Lucas 21 - Porciones del Nuevo Testamento

Wũẽrã pẽdraba ofrenda diadꞌa

¹ Jesúsbara ũdusia bara bꞌe bioba plata edꞌa kenabꞌari kꞌopanʉta ofrenda kenabꞌaribada maẽ.

² Dewara ũdusia wũẽrã pẽdra kꞌãbãẽã zuburia bꞌʉba moneda zakerãta ũme edꞌa kenabꞌaribʉrʉta.

³ Mawũẽ mawũãsia: Mʉã wãrĩnu marãã jaraya: Naʉ̃ wũẽrã pẽdra zuburia bꞌʉbara jõmaʉ̃ audre edꞌa kenabꞌaribʉrʉa.

⁴ Wuaabemabara ofrenda Daizezeitara edꞌa kenabꞌaribʉda plata audꞌubemata, mawũãmina naʉ̃ wũẽrãbara zuburia bꞌʉdꞌe jõma edꞌa kenabꞌaribʉrʉa izhi nekꞌoita erubꞌadꞌata.

Daizeze de ãrĩnaĩnebema

⁵ Ʉ̃kʉrʉba jara kꞌopanasia Daizeze dera bi-ia onʉmʉta mongꞌara bi-ia kedꞌeba, ne bi-ia kedꞌeta diadꞌapeadꞌaba, maʉ̃ne Jesúsbara mawũãsia:

⁶ Marãba naʉ̃ akʉ kꞌobꞌedꞌebema ewarita zeya, maʉ̃nerã mongꞌara abꞌari mongꞌara ʉ̃rʉ̃bidꞌa kꞌobꞌa ẽbaya ãrĩbʉdaba.

Sãwũãĩnebema ẽjũã jõĩ nawedꞌa

⁷ Mawũãĩ widꞌi mawũãsidꞌa: Miã Ũrãgꞌabari, ¿sõmbedꞌepe Daizeze deta mawũã ãrĩnaĩrã? ¿Sãwũãĩpe maʉ̃ta arimaẽ berabꞌariira?

⁸ Mawũãnaĩ Jesúsbara mawũãsia: Kĩrãkuita bꞌeaudua miõã zhi sewabidꞌa ẽbaita, nʉmʉne bio sewata mʉneba zebʉdabara mawũãnaña: Mʉrã zhãrã ẽdrʉbia, ẽjũã aduaira kꞌaita basia. Maʉ̃nerã maʉ̃rãta pẽwãrãũdua.

⁹ Marãbara ũrĩnaña zhõta, nokꞌo bawara zhõ nʉmeta, maʉ̃nerã perarãũdua, naara mawũã berabꞌariibara, mawũãmina wadꞌi ẽbaya ewari nʉmʉta jõĩrã.

¹⁰ Dewara mawũãsia: Drua tabꞌeta drua awʉrʉta tabꞌe bawara zhõnaña, nokꞌorãta nokꞌorã awʉrʉ bawara zhõnaña.

¹¹ Menajacha nʉmeña ẽjũã ureta, baridu maẽ nʉmeña jarrabata puata. Dazhi perata ũdudꞌakꞌa zromata ũdudꞌaya bãjãne.

¹² Mawũãmina maʉ̃ jõmaʉ̃ nawedꞌa marã jidakuadꞌaya, marã zuburia odꞌai kꞌarea pẽwãnaña. Marã chãbꞌaridꞌaya de zhi jʉrebadata nʉme maẽ, cárcel nʉme maẽ. Marã ededꞌaya reyrã kĩrãbita, nokꞌorã kĩrãbita mʉ kꞌarea.

¹³ Aramaʉ̃ne marãbara mʉnebemata jaradꞌaya.

¹⁴ Sodꞌe kꞌobꞌʉudua nawedꞌa krĩchadꞌa ẽbaita sãwũã panaʉ̃naĩta mazhikusa zhi kꞌarebaita.

¹⁵ Mʉãbʉrʉ marãã diaya bedꞌeata, krĩchata, maʉ̃nebema ãña panaʉ̃na ẽbaya miã mawũã ẽãta jaradꞌa ẽbaya marã jura kꞌobꞌebara.

¹⁶ Marã chãbꞌaridꞌaya ari mazhi zhibarirãba, mazhi mebẽrãba, mazhi ʉrerãba, mazhi bawara zhibiarãba. Marãnebema ʉ̃kʉrʉ beakuadꞌaya.

¹⁷ Jõmaʉ̃ba marã juradꞌaya mʉ kꞌarea.

¹⁸ Mawũãmina marã burudꞌebema miã budꞌa abꞌabidꞌa adua ẽã.

