Juan 6 - Porciones del Nuevo Testamento

Nekꞌobigadꞌa cinco mil

¹ Maʉ̃ tẽã Jesús kĩrãrã wãsia Galilea dota jedꞌea õbꞌʉdꞌe, maʉ̃ dora abꞌaʉta Tiberia abada.

² Kꞌabanata izhi kꞌaidꞌu wãsidꞌa ũdudꞌakꞌata ũdu bꞌeta bꞌebiga nʉmʉba kꞌayarãta.

³ Mawũẽ Jesús wãrĩzesia kꞌatuma zakeidꞌu, mobe mama jewedꞌasia izha jʉrʉkuadꞌa bawara.

⁴ Maʉ̃nerã ewari araa zebodꞌo basia Egiptodꞌeba ẽzoadꞌata krĩcha fiesta obadata judíorãba.

⁵ Jesúsba akʉbʉrʉdꞌera ũdusia kꞌabanata izhi kꞌaidꞌu bꞌeta, mawũẽ Felipea mawũãsia: ¿Zhiko sãma edadꞌaipe naʉ̃rãta nekꞌodꞌamarẽãrã?

⁶ Mawũã widꞌisia sãwũã panaʉ̃ĩ kꞌawuaita, izhara kꞌawua bꞌʉta kꞌãrẽ oira.

⁷ Mawũãĩ Felipebara panaʉ̃ mawũãsia: Ewari dociento trajadꞌaba denario docientoba pan edabʉrʉsidꞌa arabꞌae ẽã naʉ̃rãta abꞌa abꞌakꞌa wĩkabidꞌa nekꞌobigaira.

⁸ Izha jʉrʉkuadꞌaba abꞌaʉba, Andrés Pedro mebeaba mawũãsia:

⁹ Kũrãta za bꞌʉba pan juesoma erubꞌʉta cebada omata erubꞌʉa, bꞌedasidꞌa ũme erubꞌʉa, mawũãmina ¿naʉ̃ sãwũãĩpe bioitara?

¹⁰ Mawũãĩ Jesúsbara mawũãsia: Zhãrãta jewedꞌabigaudua. Mamarã bio nʉmasia poajãrãta, aramaʉ̃ne cinco mil jewedꞌasidꞌa zhũmakĩrãrãta.

¹¹ Mobebʉrʉ Jesúsbara maʉ̃ pan jiraedape Daizezea zhibia jipe bꞌʉekuape diasia izha jʉrʉkuadꞌaa, mawũẽ izha jʉrʉkuadꞌabara jedꞌekasidꞌa jewedꞌa kꞌobꞌea, bꞌedasidꞌa abꞌarika osia ãzha kꞌobʉdadꞌe kꞌodꞌamarẽã.

¹² Jãwũã duanebʉdadꞌe izha jʉrʉkuadꞌaa mawũãsia: Adꞌubabʉdata zhi bꞌʉgʉzoamata jʉrepeudua, miã kꞌãrẽta adua ẽbamarẽã.

¹³ Mawũãĩ jʉrepesidꞌa, aramaʉ̃ne zhi bꞌʉgʉzoamaba jamara doce birasidꞌa, pan juesomata cebada omata adꞌubadꞌapeadꞌata zhi kꞌodꞌapeadꞌaba.

¹⁴ Mawũẽ zhãrãbara ũdudꞌakꞌata Jesúsba mawũã obʉrʉta ũdudꞌai mawũãsidꞌa: Naʉ̃ wãrĩnu Daizezeba bedꞌeata jarabibarita zeita bꞌadꞌa naʉ̃ ẽjũãẽna.

¹⁵ Maʉ̃nerã Jesúsbara kꞌawuasia izhira zareadꞌe edeita kꞌopanʉta rey babidꞌaita, mawũẽ wakusa kꞌatumaẽna wãsia izhi dobꞌa.

Jesús tebadꞌa do ʉ̃rʉ̃

¹⁶ Keubʉrʉdꞌera Jesúsba jʉrʉkuadꞌara zesidꞌa do jedꞌea õbꞌʉidꞌu.

¹⁷ Mobe jãbadꞌe bꞌarikuape do jedꞌea õbꞌʉdꞌe kĩrãrã wãsidꞌa Capernaúm pʉwʉrʉedꞌa. Maʉ̃nerã ya paisosoa nʉmʉne Jesús wadꞌi ze ẽbasia ãzhima.

¹⁸ Maʉ̃ne do jedꞌea õbꞌʉra bomatʉ bʉsadꞌewasia zarea pʉ̃ãdrʉ nʉmʉba.

¹⁹ Wigui wãnata cinco o seis kilómetro babʉrʉdꞌe Jesús do ʉ̃rʉ̃ taita ũdubʉdadꞌera orra tebasia jãbata, mawũẽ perasidꞌa.

