Lucas 12 - Porciones del Nuevo Testamento

Ne oreguea fariseorãne

¹ Maʉ̃ne kꞌabana bʉredrʉ bʉsiba ãzhirãĩnu zhiya biradiga kꞌobꞌedꞌe Jesúsbara izha jʉrʉkuadꞌaa naara mawũãsia: Kĩrãkuita bꞌeaudua ne oreguea fariseorãne kꞌarea, ãzhi sewa bibaʉta bꞌeta maʉ̃ã.

² Kꞌãrẽ chũwẽã nʉmʉta kꞌawuadꞌa ẽã nʉmaĩrã ne ẽã, miã kꞌãrẽ merã bꞌʉta kꞌawuadꞌa ẽã nʉmaĩrã ne ẽã.

³ Mawũẽ jõma marãba pãrĩguadꞌe chupea jarabʉdara ewaridꞌe ũrĩnaña. Marãba dedꞌa kʉwʉrʉ kꞌawa jarabʉdara jĩgua jaradꞌaya de ʉ̃rʉ̃ba.

Kꞌaita wawiaita barape

⁴ Marã mʉ bawara zhibiata bꞌea mʉã jaraya: Wawiarãũdua kꞌakua bea bꞌeta, maʉ̃rãbara ãmañarã kꞌãrẽ obꞌedꞌa ẽã.

⁵ Mawũãmina kꞌaitrʉ wawiadꞌaita mʉã marãã jaraya: Daizezetrʉ wawiaudua, zhãrã beubipe jawure tebʉdꞌe bꞌaribuei zareata erubꞌʉa. Mʉã marãã jaraya, izhitrʉ wawiaudua.

⁶ ¿Ibana zakerã juesomata plata wĩkaubari nendobada ẽka? Maʉ̃ta Daizezebara miã abꞌabidꞌa kĩrãdua ẽã wuagꞌa jʉre bꞌʉa.

⁷ Marãẽnabema mazhi budꞌaidꞌu jõma juacha erubꞌʉa. Maʉ̃ba perarãũdua, Daizezema marã audre vale bꞌea ibana zaketa bio kꞌãñabara.

Mʉ pẽwã bꞌʉa abʉrʉdꞌebema

⁸ Mʉã marãã jaraya, iabꞌaʉba zhãrã kĩrãbita mʉ pẽwã bꞌʉa ara, mʉ Beubari Bape bꞌadꞌabidꞌa mʉ pẽwã bꞌʉa aya ángelerã Daizezedꞌe kĩrãbita.

⁹ Mawũãmina iabꞌaʉba zhãrã kĩrãbita mʉ pẽwã bꞌʉ ẽã ara, mʉãbidꞌa mʉ pẽwã bꞌʉ ẽã aya ángelerã Daizezedꞌe kĩrãbita.

¹⁰ Mʉ Beubari Bape bꞌʉta bĩ ẽã jaradꞌata zuburia bedꞌeara Daizezebara bedꞌea ne ẽã bꞌʉya. Mawũãmina Jawurebiama mitia bedꞌeabʉrʉra bedꞌea ne ẽã bꞌʉ ẽã.

¹¹ De zhi jʉrebada nʉmeza marã webʉdata nokꞌorã bedꞌea araa obada kĩrãbita webʉdadꞌera, perarãũdua sãwũã panaʉ̃naĩ kꞌareara, o kꞌãrẽ jaradꞌai kꞌareara.

¹² Maʉ̃nerã Jawurebiaba marãã jaraya marãba kꞌãrẽ jaraira.

Bara bꞌʉta krĩcha ne ẽã bꞌadꞌa

¹³ Kꞌabana maẽba abꞌaʉba Jesúa mawũãsia: Miã Ũrãgꞌabari, mʉ mebea jaradua mʉãã dra diamarẽã mʉ zezeba ne ãmaẽnata.

¹⁴ Mawũãĩ Jesúsbara mawũãsia: ¿Mʉrã kꞌaiba marã ʉ̃rʉ̃ bꞌʉsidꞌa mawũã bedꞌea marãnebemata araa oira o ne draira?

