Juan 2 - Porciones del Nuevo Testamento

Iabꞌa juwua jidadꞌa Caná pʉwʉrʉdꞌe

¹ Ewari ũbeadꞌe iabꞌa juwua jidabʉrʉdꞌe fiesta osidꞌa Caná pʉwʉrʉdꞌe, maʉ̃ pʉwʉrʉra Galilea druadꞌebema. Mama bꞌasia Jesús papata.

² Mawũã iabꞌa juwua jidabʉrʉdꞌera trʉ̃sidꞌa Jesústa izha jʉrʉkuadꞌa bawara.

³ Maʉ̃ne vino jõbʉrʉdꞌe zhi papaba Jesúa mawũãsia: Ya vino ne ẽã duaĩna.

⁴ Mawũãĩ Jesúsbara mawũãsia: ¿Papa, dazhira maʉ̃ne nʉmʉ ẽãta bʉara kꞌãrẽã maʉ̃ta mʉãã jarabʉrʉ? Mʉã kꞌãrẽ oira wadꞌi araba ẽã.

⁵ Zhi papabara vino jedꞌekabadarãã mawũãsia: Izha jarabʉrʉra jõma oudua.

⁶ Mama zokꞌo seis bꞌasia mongꞌara omata baniã tʉbadata, Daizeze kĩrãbita bia bꞌeaita judíorãbara ne sʉgʉira baniã maʉ̃ zokꞌodꞌeba jue bazhidꞌa. Maʉ̃ zokꞌodꞌera abꞌa abꞌaʉdꞌe baniã balde diez ara bꞌasia.

⁷ Jesúsbara vino jedꞌekabadarãã mawũãsia: Zokꞌo za nʉmeta baniãba biraudua. Mawũãĩ birakuasidꞌa.

⁸ Mawũẽ Jesúsbara mawũãsia: Kꞌõbebʉrʉ wĩka jue edadꞌape vino jedꞌekabi nʉmʉma edeudua. Mawũãĩ edesidꞌa.

⁹ Mawũẽ vino jedꞌekabi nʉmʉbara baniãta vino babʉrʉra do akʉsia sãmaʉ̃ba ʉ̃tʉ zebʉrʉta kꞌawua ẽãta, baniãta ãzha juesidꞌa baera vino jedꞌekabadabʉrʉ kꞌawua kꞌopanasia, aramaʉ̃ne vino jedꞌekabi nʉmʉbara juwua jida nʉmʉta trʉ̃pe,

¹⁰ mawũãsia: Jõmaʉ̃ba naara vino zhi biata dedꞌekabada, mawũẽ bio dobʉdadꞌera vino zhi bia ẽãta dedꞌekabada. Mawũãmina bʉara vino zhi biara wuagꞌasia tẽã dedꞌekaita.

¹¹ Maʉ̃ ũdudꞌakꞌata naarabemata obʉrʉra Jesúsbara osia Caná pʉwʉrʉdꞌe Galilea druadꞌe, aramaʉ̃ne ũdubigasia izhira zhi zromata, mawũẽ izha jʉrʉkuadꞌabara wuaabʉrʉ ĩjãsidꞌa izhidꞌebemata.

¹² Maʉ̃ tẽã Capernaúm pʉwʉrʉedꞌa wãsidꞌa izhita, zhi papata, zhi mebẽrãta, izha jʉrʉkuadꞌata. Mobe mama bꞌeasia ewari kꞌakutua.

Jesúsba miti ẽã odꞌa Daizeze deta

¹³ Ewari araa zebodꞌo basia Egiptodꞌeba ẽzoadꞌata krĩcha judíorãba fiesta obadata, mawũẽ Jesús wãrĩzesia Jerusalén pʉwʉrʉedꞌa.

¹⁴ Maʉ̃ne Daizeze dedꞌa ewara maẽ ũdukuasia Daizezeita babueidꞌebemata nendo bꞌeta pakꞌata, ovejata, palomata, plata kꞌãbiabadasidꞌa ũdusia mama jewedꞌa bꞌeta.

¹⁵ Mawũẽ lasota bio baratʉ edape Daizeze dedꞌa ewara maẽbara jõma ãĩ jʉrekuasia ãzhi oveja bawara, ãzhi pakꞌa bawara, monedara kuekuasia plata kꞌãbiabadadꞌera, burekuasia mesara.

¹⁶ Mobe paloma nendobadaa mawũãsia: Ãĩ edeudua naʉ̃ namaʉ̃bara, mʉ Zeze deta kꞌãwũã orãũdua ne nendobada deta.

¹⁷ Mobebʉrʉ izha jʉrʉkuadꞌabara bude basidꞌa maʉ̃ẽnabemata zhi bꞌʉmata mawũã bꞌʉta: Mʉã bʉ dera kꞌãbãẽã jiwa bꞌʉa.

¹⁸ Maʉ̃nerã judíorãba mawũãsidꞌa: ¿Sãwũãta daia kꞌawuabirua Daizezeba kꞌãwũã obi nʉmʉbʉrʉ?

¹⁹ Mawũãnaĩ Jesúsbara panaʉ̃ mawũãsia: Naʉ̃ Daizeze dera ãrĩũdua, mʉã ewari ũbeadꞌe wakusa pãrãña.

²⁰ Mawũãĩ judíorãbara mawũãsidꞌa: Naʉ̃ Daizeze dera cuarenta y seis añone pãrãsidꞌa, ¿maʉ̃ta bʉara ewari ũbeadꞌe pãrãĩka?

²¹ Mawũã Daizeze deta jarabʉrʉra Jesúsbara jarasia izhi kꞌakuata.

²² Maʉ̃neba beudꞌata piradrʉbʉrʉdꞌera izha jʉrʉkuadꞌabara bude basidꞌa maʉ̃ta jaradꞌata, mawũẽ ĩjãsidꞌa maʉ̃ẽnabemata zhi bꞌʉmata, aramaʉ̃ne ĩjãsidꞌa bedꞌeata Jesúsba jaradꞌara.

Jesúsbara kꞌaua zhãrãnebema jõma

²³ Jesús Jerusalénne bꞌʉta, Egiptodꞌeba ẽzoadꞌata krĩcha fiesta obadadꞌe bꞌʉdꞌe, izhidꞌebemata bioba ĩjãsidꞌa ũdudꞌakꞌata bio onʉmʉta ũdubʉdaba.

²⁴ Mawũãmina Jesúsbara kꞌawuasia ãzhara wãrĩnu ĩjãbʉda ẽãta, zhãrãnebema jõma kꞌau baera.

²⁵ Aramaʉ̃ne zhãrãnebema jaradꞌaira nesidꞌa ẽbasia, aramaʉ̃ne izhara kꞌau basia sodꞌera zhãrã sãwũã bꞌeta.