Juan 20 - Porciones del Nuevo Testamento

Jesús beudꞌata piradrʉdꞌa

¹ Semana ewarita nabemata domingodꞌe María Magdalena diapedꞌa wadꞌi pãrĩgua nʉmʉne wãsia Jesús wuagꞌadꞌapeadꞌaidꞌu. Maʉ̃nerã peña zobꞌeata tapa kꞌobꞌadꞌara mongꞌara ãña ʉratʉ kꞌobꞌʉta ũdusia.

² Mawũẽ wãẽba wãsia Simón Pedroma, dewarabema Jesúsba jʉrʉdꞌata Jesúsba kʉãgꞌama, mobe mawũãsia: Izhi wuagꞌadꞌapeadꞌa maẽbara edesidꞌa Nokꞌora, kꞌawuadꞌa ẽã sãma tabꞌʉsidꞌara.

³ Mawũãĩ Pedrora dewarabema Jesúsba jʉrʉdꞌa ũme wãsidꞌa Jesús wuagꞌadꞌapeadꞌaidꞌu.

⁴ Ũmewedꞌa wãẽba wãsidꞌa, mawũãmina dewarabema Jesúsba jʉrʉdꞌara audre wãẽba wãsia Pedro kꞌãñabara, mawũẽ naara jũẽsia Jesús wuagꞌadꞌapeadꞌaidꞌu.

⁵ Bꞌarrupe edꞌa akʉbʉrʉdꞌera burubꞌata ũdusia, mawũãmina edꞌa wã ẽbasia.

⁶ Tẽã zesia Simón Pedrora izhi kꞌaidꞌu, mobe peña zobꞌeadꞌe edꞌa wãbʉrʉdꞌera ũdusia burubꞌa kꞌobꞌʉta mama.

⁷ Wua Jesús buruta buradꞌapeadꞌasidꞌa ũdubʉrʉdꞌera burubꞌa bawara kꞌobꞌa ẽbasia, awuarabʉrʉ ãĩ buratʉ kꞌobꞌasia.

⁸ Mobebʉrʉ edꞌa wãsia dewarabema Jesúsba jʉrʉdꞌasidꞌa, izhira naara zesia peña zobꞌeata nʉmʉĩnu. Mawũã berabꞌaribʉrʉta ũdui ĩjãsia Jesús piradrʉdꞌata.

⁹ Maʉ̃ẽnabema wadꞌi sãwũãta kꞌawuadꞌa ẽãrã zhi bꞌʉmata, Jesús mawũã beudꞌata piradrʉi bara basia.

¹⁰ Mobebʉrʉ Jesúsba jʉrʉkuadꞌara wãsidꞌa ãzhi panʉma.

Jesús zhi ũdubidꞌa María Magdalenaa

¹¹ Mawũãmina María jẽga bꞌasia peña zobꞌeata nʉmʉ kꞌaita. Mawũã jẽga bꞌʉdꞌe bꞌarrusia edꞌa akʉi kꞌarea.

¹² Maʉ̃ne ũdusia ángelerã ũme wua torro jʉ̃ panʉta. Abꞌa buru bude, abꞌa jẽrũ bꞌadaudꞌe jewedꞌa kꞌopanasia Jesús kꞌakua tabꞌʉdꞌapeadꞌa maẽ.

¹³ Maʉ̃rãbara mawũãsidꞌa: Wũẽrã, ¿bʉra kꞌãrẽã jẽga bꞌʉ? Mawũãnaĩ mawũãsia: Mʉ Nokꞌota edesidꞌa, mʉã kꞌawua ẽã sãma tabꞌʉsidꞌara.

¹⁴ Mawũãpe pʉrʉwabʉrʉdꞌera ũdusia Jesús mama kꞌobꞌʉta, mawũãmina kꞌawua ẽbasia Jesústa kꞌobꞌʉta.

¹⁵ Maʉ̃ne Jesúsbara mawũãsia: Wũẽrã, ¿bʉra kꞌãrẽã jẽga bꞌʉ? ¿Kꞌaita jʉrʉ bꞌʉ? Mawũãĩ izhara ne uta akʉbarita krĩchape mawũãsia: Jesús kꞌakuata bʉa edesibʉrʉ mʉãã jaradua sãma tabꞌʉsita, mobedꞌeba mʉã edeya.

¹⁶ Mawũãĩ Jesúsbara mawũãsia: ¡María! Mawũãĩ pʉrʉwape izhara mawũãsia: ¡Raboni! Maʉ̃bara jara krĩña bꞌʉa Miã Ũrãgꞌabarita.

