Lucas 20 - Porciones del Nuevo Testamento

Zareata Jesúsdꞌe

¹ Ewari abꞌa Jesús Daizeze dedꞌa ewara maẽ zhãrã ũrãgꞌa nʉmʉta bedꞌea biata jarakꞌa nʉmʉne zesidꞌa sacerdoterã nokꞌorãta, ũrãgꞌa Moisédꞌe jarabadata nokꞌorã bawara.

² Mobe bedꞌeabʉdata mawũãsidꞌa: Daia jaradua, ¿kꞌaiba obi bꞌʉ bʉa obꞌʉra? ¿O kꞌaiba diasi kꞌãwũã zarea nʉmaĩrã?

³ Mawũãnaĩ Jesúsbara panaʉ̃ mawũãsia: Mʉãbidꞌa marãã widꞌiya, panuũdua.

⁴ Zhãrã buru kꞌoemarẽã Juan, ¿Ʉ̃trebemaba zokꞌasika o zhãrãba?

⁵ Mawũãĩ ãzhirãĩnu mawũãsidꞌa: Dazhirãba Ʉ̃trebemaba zokꞌasia adꞌara, ¿mobera kꞌãrẽã ĩjãna ẽbasi aya?

⁶ Dazhirãba zhãrãba zokꞌasia adꞌara, dazhirã zhãrã jõmaʉ̃ba mongꞌaraba bꞌata jidadꞌaya kꞌawua bꞌe baera Juan Daizezeba bedꞌeata jarabibarita bꞌadꞌata.

⁷ Ãzhara panaʉ̃bʉdata kꞌawuadꞌa ẽã asidꞌa kꞌaiba zokꞌadꞌara.

⁸ Mawũãnaĩ Jesúsbara mawũãsia: Mʉãbidꞌa marãã jara ẽã kꞌaiba obi bꞌʉra mʉã obꞌʉra.

Uvadꞌe trajabadata bia ẽãta bꞌeadꞌa

⁹ Maʉ̃ tẽã zhãrã kꞌobꞌea ne jarakꞌa mawũãsia: Ũmakĩrãba uvata upe uvadꞌe trajabadaa arrendasia, mobe ãĩ wãsia ewari dããrãẽna.

¹⁰ Uva bꞌʉabada ewade nezokꞌata zokꞌasia uvadꞌe trajabadama, diadꞌamarẽã uva izhaa diadꞌai bꞌʉta. Mawũãmina uvadꞌe trajabadabara jirachi jidasidꞌa, aramaʉ̃ne buesidꞌa juwuaawa.

¹¹ Wakusa zokꞌasia nezokꞌa awʉrʉta, maʉ̃sidꞌa jirachi jidasidꞌa, ikꞌazhirua jarasidꞌa, aramaʉ̃ne buesidꞌa juwuaawa.

¹² Wakusa zokꞌasia nezokꞌa zhi ũbeata. Ãzhara maʉ̃sidꞌa ãĩ jʉretasidꞌa pugabi.

¹³ Mawũẽ uva zhibaribara izhikusa mawũãsia: ¿Mʉã kꞌãrẽta oi baraba? Kꞌõbera mʉãrã zokꞌaya mʉ warra mʉã kʉãgꞌata, baʉcha izhi ũdubʉdadꞌera wawiadꞌaya.

¹⁴ Mawũãmina uvadꞌe trajabadabara ũdudꞌai ãzhirãĩnu mawũãsidꞌa: Ne zhi zezedꞌera naʉ̃ba jidaya, mawũẽ beadꞌaya, izha jidaita bꞌʉra aramaʉ̃ne dazhirãba jidadꞌaya.

¹⁵ Aramaʉ̃ne uvadꞌebara ãĩ jʉretadꞌape beasidꞌa. ¿Aramaʉ̃nerã uva zhibaribara sãwũã okuaipe?

