Lucas 17 - Porciones del Nuevo Testamento

Zhãrãta bꞌaebibʉrʉdꞌebema

¹ Jesúsbara izha jʉrʉkuadꞌaa mawũãsia: Kꞌazhiruadꞌe bꞌaebidꞌa ẽã nʉmaĩrã ne ẽã, mawũãmina, ¡Daizezebara pua kꞌawua oya zhãrãta kꞌazhiruadꞌe bꞌaebibʉrʉra!

² Mawũẽ biga bakꞌausia osidaudꞌe yuta tãjʉ̃nape bꞌaribuedꞌaita pusadꞌe, abꞌa kꞌazhiruadꞌe bꞌaebii kꞌãñabara mʉnebema ĩjã bꞌe za wĩka kedꞌeta.

³ Kĩrãkuita bꞌeaudua. Bʉ mebeaba bʉta bĩ ẽã obʉrʉba kꞌazhiruata ora ũrãgꞌarua, wueta mawũã o ẽãta jarara, bedꞌea ne ẽãne edarua.

⁴ Bʉta bĩ ẽã onʉmʉta ewaridꞌe kꞌazhiruata oma siete ora, aramaʉ̃ne bʉma ewaridꞌe zema siete zebʉrʉta, wueta mawũã o ẽãta jara dugue nʉmʉnerã bedꞌea ne ẽãne edarua.

Daira soidꞌu bꞌeabirua

⁵ Izha jʉrʉkuadꞌabara Jesúa mawũãsidꞌa: Daira soidꞌu bꞌeabirua.

⁶ Mawũãnaĩ Nokꞌo Jesúsbara mawũãsia: Mostaza ta wĩka kĩrãkꞌa marãta wĩkabidꞌa soidꞌu bꞌebʉrʉ bakuru za nʉmʉã mawũã bꞌedꞌaya: Ẽtotodua, mobe pusadꞌe nʉmane wãrũã, mawũãnaĩ marã bedꞌeara aribꞌaeya.

Nezokꞌaba oita bꞌʉdꞌebema

⁷ ¿Marãnebemabara nezokꞌa abꞌa erubꞌʉta meã traja bꞌadꞌata o pakꞌa akʉ bꞌadꞌata zebʉrʉdꞌera, nekꞌoita jewedꞌarua aibʉka?

⁸ ¿Awuarabʉrʉ mawũãĩ ẽka: Zhiko kewarabema odua, wua kꞌãbiape mʉta aribꞌaetadua, mʉrã nekꞌobirua, baniã dobirua. Mobebʉrʉ bʉta nekꞌorua, baniã dorua ai ẽka?

⁹ ¿Nezokꞌaara zhibia jibarika jarabʉrʉta obʉrʉdꞌera? Mʉ krĩchama mawũã ẽã.

¹⁰ Aramaʉ̃ kĩrãkꞌa marãbidꞌa jarabʉdata jõma obʉdadꞌera mawũãũdua: Dazhirã bari nezokꞌata bꞌea, mawũẽ dazhirãba oita bꞌadꞌatrʉ osidꞌa.

Diez aidꞌaba bꞌeta nene ẽã bꞌekuadꞌa

¹¹ Jesús Jerusalén pʉwʉrʉedꞌa wãta berabꞌarisia Samaria druadꞌe, Galilea druadꞌe.

¹² Maʉ̃ne pʉwʉrʉ zakedꞌe edꞌa wãbʉrʉdꞌera daucha zesia ũmakĩrãrã diez aidꞌaba bꞌeta, maʉ̃rã jĩga kꞌopanepe,

¹³ nemi jĩgua mawũãsidꞌa: ¡Jesús Miã Ũrãgꞌabari, daira sozuburiarua!

¹⁴ Jesúsbara ãzhi ũdui mawũãsia: Bꞌekuata ũdudꞌamarẽã wãnape sacerdoterãã akʉbiudua. Mawũãĩ ãzhira wãne nene ẽã bꞌekuasia.

¹⁵ Mawũẽ ãzhi abꞌaʉba mawũã izhi bꞌebʉrʉta ũdui, nemi jĩgua Daizeze ibia jara jẽrũya zepe,

¹⁶ Jesús jẽrũ kꞌaita egoroma kĩrã bꞌarru ju kꞌobꞌesia zhibia ji. Maʉ̃ Samariadꞌebema basia.