¹⁵ Mawũãpe mawũãsia: Kĩrãkuita bꞌeaudua, ne wuaabʉrʉ krĩña bꞌearãũdua, beubarira bꞌʉ ẽã ne bio erubꞌʉba.

¹⁶ Ne jarakꞌa dewara mawũãsia: Bara bꞌʉba ne udꞌata biodꞌe bia zausia.

¹⁷ Mawũẽ izhikusa krĩcha mawũãsia: ¿Mʉã kꞌãrẽta oipe? Mʉã sãma wuagꞌaira ne ẽã mʉrẽ ne zaudꞌara.

¹⁸ Mawũãpe mawũãsia: Mʉã ya kꞌawuabʉrʉa kꞌãrẽ oira: Mʉrẽ ne kuabari nʉmeta teguekuape audre zhi zromata okuape mama wuagꞌaya jõma mʉrẽ ne zaudꞌata, jõma mʉã ne erubꞌʉta.

¹⁹ Mobe mʉzhikusa mawũãña: Bʉra ne bio wuagꞌa erubꞌʉa año bioedꞌa, mawũẽ ẽnaʉ̃rũã, nekꞌorua, baniã dorua, sobiarua.

²⁰ Maʉ̃ne Daizezebara mawũãsia: Bʉra krĩcha ne ẽã, bʉra naʉ̃ diamase beuya. Mawũẽ bʉa wuagꞌabʉrʉra ¿kꞌaidꞌe baipe?

²¹ Aramaʉ̃ kĩrãkꞌa bꞌʉa izhikusaita ne bio eababi bꞌʉta, aramaʉ̃nerã bara bꞌʉ ẽã Daizezeitara.

Sopua nʉma ẽbaidꞌebema

²² Maʉ̃ tẽã Jesúsbara izha jʉrʉkuadꞌaa mawũãsia: Maʉ̃neba mʉã marãã jaraya: Sopuarãũdua mazhi bꞌaidꞌebema kꞌarea, kꞌãrẽta kꞌoidꞌe, miã kꞌakuaita kꞌãrẽta jʉ̃ĩne.

²³ Dazhi bꞌʉra audre vale bꞌʉa zhiko kꞌãñabara, kꞌakuara audre vale bꞌʉa wua kꞌãñabara.

²⁴ Ibanata akaudua, ne udꞌa ẽã, miã ne ewadꞌa ẽã, miã ne wuagꞌabari maẽ ne kuadꞌa ẽã. Maʉ̃ta Daizezebara ne dedꞌeka bꞌʉa. ¿Marã audre vale duanu ẽka ibana bꞌe kꞌãñabara?

²⁵ ¿Marãnebemabara kꞌaiba izhi sopua nʉmʉba izhira ewari wueta bꞌabi bꞌeipe?

²⁶ Mawũã ne wĩkata bꞌedꞌa ẽãta, ¿kꞌãrẽã sopuadꞌaipe ne awʉrʉ kꞌarea?

²⁷ Krĩchaudua nepono sãwũã wari bꞌeta. Trajadꞌa ẽã, miã wua kꞌasudꞌa ẽã. Mawũãmina mʉã marãã jaraya, rey Salomón kĩrãwãrẽã zho bꞌasimina kĩrãwãrẽã zho bꞌa ẽbasia nepono abꞌaʉdꞌebema kĩrãkꞌabidꞌa.

²⁸ Daizezebara chiruata mawũã zhobi bꞌʉra, idꞌi meã takeradꞌata nunebai tebʉdꞌe babuebadata mawũã obꞌʉra, ¿marã audre zhobigai ẽka, awuarabʉrʉ soidꞌu bꞌeaita wãẽã duanu ẽka?

²⁹ Maʉ̃ba marã sopua bꞌearãũdua kꞌãrẽ kꞌoi kꞌarea, kꞌãrẽ doi kꞌarea, miã sãwũãĩ kꞌawua ẽã bꞌearãũdua.

³⁰ Maʉ̃ jõmaʉ̃ kꞌarea sopua bꞌea Daizezedꞌebema ẽãta ẽjũãne bꞌera. Mawũãmina marã Zezebara kꞌawua bꞌʉa marãbara maʉ̃ jõma nesidꞌa bꞌeta.

