Juan 7 - Porciones del Nuevo Testamento

Jesús mebẽrãba izhidꞌebema ĩjã ẽã bꞌeadꞌa

¹ Maʉ̃ tẽã Jesús pʉrrʉasia Galilea druadꞌe, Judea druadꞌera pʉrrʉa krĩña ẽbasia judíorãba beaita jirpanʉba.

² Kꞌaita bata nʉmasia fiesta judíorãne de pãne duanebadata.

³ Mawũẽ zhi mebẽrãbara Jesúa mawũãsidꞌa: Namaʉ̃bara wãrũã Judea druaedꞌa, maĩnu bʉ pẽwã bꞌebidꞌa ũdudꞌamarẽã bʉa obꞌʉta.

⁴ Iabꞌaʉba izhita ũdukꞌawabiga krĩña bꞌʉbara kꞌãrẽ chupea o ẽã. Mawũẽ bʉara kꞌãwũã kꞌãrẽ onʉmaẽrã jõmaʉ̃ daidꞌu kꞌãrẽ odua.

⁵ Mawũãsidꞌa miã zhi mebẽrãbidꞌa izhidꞌebema ĩjãna ẽãba.

⁶ Mawũãnaĩ Jesúsbara mawũãsia: Mʉrã wadꞌi wãĩne bꞌʉ ẽã, mawũãmina marã baridu ʉ̃madaudꞌe wã bꞌeya.

⁷ Naʉ̃ ẽjũãne bꞌebara marã ũduama ẽã, mawũãmina mʉrã ũduama bꞌea mʉã jara bꞌʉba ãzha obꞌera bia ẽãta.

⁸ Marã wãrĩzeudua fiestaidꞌu, mʉrã wadꞌi wãrĩze ẽã maʉ̃ fiestaidꞌura, mʉ wãĩ ewarira wadꞌi araba ẽã.

⁹ Maʉ̃ta jarakꞌape bꞌesia Galileadꞌe.

Jesús fiestadꞌe bꞌadꞌa de pãne duanu maẽ

¹⁰ Zhi mebẽrã wãrĩzekuadꞌa tẽãne izhisidꞌa wãrĩzesia fiestaidꞌu, mawũãmina jõmaʉ̃ daidꞌu wã ẽbasia, awuarabʉrʉ wãsia chupea.

¹¹ Maʉ̃ne judíorãbara fiestadꞌe jʉrʉ bꞌeta mawũã duanasia: ¿Kꞌãʉ̃ sãma bꞌʉba?

¹² Kꞌabanane edꞌara izhi ʉ̃rʉ̃rã biodꞌe bedꞌea jirpanʉta ʉ̃kʉrʉbara biata bꞌʉa aduanasia. Waya ʉ̃kʉrʉbara mawũã duanasia: Mawũã ẽã, awuarabʉrʉ zhãrãta sewa bꞌʉa.

¹³ Mawũãmina izhi ʉ̃rʉ̃rã miõta dajada bedꞌeadꞌa ẽbasia judíorã wawiaba.

¹⁴ Fiestara ẽsadra babʉrʉdꞌera, Jesús Daizeze deidꞌu wãrĩzepe ewara maẽ miã ũrãgꞌasia.

¹⁵ Mawũẽ judíorãbara bia akʉdrua mawũãsidꞌa: ¿Naʉ̃bara sãwũã kꞌawua bꞌʉ miã ũrãgꞌaidꞌebema estudia ẽbadꞌata?

¹⁶ Maʉ̃ne Jesúsbara mawũãsia: Ũrãgꞌata mʉã jara bꞌʉra mʉrẽ ẽã, awuarabʉrʉ Daizeze mʉ zokꞌadꞌadꞌea.

¹⁷ Daizezeba krĩñata okrĩña bꞌʉbara kꞌawuaya ũrãgꞌara Daizezedꞌeta, o kꞌawuaya mʉrã bedꞌea bꞌʉta mʉzhikusauba.

¹⁸ Izhikusauba bedꞌea bꞌʉbara izhitrʉ bia jaradꞌamarẽã bꞌʉa, mawũãmina mʉãrã Daizeze mʉ zokꞌadꞌata bia jaradꞌamarẽã bꞌʉa, mawũẽ wãrĩnuta jara bꞌʉa, aramaʉ̃ne mʉãrã sewata jara ẽã.

¹⁹ ¿Moisébara ũrãgꞌara marãã diasi ẽka? Maʉ̃ta marãbara miõba aribꞌaedꞌa ẽã. ¿Maʉ̃ba mʉrã bea krĩña duanu ẽka?