¹⁹ Zuburiata zrogꞌa bꞌedꞌe ẽdrʉbidꞌaya mazhi jawurera.

²⁰ Jerusalén pʉwʉrʉta soldaorãba pʉrrabʉdata ũdubʉdadꞌera, kꞌawuaudua ãrĩnaĩta arabata.

²¹ Mobebaira Judea druadꞌe bꞌera merũ wãẽbaudua kꞌatumaẽna. Jerusalénne bꞌera ãĩ wãũdua, meã bꞌera edꞌa zerãũdua.

²² Maʉ̃ ewadera Daizezebara zuburia okuaya, aramaʉ̃ne jõma arimeã berabꞌariya maʉ̃ẽnabemata zhi bꞌʉmata.

²³ ¡Bꞌiogꞌoa bꞌera, wũãwũã judꞌebema erubꞌera zuburiadꞌaya maʉ̃ ewadera! Aramaʉ̃ne puata kꞌãbãẽã nʉmeña druadꞌe, aramaʉ̃ne Daizeze kĩrũbita nʉmeña Jerusalén ʉ̃rʉ̃.

²⁴ Ʉ̃kʉrʉ kuchoba beadꞌaya, ʉ̃kʉrʉ jidadꞌape druaza ededꞌaya. Aramaʉ̃ne Jerusalén judíorã ẽãba edre erubarabꞌaya Daizezeba bꞌʉdꞌa ewarita arabayeedꞌa.

Jesús zeidꞌebema

²⁵ Neidꞌa ũdudꞌaya ʉ̃madauta, jedꞌekꞌota, chĩdau jizoa nʉmʉta. Druadꞌera zhãrã pera kꞌawua ẽã jirpaneña pusata bomatʉ bꞌae nʉmʉ jĩguaba.

²⁶ Zhãrã peraba nomadrʉdꞌaya drua sãwũã berabꞌariita kꞌawuadꞌa ẽãba, ne zarea zromarãta bãjãnebema pʉrʉderreadꞌaya.

²⁷ Mobebʉrʉ ũdudꞌaya mʉ Beubari Bape bꞌadꞌara jãrãrãne uruta zarea bara kꞌãbãẽã kĩrãwãrẽã.

²⁸ Mawũã berabꞌari bʉsadꞌewadꞌera wãniguaudua, mobebaira marã ẽdrʉira kꞌaita basia.

²⁹ Dewara ne jarakꞌa mawũãsia: Akaudua bakuru higuerata, jõma bakuru nʉmeta.

³⁰ Wikubʉdata ũdubʉdadꞌera marãbara kꞌawuabada poagꞌa kꞌaita bata.

³¹ Aramaʉ̃ kĩrãkꞌa mawũã berabꞌari bʉsadꞌewata ũdubʉdadꞌera kꞌawuaudua kꞌaita bata Daizezeta Nokꞌodꞌebemata.

³² Mʉã wãrĩnu marãã jaraya, zhãrã bꞌera neba ẽwedꞌa mʉã jara nʉmʉrã jõma arimaẽ berabꞌariya.

³³ Bãjã, drua nebaya, mawũãmina mʉ bedꞌeara bari neba ẽã.

³⁴ Mazhikusa kĩrãkuita bꞌeaudua, mazhi soba krĩñane bꞌearãũdua, ituaba beu bꞌearãũdua, naʉ̃ ẽjũãnebemata krĩcha bꞌearãũdua. Mobedꞌeba mʉrã aritiaudꞌe marã ʉ̃rʉ̃ ze ẽbaya jari ewadera.

³⁵ Mʉrã zeya druadꞌe zhãrã bꞌe jõmaʉ̃ ʉ̃rʉ̃.

³⁶ Mawũẽ kĩrãkuita bꞌeaudua, baridu ʉ̃madaudꞌe zhiwidꞌi bꞌeaudua, aramaʉ̃ne ẽdrʉdꞌaitrʉ bꞌeaudua ne bio mawũã menajacha bʉsadꞌewaidꞌera. Mawũãrã kꞌãrẽã peradꞌai ne ẽã kꞌobꞌeaya mʉ Beubari Bape bꞌadꞌa kĩrãbita.

³⁷ Jesús ewaridꞌera miã ũrãgꞌa bꞌasia Daizeze dedꞌa ewara maẽ. Diamasera wãpe chubꞌe bꞌasia kꞌatuma Olivo abada maẽ.

³⁸ Diapedꞌara zhãrã jõma izhima ze bꞌeasia izhi ũrãgꞌata ũrĩnaĩta Daizeze dedꞌa ewara maẽ.