³¹ Maʉ̃ba izha jara bꞌʉta obʉrʉba jʉrʉdua Daizezeta Nokꞌodꞌebemata, mobedꞌeba izhara maʉ̃ jõma marãã diaya.

Ne biata ʉ̃tre tʉdꞌaidꞌebema

³² Marã kꞌabana ẽmina perarãũdua, Daizezebara krĩñasia marãã diaita izhita Nokꞌodꞌebemata.

³³ Mazha ne erubꞌera nendodꞌape zuburia bꞌea diaudua. Mawũãrã zũbi soreakꞌadꞌe ne biata ʉ̃tre tʉdꞌaya jõkꞌata. Maĩnurã nezrʉgamiã jũẽ ẽã, miã zhi muĩba ãrĩ ẽã.

³⁴ Mawũã ne biata marãneta bꞌʉ maẽ nʉmaña marã sora.

Nezokꞌa kĩrãkuitaidꞌebema

³⁵ Marãbara kĩrãkuita jʉ̃ã bꞌeba ĩbĩrã kꞌoape bꞌe kĩrãkꞌa bꞌeaudua.

³⁶ Aramaʉ̃ne nezokꞌarãta bꞌeabari kĩrãkꞌa bꞌeaudua, jʉ̃ãbada ãzhi nokꞌo juwua jida nʉmanata jẽrũya zeyeedꞌa, zepe trʉ̃bʉrʉdꞌera aramaʉ̃ta ewadꞌaita.

³⁷ Nezokꞌarã maʉ̃rã sobiadꞌaya ãzhi nokꞌo zebʉrʉdꞌe mawũã jʉ̃ã bꞌeta ũdu zera. Mʉã wãrĩnu marãã jaraya, mawũãrã jewedꞌabigape izhabʉrʉ ne jigaya.

³⁸ Ewari ẽsadra o ʉ̃nadrʉ bodꞌodꞌe zebʉrʉdꞌe mawũã ũdu zera sobiadꞌaya maʉ̃rã nezokꞌarãta bꞌera.

³⁹ Naʉ̃ta kꞌawuaudua, nezrʉgamiã kꞌãrẽ ʉ̃madaudꞌe zeita zhidekʉba kꞌawuara daukꞌãrã bꞌeya, aramaʉ̃ne nezrʉgabi ẽbaya izhi dedꞌara.

⁴⁰ Marãsidꞌa aramaʉ̃ kĩrãkꞌa kĩrãkuita bꞌeaudua, marãbara zeita krĩchadꞌa ẽãne zei baera mʉ Beubari Bape bꞌadꞌara.

Nezokꞌaba ne aribꞌae ẽãnebema

⁴¹ Mobebʉrʉ Pedroba mawũãsia: Nokꞌó, ¿bʉa maʉ̃ jarabʉrʉra bari daia jarabʉrʉka, o jarabʉrʉ jõmaʉ̃ã?

⁴² Mawũãĩ Nokꞌo Jesúsbara mawũãsia: ¿Nezokꞌata ne aribꞌae krĩcha bara bꞌʉra izhi nokꞌobara izhi dedꞌa bꞌe ʉ̃rʉ̃ bꞌʉi ẽka nekꞌobada ʉ̃madaudꞌe ne dedꞌekamarẽã?

⁴³ Nezokꞌa maʉ̃ sobiaya izhi nokꞌo zebʉrʉdꞌe maʉ̃ta aribꞌae nʉmʉta ũdu zera.

⁴⁴ Mʉã wãrĩnu marãã jaraya, mawũã bꞌʉra nebia izhidꞌeta nʉmʉ jõmaʉ̃ ʉ̃rʉ̃ bꞌʉya.