¹⁶ Wãpe uvadꞌe trajabadara beakuaya, mobe izhi uvara chãbꞌariya awʉrʉrãã. Zhãrã kꞌobꞌebara maʉ̃ta ũrĩnaĩ mawũãsidꞌa: ¡Maʉ̃nebara daira Daizezeba kꞌarebaidꞌe bꞌʉa!

¹⁷ Mawũãnaĩ Jesúsbara ãzhi akʉ mawũãsia: ¿Mobera kꞌãrẽpe aramaʉ̃ kĩrãkꞌa mʉ seribidꞌa ẽãnebemata zhi bꞌʉmarã?: ¿Jara bꞌʉ ẽka de obadaba mongꞌara seri ẽãne bꞌʉdꞌapeadꞌara wagꞌauta bꞌesita? (Salmos 118:22)

¹⁸ Iabꞌa maʉ̃ mongꞌara ʉ̃rʉ̃ bꞌaera bꞌʉgꞌʉzoaya, maʉ̃ mongꞌarata iabꞌaʉ ʉ̃rʉ̃ bꞌaera naʉ̃sãña.

Rey Romanebemaĩta plata diabadadꞌebema

¹⁹ Sacerdoterã nokꞌorãbara ũrãgꞌa Moisédꞌe jarabadabara aramaʉ̃ta jida krĩñasidꞌa mawũã ne jarabʉrʉbara ãzhita jarabʉrʉta kꞌawuabʉdaba. Mawũãmina wawiasidꞌa zhãrãta.

²⁰ Mawũẽ zhãrãta zokꞌasidꞌa Jesúa biarã kĩrãkꞌa bedꞌeadꞌamarẽã, aramaʉ̃ne wãẽã bedꞌeabidꞌape chãbꞌaridꞌaita nokꞌo Roma bidꞌata bꞌʉa.

²¹ Mawũẽ maʉ̃rãbara widꞌi mawũãsidꞌa: Miã Ũrãgꞌabari, daiba kꞌawua bꞌedꞌera bʉa jara bꞌʉra bʉ ũrãgꞌara jipa bꞌʉa, bʉara miõta awuara eda ẽã, awuarabʉrʉ Daizeze ota jara bꞌʉa wãrãne.

²² ¿Dazhirãbara diasia bꞌʉka rey César plata diabadara, o bꞌe ẽ?

²³ Jesúsbara kꞌawuasia ãzhara bĩ ẽã oita kꞌobꞌeta, mawũẽ mawũãsia: ¿Mʉrã kꞌãrẽã wãẽãbidꞌaita kꞌopanʉ?

²⁴ Mʉãã ũdubiudua monedata. ¿Naʉ̃nerã kꞌai zata nʉmʉ, kꞌai trʉ̃ta bꞌʉ nʉmʉ? Mawũãĩ panaʉ̃ mawũãsidꞌa: Césardꞌea.

²⁵ Mawũãnaĩ Jesúsbara mawũãsia: Césardꞌera César diaudua, Daizezedꞌera Daizezea diaudua.

²⁶ Aramaʉ̃ne wãẽã bedꞌeabi bꞌedꞌa ẽbasia zhãrã daidꞌura, awuarabʉrʉ akʉdruape bia panaʉ̃bʉrʉba chupeasidꞌa.

Beudꞌata piradrʉdꞌaidꞌebema

²⁷ Maʉ̃ne saduceorãta ʉ̃kʉrʉ zesidꞌa, maʉ̃rãbara jara bꞌea beudꞌara piradrʉ ẽãta, mawũẽ widꞌi,

²⁸ mawũãsidꞌa: Miã Ũrãgꞌabari, Moisébara dazhirãĩta bꞌʉdꞌata mawũãsia: Iabꞌaʉ mebeata wũẽrã erubꞌʉdꞌe beubʉrʉta warrarãta ãmaẽ ẽbʉrʉ, maʉ̃ wũẽrã zhi mebeaba edaibara, aramaʉ̃ne zhi mebea beudꞌata warrarã barabiya.

²⁹ Mebẽrãta siete pãĩna bazhia, nabemata miã kꞌãĩpe beusia warrarã ne ẽã.