¹⁷ Maʉ̃ne Jesúsbara mawũãsia: Mʉta jiru nʉmerãrũã, mʉrã wadꞌi wãrĩze ẽã mʉ Zezema, mawũẽ mʉ mebẽrãma wãpe jaradua: Mʉrã wãrĩzeita mʉ Zezema, marã Zezema, mʉ Zhibarima, marã Zhibarima.

¹⁸ Mawũãĩ María Magdalena wãsia Jesúsba jʉrʉkuadꞌaa jaraita Nokꞌo Jesús izha ũdudꞌata. Aramaʉ̃ne jarakꞌasia Jesúsba jaradꞌata.

Jesús zhi ũdubidꞌa izha jʉrʉkuadꞌaa

¹⁹ Keubʉrʉdꞌe maʉ̃ abꞌaʉ ewadera semana ewartia nabemata domingodꞌera Jesúsba jʉrʉkuadꞌara zhi jʉre ãzhi duanu maẽ puerta serrape duanasia. Judíorã wawiaba mawũã duanune Jesús zepe ãzhi ẽsadra edau nʉmepe mawũãsia: ¡Kʉa, marã adu-a bꞌeaudua!

²⁰ Mawũãpe ũdubigasia izhi juwuata, izhi orrota. Izha jʉrʉkuadꞌara sobiasidꞌa Nokꞌota ũdubʉdaba.

²¹ Mawũẽ Jesúsbara wakusa mawũãsia: ¡Kʉa, marã adu-a bꞌeaudua! Mʉ Zezeba mʉta zokꞌadꞌa kĩrãkꞌa mʉãbidꞌa marãta zokꞌaya.

²² Mawũãpe ãzhima jãrãpuape mawũãsia: Jidaudua Jawurebiata.

²³ Zhãrã kꞌazhirua odꞌata marãba Jawurebiadꞌeba bedꞌea ne ẽã edabʉdara maʉ̃ Daizezebara bedꞌea ne ẽã bꞌʉya. Mawũãmina marãba Jawurebiadꞌeba bedꞌea ne ẽã edabʉda ẽãrã maʉ̃ Daizezebidꞌa bedꞌea ne ẽã bꞌʉ ẽã.

Tomásbara ĩjã ẽã nʉmape ĩjãna

²⁴ Tomás Jesúsba doce jʉrʉkuadꞌadꞌebemata Memerã abadara ãzhi bawara ne ẽbasia Jesús zesidꞌera.

²⁵ Mawũẽ dewarabemarã Jesúsba jʉrʉkuadꞌabara mawũãsidꞌa: Nokꞌora daibara ũdusidꞌa. Mawũãnaĩ mawũãsia: Izhi juwua clavoba kꞌachidꞌapeadꞌata mʉã ũdupe mʉ juwua jĩwĩnita edꞌa pẽũ ẽbʉrʉ, mʉ juwuata izhi orrodꞌe pẽũ ẽbʉrʉ, beudꞌata piradrʉdꞌara mʉãrã ĩjã ẽã.

²⁶ Ewari ocho babʉrʉdꞌe Jesúsba jʉrʉkuadꞌara wakusa edꞌa zhi jʉre bꞌedꞌera Tomás ãzhi bawara bꞌasia. Maʉ̃ne puerta serra nʉmʉne Jesús zepe ẽsadra edau nʉmepe mawũãsia: ¡Kʉa, marã adu-a bꞌeaudua!

²⁷ Mobe Tomás kꞌobꞌʉa mawũãsia: Nama pẽũdua bʉ juwua jĩwĩnita, akʉdua mʉ juwuata, bʉ juwuara pẽũdua mʉ orrodꞌe. Mobe ĩjã ẽã nʉmarãrũã, awuarabʉrʉ ĩjãrũã.

²⁸ Mawũãĩ Tomásbara panaʉ̃ mawũãsia: ¡Bʉra mʉ Nokꞌoa, mʉ Zhibaria!

²⁹ Mawũãĩ Jesúsbara mawũãsia: Mʉta ũdubʉrʉ baera Tomás bʉara ĩjãbʉrʉa. Sobiadꞌaidꞌe bꞌʉa ũdu ẽãta ĩjãbʉdara.

Kꞌãrẽã bꞌʉdꞌapeadꞌa naʉ̃ libro

³⁰ Jesúsbara dewara ũdudꞌakꞌata bio osia izha jʉrʉkuadꞌa daidꞌu, maʉ̃ zhi bꞌʉma ẽã naʉ̃ librodꞌera.

³¹ Mawũãmina naʉ̃ bꞌʉsidꞌa ĩjãnamarẽã Jesúra zhãrã Ẽdrʉbita Daizeze Warrata. Maʉ̃ta ĩjãbʉdaba izhikꞌareuba erubꞌeamarẽã Daizeze ũme bꞌai jõ ẽãta.