Juan 8 - Porciones del Nuevo Testamento

Wũẽrãba kĩma ẽãta erukꞌãĩna

¹ Waya Jesúra wãsia Olivo kꞌatumaĩnu.

² Nrũẽma diapedꞌa wakusa Daizeze dedꞌa ewara maẽ zebʉrʉdꞌera zhãrã jõma zesidꞌa izhima. Mawũẽ jewedꞌape maʉ̃rãta ũrãgꞌasia.

³ Maʉ̃ne ũrãgꞌa Moisédꞌe jarabadaba fariseorã bawarauba wũẽrãta izhima wesidꞌa kĩma ẽãta erukꞌãĩ nʉmʉta burudꞌape, mobe miõ ẽsadra kꞌobꞌʉdꞌape,

⁴ mawũãsidꞌa: Miã Ũrãgꞌabari, naʉ̃ wũẽrã kĩma ẽãta erukꞌãĩ nʉmʉta burusidꞌa.

⁵ Ũrãgꞌadꞌera Moisébara daia jarasia wũẽrã kꞌãwũã bꞌera mongꞌaraba tabꞌari beadꞌamarẽã. ¿Mawũẽ bʉara kꞌasia aipe?

⁶ Maʉ̃ta jarasidꞌa wãẽãbidꞌape nokꞌoa jidꞌai kꞌarea. Mawũãmina Jesús ju kꞌobꞌepe egorodꞌe ne bꞌʉsia juwua jĩwĩniba.

⁷ Maʉ̃ne ãzhara pi widꞌi barabꞌʉba jipa kꞌobꞌepe mawũãsia: Marãnebema kꞌazhirua ne ẽãba maʉ̃ba naara mongꞌaraba tabꞌarirua kꞌãʉ̃ wũẽrã.

⁸ Mawũãpe wakusa ju kꞌobꞌepe ari ne bꞌʉ nʉmesia egorodꞌe.

⁹ Mawũãmina ãzhara maʉ̃ta ũrĩnape kꞌazhirua bara bꞌeta kꞌawua bꞌeba abꞌa abꞌaʉdꞌe ãĩ wãsidꞌa, naara ãĩ wãsidꞌa zõrãrãta, maʉ̃are kũrãrãta. Aramaʉ̃ne Jesús dobꞌa kꞌobꞌesia, wũẽrãsidꞌa kꞌobꞌesia miõ ẽsadra kꞌobꞌedꞌata.

¹⁰ Mawũẽ Jesús jipa kꞌobꞌebʉrʉdꞌe miõ ũdu ẽãne wũẽrãtrʉ ũdui mawũãsia: ¿Wũẽrã, bʉta ji kꞌopanana sãma kꞌopanʉ? ¿Bʉra miõba bea ẽka?

¹¹ Mawũãĩ wũẽrãbara mawũãsia: Nokꞌó, mʉrã miõba bea ẽã. Mobebʉrʉ Jesúsbara mawũãsia: Bʉra miã mʉãbidꞌa bea ẽã, mawũẽ wãrũã, mobe wueta kꞌazhiruata orãrũã.

Jesúra ʉ̃nata bꞌʉa ẽjũãne bꞌerãĩta

¹² Wakusa Jesúsbara zhãrã kꞌobꞌea mawũãsia: Mʉrã ʉ̃nata bꞌʉa ẽjũãne bꞌerãĩta, mʉta pẽwã bꞌʉra pãrĩguadꞌe nimiba ẽã, awuarabʉrʉ ʉ̃nata erubꞌaya Daizeze ũme bꞌai jõ ẽãta.

¹³ Mawũãĩ fariseorãbara mawũãsidꞌa: Bʉara bʉzhidꞌebemata jara bꞌʉa, mawũẽ bʉa jara bꞌʉra kꞌãrẽ ẽã.

¹⁴ Mawũãnaĩ Jesúsbara panaʉ̃ mawũãsia: Mʉãrã mʉzhidꞌebemata jara bꞌʉmina mʉã jara bꞌʉra wãrĩnuã, mʉã kꞌawua bꞌʉba mʉ sãmaʉ̃ba zedꞌata, mʉ sãmaã wãĩta. Mawũãmina marãbara kꞌawuadꞌa ẽã mʉ sãmaʉ̃ba zedꞌata miã sãmaã wãĩta.

