Juan 21 - Porciones del Nuevo Testamento

Jesús zhi ũdubidꞌa izha jʉrʉkuadꞌata sietea

¹ Maʉ̃ tẽã izha jʉrʉkuadꞌaa Jesús wakusa zhi ũdubisia do jedꞌea õbꞌʉta Tiberia abada doya. Maʉ̃nerã kꞌãwũã berabꞌarisia:

² Ãba duanasia Simón Pedrota, Tomás Memerã abadata, Natanael Caná pʉwʉrʉdꞌebemata, maʉ̃ pʉwʉrʉra Galilea druadꞌebema, dewara Zebedeo warrarãta, dewara ũme Jesúsba jʉrʉkuadꞌata.

³ Maʉ̃ne Simón Pedrobara mawũãsia: Mʉrã wãña bꞌeda beadꞌe. Mawũãĩ jarirãbara mawũãsidꞌa: Daisidꞌa wãnaña bʉ bawara. Aramaʉ̃ne wãnape jãbadꞌe bꞌarisidꞌa, maʉ̃ diamasera bꞌeda beadꞌa ẽbasia miã kꞌãrẽta.

⁴ Ʉ̃nadrʉ bʉsidꞌe Jesús zhi ũdubisia ibudꞌe, mawũãmina izha jʉrʉkuadꞌabara kꞌawuadꞌa ẽbasia Jesústa kꞌobꞌʉta.

⁵ Maʉ̃ne Jesúsbara mawũãsia: Warrarã, ¿jidasidꞌakꞌa bꞌeda kꞌoira? Mawũãĩ panaʉ̃ mawũãsidꞌa: Jidadꞌa ẽã.

⁶ Mawũãnaĩ mawũãsia: Atarraya jãbadꞌeba juwua araare bꞌaribueudua mawũãrã jidadꞌaya. Mawũãĩ bꞌaribuesidꞌa, mawũẽ jirabꞌari bꞌedꞌa ẽbasia bꞌeda bioba.

⁷ Maʉ̃ne izha jʉrʉdꞌata Jesúsba kʉãgꞌaba Pedroa mawũãsia: ¡Kꞌãʉ̃ Nokꞌoa! Simón Pedroba mawũã Nokꞌota ũrĩbʉrʉdꞌera, wua ãnebꞌari jʉ̃ bꞌʉta wẽãnata jʉ̃pe doidꞌu tẽũsia.

⁸ Dewaraurã izha jʉrʉkuadꞌara jãbadꞌe zesidꞌa ibuidꞌu, erbꞌari wesidꞌa atarraya bꞌedaedꞌa. Druadꞌebara wawara kꞌopana ẽbasia, awuarabʉrʉ kꞌopanasia cien metro.

⁹ Drua wãbʉdadꞌera ũdusidꞌa tebʉ purea nʉmʉta, bꞌeda ba nʉmʉta, pan kꞌobꞌʉta.

¹⁰ Maʉ̃ne Jesúsbara mawũãsia: Weudua bꞌeda aritia jidabʉdata.

¹¹ Mawũãĩ Simón Pedrora jãbadꞌe edꞌa wãpe atarraya drua webʉrʉta bꞌeda zromarãba bira wesia, bꞌedara bꞌasia ciento cincuenta y tres. Mawũã biomina atarraya tʉdꞌʉzoa ẽbasia.

¹² Mobebʉrʉ Jesúsbara mawũãsia: Zeudua, nekꞌoudua. Izha jʉrʉkuadꞌabara miõba bʉra kꞌaipe adꞌa ẽbasia kꞌawuasidꞌa baera Nokꞌota.

¹³ Aramaʉ̃ne Jesúsbara pan jiraedape dedꞌekasia bꞌedasidꞌa dedꞌekasia.

¹⁴ Maʉ̃ta zhi ũbea basia izha jʉrʉkuadꞌaa Jesús zhi ũdubi nʉmʉta beudꞌata piradrʉpe.