²⁰ Mawũãĩ kꞌabanabara panaʉ̃ mawũãsidꞌa: Bʉra jaiba mawũã krĩchabi bꞌʉa, ¿bʉra kꞌaiba bea krĩña nʉmʉ?

²¹ Mawũãnaĩ Jesúsbara panaʉ̃ mawũãsia: Ẽnaʉ̃bada ewade mʉã ne abꞌa obʉrʉba marã jõma kꞌawua ẽã krĩcha kꞌobꞌea.

²² Mawũẽ mʉã jaraya, Moisébara marãã jarasia warra zakera kꞌakua eta kꞌõnamarẽã, mawũã oira Moisédꞌeba ze ẽbasia, awuarabʉrʉ marã zhibarirã bꞌeadꞌadꞌeba zesia, aramaʉ̃ne marãbara ẽnaʉ̃bada ewadebidꞌa warra zakera kꞌakua eta kꞌõbada.

²³ Mawũã ẽnaʉ̃bada ewadebidꞌa warra zakera kꞌakua eta kꞌõbada Daizezeba ũrãgꞌa Moiséa diadꞌata aribꞌaedꞌai kꞌarea, ¿maʉ̃ta marã mʉ bawara kĩrũ duanuka ẽnaʉ̃bada ewade mʉã jipa bꞌebibʉrʉba zhãrãta?

²⁴ Zhãrãba kꞌãrẽ obʉrʉta ũdudꞌape bĩ ẽã bedꞌearãũdua, awuarabʉrʉ kꞌãrẽ obʉrʉta bigara kĩrãẽpa biga audua.

¿Naʉ̃ka zhãrã Ẽdrʉbiira?

²⁵ Jerusalénne bꞌebara ʉ̃kʉrʉba mawũã duanasia: ¿Naʉ̃ ẽka beadꞌaita jʉrʉ bꞌera?

²⁶ Akaudua, jõmaʉ̃ daidꞌu bedꞌea nʉmʉta kꞌãrẽ jaradꞌa ẽã. ¿Nokꞌorãbara wãrĩnu krĩcha duanu ẽka naʉ̃ zhãrã Ẽdrʉbiita?

²⁷ Mawũãmina dazhirãbara kꞌawua bꞌea naʉ̃ sãmabemata, maʉ̃ne zhãrã Ẽdrʉbiita zebʉrʉdꞌera miõba kꞌawua ẽbaya sãmabemata.

²⁸ Mobebʉrʉ Jesúsbara Daizeze dedꞌa ewara maẽ miã ũrãgꞌa nʉmʉba nemi jĩgua mawũãsia: Marãbara mʉrã ũdukꞌawua bꞌeta kꞌawua bꞌea sãmabemata. Mawũãmina mʉrã mʉzhikusauba ze ẽbasia, awuarabʉrʉ mʉrã zokꞌasia Daizeze wãrĩnu bꞌʉba, izhidꞌebema marãbara kꞌawua duanu ẽã.

²⁹ Mawũãmina mʉãrã kꞌawua bꞌʉa mʉrã zesi baera izhi maẽba, mʉrã izha zokꞌasia.

³⁰ Mawũãbʉrʉ kꞌarea Jesús jida krĩñasidꞌa, mawũãmina miõba jida ẽbasia wadꞌi araba ẽãba izhi ewarita.

³¹ Kꞌabanabara bioba izhidꞌebemata ĩjãnape mawũã duanasia: Zhãrã Ẽdrʉbiita zebʉrʉdꞌera, ¿ũdudꞌakꞌara audre oibʉka naʉ̃ba obꞌʉ kꞌãñabara?

Fariseorãba Jesús jida krĩñanapeadꞌa

³² Fariseorãbara ũrĩsidꞌa zhãrã Jesú ʉ̃rʉ̃ mawũã bedꞌea jirpanʉta, mawũẽ sacerdoterã nokꞌorãbara, fariseorã bawarauba Daizeze de akʉbadata zokꞌasidꞌa jidadꞌamarẽã.

³³ Mawũẽ Jesúsbara mawũãsia: Mʉrã wadꞌi ewari kꞌakutua marã bawara bꞌape wãña mʉ zokꞌadꞌama.

³⁴ Marãbara mʉrã jʉrʉdꞌaya, mawũãmina mʉrã ũdudꞌa ẽbaya, aramaʉ̃ne mʉ bꞌaima marã wã bꞌedꞌa ẽã.

³⁵ Mawũãĩ judíorãbara ãzhirãĩnu mawũãsidꞌa: ¿Naʉ̃ sãmaã wãĩba dazhirãba mawũã ũdudꞌa ẽbaira? ¿Judíorã druaza griegorãne edꞌa bꞌema wãĩbʉka, aramaʉ̃ne griegorã ũrãgꞌaita?