¹⁵ Marãbara mʉrã jara bꞌea beubarita bedꞌea bꞌedꞌe, mawũãmina mʉã zhãrã mawũãrã jara ẽã.

¹⁶ Mʉã zhãrãnebemata jarara mʉãrã wãrĩnuta jaraya mʉrã abꞌa nʉmʉ ẽbaera, awuarabʉrʉ daira panʉã mʉta mʉ Zeze mʉ zokꞌadꞌata.

¹⁷ Marã ũrãgꞌadꞌera bꞌʉ tabꞌʉa zhãrã ũmeba bedꞌeata jarabʉdara wãrĩnuta.

¹⁸ Aramaʉ̃ kĩrãkꞌa mʉãrã mʉnebemata jara bꞌʉa, mʉ Zeze mʉ zokꞌadꞌabidꞌa jara bꞌʉa mʉnebemata.

¹⁹ Mawũãĩ ãzhara mawũãsidꞌa: ¿Sãma bꞌʉ bʉ Zezera? Mawũãnaĩ Jesúsbara panaʉ̃ mawũãsia: Marãbara mʉrã ũdukꞌawua duanu ẽã, miã mʉ Zezesidꞌa ũdukꞌawua duanu ẽã, mʉta ũdukꞌawua bꞌebʉrʉ mʉ Zezesidꞌa ũdukꞌawua bꞌea.

²⁰ Jesúsbara maʉ̃ bedꞌeata jarasia ofrenda bꞌʉbada maẽ Daizeze dedꞌa ewara maẽ miã ũrãgꞌa nʉmʉba. Maʉ̃nerã miõba jidadꞌa ẽbasia wadꞌi araba ẽãba izhi ewarita.

Mʉ wãĩma marã wã bꞌedꞌa ẽã

²¹ Jesúsbara wakusa mawũãsia: Mʉta wãbʉrʉdꞌera marãbara mʉrã jʉrʉdꞌaya, mawũãmina marã mazhi kꞌazhiruadꞌe beukuaya, mawũẽ mʉ wãĩma marã wã bꞌedꞌa ẽã.

²² Mawũãĩ judíorãbara mawũãsidꞌa: ¿Mobera izhikusa zhi beaika, sãwũã mawũã mʉ wãĩma marã wã bꞌedꞌa ẽã abʉrʉ?

²³ Maʉ̃ne Jesúsbara mawũãsia: Marã udꞌabema, mʉrã ʉ̃trebema, marã naʉ̃ ẽjũãnebema, mʉrã naʉ̃ ẽjũãnebema ẽã.

²⁴ Maʉ̃ba mʉã marãã jarabʉrʉa marã mazhi kꞌazhiruadꞌe beukuaita, Mʉrã Mʉta ĩjãna ẽbʉrʉ mazhi kꞌazhiruadꞌe beukuaya.

²⁵ Mawũãĩ mawũãsidꞌa: ¿Bʉra kꞌaipe? Mawũãnaĩ Jesúsbara mawũãsia: Mʉnebema jẽde wedꞌauba mʉã marãã zhi jarama.

²⁶ Mʉãrã marãnebema ne bio jara kꞌawua oya, mʉ zokꞌadꞌabara wãrĩnuta jara bꞌʉa, mawũẽ mʉãrã izha jarabʉrʉta ũrĩbʉrʉta jara bꞌʉa ẽjũãne bꞌea.

²⁷ Mawũãbʉrʉdꞌera ãzhara kꞌawuadꞌa ẽbasia zhi Zezeta jarabʉrʉra.

²⁸ Mawũẽ Jesúsbara mawũãsia: Mʉ Beubari Bape bꞌʉta marãba cruzdꞌe jirabꞌʉdꞌai marãbara kꞌawuadꞌaya Mʉrã Mʉta, aramaʉ̃ne kꞌawuadꞌaya mʉã miã kꞌãrẽta o ẽãta mʉzhikusaubara, awuarabʉrʉ mʉrã mʉ Zezeba jaradiadꞌadꞌe bedꞌea bꞌʉa.

