Juan 9 - Porciones del Nuevo Testamento

Jesúsba ne ũdubidꞌa daʉbꞌerrea todꞌata

¹ Jesús wãbʉrʉdꞌera ũdusia ũmakĩrã daʉbꞌerrea todꞌata.

² Mawũẽ izha jʉrʉkuadꞌabara widꞌi mawũãsidꞌa: Miã Ũrãgꞌabari, ¿kꞌazhiruara kꞌaiba osi, naʉ̃ba o zhibarirãba osidꞌakꞌa kꞌãwũã daʉbꞌerrea toira?

³ Mawũãnaĩ Jesúsbara panaʉ̃ mawũãsia: Izha kꞌazhiruata odꞌadꞌeba kꞌãwũã bꞌʉ ẽã, miã zhibarirãba kꞌazhiruata odꞌapeadꞌadꞌeba kꞌãwũã bꞌʉ ẽã, awuarabʉrʉ kꞌãwũã tosia Daizezeba kꞌãrẽ obꞌei bꞌʉta dajada nʉmemarẽã naʉ̃neba.

⁴ Mʉ zokꞌadꞌaba obi nʉmʉrã mʉãrã oibara wadꞌi ãsapedꞌa nʉmʉ kĩrãkꞌa nʉmʉwedꞌa. Ewarita zeya diamase dogꞌo kĩrãkꞌa miõba Daizezedꞌebema obꞌe ẽãta.

⁵ Mʉta naʉ̃ ẽjũãne bꞌʉwedꞌara mʉta ʉ̃nata bꞌʉa ẽjũãne bꞌerãĩta.

⁶ Maʉ̃ta jarape egorodꞌe idꞌosia, aramaʉ̃ne egorora idꞌoba susua ope maʉ̃ egoro susuaba pãrĩkua kꞌobꞌʉsia daʉbꞌerrea bꞌʉ dabʉta.

⁷ Mobe mawũãsia: Sʉgʉdꞌe wãrũã Siloé posoidꞌu. Maʉ̃ trʉ̃bara jara krĩña bꞌʉa Zokꞌabuedꞌata. Mawũãĩ wãpe sʉgʉsia, mawũẽ jẽrũya zebʉrʉdꞌera ne ũdu zesia.

⁸ Mawũẽ arakꞌaita bꞌebara naara daʉbꞌerrea bꞌʉta akʉ bꞌeadꞌabara mawũãsidꞌa: ¿Naʉ̃ ẽka jewedꞌape nebari widꞌi bꞌadꞌara?

⁹ Ʉ̃kʉrʉbara mawũãsidꞌa: Kꞌãʉ̃ izhia. Waya awʉrʉrãbara mawũãsidꞌa: Izhi kĩrãkꞌa bꞌʉa. Maʉ̃ne izhara mawũãsia: Mʉrã izhia.

¹⁰ Mawũãĩ mawũãsidꞌa: ¿Bʉra sãwũã ne ũdu bꞌidꞌa?

¹¹ Mawũãnaĩ izhara panaʉ̃ mawũãsia: Jesús abadaba egorota idꞌoba susua ope mʉ dabʉta pãrĩkua kꞌobꞌʉpe mawũãsia: Siloé posoidꞌu wãpe sʉgʉdua. Mawũãĩ mʉrã wãpe sʉgʉsia, aramaʉ̃ne mʉrã ne ũdusia.

¹² Mawũãĩ mawũãsidꞌa: ¿Maʉ̃ sãma bꞌʉ? Mawũãnaĩ izhara mawũãsia: Mʉãrã kꞌawua ẽã.

Fariseorãba widꞌidꞌapeadꞌa daʉbꞌerrea bꞌʉta bꞌedꞌaa

¹³ Fariseorã kĩrãbita edesidꞌa daʉbꞌerrea bꞌadꞌara.

¹⁴ Ẽnaʉ̃bada ewari basia Jesúsba egorota idꞌoba susua ope ne ũdubisidꞌera.

