Lucas 18 - Porciones del Nuevo Testamento

Ne jaradꞌa pẽdradꞌeba dewara nokꞌodꞌeba

¹ Jesúsbara ne jarakꞌasia ewariza zhiwidꞌii baradꞌebemata poea ẽã.

² Maʉ̃ta mawũãsia: Pʉwʉrʉdꞌe nokꞌota bꞌasia bedꞌeata araa obarita, Daizeze wawi ẽbasia, miã zhãrã wawi ẽbasia.

³ Abꞌaʉ pʉwʉrʉdꞌe bꞌasia wũẽrã pẽdrata, maʉ̃ izhima zebʉrʉza mawũã bꞌasia: Mʉrã kꞌarebarua mʉ jura bꞌʉ juwuadꞌeba.

⁴ Izhara aribꞌae krĩña ẽã bꞌʉta ewari bio basia, mawũãmina maʉ̃ tẽã izhikusa mawũãsia: Mʉãrã Daizezera wawi ẽmina, miã zhãrã wawi ẽmina,

⁵ naʉ̃ wũẽrã pẽdra miãsẽã nʉmʉba mʉãrã kꞌarebaya, manebʉrʉ baridua dugue nʉmʉta mʉãrã zrogꞌa ẽbaya.

⁶ Maʉ̃ta jarape Nokꞌo Jesúsbara mawũãsia: Ũrĩũdua nokꞌo bia ẽãbara kꞌasia adꞌata.

⁷ ¿Kꞌõbe Daizezebara kꞌareba ẽka izha jʉrʉkuadꞌata izhaa bꞌia bꞌebʉrʉ ewaridꞌe, diamase? ¿Dããrã baika panuĩrã?

⁸ Mʉã marãã jaraya, kꞌadrʉabai kꞌarebakuaya. Mawũãmina mʉ Beubari Bape bꞌadꞌata zebʉrʉdꞌera, ¿mawũã soidꞌu bꞌera ũduika naʉ̃ druadꞌera?

Ne jaradꞌa zhãrã ũmeneba

⁹ Ʉ̃kʉrʉ ãzhikusa biata bꞌeba awʉrʉrãta yarebai eda bꞌedꞌebemata Jesúsbara ne jara mawũãsia:

¹⁰ Ũmakĩrã ũme wãsidꞌa Daizeze dedꞌa ewara maẽ zhiwidꞌidꞌe, abꞌara fariseo basia, dewarabemata rey Romanebemaĩta plata widꞌibari basia.

¹¹ Fariseora ʉ̃ta nʉmepe zhiwidꞌi ari izhita jara mawũãsia: Daizeze, mʉã bʉaa zhibia jiya mʉrã zhãrã kĩrãkꞌa bꞌʉ ẽãba, zhãrã bꞌea nezrʉgamiãta, bia ẽãta, kĩma ẽãta erukꞌãĩmiãta. Mʉrã miã naʉ̃ za rey Romanebemaĩta plata widꞌibari kĩrãkꞌa bꞌʉ ẽã.

¹² Mʉrã nekꞌo ẽã zhiwidꞌi bꞌidꞌabaria, maʉ̃ta semanane oma ũme obaria, diez bꞌʉta abꞌa bʉaa dia bꞌʉa jõma mʉã jidabʉrʉra.

¹³ Waya rey Romanebemaĩta plata widꞌibarira wawara nʉmepe miã ʉ̃taa akʉ krĩña ẽbasia, awuarabʉrʉ trũã neãchi mawũãsia: Daizeze, mʉrã sozuburiarua, mʉrã kꞌazhirua omiã.

¹⁴ Mʉã marãã jaraya, maʉ̃ bedꞌea ne ẽã dedꞌaa wãsia dewarabema kꞌãñabara. Bariduta zhi zromane bꞌʉra Daizezebara zhi zroma ẽãta bꞌʉya, waya zhi zroma ẽãne bꞌʉta zhi zromata bꞌʉya.

Jesúsba ibia jaradꞌa wũãwũãrãta

¹⁵ Wũãwũãrãta Jesúsma wesidꞌa ibia jara tõbꞌarikuamarẽã, maʉ̃ta izha jʉrʉkuadꞌaba ũdudꞌai kẽãsidꞌa.

¹⁶ Mawũẽ Jesúsbara trʉ̃kuape mawũãsia: Wũãwũãrã mʉma idu zebiudua, bueamarãũdua, naʉ̃rãne kĩrãkꞌa izhi krĩcha bꞌetrʉ Daizezeta Nokꞌodꞌebema.

¹⁷ Mʉã wãrĩnu marãã jaraya, iabꞌaʉba Daizezeta Nokꞌodꞌebemata wũãwũãne kĩrãkꞌa krĩcha ẽbʉrʉ maʉ̃nebemanerã edꞌa wã ẽã.

Kũrãta bara bꞌadꞌa

¹⁸ Nokꞌoba Jesúa widꞌi mawũãsia: Miã Ũrãgꞌabari, bʉra biata bꞌʉa, ¿mʉãrã kꞌãrẽta oi barape Daizeze ũme bꞌai jõ ẽãta jidaira?

¹⁹ Mawũãĩ Jesúsbara mawũãsia: ¿Bʉara mʉrã kꞌãrẽã biata jarabʉrʉ? Miõta biata bꞌʉ ẽã, awuarabʉrʉ biara abꞌabai bꞌʉa Daizezeta.