²⁰ Maʉ̃ne izhara mawũãsia: Mʉta taia, perarãũdua.

²¹ Mawũãĩ ãzhara sobia jãbadꞌe edasidꞌa, aramaʉ̃ne dããrã ẽãne jũẽkuasia drua ãzhi wãma.

Zhãrãba jʉrʉdꞌapeadꞌa Jesús

²² Do jedꞌea õbꞌʉ kĩrãrẽ zhãrã duanenabara nrũẽmane kꞌawuasidꞌa mama jãba abꞌabai bꞌadꞌata, izha jʉrʉkuadꞌa bawara Jesús maʉ̃ jãbadꞌera bꞌari ẽbasia, awuarabʉrʉ maʉ̃rã wãsidꞌa ãzhi dobꞌa.

²³ Maʉ̃ne jãba awʉrʉta Tiberia pʉwʉrʉdꞌeba zesidꞌa, Jesúsba Daizezea zhibia jipe pan kꞌodꞌapeadꞌa kꞌaita.

²⁴ Aramaʉ̃ne zhãrãbara kꞌawuasidꞌa Jesús mama ne ẽãta, miã izha jʉrʉkuadꞌasidꞌa ne ẽãta, mawũẽ maʉ̃ jãbadꞌe bꞌarikuape wãsidꞌa Capernaúm pʉwʉrʉedꞌa Jesús jʉrʉdꞌe.

Jesúra panta Daizeze ũme bꞌai jõ ẽãnebema

²⁵ Aramaʉ̃ne do jedꞌea õbꞌʉ kĩrãrẽ ũdudꞌape mawũãsidꞌa: Miã Ũrãgꞌabari, ¿bʉra sõmbewedꞌa naĩnu zesi?

²⁶ Mawũãnaĩ Jesúsbara panaʉ̃ mawũãsia: Mʉã wãrĩnu marãã jaraya, marãbara mʉrã jʉrʉ duanu ẽã sãwũãta kꞌawuasidꞌa baera mʉã odꞌata ũdudꞌakꞌata, awuarabʉrʉ mʉrã jʉrʉ duanuã panta jãwũã kꞌosidꞌa baera.

²⁷ Kꞌãrẽ obʉdata bari zhiko jõbari kꞌarea orãũdua, awuarabʉrʉ kꞌãrẽ oudua pan jõkꞌa kꞌarea, Daizeze ũme bꞌai jõ ẽã kꞌarea, mʉ Beubari Bape bꞌʉba maʉ̃ pan marãã diaya, mʉrã maʉ̃ kꞌarea bꞌʉsia mʉ Zhibari mʉ Zezeba.

²⁸ Mawũãĩ mawũãsidꞌa: ¿Daibara kꞌãrẽta odꞌaibarape kꞌãrẽ Daizezedꞌeta odꞌaira?

²⁹ Mawũãnaĩ Jesúsbara panaʉ̃ mawũãsia: Marãba kꞌãrẽ Daizezedꞌeta odꞌaira, ĩjãũdua mʉ izha zokꞌadꞌata.

³⁰ Mawũãĩ mawũãsidꞌa: ¿Bʉara kꞌãrẽta ũdudꞌakꞌata oipe daiba maʉ̃ta ũdudꞌape bʉdꞌebemata ĩjãnaĩrã? ¿Bʉara kꞌãrẽta oipe?

³¹ Dai zhibarirã bꞌeadꞌabara pan maná abadata kꞌosidꞌa drua drudrua tabꞌʉ maẽ, maʉ̃ẽnabemata zhi bꞌʉmata mawũã bꞌʉa: Pan ʉ̃trebemata dedꞌekasia kꞌodꞌamarẽã.

³² Mawũãnaĩ Jesúsbara mawũãsia: Mʉã wãrĩnu marãã jaraya: Maʉ̃ pan ʉ̃trebema Moiséba dedꞌeka ẽbasia, awuarabʉrʉ dedꞌekasia mʉ Zezeba. Aramaʉ̃ne mʉ Zezebara dedꞌeka bꞌʉa wãrĩnu pan ʉ̃trebemata.

³³ Pan Daizezedꞌea mʉta ʉ̃treba zedꞌata, mʉãrã Daizeze ũme bꞌai jõ ẽãta dia bꞌʉa ẽjũãne zhãrã bꞌea.

³⁴ Mawũãĩ mawũãsidꞌa: Nokꞌó, daia ewariza diadua maʉ̃ panta.

³⁵ Mawũãnaĩ Jesúsbara mawũãsia: Mʉta panta Daizeze ũme bꞌai jõ ẽãnebema, mʉma zebʉrʉra maʉ̃nebemanerã jarrakꞌa baya, mʉnebemata ĩjãbʉrʉra aramaʉ̃ne obisiakꞌa baya.

