ̃ne ʉ̃madaura pãrĩgusia, Daizeze dedꞌa wua eubꞌari jirabꞌʉra kꞌõã totosia ẽsadra.

⁴⁶ Maʉ̃nerã Jesúsbara nemi jĩgua mawũãsia: Zeze, mʉãrã bʉ juwuadꞌe chãbꞌariya mʉ jawurera. Mawũãpe beusia.

⁴⁷ Soldaorã nokꞌoba maʉ̃ta ũdui Daizeze ibia jara mawũãsia: Wãrãne ũmakĩrã naʉ̃ bia basia.

⁴⁸ Kꞌabanata mama kꞌobꞌebara jõmaʉ̃ba mawũã berabꞌaribʉrʉta ũdudꞌai, jẽrũya wãsidꞌa sopuaba trũã neãchi.

⁴⁹ Mawũãmina jõma Jesúsba ũdukꞌaubara, wũẽrãrã Galilea druadꞌeba izhi kꞌaidꞌu zekuadꞌabara wawarauba akʉ duanasia mawũã dogꞌora.

Jesús wuagꞌadꞌapeadꞌa

⁵⁰ José abadata bꞌasia Arimatea pʉwʉrʉdꞌebemata, maʉ̃ pʉwʉrʉra Judea druadꞌebema. Nokꞌorã wagꞌaurãnebemata maʉ̃ biata bꞌasia.

⁵¹ Maʉ̃bidꞌa jʉ̃ã bꞌasia Daizezeta Nokꞌodꞌebemata. Mawũẽ krĩcha abꞌarika ẽbasia mawũã obʉdara jarirãba.

⁵² Mawũẽ Pilatoma wãpe widꞌisia Jesús kꞌakuata.

⁵³ Aramaʉ̃ne cruzdꞌebara ãĩ edape burasia burubꞌaba, mobe edꞌa tabꞌʉsia peñata zobꞌea kꞌorubidꞌa maẽ, mamarã beuwãrã wadꞌi bꞌʉdꞌa ẽbasia miõta.

⁵⁴ Maʉ̃ ewadera aribꞌae jirpanʉta nrũẽma sábadodꞌe ẽnaʉ̃bada basia.

⁵⁵ Wũẽrãrã Jesús kꞌaidꞌu Galileadꞌeba zedꞌapeadꞌasidꞌa kꞌaidꞌu zebʉdaba ũdusidꞌa beuwãrã wuagꞌaidꞌebema nʉmʉ maẽ Jesús kꞌakua tabꞌʉbʉdata.

⁵⁶ Mobe jẽrũya dedꞌaa wãnape kerata osidꞌa beuwãrã kꞌakua chiratʉdꞌaita. Nrũẽma ẽnaʉ̃bada ewade ẽnaʉ̃sidꞌa Daizezeba jara bꞌʉ kĩrãkꞌa.