Juan 5 - Porciones del Nuevo Testamento

Kꞌakua pira ẽã bꞌadꞌa Betesdadꞌe

¹ Maʉ̃ tẽã judíorãbara fiesta osidꞌa, mawũẽ Jesús wãrĩzesia Jerusalén pʉwʉrʉedꞌa.

² Jerusalénne edꞌa wãbarita puerta ovejarãneã abada kꞌaita bꞌʉa posota, maʉ̃ta hebreo bedꞌeadꞌera Betesda abada, mamarã juesoma bꞌʉa de zaketa.

³ Maʉ̃za kꞌayarãta bio nʉmasia, daʉbꞌerrea bꞌeta, wã bꞌe ẽã bꞌeta, kꞌakua pira ẽã kꞌaya bꞌeta nʉmasia, maʉ̃rãbara jʉ̃ã bꞌeasia poso õbꞌʉta pirayeedꞌa.

⁴ Maʉ̃ẽnabema edꞌaudꞌe ángelta zepe maʉ̃ poso õbꞌʉta pirabi bꞌasia, mawũẽ pirabʉrʉdꞌe naara doedꞌa õbꞌebʉrʉta bꞌe bꞌasia ne bariduba kꞌaya bꞌʉta.

⁵ Maʉ̃ne ũmakĩrãta mama bꞌasia treinta y ocho año bata kꞌaya bꞌʉta.

⁶ Maʉ̃ tabꞌʉta Jesúsba ũdubʉrʉdꞌera, mawũã bꞌʉta ewari dããrã bata kꞌawuape mawũãsia: ¿Bʉra bꞌe krĩña bꞌʉka?

⁷ Mawũãĩ kꞌayabara panaʉ̃ mawũãsia: Nokꞌó, mʉrã bꞌe krĩña bꞌʉa, mawũãmina poso pirabʉrʉdꞌera mʉrã kꞌaiba doedꞌa õbꞌʉdꞌaita ne ẽã, mawũẽ mʉ wãbʉrʉedꞌa awʉrʉta edꞌa wã bꞌʉa mʉ nawedꞌa.

⁸ Mawũãĩ Jesúsbara mawũãsia: Piradrʉrua, bʉzhi ertõ jiraedape tebarua.

⁹ Audre ẽãne maʉ̃ bꞌesia, mawũẽ izhi ertõ jiraedape tebadꞌewasia. Ẽnaʉ̃bada ewari basia maʉ̃ ewadera.

¹⁰ Mawũẽ judíorãbara mawũã bꞌebʉrʉa mawũãsidꞌa: Idꞌira ẽnaʉ̃bada ewaria, mawũẽ bʉzhi ertõ anʉma bꞌe ẽã.

¹¹ Mawũãnaĩ izhara panaʉ̃ mawũãsia: Mʉta bꞌebidꞌabara ertõ jiraedape tebarua asia.

¹² Mawũãĩ widꞌi mawũãsidꞌa: ¿Kꞌaiba bʉaa mawũã bʉzhi ertõ jiraedape tebarua asi?

¹³ Mawũãbʉdadꞌera zhi bꞌedꞌabara kꞌawua ẽbasia kꞌaita, Jesús nebasi baera mama zhãrã kꞌabana nʉmanane edꞌa.

¹⁴ Tẽã Jesúsbara ũdupe mawũãsia: Bʉra bꞌesia, mawũẽ wueta kꞌazhiruata orãrũã audre zuburia ẽbaita.

¹⁵ Maʉ̃ wãpe judíorãã jarasia izhira Jesúsba bꞌebidꞌata.

¹⁶ Maʉ̃ kꞌarea judíorã Jesús kꞌaidꞌu jirpanesia beadꞌaita, maʉ̃ta onʉmaẽrã ẽnaʉ̃bada ewade.

¹⁷ Mawũẽ Jesúsbara mawũãsia: Mʉ Zezera ewariza kꞌãrẽ obꞌʉa, mawũẽ mʉsidꞌa kꞌãrẽ onʉmʉã.