²⁹ Mʉ zokꞌadꞌara mʉ ũme bꞌʉa, aramaʉ̃ne mʉ Zezebara mʉrã dobꞌa kenabꞌari ẽã, mʉãrã ewariza obꞌʉba izha krĩñata.

³⁰ Jesúsba maʉ̃ta jarabʉrʉba bioba ĩjãsidꞌa izhidꞌebemata.

Wãrãbara ẽdrʉbigaya

³¹ Mobebʉrʉ Jesúsbara judíorã izhidꞌebema ĩjãbʉdaa mawũãsia: Marãba mʉ bedꞌeata aribꞌae bꞌebʉrʉ wãrĩnu mʉta pẽwã bꞌea.

³² Mawũãrã kꞌawuadꞌaya Daizezedꞌebema wãrãta, wãrãbara ẽdrʉbigaya.

³³ Mawũãĩ panaʉ̃ mawũãsidꞌa: Daira Abrahamneba uruta bꞌea, mawũẽ daira nezokꞌata duanu ẽã. ¿Sãwũã maʉ̃ta bʉara ẽdrʉdꞌaya abʉrʉ?

³⁴ Mawũãnaĩ Jesúsbara panaʉ̃ mawũãsia: Mʉã wãrĩnu marãã jaraya: Kꞌazhiruata obꞌera kꞌazhirua nezokꞌata bꞌea.

³⁵ Nezokꞌara zhidekʉ maẽ jipa dedꞌabema ẽã, mawũãmina zhi warrara jipa dedꞌabema.

³⁶ Mawũẽ mʉta Daizeze Warraba ẽdrʉbigara, wãrĩnu ẽdrʉdꞌaya.

³⁷ Mʉãrã kꞌawua bꞌʉa marã Abrahamneba uruta, mawũãmina marãbara mʉrã bea krĩña bꞌea, mʉ bedꞌeara ĩjãna ẽãba marãbara.

³⁸ Mʉãrã jara bꞌʉa mʉ Zezeba ũdubidꞌata, waya marãbara obꞌea mazhi zezeba ũrĩbidꞌata.

Marã mazhi zeze ãtõmiãneã

³⁹ Mawũãĩ panaʉ̃ mawũãsidꞌa: Dai zezea Abrahamta. Mawũãnaĩ Jesúsbara mawũãsia: Marãta Abraham warrarãbʉrʉ, Abrahamba odꞌata okꞌausidꞌa.

⁴⁰ Mawũãmina marãbara mʉrã bea krĩña bꞌea, maʉ̃ne mʉãrã wãrãta jarakꞌa bꞌʉa Daizezedꞌeba ũrĩnata. Marã kĩrãkꞌa maʉ̃ kꞌaudꞌa bꞌa ẽbasia Abraham.

⁴¹ Marãbara obꞌea mazhi zezeba obꞌʉta. Mawũãĩ mawũãsidꞌa: Daira wũẽrã jõmaĩnu bꞌʉba todꞌata duanu ẽã. Daibara zeze abꞌa erubꞌea, izhira Daizezea.

⁴² Mawũãnaĩ Jesúsbara mawũãsia: Marã zezeta Daizeze basibʉrʉ, marãbara mʉrã kʉãgꞌa kꞌausidꞌa. Mʉrã Daizeze maẽba zedꞌaba mʉzhikusaudꞌeba ze ẽbasia, awuarabʉrʉ mʉrã izha zokꞌasia.

⁴³ ¿Marãbara kꞌãrẽneba sãwũãta kꞌawuadꞌa ẽpe mʉã jara bꞌʉra? Kꞌawua ẽã bꞌea mʉ bedꞌeara ũrĩ krĩña ẽã bꞌeba.

⁴⁴ Marã mazhi zeze ãtõmiãneã, mawũẽ mazhi zezeba krĩñata okrĩña bꞌea. Jẽde wedꞌauba izhira miã beamiãta bꞌʉa, wãrãnebemane bꞌʉ ẽãba wãrãta jarakꞌa. Sewata jara bedꞌeabʉrʉdꞌera izhi bꞌʉdꞌe bedꞌea bꞌʉa. Aramaʉ̃ne sewa nebʉrʉmiãba sewadꞌebema zezea.