²⁰ Daizezeba aribꞌaemarẽã jara bꞌʉra bʉara kꞌawua bꞌʉta mawũã bꞌʉa: Kĩma ẽãta erukꞌãĩrãrũã. Miã bearãrũã. Nezrʉgarãrũã. Zhãrã ʉ̃rʉ̃ sewa nebʉrʉrãrũã. Wawiarua bʉ zezera bʉ papara.

²¹ Mawũãĩ izhara mawũãsia: Mʉãrã maʉ̃ jõma aribꞌae bꞌʉa kũrã wedꞌauba.

²² Maʉ̃ta ũrĩĩ Jesúsbara mawũãsia: Bʉara wadꞌi ne abꞌa aribꞌaeita wãẽã bꞌʉa. Bʉa ne erubꞌʉta jõma nendope platara zuburia bꞌea diadua, mawũãrã ne biata erubꞌaya ʉ̃tre. Aramaʉ̃ne zepe mʉta pẽwãdua.

²³ Izha maʉ̃ta ũrĩĩ kꞌãbãẽã sopuasia biodꞌe bara bꞌʉba.

²⁴ Kꞌãbãẽã sopuabʉrʉta Jesúsba ũdui mawũãsia: ¡Daizezeta Nokꞌodꞌebemane edꞌara borekea edꞌa wãna ẽã ne bio erubꞌera!

²⁵ Aguja uriadꞌe camellota audre bia berabꞌari bꞌeya bara bꞌʉta edꞌa wãĩ kꞌãñabara Daizezeta Nokꞌodꞌebemane.

²⁶ Maʉ̃ta ũrĩbʉdabara mawũãsidꞌa: ¿Bara bꞌʉsidꞌa mawũãbʉrʉ kꞌaita ẽdrʉipe?

²⁷ Mawũãnaĩ Jesúsbara mawũãsia: Ẽdrʉira zhãrãĩtara boreke ẽãta, ẽdrʉbi bꞌeya Daizezebara.

²⁸ Mawũãĩ Pedroba mawũãsia: Daibara ne daidꞌera ãmaẽnape bʉta pẽwã bꞌea.

²⁹ Mawũãĩ Jesúsbara mawũãsia: Mʉã wãrĩnu marãã jaraya, iabꞌaʉba deta ãmaẽrã, zhibarirãta, mebẽrãta, wũẽrãta, warrarãta ãmaẽrã, Daizezeta Nokꞌodꞌebema kꞌarea mawũã ãmaẽrã,

³⁰ idꞌi ewade audre jidaya, ewari tẽã nʉmaĩta zeidꞌera jidaya Daizeze ũme bꞌai jõ ẽãta.

Jesúsba jarama ũbeata jaradꞌa izhi beadꞌaita

³¹ Jesúsbara doce izha jʉrʉkuadꞌata awuara jʉre edape mawũãsia: Dazhirã wãrĩze wã Jerusalén pʉwʉrʉedꞌa, aranaʉ̃ne arimaẽ berabꞌariya Daizezeba bedꞌeata jarabibarirãba bꞌʉdꞌapeadꞌata mʉ Beubari Bape bꞌʉdꞌebemata.

³² Mʉrã chãbꞌaridꞌaya judíorã ẽãta bꞌea, mʉrã ãzhima sewakꞌau bꞌʉdꞌeba ikꞌazhirua jaradꞌaya, dau idꞌodꞌaya.

³³ Udꞌape beadꞌaya, mawũãmina ewari ũbeadꞌe piradrʉya beudꞌata.

³⁴ Ãzhara maʉ̃ sãwũãta kꞌawuadꞌa ẽbasia, maʉ̃ bedꞌeara sãwũãta kꞌawuadꞌa ẽbaera mawũã jarakꞌabʉrʉra.

Daʉbꞌerrea bꞌʉta ne ũdubidꞌa

³⁵ Jesús Jericó pʉwʉrʉ kꞌaita babʉrʉdꞌera, daʉbꞌerrea bꞌʉta o kꞌaita jewedꞌa bꞌasia nebari widꞌi bꞌʉta.

³⁶ Maʉ̃ne kꞌabanata berabꞌari wãta ũrĩĩ widꞌisia kꞌãrẽ kꞌawuaita.

³⁷ Mawũẽ jarasidꞌa berabꞌari wãta Jesús Nazaredꞌebemata.

³⁸ Mawũãnaĩ nemi jĩgua mawũãsia: ¡Jesús, bʉra rey Davidꞌeba uruta bꞌʉba mʉrã sozuburiarua!

³⁹ Mawũãĩ na kuataiba kẽãsidꞌa chupeamarẽã. Mawũãmina izhara wuaabʉrʉ nemi jĩgua mawũãsia: ¡Bʉra rey Davidꞌeba uruta bꞌʉba mʉrã sozuburiarua!

⁴⁰ Mawũẽ Jesús pi nʉmepe jarasia wedꞌamarẽã izhima, aramaʉ̃ne zei widꞌibʉrʉta,

⁴¹ mawũãsia: ¿Mʉã kꞌãrẽta oita krĩñape? Mawũãĩ izhara mawũãsia: Nokꞌó, mʉta ne ũdubirua.

⁴² Mawũãĩ Jesúsbara mawũãsia: Bʉra ne ũdu bꞌidꞌa, bʉra soidꞌu kꞌobꞌʉba ẽdrʉbʉrʉa.

⁴³ Audre ẽãne ne ũdusia, mawũẽ kꞌaidꞌu tebasia Daizeze ibia jara. Zhãrã jõmaʉ̃ba maʉ̃ta ũdudꞌai ibia jarasidꞌa Daizezera.