Jʉredua mʉ pẽwã bꞌeta

¹⁵ Nekꞌodꞌa tẽã Jesúsbara Simón Pedroa mawũãsia: Simón Jonás warra, ¿bʉa mʉrã audre kʉãgꞌakꞌa naʉ̃rãne kꞌãñabara? Mawũãĩ panaʉ̃ mawũãsia: Ããjã Nokꞌó, bʉa kꞌawua bꞌʉa mʉã bʉra kʉãgꞌata. Mawũãĩ mawũãsia: Jʉredua mʉ pẽwã bꞌeta.

¹⁶ Jarama ũmeta wakusa mawũãsia: Simón Jonás warra, ¿bʉa mʉrã kʉãgꞌakꞌa? Mawũãĩ Pedrobara panaʉ̃ mawũãsia: Ããjã Nokꞌó, bʉa kꞌawua bꞌʉa mʉã bʉra kʉãgꞌata. Mawũãĩ mawũãsia: Jʉredua mʉ pẽwã bꞌeta.

¹⁷ Jarama ũbeata mawũãsia: Simón Jonás warra, ¿bʉa mʉrã kʉãgꞌakꞌa? Pedrora sopuasia mawũã jarama ũbea, ¿bʉa mʉrã kʉãgꞌakꞌa abʉrʉba? Mawũẽ mawũãsia: Nokꞌó bʉara jõma kꞌawua bꞌʉa. Bʉa kꞌawua bꞌʉa mʉã bʉra kʉãgꞌata. Mawũãĩ Jesúsbara mawũãsia: Jʉredua mʉ pẽwã bꞌeta.

¹⁸ Mʉã wãrĩnu bʉaa jaraya: Bʉ kũrãta bꞌasidꞌera zhope wã bꞌasia bʉzha krĩñama, mawũãmina ya zõrãta bꞌebʉrʉdꞌera bʉra juwua jirabꞌariya, aramaʉ̃ne bʉra awʉrʉba zhobiya, mobe edeya bʉa krĩña ẽãma.

¹⁹ Maʉ̃bara Jesúsbara jara krĩñasia Pedro sãwũã beuita, aramaʉ̃ne kꞌawuabigaita Daizeze zhi zromata. Maʉ̃ jarape mawũãsia: Mʉrã pẽwã bꞌadua.

Izha jʉrʉdꞌata kʉãgꞌadꞌebema

²⁰ Pedroba jẽrũya akʉbʉrʉdꞌera ũdusia kꞌaidꞌu taita Jesúsba jʉrʉdꞌa Jesúsba kʉãgꞌata, nekꞌo duanune maʉ̃ abꞌaʉta Jesús kꞌaita kꞌobꞌadꞌa basia, mawũã kꞌobꞌasidꞌera mawũãsia: Nokꞌó, ¿bʉra kꞌaiba chãbꞌariipe?

²¹ Pedroba maʉ̃ta ũdui Jesúa mawũãsia: Nokꞌó, ¿naʉ̃ sãwũã berabꞌariipe?

²² Mawũãĩ Jesúsbara mawũãsia: Naʉ̃ mʉ zeyeedꞌa bꞌaita mʉã krĩñabʉrʉ, ¿bʉa sãwũãĩpe? Bʉra mʉta pẽwã bꞌadua.

²³ Maʉ̃neba mebẽrãbara ãzhirãĩnu jara duanesia maʉ̃ Jesúsba jʉrʉdꞌara beu ẽãta. Mawũãmina Jesúsbara jara ẽbasia beu ẽãta, awuarabʉrʉ mawũãsia: Naʉ̃ mʉ zeyeedꞌa bꞌaita mʉã krĩñabʉrʉ, ¿bʉa sãwũãĩpe?

²⁴ Maʉ̃ Jesúsba jʉrʉdꞌaba naʉ̃ bedꞌeata jarakꞌa bꞌʉbʉrʉa. Kꞌawua panʉã izha jara bꞌʉra wãrĩnuta.

²⁵ Dewara ne bio bꞌʉa Jesúsba odꞌara. Maʉ̃ta abꞌa abꞌaʉdꞌe bꞌʉsidꞌabʉrʉ mʉma ẽjũãnerã ara ẽbakꞌausia libro bꞌʉkuadꞌara. Amén.