¹⁸ Mawũãbʉrʉ kꞌarea judíorãbara wuaabʉrʉ bea krĩñasidꞌa, ãzhima aramaʉ̃nerã bari ewari ẽnaʉ̃badadꞌebemata aribꞌae ẽã nʉma ẽbasia, awuarabʉrʉ Daizezesidꞌa zhi Zezeta jarasia, ãzhima aramaʉ̃nerã Daizeze ũme abꞌarikadꞌe nʉmasia.

Zhi Zezeba obꞌʉta obꞌʉa zhi Warrabara

¹⁹ Maʉ̃ kꞌarea Jesúsbara mawũãsia: Mʉã wãrĩnu marãã jaraya: Mʉ zhi Warrabara mʉzhikusaubara miã kꞌãrẽta obꞌe ẽã, awuarabʉrʉ mʉ Zezeba obʉrʉta ũdubʉrʉta obꞌʉa, aramaʉ̃ne jõma mʉ Zezeba obꞌʉra mʉ zhi Warrabidꞌa obꞌʉa.

²⁰ Mʉ Zezebara zhi Warra mʉrã kʉãgꞌaba jõma ũdubi bꞌʉa izha obꞌʉra, mawũẽ kꞌãrẽ ãmaña audre waibꞌʉata bio ũdubiya, mawũẽ marãbara bia akʉdrua jirpaneña.

²¹ Mʉ Zezebara beukuadꞌara piradrʉbipe zokꞌai bꞌʉbari kĩrãkꞌa, mʉ zhi Warrabidꞌa mawũã okrĩñabʉrʉrãta zokꞌai bꞌʉbaria.

²² Mʉ Zezebara miõta kꞌawua o ẽã, awuarabʉrʉ zhãrã kꞌawua oidꞌebema jõma diasia mʉta zhi Warraa.

²³ Mawũãtrʉ jõmaʉ̃ba mʉ zhi Warrata wawiadꞌaya mʉ Zeze wawia panʉ kĩrãkꞌa. Mʉ zhi Warrata wawia ẽãbara wawia ẽã mʉ Zeze mʉ zokꞌadꞌata.

²⁴ Mʉã wãrĩnu marãã jaraya: Iabꞌaʉba mʉ bedꞌeata ũrĩ bꞌʉba mʉ zokꞌadꞌadꞌebemata ĩjã bꞌʉra erubꞌʉa Daizeze ũme bꞌai jõ ẽãta, mawũẽ Daizezebara pua kꞌawua o ẽbaya, awuarabʉrʉ aduaita bꞌadꞌata zhi berabꞌarima baya Daizeze ũme bꞌai jõ ẽãma.

²⁵ Mʉã wãrĩnu marãã jaraya: Ewarita zeya, maʉ̃ ewarira ya arabasia, mawũẽ aduaita bꞌebara ũrĩnaña mʉ Daizeze Warra nemita, mʉ bedꞌeata ũrĩbʉdara Daizeze ũme bꞌai jõ ẽã bꞌeaya.

²⁶ Mʉ Zezebara erubꞌʉa izhi ũme bꞌai jõ ẽãta, mawũẽ mʉ zhi Warraabidꞌa diasia erubꞌamarẽã izhi ũme bꞌai jõ ẽãta.

²⁷ Dewara zhãrã kꞌawua oi zareata diasia mʉrã Beubari Bape bꞌʉba.

²⁸ Mʉã maʉ̃ta jarabʉrʉ kꞌarea kꞌawua ẽã krĩcharãũdua, ewarita zeya, maʉ̃ ewadera beudꞌapeadꞌata jou nʉmebara ũrĩnaña mʉ nemirã.

²⁹ Mawũẽ biata odꞌapeadꞌara piradrʉdꞌaya Daizeze ũme bꞌai jõ ẽã bꞌaita, mawũãmina bia ẽãta odꞌapeadꞌara piradrʉdꞌaya aduaita.

Jara bꞌea Jesúra zhãrã Ẽdrʉbita

³⁰ Mʉãrã mʉzhikusaubara kꞌãrẽ o ẽã. Awuarabʉrʉ sãwũãta mʉ Zezeba mʉãã jarabʉrʉta ũrĩpe mʉãrã zhãrã kꞌawua obaria, aramaʉ̃ne obaria sãwũã oi bꞌʉdꞌe, mawũẽ mʉãrã onʉmʉ ẽã mʉã krĩñata, awuarabʉrʉ onʉmʉã mʉ Zeze mʉ zokꞌadꞌaba krĩñata.