⁴⁵ Mawũãmina nezokꞌa maʉ̃ba izhi sobitabaiba mʉ nokꞌo zeira dããrã baya ape zhũmakĩrãrã, wũẽrãrã abꞌarika nezokꞌarãta puokua, nekꞌo, itua do beu nʉmaĩbʉrʉ,

⁴⁶ maʉ̃ nezokꞌa nokꞌora zeya izha jʉ̃ã bꞌʉ ẽã ewade, izha kꞌawua ẽã ʉ̃madaudꞌe, mobe abꞌaedꞌa puoya, mobe bꞌʉya ne aribꞌae duanu ẽã bawara.

⁴⁷ Maʉ̃ nezokꞌabara izhi nokꞌoba kꞌãrẽ krĩñata kꞌawua bꞌʉta kĩrãkuita ẽãba izha krĩñata o ẽbadꞌara bio uya.

⁴⁸ Mawũãmina iabꞌaʉba kꞌawua ẽãba uidꞌebemata ora bio u ẽã. Daizezeba iabꞌaʉa kꞌãrẽ bio diabʉrʉdꞌera kꞌãrẽ bio aribꞌae nʉmabiya. Aramaʉ̃ne iabꞌaʉa kꞌãrẽ bio chãbꞌaribʉrʉdꞌera kꞌãrẽ audre aribꞌae nʉmabiya.

Jesúsdꞌebemata juradꞌaidꞌebema

⁴⁹ Mʉrã zhãrã kꞌawua oita zesia, aramaʉ̃ne tebʉta pureabibʉrʉkaya naʉ̃ druadꞌe. ¡Mʉãrã krĩña bꞌʉa yabidꞌa purea nʉmeĩta!

⁵⁰ Mʉrã zuburia beuya. ¡Mʉrã maʉ̃ba sopua bꞌʉa maʉ̃ta arimaẽ berabꞌariyeedꞌa!

⁵¹ ¿Marãbara krĩcha duanuka mʉrã zesita druadꞌe zhãrã adu-a bꞌeabiita? Mʉã marãã jaraya, mawũã ẽã, awuarabʉrʉ zhi juradꞌaya.

⁵² Naneba ʉ̃taara abꞌaʉ dedꞌa juesoma bꞌeta dra duanaña. Mʉ kꞌarea ũbeaba juradꞌaya ũmeta, ũmeba juradꞌaya ũbeata.

⁵³ Zezeba juraya zhi warrata, warraba juraya zhi zezeta. Papaba juraya zhi kꞌauta, kꞌauba juraya zhi papata. Pakꞌõrẽba juraya zhi ãĩguta, ãĩguba juraya zhi pakꞌõrẽta.

¿Ũdudꞌakꞌata mʉã onʉmʉ ẽka idꞌidꞌera?

⁵⁴ Kꞌabanata kꞌobꞌea Jesúsbara mawũãsia: Marãba jãrãrãta pusaare ũdubʉdadꞌe kueta zeya abʉdadꞌera zebaria.

⁵⁵ Pʉ̃ãdrʉta druaareba pʉ̃ãdrʉbʉrʉdꞌe jʉ̃wʉ̃rʉ̃ baya abʉdadꞌera jʉ̃wʉ̃rʉ̃ã nʉmebaria.

⁵⁶ ¡Sewakꞌau bꞌea! Marãbara sãwũãta kꞌawua bꞌea bãjãnebemata, druadꞌebemata, ¿maʉ̃ta kꞌãrẽneba sãwũãta kꞌawuadꞌa ẽpe ũdudꞌakꞌata mʉã onʉmʉrã idꞌidꞌe?

Bʉ jura ũme ibiadꞌe barua

⁵⁷ ¿Kꞌãrẽã mazhikusaubara kꞌawuadꞌa ẽpe kꞌãrẽ bia oira?

⁵⁸ Nokꞌo zhãrã kꞌawua obarima bʉ jura ũme wãbʉdadꞌera, izhi ũme ibiadꞌe baudua odꞌewedꞌa. Mawũã o ẽbʉrʉ bʉra nokꞌoma edeya, waya nokꞌoba policia chãbꞌariya edꞌa bꞌʉmarẽã cárceldꞌe.

⁵⁹ Mʉã bʉaa jaraya, bʉra mamaʉ̃bara ẽdrʉ ẽã nokꞌoba plata sõmbe diaita jaradꞌata jõma dia ẽbʉrʉ.