Lucas 22 - Porciones del Nuevo Testamento

Krĩcha jʉrʉdꞌapeadꞌa Jesús beadꞌaita

¹ Kꞌaita bata nʉmasia fiesta pan ne oreguea ne ẽã kꞌobadata, maʉ̃ta jarabada Egiptodꞌeba ẽzoadꞌata krĩchabadata.

² Sacerdoterã nokꞌorãta bꞌera ũrãgꞌa Moisédꞌe jarabadata bꞌera krĩcha jʉrʉ bꞌeasia Jesús sãwũã beadꞌaita, ãzhara wawia bꞌe baera zhãrã bꞌeta.

³ Maʉ̃ne ãtõmiãta edꞌa wãsia Judadꞌe, ijaramiã trʉ̃ta Iscariote basia. Jesúsba jʉrʉkuadꞌata maʉ̃ta zhi doce basia.

⁴ Maʉ̃ta wãpe sacerdoterã nokꞌorã bawara, Daizeze de akʉbada nokꞌorã bawara bedꞌeasia Jesús sãwũã chãbꞌarikuaita.

⁵ Mawũẽ ãzhira sobiadꞌape jarasidꞌa plata diadꞌaita.

⁶ Izhara ĩjãpe kĩrãkuita bꞌesia sãwũã chãbꞌarikuaita zhãrãba kꞌawuadꞌa ẽãne.

Zhiko odꞌapeadꞌa Jesúita

⁷ Ewari arabasia pan ne oreguea ne ẽã kꞌobadata, maʉ̃nerã oveja zaketa bea bazhidꞌa Egiptodꞌeba ẽzoadꞌata krĩcha kꞌodꞌaita.

⁸ Maʉ̃ne Jesúsbara Pedrota Juanta zokꞌabʉrʉta mawũãsia: Egiptodꞌeba ẽzoadꞌata krĩcha kꞌobadata odꞌe wãũdua kꞌodꞌaita.

⁹ Mawũãĩ ãzhara mawũãsidꞌa: ¿Bʉara sãma odꞌaita krĩñape?

¹⁰ Mawũãnaĩ izhara mawũãsia: Pʉwʉrʉdꞌe marã edꞌa wãbʉdadꞌera ũmakĩrãta daucha zeya zokꞌodꞌe baniã akꞌobꞌʉta. Maʉ̃ kꞌaidꞌu wãũdua deidꞌu bayeedꞌa.

¹¹ Mobe zhidekʉa mawũãũdua: Miã Ũrãgꞌabariba mawũãsia: ¿Kʉdꞌa sãma bꞌʉ Egiptodꞌeba ẽzoadꞌata krĩcha kꞌobadata mʉã mama kꞌoira mʉã jʉrʉkuadꞌa bawarauba?

¹² Izhara marãã ũdubigaya kʉdꞌa ʉ̃rʉ̃bema kʉdꞌa zromata zhi araa omata, mama zhiko oudua.

¹³ Mawũãĩ wãbʉdadꞌera izha jaradꞌa kĩrãkꞌa ũdusidꞌa. Mawũẽ osidꞌa Egiptodꞌeba ẽzoadꞌata krĩcha kꞌobadara.

¹⁴ Nekꞌoita arababʉrʉdꞌera Jesús nekꞌoita jewedꞌasia, izhi bawara jewedꞌasidꞌa izha zokꞌakuadꞌata bꞌesidꞌa.

¹⁵ Maʉ̃nerã mawũãsia: ¡Naʉ̃ kꞌãwũã Egiptodꞌeba ẽzoadꞌata krĩcha kꞌobadata mʉãrã marã bawarauba kꞌo krĩña bꞌasia mʉ zuburiai nawedꞌa!

¹⁶ Mʉã marãã jaraya, mʉãrã wueta kꞌo ẽãta aribꞌae nʉmebʉrʉdꞌebʉrʉ kꞌoya Daizezeta Nokꞌo maẽ.

¹⁷ Mobebʉrʉ vino copadꞌe jiraedape maʉ̃bari Daizezea zhibia jipe mawũãsia: Naʉ̃ta doudua, mazhirãĩnu jedꞌeka doudua.

¹⁸ Mʉã marãã jaraya, mʉãrã naʉ̃ vino wueta do ẽãta doya Daizezeta Nokꞌo maẽ.