¹⁵ Mawũẽ fariseorãbidꞌa widꞌisidꞌa sãwũã ne ũdu bꞌidꞌata. Mawũẽ izhara mawũãsia: Egorota idꞌoba susua ope mʉ dabʉta pãrĩkua kꞌobꞌʉsia, maʉ̃ta mʉã sʉgʉbʉrʉdꞌera mʉrã ne ũdusia.

¹⁶ Mawũãĩ fariseorã ʉ̃kʉrʉbara mawũãsidꞌa: Kꞌãʉ̃ Daizezedꞌeba nʉmʉ ẽã, mawũẽ aribꞌae ẽã ẽnaʉ̃bada ewarira. Waya awʉrʉrãbara mawũãsidꞌa: ¿Kꞌazhirua omiãbara sãwũã mawũã ũdudꞌakꞌata oipe? Ãzhira aramaʉ̃ne krĩcha abꞌarika ze ẽbasia.

¹⁷ Mawũẽ daʉbꞌerrea bꞌadꞌaa wakusa mawũãsidꞌa: ¿Bʉara kꞌasia aipe bʉ daʉbꞌerrea bꞌʉta ne ũdubidꞌadꞌebema? Mawũãnaĩ izhara mawũãsia: Mʉma kꞌãʉ̃ Daizezeba bedꞌeata jarabibaria.

¹⁸ Judíorãbara ĩjãna ẽbasia izhira daʉbꞌerrea bꞌadꞌata ne ũdu bꞌidꞌara, mawũẽ zhibarirãta trʉ̃sidꞌa.

¹⁹ Mobe widꞌi mawũãsidꞌa: ¿Marã naʉ̃ zhibarirãta panʉka, naʉ̃ka marãba jara panʉrã daʉbꞌerrea todꞌata? ¿Sãwũã kꞌãwũã ne ũdu bꞌidꞌa?

²⁰ Mawũãnaĩ zhibarirãbara panaʉ̃ mawũãsidꞌa: Daibara kꞌawua panʉã daira naʉ̃ zhibarirãta, naʉ̃ daʉbꞌerrea tosia.

²¹ Mawũãmina sãwũã kꞌãwũã ne ũdu bꞌidꞌara daibara kꞌawuadꞌa ẽã, miã daʉbꞌerrea bꞌʉta kꞌaiba kꞌãwũã ne ũdubi bꞌidꞌapʉra daibara kꞌawuadꞌa ẽã. Ya zõrã baera izhaa widꞌiudua, ari izha nebʉrʉya.

²² Zhibarirãbara mawũãsidꞌa judíorãta wawia panʉba, maʉ̃ẽnabemata judíorã ya krĩcha abꞌarika zekuasia Jesús zhãrã Ẽdrʉbia abʉrʉra de zhi jʉrebada maẽ edꞌa wãbidꞌa ẽbaita.

²³ Maʉ̃ kꞌarea zhibarirãbara mawũãsidꞌa: Ya zõrã baera izhaa widꞌiudua.

²⁴ Mawũẽ daʉbꞌerrea bꞌadꞌara wakusa trʉ̃nape mawũãsidꞌa: Daizeze kĩrãbita daia wãrãta jaradua. Daibara kꞌawua bꞌea kꞌãʉ̃ kꞌazhirua omiãta.

²⁵ Mawũãnaĩ izhara panaʉ̃ mawũãsia: Kꞌazhirua omiãbʉrʉ mʉãrã kꞌawua ẽã. Awuarabʉrʉ mʉã kꞌawua bꞌʉra mʉrã daʉbꞌerrea bꞌadꞌata ne ũdu bꞌidꞌa.

²⁶ Mawũãĩ wakusa mawũãsidꞌa: ¿Bʉra sãwũã osi? ¿Bʉra sãwũã ne ũdubi bꞌidꞌapʉ?