¹⁷ Jesúsbara mawũãsia: ¿Diez ẽka nene ẽã bꞌebʉdara? ¿Zhi nuevera sãma kꞌobꞌe?

¹⁸ ¿Jẽrũya zepe Daizeze ibia jarabʉrʉka naʉ̃ judío ẽãbʉrʉ?

¹⁹ Mobe mawũãsia: Piradrʉpe wãrũã. Bʉzhi soidꞌu kꞌobꞌʉba ẽdrʉbʉrʉa.

Zeidꞌebema Daizezeta Nokꞌodꞌebemata

²⁰ Fariseorãbara Jesúa widꞌisidꞌa Daizezeta Nokꞌodꞌebema sõmbedꞌe zeita, mawũẽ panaʉ̃ mawũãsia: Daizezeta Nokꞌodꞌebema ze ẽã dajada ũdu.

²¹ Miã mawũãna ẽã: Za bꞌʉa, o zawa bꞌʉa adꞌa ẽã, Daizezeta Nokꞌodꞌebema bꞌʉba marãne edꞌa.

²² Mobe izha jʉrʉkuadꞌaa mawũãsia: Ewarita zeya zuburiadꞌaita, maʉ̃nerã marãbara mʉ Beubari Bape bꞌadꞌara ewari abꞌabidꞌa ũdu krĩñanaña, mawũãmina ũdudꞌa ẽbaya.

²³ Maʉ̃nerã mawũãnaña: Za bꞌʉa, zawa bꞌʉa adꞌaya. Maʉ̃nerã wãrãũdua, miã pẽwãrãũdua.

²⁴ Ba pureabʉrʉdꞌe bãjãta ʉ̃nabari kĩrãkꞌa dajada zeya mʉ Beubari Bape bꞌadꞌata zebʉrʉ ewadera.

²⁵ Mawũãmina naara biodꞌe zuburiaya, seribidꞌa ẽbaya zhãrã idꞌi ewade bꞌebara.

²⁶ Noé ewade berabꞌaridꞌa kĩrãkꞌa berabꞌariya mʉ Beubari Bape bꞌadꞌata zebʉrʉ ewadera.

²⁷ Nekꞌo, baniã do, miã kꞌãĩ bꞌedꞌe Noé edꞌa wãsia jãba zromane. Maʉ̃ne do birupe doba beakuasia jõma.

²⁸ Aramaʉ̃ kĩrãkꞌa berabꞌarisia Lot ewadera. Nekꞌo, baniã do, ne eda, ne nendo, ne u, de o bꞌeasia.

²⁹ Maʉ̃ne Sodoma pʉwʉrʉdꞌeba Lot ãĩ wãsi ewadera, bãjãneba jurzoasia tebʉta azufreedꞌa, maʉ̃ba beakuasia jõma.

³⁰ Aramaʉ̃ kĩrãkꞌa berabꞌariya mʉ Beubari Bape bꞌadꞌata zebʉrʉdꞌera.

³¹ Maʉ̃ ewadera de ʉ̃rʉ̃ kꞌobꞌʉbara dedꞌa ne erubꞌʉra udꞌubꞌaepe jiraedadꞌe wãrãrũã. Meã kꞌobꞌʉra aramaʉ̃ kĩrãkꞌa deidꞌu zerãrũã.

³² Bude baudua sãwũãnata Lot kĩma.

³³ Iabꞌaʉba izha ne erubꞌʉtrʉ bia nʉmabiya bꞌʉra aduaya, mawũãmina mʉ kꞌarea aduabira ẽdrʉya.

³⁴ Mʉã marãã jaraya, maʉ̃ diamasera ũme kʉdꞌadꞌe kꞌãĩ panʉta abꞌa edeya, abꞌa ãmaẽña zhi aribꞌaema ẽãta.

³⁵ Wũẽrãrã ũme nebꞌa panʉta abꞌa edeya, abꞌa ãmaẽña.

³⁶ Ũme meã panʉta abꞌa edeya, abꞌa ãmaẽña.

³⁷ Mawũãĩ panaʉ̃ mawũãsidꞌa: ¿Nokꞌó, maʉ̃ sãma mawũã berabꞌariipe? Mawũãnaĩ izhara mawũãsia: Ne beuma tabꞌʉra kꞌawuabada ãkꞌoso pouga nʉmʉba. (Mʉ zebʉrʉra aramaʉ̃ kĩrãkꞌa kꞌawuadꞌaya.)