¹⁹ Mobebʉrʉ pan jiraedape maʉ̃bari Daizezea zhibia jipe bꞌʉape dedꞌekabʉrʉta mawũãsia: Naʉ̃ mʉ kꞌakuata marãbari chãbꞌariya, naʉ̃ta kꞌãwũã o bꞌeaudua mʉta krĩchabʉdata.

²⁰ Abꞌarika obʉrʉta nekꞌope vino copadꞌe jiraedape mawũãsia: Naʉ̃ vino copadꞌera Daizezeba zhãrã ẽdrʉbiidꞌebemata zhiwidꞌita nʉmeña mʉ wadꞌeba, mʉrã marãbari wa erezoaya.

²¹ Mʉta chãbꞌariira mʉ ũme ãba nekꞌo kꞌobꞌʉa.

²² Wãrãnebai mʉ Beubari Bape bꞌʉra sãwũã berabꞌarii bꞌʉdꞌe berabꞌari wã, ¡mawũãmina zuburiaya mʉ chãbꞌaribʉrʉra!

²³ Mawũãĩ ãzhirãĩnu bedꞌeasidꞌa ãzhirãnebemabara kꞌaiba mawũã oita.

Zhi zroma zhãrã aribꞌae bꞌʉta

²⁴ Ãzhirãĩnu bedꞌeasidꞌa ãzhirãnebema kꞌaita zhi zroma kꞌawuaita.

²⁵ Maʉ̃ne Jesúsbara mawũãsia: Naʉ̃ ẽjũãne reyrãta bꞌebara zhãrã ãzhi edre erunʉmeã, mawũã zhãrã ʉ̃rʉ̃ nʉmerã jarabada biata obadata.

²⁶ Mawũãmina marã mawũã bꞌearãũdua, awuarabʉrʉ marãnebemata zhi zromata bꞌʉra zhi zroma ẽãne bꞌaibara. Nokꞌota bꞌʉra nezokꞌa kĩrãkꞌa bꞌaibara.

²⁷ ¿Sãʉ̃ta zhi zromape nekꞌoita jewedꞌabarita o zhãrã nediabarita? ¿Nekꞌoita jewedꞌabarita zhi zroma ẽka? Mawũãnerã mʉrã marãne edꞌa bꞌʉa nezokꞌa kĩrãkꞌa.

²⁸ Marã mʉ bawara bꞌea mʉ bĩ ẽã o bꞌeidꞌu.

²⁹ Mawũẽ mʉãrã nokꞌota bꞌʉkuaya mʉ Zezeba mʉta nokꞌota bꞌʉdꞌa kĩrãkꞌa.

³⁰ Aramaʉ̃ne marã nekꞌodꞌaya baniã dodꞌaya mʉta Reyta bꞌʉ maẽ. Maʉ̃nerã marã bugue chubꞌedꞌe nokꞌota jewedꞌadꞌaya kꞌawua odꞌaita Israel warrarã docedꞌebemata.

Jesúsba jaradꞌa Pedroba ũdukꞌa aita

³¹ Dewara Nokꞌo Jesúsbara mawũãsia: Simón, Simón, ãtõmiãbara marã widꞌisia soidꞌu kꞌobꞌeai kꞌawuaita jãrãweita trigo kĩrãkꞌa.

³² Mawũãmina mʉrã bʉ bari Daizezea zuburia bedꞌeasia, mʉnebema ĩjã bꞌʉta kenabꞌari ẽbamarẽã. Mawũẽ bʉta wakusa mʉ pẽwãbʉrʉdꞌera jipa nʉmeãĩta kꞌarebarua bʉzhi mebẽrãta.

³³ Mawũãĩ izhara mawũãsia: Nokꞌó, mʉrã bari bʉ ũme cárceldꞌe edꞌa wãĩta bꞌʉ ẽã, awuarabʉrʉ bʉ ũme beuisidꞌa bꞌʉa.

³⁴ Mawũãĩ Jesúsbara mawũãsia: Pedro, mʉã bʉaa jaraya, gallo idꞌira beru ẽbaya bʉa mʉ ũdukꞌata jarama ũbea jara ẽwedꞌara.

Zũbita, wũãbita, kuchota jaradꞌa

³⁵ Tẽãne Jesúsbara ãzhaa mawũãsia: Mʉã marãta zũbi ne ẽã, wũãbi ne ẽã, sandalia ne ẽã zokꞌasidꞌera, ¿marã ne wãẽãsidꞌakꞌa? Mawũãĩ ãzhara mawũãsidꞌa: Miã kꞌãrẽta wãẽãna ẽbasia.

