Lucas 16 - Porciones del Nuevo Testamento

Ne jaradꞌa plata ewaradꞌe gastadꞌadꞌeba

¹ Dewara Jesúsbara izha jʉrʉkuadꞌaa mawũãsia: Ũmakĩrã bara bꞌʉba nezokꞌata erubꞌasia ne akʉbarita, jarasidꞌa maʉ̃bara ewaradꞌe gasta nʉmʉta izhi platara.

² Mawũẽ trʉ̃pe mawũãsia: ¿Bʉdꞌebemata mʉã ũrĩbʉrʉra kꞌãrẽpe? Mʉãã jaradua bʉa ne akʉ nʉmʉnebemata, bʉra wueta ne akʉbarita bꞌa ẽã.

³ Mawũãĩ ne akʉbarira izhikusa mawũãsia: ¿Mʉã kꞌãrẽta oi baraba? Mʉ nokꞌobara jãrĩña mʉ ne akʉ bꞌʉra. Traja ne kꞌoruira mʉãrã bꞌe ẽã, ne widꞌiira mʉrã pera.

⁴ Mʉã ya kꞌawuabʉrʉa kꞌãrẽ oira, kꞌãwũãrã mʉ ne akʉ bꞌʉta jãrĩbʉdadꞌera zhãrãba mʉ ãzhi dedꞌa bia edadꞌaya.

⁵ Aramaʉ̃ta izhi nokꞌoa dewe bꞌeta abꞌa abꞌaʉdꞌe trʉ̃kua naarabemaa mawũãsia: ¿Mʉ nokꞌoa bʉra sõmbe dewepe?

⁶ Mawũãĩ maʉ̃bara mawũãsia: Mʉrã dewea galon mil olivo dragꞌata. Mawũãĩ mawũãsia: Ĩñabasia jewedꞌape naʉ̃ kꞌartadꞌe bꞌʉtadua quiniento diai bꞌʉta.

⁷ Mobebʉrʉ dewaraua mawũãsia: ¿Bʉra sõmbe dewepe? Mawũãĩ maʉ̃bara mawũãsia: Mʉrã dewea trigota cien bulto. Mawũãĩ izhara mawũãsia: Naʉ̃ kꞌartadꞌe bꞌʉtadua ochenta diai bꞌʉta.

⁸ Ne akʉbarita bia ẽãrã izhi nokꞌobara ibia jarasia mawũã kꞌãrẽ sãwũã oira bigaudꞌeba. Aramaʉ̃ne naʉ̃ ẽjũãne bꞌera zhãrã sãwũã edaira audre bigauta bꞌea Daizeze warrarã kꞌãñabara.

⁹ Mʉã marãã jaraya: Marãbidꞌa zhãrã marã bawara zhibiarãta oudua mazha ne erubꞌeba, plata erubꞌeba, mawũãrã maʉ̃ jõbʉrʉdꞌera bꞌaribidꞌaya Daizeze ũme bꞌai jõ ẽã maẽ.

¹⁰ Iabꞌaʉba ne wĩkata bia ora ne biosidꞌa bia oya. Iabꞌaʉba ne wĩkata bia o ẽbʉrʉ ne biosidꞌa bia o ẽã.

¹¹ Ne biata, platata marãba bia odꞌa ẽbʉrʉ, ¿Daizezebara marãã diaika wãrĩnu ne biata ʉ̃tre nʉmʉrã?

¹² Ne izhidꞌeta Daizezeba diadꞌata bia odꞌa ẽbʉrʉ, ¿izhara marãã diaika ʉ̃tre marãĩta erubꞌʉra?

¹³ Miõba nezokꞌabara zhibari ũme aribꞌae nʉma bꞌe ẽã. Manebʉrʉ abꞌa jurape abꞌa kʉãgꞌaya, o abꞌa zhi zromane edape abꞌa zhi zroma ẽãne edaya. Aramaʉ̃ kĩrãkꞌa Daizezedꞌebema aribꞌae ẽã platadꞌebemata aribꞌae nʉmʉbara.

¹⁴ Fariseorãba maʉ̃ jõma ũrĩbʉdadꞌera biodꞌe plata kʉãgꞌa bꞌeba sewakꞌau bꞌʉa asidꞌa Jesúra.

¹⁵ Mawũẽ Jesúsbara mawũãsia: Zhãrã kĩrãbitara marã biarã kĩrãkꞌa bꞌea, mawũãmina Daizezebara ũdukꞌawua bꞌʉa marã sora. Zhãrãba kꞌãbãẽã ne biadꞌe erubꞌera Daizezebara krĩña ẽã.