³⁶ Mawũãmina mʉã marãã jaradꞌa kĩrãkꞌa, marãbara mʉrã ũdu bꞌemina mʉnebema ĩjãna ẽã.

³⁷ Mʉ Zezeba mʉãã diabʉrʉra jõma mʉma zedꞌaya, mʉma zebʉrʉra mʉãrã ãĩ jʉreta ẽã.

³⁸ Mʉrã ʉ̃trebara ze ẽbasia mʉã krĩñata oita, awuarabʉrʉ zesia mʉ Zeze mʉ zokꞌadꞌaba krĩñata oita.

³⁹ Mʉ Zeze mʉ zokꞌadꞌabara krĩña bꞌʉa jõma izha mʉãã diabʉrʉra mʉrẽ miõta adua ẽbaita, awuarabʉrʉ krĩña bꞌʉa maʉ̃rãta beudꞌapeadꞌara mʉã piradrʉbigaita ewari nʉmʉta jõbʉrʉdꞌera.

⁴⁰ Mʉ Zeze mʉ zokꞌadꞌabara krĩña bꞌʉa zhi Warra mʉta krĩcha bꞌebara, mʉnebemata ĩjã bꞌebara jõmaʉ̃ba erubꞌeamarẽã Daizeze ũme bꞌai jõ ẽãta. Aramaʉ̃nerã maʉ̃rãta beudꞌapeadꞌara mʉã piradrʉbigaya ewari nʉmʉta jõbʉrʉdꞌera.

⁴¹ Judíorãbara Jesús bĩ ẽã jarasidꞌa: Mʉrã pan ʉ̃treba zedꞌa, abʉrʉba.

⁴² Maʉ̃nerã mawũãsidꞌa: ¿Naʉ̃ Jesúra José warra ẽka? Zhi Zezera, zhi papara dazhirãbara ũdukꞌawua bꞌea. ¿Maʉ̃ta sãwũã naʉ̃bara izhira ʉ̃treba zedꞌa abʉrʉ?

⁴³ Mawũãnaĩ Jesúsbara panaʉ̃ mawũãsia: Bĩ ẽã bedꞌearãũdua.

⁴⁴ Miõta mʉma ze bꞌe ẽã mʉ Zeze mʉ zokꞌadꞌaba webʉrʉ ẽbʉrʉ. Izha webʉrʉtrʉ beudꞌata mʉãrã piradrʉbiya ewari nʉmʉta jõbʉrʉdꞌera.

⁴⁵ Daizezeba bedꞌeata jarabibarirãba jaradꞌapeadꞌata zhi bꞌʉmata mawũã bꞌʉa: Daizezeba jõma ũrãgꞌaya. Aramaʉ̃nerã mʉ Zeze bedꞌeata ũrĩnape izhidꞌebemata kꞌawabʉdara jõma mʉma zedꞌaya.

⁴⁶ Mʉã maʉ̃ta jarabʉrʉ ẽã iabꞌaʉba mʉ Zezeta ũdudꞌaba, awuarabʉrʉ mʉta Daizeze maẽba zedꞌabʉrʉ mʉãbʉrʉ ũdubaria mʉ Zezera.

⁴⁷ Mʉã wãrĩnu marãã jaraya: Mʉnebemata ĩjã bꞌʉbara erubꞌʉa Daizeze ũme bꞌai jõ ẽãta.

⁴⁸ Mʉrã panta Daizeze ũme bꞌai jõ ẽãnebema.

⁴⁹ Marã zhibarirã bꞌeadꞌaba drua drudrua tabꞌʉ maẽ maná kꞌo bꞌeadꞌara bari zhiko basia, mawũẽ kꞌo bꞌeasimina beukuasia.

⁵⁰ Mʉrã pan ʉ̃treba zedꞌa, pan mʉta kꞌobʉrʉra adua ẽã.

⁵¹ Mʉrã panta Daizeze ũme bꞌai jõ ẽãta ʉ̃treba zesia, iabꞌaʉba pan mʉta kꞌobʉrʉra Daizeze ũme bꞌai jõ ẽã bꞌaya. Pan mʉã diabʉrʉra mʉ zharata diaya. Maʉ̃ mʉãrã Daizeze ũme bꞌai jõ ẽãta diaya ẽjũãne zhãrã bꞌea.

⁵² Mawũãĩ judíorã ãzhirãĩnu bĩ ẽã mawũãsidꞌa: ¿Naʉ̃bara sãwũã mawũã dazhirãã kꞌobigaipe izhi zharata?