³⁶ Mawũãnaĩ mawũãsia: Idꞌira zũbi erubꞌʉbara ataurua, wũãbisidꞌa ataurua, kucho ne ẽã bꞌʉbara bʉzhi wuata nendope edarua abꞌa.

³⁷ Mʉã marãã jaraya, mʉnebemata wadꞌi arimaẽ berabꞌarii bara zhi bꞌʉmata mawũã bꞌʉta: Abꞌarika edasidꞌa bia ẽã omiãrã bawara. Aramaʉ̃ne mʉnebemata bꞌʉ tabꞌʉra arimaẽ berabꞌariya.

³⁸ Mawũãĩ ãzhara mawũãsidꞌa: Nokꞌó, kucho ũme za bꞌʉa. Mawũãnaĩ izhara mawũãsia: Kꞌãʉ̃ba.

Jesús zhiwidꞌidꞌa Getsemaníne

³⁹ Mobebʉrʉ izhi wã kꞌawa bꞌʉ kĩrãkꞌa wãsia Olivo kꞌatumaĩnu, maʉ̃nerã izha jʉrʉkuadꞌasidꞌa wãsidꞌa kꞌaidꞌu.

⁴⁰ Maĩnu jũẽbʉrʉdꞌera mawũãsia: Zhiwidꞌiudua wãẽãna ẽbaita.

⁴¹ Mobe izhira ãzhi maẽbara arajĩga wãpe sãkꞌokꞌodꞌe kꞌobꞌepe zhiwidꞌibʉrʉta,

⁴² mawũãsia: Zeze, bʉma bigabʉrʉ mʉrã zuburiabirãrũã, mawũãmina aribꞌaerãrũã mʉã krĩñata, awuarabʉrʉ aribꞌaedua bʉzha krĩñata.

⁴³ Maʉ̃ne ángel ʉ̃trebemata zhi ũdubisia zareata diaita.

⁴⁴ Mawũẽ sopua kꞌobꞌʉidꞌu zhiwidꞌisia audre zarea. Maʉ̃nerã izhi jʉara wa kĩrãkꞌa waibꞌʉa erezoasia bꞌae bʉsita egoroidꞌu.

⁴⁵ Zhiwidꞌi nʉmanata piradrʉpe izha jʉrʉkuadꞌama zebʉrʉdꞌera ũdukuasia kꞌãĩgue nʉmʉta sopuaba.

⁴⁶ Mawũẽ mawũãsia: ¿Kꞌãrẽã kꞌãĩgue nʉmʉ? Pirabꞌariudua, zhiwidꞌiudua wãẽãna ẽbaita.

Jesús jidadꞌapeadꞌa

⁴⁷ Jesús wadꞌi bedꞌea kꞌobꞌʉdꞌe zhãrã bio zesidꞌa. Maʉ̃ne Juda abadata docedꞌebemata na taiba Jesús orrasia kĩrãma nigaita.

⁴⁸ Maʉ̃ne Jesúsbara mawũãsia: Juda, ¿bʉara kꞌãwũã nigabʉrʉba chãbꞌaribʉrʉka mʉ Beubari Bape bꞌʉra?

⁴⁹ Izha jʉrʉkuadꞌata izhi bawara kꞌobꞌebara sãwũã berabꞌariita kꞌawuadꞌape mawũãsidꞌa: Nokꞌó, ¿tudꞌaika kuchoba?

⁵⁰ Aramaʉ̃ne ãzhidꞌebema abꞌaʉba tusia sacerdote wagꞌau nezokꞌata, mawũẽ ʉrawesia kʉwʉrʉ juwua araarebemata.

⁵¹ Mawũẽ Jesúsbara mawũãsia: Kꞌãmabai idaribirua. Mobe kʉwʉrʉ tõbꞌari bꞌebisia.

⁵² Mobebʉrʉ Jesús bedꞌeabʉrʉta, sacerdoterã nokꞌorãta, nokꞌorã Daizeze de akʉbadata, nokꞌorãta izhi ededꞌaita zebʉdaa mawũãsia: ¿Mʉrã nezrʉgamiã kĩrãkꞌa kuchoedꞌa bakuruedꞌa zebʉdakꞌa?

⁵³ Mʉ marã bawara ewariza Daizeze dedꞌa ewara maẽ bꞌasidꞌera marãbara mʉrã jidadꞌa ẽbasia. Mawũãmina marãba kꞌãwũã odꞌai ewaria, Daizezeba idaribibʉrʉba ãtõmiãba zarea kꞌãwũã oi ewaria.