Daizezeta Nokꞌodꞌebema

¹⁶ Ũrãgꞌara Moisédꞌeta tabꞌʉta, Daizezeba bedꞌeata jarabibarirãneta tabꞌʉta, tabꞌʉa Juanba jaradꞌa bitabai. Mamaʉ̃ba jara panʉã Daizezeta Nokꞌodꞌebemata, mawũẽ bio maʉ̃ne edꞌa wã krĩña bꞌea.

¹⁷ Audre borekea nebaya bãjãta, druata, mawũãmina bedꞌea abꞌabidꞌa neba ẽãba arimaẽ berabꞌariya Daizezeba diadꞌa ũrãgꞌara.

Jesúsba jaradꞌa kĩma ãmaĩrã kꞌazhiruata

¹⁸ Bariduba izhi wũẽrãta ãmape awʉrʉta kꞌãĩbʉrʉra kꞌazhiruata oya. Wũẽrã ãmanapeadꞌata kꞌãĩbʉrʉsidꞌa kꞌazhiruata oya.

Bara bꞌadꞌadꞌebema Lázarodꞌebema

¹⁹ Ũmakĩrãta bꞌasia bara bꞌʉta, zho bꞌidꞌa bazhia wua granateba, lino wua biaba. Ewariza fiesta o nekꞌo bꞌʉra obꞌasia uruzhiderrea.

²⁰ Maʉ̃ne zuburia bꞌʉta bꞌasia Lázaro abadata, maʉ̃ puerta maẽ jewedꞌa bꞌidꞌa bazhia kʉkʉba bira bꞌʉta.

²¹ Bara bꞌʉta nekꞌobari maẽ zhiko jarra jʉrrzoadꞌata kꞌo krĩña bꞌidꞌa bazhia. Usarãta zepe burasẽ bazhidꞌa kʉkʉra.

²² Nʉmʉne zuburia bꞌʉra beubʉrʉdꞌera ángelerãba edesidꞌa Abraham bꞌʉ maẽ. Nʉmʉne bara bꞌʉsidꞌa beubʉrʉdꞌera wuagꞌasidꞌa.

²³ Tebʉdꞌe zuburia kꞌobꞌʉba wawarauba ũdusia Abrahamta, Lázarosidꞌa ũdusia Abraham maẽ.

²⁴ Mawũẽ izhara nemi jĩgua mawũãsia: Zeze Abraham, mʉrã sozuburiarua, Lázarota zokꞌadua juwua jĩwĩni baniãne ũ edape mʉ kĩrãme kũrãdrʉdꞌe zemarẽã. Mʉrã zuburia nʉmʉã naʉ̃ tebʉdꞌe.

²⁵ Mawũãĩ Abrahambara mawũãsia: Warra, bʉra bia bꞌadꞌata bude barua, maʉ̃ne Lázaro zuburia bꞌasia. Mawũãmina idꞌira naʉ̃ nama sobia bꞌʉa, maʉ̃ne bʉra zuburia bꞌidꞌa.

²⁶ Mawũã bꞌidꞌadꞌe dazhirã ewara zromaba dra nʉmʉã, maʉ̃ba namaʉ̃ba marãma wã krĩñabʉrʉra wã bꞌe ẽã, miã kꞌãmaʉ̃ba namaabidꞌa ze bꞌe ẽã.

²⁷ Mawũãĩ mawũãsia: Zeze Abraham, mʉrã zuburia bedꞌeaya, mobera zokꞌadua mʉ zeze dedꞌa.

²⁸ Mʉãrã mebẽrãta juesoma erubꞌʉa, mawũẽ maʉ̃rãã jaradꞌe zokꞌadua, aramaʉ̃ne ãzhisidꞌa zedꞌa ẽbamarẽã nama kꞌãwũã zuburia nʉmʉ maẽ.

²⁹ Mawũãĩ Abrahambara mawũãsia: Ũrãgꞌa Moisédꞌeta, ũrãgꞌa Daizezeba bedꞌeata jarabibarirãneta erubꞌea, mawũẽ maʉ̃ta ũrĩnaĩbara.

³⁰ Mawũãĩ izhara mawũãsia: Bari maʉ̃bara ũrĩna ẽã Zeze Abraham, mawũãmina beudꞌata iabꞌa piradrʉpe ãzhima wãrã, kꞌazhiruara ãmape Daizezeta pẽwãnaña.

³¹ Mawũãĩ Abrahambara mawũãsia: Ũrãgꞌa Moisédꞌeta, ũrãgꞌa Daizezeba bedꞌeata jarabibarirãneta ũrĩna ẽbʉrʉ, ĩjãna ẽbaya iabꞌa beudꞌata piradrʉbʉrʉsidꞌa.