⁵³ Mawũãnaĩ Jesúsbara mawũãsia: Mʉã wãrĩnu marãã jaraya: Mʉ Beubari Bape bꞌʉ zharata kꞌodꞌa ẽbʉrʉ, mʉ wata dodꞌa ẽbʉrʉ erubꞌea ẽã Daizeze ũme bꞌai jõ ẽãrã.

⁵⁴ Mʉ zharata kꞌo bꞌʉbara mʉ wata do bꞌʉbara erubꞌʉa Daizeze ũme bꞌai jõ ẽãrã, mawũẽ beudꞌata mʉã piradrʉbiya ewari nʉmʉta jõbʉrʉdꞌera.

⁵⁵ Mʉ zhara wãrĩnu zhikoa, mʉ wara wãrĩnu doyidꞌebema.

⁵⁶ Mʉ zharata kꞌo bꞌʉra mʉ wata do bꞌʉra mʉne bꞌʉa, mʉrã izhidꞌe bꞌʉa.

⁵⁷ Mʉ Zeze mʉ zokꞌadꞌata bꞌʉ kĩrãkꞌa, mʉrã bꞌʉa mʉ Zezedꞌeba, aramaʉ̃ kĩrãkꞌa mʉta kꞌo bꞌʉra bꞌaya mʉneba.

⁵⁸ Mʉta panta ʉ̃treba zedꞌa. Marã zhibarirã bꞌeadꞌaba maná kꞌodꞌapeadꞌa kĩrãkꞌa bꞌʉ ẽã, mawũã kꞌosidꞌamina beukuasia. Pan mʉta kꞌobʉrʉra Daizeze ũme bꞌai jõ ẽã bꞌaya.

⁵⁹ Jesúsbara Capernaúm pʉwʉrʉdꞌe maʉ̃ta jarasia miã ũrãgꞌa nʉmʉba de zhi jʉrebada maẽ.

Bedꞌeata Daizeze ũme bꞌai jõ ẽãnebema

⁶⁰ Maʉ̃ta ũrĩnape izhi pẽwã bꞌebara bioba mawũãsidꞌa: Maʉ̃ bedꞌeara zarea. ¿Mawũẽ kꞌaiba ũrĩ bꞌeipe?

⁶¹ Jesúsbara kꞌawuasia izhi pẽwã bꞌe mawũã bĩ ẽã bedꞌea kꞌobꞌera, mawũẽ mawũãsia: ¿Maʉ̃ bedꞌeabara marã bĩ ẽãbʉdakꞌa?

⁶² ¿Mobera sãwũãnaĩpe mʉ Beubari Bape bꞌʉta ʉ̃taa wãbʉrʉta ũdudꞌara naara mʉ bꞌadꞌama?

⁶³ Jawurebiabʉrʉ dia bꞌʉa Daizeze ũme bꞌai jõ ẽãta, zharabara dia ẽã. Bedꞌeata mʉã marãã jara bꞌʉra Jawurebiadꞌebemata Daizeze ũme bꞌai jõ ẽãnebema.

⁶⁴ Mawũãmina marã ʉ̃kʉrʉbara ĩjãna ẽã. Jesúsbara mawũã jarasia jẽde wedꞌauba kꞌawua bꞌasi baera kꞌairãba ĩjãna ẽãta, aramaʉ̃ne kꞌawua bꞌasia izhira kꞌaiba chãbꞌariita.

⁶⁵ Maʉ̃nerã mawũãsia: Maʉ̃neba mʉã marãã jarasia miõta mʉma ze ẽãta mʉ Zezeba diabʉrʉ ẽãrã.

⁶⁶ Mamaʉ̃ba ʉ̃taara izhi pẽwã bꞌebara bioba izhira kenabꞌarisidꞌa, mawũẽ ya izhi bawara erjirana ẽbasia.

⁶⁷ Mawũẽ Jesúsbara izha jʉrʉkuadꞌata docea mawũãsia: ¿Marãsidꞌa wã krĩña panʉka?

⁶⁸ Mawũãĩ Simón Pedroba panaʉ̃ mawũãsia: Nokꞌó, ¿daira kꞌaima wãĩpe? Bʉabʉrʉ bedꞌeata erubꞌʉa Daizeze ũme bꞌai jõ ẽãta.

⁶⁹ Maʉ̃ daibara ĩjã bꞌea, aramaʉ̃ne daiba kꞌawua bꞌedꞌera bʉra zhãrã Ẽdrʉbita Daizeze zokꞌai bꞌʉ Warra.

⁷⁰ Mawũãĩ Jesúsbara mawũãsia: Mʉã marã doce jʉrʉkuasia, mawũãmina marãnebema abꞌa ãtõmiãba erunʉmʉã.

⁷¹ Mawũã jarabʉrʉbara Juda Iscarioteta jarasia Simón warrata, izhira maʉ̃ba chãbꞌarii baera mawũã jarasia, maʉ̃ docedꞌebema basia.