³¹ Mʉnebemata mʉã jarara mʉnebema zhãrãma wãrĩnu ẽã.

³² Mawũãmina mʉ Zezeba mʉnebemata jara bꞌʉa, mʉã kꞌawua bꞌʉa mawũã mʉnebemata jara bꞌʉra wãrĩnuã.

³³ Mʉnebemata widꞌidꞌamarẽã marãbara zhãrãta zokꞌasidꞌa Juan Burukꞌoemiãma, mawũẽ izhara jarasia mʉnebema wãrãta.

³⁴ Mawũãmina mʉãrã zhãrãba mʉnebema mawũã jaraita nesidꞌa nʉmʉ ẽã, awuarabʉrʉ mʉãrã Juanba jaradꞌata jarabʉrʉa marãta ẽdrʉdꞌamarẽã.

³⁵ Juanbara mʉnebema kꞌawuabiga nʉmʉba pãrĩguadꞌe ĩbĩrã ʉ̃nabari kĩrãkꞌa bꞌasia, aramaʉ̃ne marã ewari kꞌakutua sobiasidꞌa izhi ʉ̃nane.

³⁶ Mawũãmina mʉã erubꞌʉa mʉnebema audre bia jara bꞌʉta Juanba jaradꞌa kꞌãñabara, kꞌãrẽ aribꞌaeita mʉ Zezeba mʉãã diadꞌata mʉã obꞌʉba mʉnebemata jara bꞌʉa mʉrã mʉ Zezeba zokꞌadꞌata.

³⁷ Mʉ Zeze mʉ zokꞌadꞌabidꞌa mʉnebemata jara bꞌʉa. Marãbara ũrĩnakꞌa izhi nemirã, miã ũdudꞌakꞌa izhira.

³⁸ Miã izhi bedꞌeara eruduanu ẽã marã sodꞌera, mʉta izha zokꞌadꞌara marãbara ĩjãna ẽãba.

³⁹ Daizeze bedꞌeata zhi bꞌʉmarã marãbara kĩrãkuita estudia bꞌea, mazhima maʉ̃neba erubꞌeba Daizeze ũme bꞌai jõ ẽãta, mawũã zhi bꞌʉmabara jara bꞌʉa mʉnebemata.

⁴⁰ Maʉ̃ne marã mʉma ze krĩñana ẽã aramaʉ̃ne erubꞌeaira Daizeze ũme bꞌai jõ ẽãta.

⁴¹ Mʉãrã zhãrãba mʉta bia jaradꞌamarẽã nʉmʉ ẽã.

⁴² Maʉ̃ẽnabema mʉã marã ũdukꞌawua bꞌʉa, marãbara Daizezera kʉãgꞌadꞌa ẽã.

⁴³ Mʉrã zesia mʉ Zezedꞌeba, maʉ̃ta marãbara mʉrã bia edadꞌa ẽã, awʉrʉta izhikusaudꞌeba zera maʉ̃ marãbara bia edadꞌaya.

⁴⁴ ¿Marãbara mʉnebema sãwũã ĩjãnaĩpe kꞌãwũã mazhirãĩnubʉrʉ zhiya bia jara bꞌera? Kꞌãwũãrã Daizeze abꞌa bꞌʉba bia jaramarẽã duanu ẽã.

⁴⁵ Krĩcharãũdua kĩrãbita mʉã marã jikuaita mʉ Zezea, mawũãmina kꞌaiba marã jikuaira bꞌʉta Moiséa, maʉ̃ne marãbara izhita krĩcha bꞌea.

⁴⁶ Moiséba bꞌʉdꞌata marãba ĩjã bꞌebʉrʉ mʉnebemata ĩjãkꞌausidꞌa, izhara mʉnebemata bꞌʉdꞌaba.

⁴⁷ Mawũãmina izha bꞌʉdꞌata ĩjãna ẽãrã, ¿sãwũã ĩjãnaĩpe mʉ bedꞌeara?