²⁷ Mawũãnaĩ izhara panaʉ̃ mawũãsia: Mʉãrã ya marãã jarasia, mawũãmina marãbara ũrĩna ẽã. ¿Kꞌãrẽã wakusa ũrĩ krĩña panʉ? ¿Marãbidꞌa pẽwã krĩña panʉka?

²⁸ Mawũãĩ ikꞌazhirua jaradꞌape mawũãsidꞌa: Bʉabʉrʉ pẽwã bꞌidꞌa, mawũãmina daibara pẽwã bꞌea Moiséta.

²⁹ Daibara kꞌawua bꞌea Daizezera bedꞌeasita Moiséa, mawũãmina kꞌãʉ̃ẽnabema daibara kꞌawuadꞌa ẽã sãmaʉ̃ba ʉ̃tʉ zedꞌara.

³⁰ Mawũãnaĩ maʉ̃bara panaʉ̃ mawũãsia: Sakua mawũã marãbara sãmaʉ̃ba ʉ̃tʉ zedꞌata kꞌawuadꞌa ẽpe, maʉ̃ne mʉrã ne ũdubi bꞌidꞌapʉa.

³¹ Kꞌawua bꞌea Daizezebara ũrĩ ẽãta kꞌazhirua omiãrã bedꞌeara, mawũãmina iabꞌaʉba Daizezeta wawia bꞌʉra, aramaʉ̃ne izha krĩñata obꞌʉra, maʉ̃ bedꞌeara ũrĩ bꞌʉa.

³² Ũrĩnakꞌa iabꞌaʉba ne ũdubisia abʉdara iabꞌa daʉbꞌerrea todꞌata.

³³ Naʉ̃ta Daizezedꞌeba ze ẽbasibʉrʉ miã kꞌãrẽta obꞌe ẽbakꞌausia.

³⁴ Mawũãĩ panaʉ̃ mawũãsidꞌa: Bʉra jipadꞌe kꞌazhiruadꞌe tosia. ¿Maʉ̃ta bʉabʉrʉ ũrãgꞌaika daita? Mawũãnape jarasidꞌa de zhi jʉrebada maẽ wueta edꞌa wã ẽbamarẽã.

Daizezedꞌebema ũdu bꞌedꞌe bꞌebara ũdudꞌa ẽã

³⁵ Jesúsbara ũrĩsia aramaʉ̃ne ãĩ kenabꞌaribʉdata, mawũẽ ũdui mawũãsia: ¿Bʉara ĩjã bꞌʉka Daizeze Warradꞌebema?

³⁶ Mawũãĩ izhara panaʉ̃ mawũãsia: ¿Nokꞌó, maʉ̃ kꞌaipe mʉã ĩjãĩta izhidꞌebemata?

³⁷ Mawũãĩ Jesúsbara mawũãsia: Maʉ̃ bʉara ũdu kꞌobꞌʉta mʉ bʉ ũme bedꞌea kꞌobꞌʉta izhia.

³⁸ Mawũãĩ izhara mawũãsia: Nokꞌó, bʉdꞌebema mʉãrã ĩjãbʉrʉa. Mawũãpe ibia jarasia.

³⁹ Jesúsbara mawũãsia: Zhãrã kꞌawua oi kꞌarea mʉrã zesia naʉ̃ ẽjũãẽna. Aramaʉ̃ne Daizezedꞌebema ũdu ẽã bꞌebara ũdudꞌamarẽã, waya ũdu bꞌedꞌe bꞌebara ũdu ẽã bꞌeamarẽã.

⁴⁰ Fariseorãnebema ʉ̃kʉrʉ izhi bawara kꞌopanʉba maʉ̃ta ũrĩbʉdadꞌera mawũãsidꞌa: ¿Mobera daisidꞌa daʉbꞌerrea duanuka?

⁴¹ Mawũãnaĩ Jesúsbara panaʉ̃ mawũãsia: Daizezedꞌebemata ũdu ẽã bꞌebʉrʉ kꞌazhirua ne ẽã bꞌeakꞌausia. Mawũãmina ũdu bꞌea abꞌeba marãne kꞌazhiruara ari nʉmʉã.