³⁶ Izhara kꞌãrẽta jara krĩñaba mawũãbʉrʉ: Marãbara mʉrã jʉrʉdꞌaya, mawũãmina mʉrã ũdudꞌa ẽbaya, aramaʉ̃ne mʉ bꞌaima marã wã bꞌedꞌa ẽã.

Dota Daizeze ũme bꞌai jõ ẽãnebema

³⁷ Fiesta jõbʉrʉ ewarita zhi zroma ewade, Jesús edau nʉmepe nemi jĩgua mawũãsia: Iabꞌa obisia bꞌʉbʉrʉ mʉma zerua, aramaʉ̃ne baniã dorua.

³⁸ Mʉnebemata ĩjã bꞌʉdꞌebara Daizeze bedꞌeata zhi bꞌʉmane jara bꞌʉ kĩrãkꞌa izhi sodꞌeba zhãrãma dota drʉya Daizeze ũme bꞌai jõ ẽãta.

³⁹ Mawũã dota jarabʉrʉra jarasia izhidꞌebemata ĩjãbʉdabara Jawurebiata jidadꞌaita, maʉ̃nerã wadꞌi ze ẽbasia Jawurebiara, wadꞌi Jesús ʉ̃taa wã ẽãba.

Krĩcha abꞌarika zedꞌa ẽbadꞌapeadꞌa

⁴⁰ Kꞌabanata ʉ̃kʉrʉbara maʉ̃ bedꞌeata ũrĩnape mawũãsidꞌa: Naʉ̃ wãrĩnu Daizezeba bedꞌeata jarabibaria.

⁴¹ Waya ʉ̃kʉrʉbara mawũãsidꞌa: Naʉ̃ zhãrã Ẽdrʉbia. Mawũãmina ʉ̃kʉrʉbara mawũãsidꞌa: ¿Galileadꞌebara ʉ̃tʉ zeita bꞌʉka zhãrã Ẽdrʉbiira?

⁴² ¿Maʉ̃ẽnabemata zhi bꞌʉmanerã jara bꞌʉ ẽka rey Davidꞌeba ʉ̃tʉ zeita, aramaʉ̃nerã David Belén pʉwʉrʉdꞌebemata bꞌadꞌa maẽba ʉ̃tʉ zei ẽka zhãrã Ẽdrʉbiira?

⁴³ Aramaʉ̃ne zhãrã krĩcha abꞌarika zedꞌa ẽbasia Jesúsdꞌebemanerã.

⁴⁴ Ãzhara ʉ̃kʉrʉbara jida krĩñasidꞌa, mawũãmina miõba jidadꞌa ẽbasia.

¡Miõta bi-ia bedꞌea ẽã Jesús kĩrãkꞌara!

⁴⁵ Daizeze deta akʉbadara wakusa zesidꞌa sacerdoterã nokꞌorãma, fariseorãma, mawũẽ maʉ̃rãbara mawũãsidꞌa: ¿Sãwũẽ Jesús wedꞌa ẽpe?

⁴⁶ Mawũãnaĩ Daizeze deta akʉbadabara panaʉ̃ mawũãsidꞌa: ¡Miõta bi-ia bedꞌea ẽã kꞌãʉ̃ kĩrãkꞌara!

⁴⁷ Mawũãnaĩ fariseorãbara panaʉ̃ mawũãsidꞌa: ¿Marãsidꞌa kꞌãʉ̃ã zhi sewabi nʉmeka?

⁴⁸ ¿Kꞌãʉ̃nebema ĩjã duanuka nokꞌorãbara, o fariseorãbara?

⁴⁹ Kꞌãʉ̃nebema ĩjã bꞌebara Moisé ũrãgꞌara kꞌawua ẽã bꞌea, mawũẽ Daizezebara kꞌawua okuaya.

⁵⁰ Mawũãnaĩ Nicodemo Jesúsma diamase zedꞌabara ãzhidꞌebemaba mawũãsia:

⁵¹ ¿Ũrãgꞌa dazhirãnebara jara bꞌʉ ẽka dazhirãbara zhãrã kꞌawua obꞌedꞌa ẽãta naara izhi bedꞌeata ũrĩbʉda ẽbʉrʉ kꞌawuaita kꞌãrẽ odꞌata?

⁵² Mawũãĩ panaʉ̃ mawũãsidꞌa: ¿Bʉsidꞌa Galileadꞌebemakꞌa? Daizeze bedꞌeata bia estudiadua, mawũãrã kꞌawuaya Galileadꞌebara piradrʉkꞌata Daizezeba bedꞌeata jarabibarira.

⁵³ Maʉ̃ tẽã wãsidꞌa ãzhi deza.