⁴⁵ Mawũãmina mʉãrã wãrãta jara bꞌʉta ĩjãna ẽã.

⁴⁶ ¿Marãnebemabara mʉrã kꞌaiba kꞌazhiruata osia aipe? Mʉã wãrãta jara bꞌʉbʉrʉ, ¿marãbara kꞌãrẽã ĩjãna ẽpe?

⁴⁷ Daizezedꞌeta bꞌʉbara Daizeze bedꞌeata ũrĩ bꞌʉa, mawũãmina marãbara ũrĩna ẽã Daizezedꞌeta duanu ẽãba.

Abraham nawedꞌa bꞌʉa zhãrã Ẽdrʉbira

⁴⁸ Mawũãĩ judíorãbara panaʉ̃ mawũãsidꞌa: ¿Kꞌãʉ̃neba bia daibara bʉra Samaria bidꞌata jara panʉta bʉra jaiba erunʉmʉ ẽka?

⁴⁹ Mawũãnaĩ Jesúsbara panaʉ̃ mawũãsia: Mʉrã jaiba erunʉmʉ ẽã. Awuarabʉrʉ mʉãrã wawia bꞌʉa mʉ Zezeta, maʉ̃ne marãbara mʉrã wawiadꞌa ẽã.

⁵⁰ Mʉãrã mʉta bia jaradꞌamarẽã bꞌʉ ẽã, mʉ Zezebʉrʉ mʉrã bia jaradꞌamarẽã bꞌʉa, mawũã bia jaradꞌa ẽbʉrʉ izhabʉrʉ kꞌawua oya.

⁵¹ Mʉã wãrĩnu marãã jaraya: Mʉ bedꞌeata aribꞌae bꞌʉra beukꞌa baya.

⁵² Mawũãĩ judíorãbara mawũãsidꞌa: Ya daibara kꞌawuabʉda bʉra jaiba erunʉmʉã. Abraham beusia, Daizezeba bedꞌeata jarabibarirãsidꞌa beukuasia, maʉ̃ne bʉara mawũãbʉrʉa: Mʉ bedꞌeata aribꞌae bꞌʉra beukꞌa baya.

⁵³ ¿Mobera bʉra zhi zromakꞌa dai zeze Abraham kꞌãñabara? Izhira beusia, Daizezeba bedꞌeata jarabibarirãsidꞌa beukuasia. ¿Mawũẽ bʉra kꞌaipe mawũã bedꞌea nʉmaĩrã?

⁵⁴ Mawũãnaĩ Jesúsbara panaʉ̃ mawũãsia: Mʉta mʉzhikusa bia jara nʉmaĩbʉrʉ, mawũã mʉzhita bia jara nʉmʉrã kꞌãrẽ ẽã. Mawũãmina mʉrã mʉ Zezeba bia jara bꞌʉa, izhira marãbara Daizezea abꞌea.

⁵⁵ Mawũãmina marãbara izhira ũdukꞌawua duanu ẽã, maʉ̃ne mʉãrã ũdukꞌawua bꞌʉa, mʉã ũdukꞌawua bꞌʉ ẽã ara, sewa nebʉrʉmiã baya marã kĩrãkꞌa, mawũãmina mʉãrã ũdukꞌawua bꞌʉa, mawũẽ mʉãrã izhi bedꞌeara aribꞌae bꞌʉa.

⁵⁶ Marã zeze Abraham sobiasia mʉ zebʉrʉ ewarita ũdui baera, aramaʉ̃ne ũdusia, mawũẽ sobiasia.

⁵⁷ Mawũãĩ judíorãbara mawũãsidꞌa: Bʉra cincuenta añobidꞌa ne ẽãta, ¿bʉa ũdusika Abrahamta?

⁵⁸ Mawũãnaĩ Jesúsbara mawũãsia: Mʉã wãrĩnu marãã jaraya: Abraham nawedꞌa mʉrã bꞌʉa.

⁵⁹ Mawũãĩ mongꞌarata jirakua edasidꞌa tabꞌari beadꞌaita, mawũãmina Jesús merũpe ãĩ wãsia Daizeze dedꞌa ewara maẽbara. Aramaʉ̃ne ãzhi ẽsadra berabꞌari wãsia.