³⁰ Zhi ũmeba kꞌãĩpe maʉ̃sidꞌa beusia warrarã ne ẽã.

³¹ Zhi ũbeaba kꞌãĩsia. Mawũã kꞌãĩsidꞌa ãzhi siete jõmaʉ̃ba, aramaʉ̃ne beukuasia warrarã ãmaẽna ẽã.

³² Nʉmʉne beusia wũẽrãsidꞌa.

³³ Beudꞌata piradrʉbʉdadꞌera, ¿ãzhirãnebemabara sãʉ̃ba izhi wũẽrã baipe mawũã sieteba ãzhi wũẽrã babidꞌapeadꞌara?

³⁴ Mawũãnaĩ Jesúsbara panaʉ̃ mawũãsia: Naʉ̃ ẽjũãne bꞌera miã kꞌãĩbada.

³⁵ Mawũãmina Daizezeba ʉ̃tre bꞌeabigaita beudꞌata piradrʉbʉdadꞌera miã kꞌãĩna ẽã.

³⁶ Mobebaira wueta beudꞌa ẽãba ángelerã kĩrãkꞌa bꞌeaya, Daizeze warrarãta bꞌeaya beudꞌata piradrʉbʉdaba.

³⁷ Beudꞌata piradrʉdꞌaidꞌebema Moiséba kꞌawuabidꞌata ʉrʉta nʉmana maẽbara jara bꞌʉa Daizezera Abraham Zhibarita, Isaac Zhibarita, Jacobo Zhibarita.

³⁸ Aramaʉ̃nerã Daizezera beukuadꞌa Zhibari ẽã, awuarabʉrʉ zokꞌai bꞌe Zhibaria, izhima maʉ̃rã jõma zokꞌai bꞌea.

³⁹ Mawũãĩ ũrãgꞌa Moisédꞌe jarabadaba ʉ̃kʉrʉba panaʉ̃ mawũãsidꞌa: Miã Ũrãgꞌabari, bʉara bia jarabʉrʉa.

⁴⁰ Mawũãnape wueta kꞌãrẽ widꞌidꞌa ẽbasia.

¿Kꞌaidꞌeba uru zhãrã Ẽdrʉbira?

⁴¹ Mobebʉrʉ Jesúsbara mawũãsia: ¿Zhãrãbara jara panʉka zhãrã Ẽdrʉbira Davidꞌeba uruta?

⁴² Davidbara Salmo librodꞌe mawũãsia: Daizezebara mʉ Nokꞌoa mawũãsia: Mʉ juwua araare jewedꞌarua,

⁴³ bʉ jura bꞌeta mʉã bʉ jẽrũ edre bꞌʉyeedꞌa. (Salmos 110:1)

⁴⁴ Davidba mawũã izhi Nokꞌoa adꞌara, ¿sãwũã bari kꞌãwũta izhidꞌeba uruta bꞌaipe?

Ũrãgꞌa Moisédꞌe jarabadadꞌebema

⁴⁵ Zhãrãbara jõmaʉ̃ba ũrĩ kꞌobꞌedꞌe Jesúsbara izha jʉrʉkuadꞌaa mawũãsia:

⁴⁶ Kĩrãkuita bꞌeaudua ũrãgꞌa Moisédꞌe jarabada kꞌarea, zhi zromane tebaita wua eidꞌu drasoa jʉ̃ teba krĩñadea, ãzhi wawia saludꞌaita krĩñadea pʉwʉrʉdꞌe kꞌabana maẽrã, nokꞌorãta jewedꞌabari maẽ jewedꞌa krĩñadea de zhi jʉrebada nʉme maẽrã, nokꞌorãta jewedꞌabari maẽ jewedꞌa krĩñadea nekꞌodꞌe trʉ̃bʉdadꞌera.

⁴⁷ Deta wũẽrãrã pẽdrarãneta jãrĩ bꞌea, mobe zhãrãma bia nʉmaĩta dããrã zhiwidꞌibada. Maʉ̃neba maʉ̃rã Daizezebara audre pua kꞌawua oya.