Pedroba ũdukꞌa adꞌa Jesús

⁵⁴ Aramaʉ̃ne jidadꞌape edesidꞌa sacerdote wagꞌau dedꞌa. Pedrora arajĩga kꞌaidꞌu bꞌasia.

⁵⁵ Maʉ̃nerã ʉ̃kʉrʉra drogꞌoa ẽsadra tebʉ puadꞌape arakꞌawa jewedꞌasidꞌa. Pedrosidꞌa jewedꞌasia ãzhi bawara.

⁵⁶ Maʉ̃ne nezokꞌa wũẽrãba tebʉ maẽ jewedꞌa kꞌobꞌʉta ũdui akʉpe mawũãsia: Naʉ̃sidꞌa bꞌasia Jesús bawara.

⁵⁷ Mawũãmina izhara merãbʉrʉta mawũãsia: Wũẽrã, mʉã maʉ̃ ũdukꞌa.

⁵⁸ Audre ẽãne awʉrʉba ũdupe mawũãsia: Bʉsidꞌa kꞌãʉ̃rãnebema. Mawũãĩ Pedrobara mawũãsia: Mʉrã izhi ẽã.

⁵⁹ Dããrãne awʉrʉba mawũãsia: Naʉ̃sidꞌa wãrĩnu Jesús bawara bꞌasia, Galileadꞌebemata kꞌobꞌʉa.

⁶⁰ Mawũãĩ Pedrobara mawũãsia: Mʉãrã kꞌawua ẽã bʉa kꞌãrẽ jara kꞌobꞌʉra. Maʉ̃ daucha izhi wadꞌi bedꞌea kꞌobꞌʉdꞌe gallo berusia.

⁶¹ Maʉ̃ne Nokꞌo Jesús pʉrʉwape akʉsia Pedrora, mobebʉrʉ Pedrobara bude basia Nokꞌo Jesúsba mawũãnata: Gallo berui nawedꞌa bʉara mʉ ũdukꞌata jarama ũbea jaraya.

⁶² Mawũẽ Pedrora ãĩ wãpe jẽgasia kꞌãbãẽã sopua.

Jesús udꞌapeadꞌa

⁶³ Soldaorã Jesús akʉ erukꞌopanʉbara ãzhima sewakꞌau bꞌʉdꞌeba jirachi jirpanesia.

⁶⁴ Dabʉ pãrĩnape kĩrãma jirachi jirpanʉta widꞌi mawũãsidꞌa: Arimaẽ jaradua, ¿bʉra kꞌaiba jirachibʉrʉ?

⁶⁵ Aramaʉ̃ne ikꞌazhirua jara jirpanesia ne awʉrʉta bio jara.

Jesús ededꞌapeadꞌa wagꞌaurã kĩrãbita

⁶⁶ Ʉ̃nadrʉbʉrʉdꞌera zhi jʉresidꞌa nokꞌorã pʉwʉrʉdꞌebemata, sacerdoterã nokꞌorãta, ũrãgꞌa Moisédꞌe jarabadata, mobe nokꞌorã wagꞌaurãma ededꞌape mawũãsidꞌa:

⁶⁷ ¿Bʉra zhãrã Ẽdrʉbika? Daia jaradua. Mawũãnaĩ mawũãsia: Mʉã marãã jarabʉrʉsidꞌa marãbara ĩjãna ẽã.

⁶⁸ Maʉ̃ẽnabemata mʉã marãã widꞌira marãbara panaʉ̃na ẽã, miã mʉrã ẽnetadꞌa ẽã.

⁶⁹ Mawũãmina idꞌidꞌeba mʉ Beubari Bape bꞌʉra jewedꞌaya Daizeze zhi zroma juwua araare.

⁷⁰ Mawũãĩ jõmaʉ̃ba mawũãsidꞌa: ¿Aramaʉ̃nerã bʉra Daizeze Warrakꞌa? Mawũãnaĩ izhara mawũãsia: Ara mazha jarabʉda mʉrã maʉ̃ta.

⁷¹ Mawũãĩ ãzhara mawũãsidꞌa: ¿Izhi ʉ̃rʉ̃ kꞌãrẽta ãmaña jaradꞌamarẽã nesidꞌa bꞌeaipe? Jipa dazhirãba ũrĩbʉda izhi idꞌeba.