Juan 16 - Porciones del Nuevo Testamento

¹ Mʉãrã maʉ̃ta marãã jarabʉrʉa kenabꞌaridꞌa ẽbamarẽã mʉnebema ĩjã bꞌeta.

² De zhi jʉrebadata nʉme maẽ marã edꞌa wãbidꞌa ẽbaya, ewarita zeya bariduba marã beabʉrʉdꞌera krĩchaita Daizezeba krĩñata obʉrʉta.

³ Maʉ̃ta odꞌaya ũdukꞌawadꞌa ẽãba mʉ Zezeta miã mʉta.

⁴ Mʉãrã maʉ̃ta marãã jarabʉrʉa maʉ̃ ewarita zebʉrʉdꞌera marãba bude badꞌamarẽã ya mʉãrã marãã zhi jaramata. Maʉ̃ mʉãrã jẽdeubara marãã jara ẽbasia, mʉrã bꞌʉ baera marã bawara.

Jawurebiaba obꞌʉdꞌebema

⁵ Mawũãmina kꞌõbebʉrʉ mʉrã wãña mʉ zokꞌadꞌama, maʉ̃ta marãnebemabara miõba widꞌi mawũã ẽã: ¿Bʉra sãmaã wãĩpe?

⁶ Awuarabʉrʉ mʉã maʉ̃ta marãã jarabʉrʉ kꞌarea marã kꞌãbãẽã sopua kꞌobꞌea.

⁷ Mawũãmina wãrĩnu mʉã marãã jaraya: Marãĩtara biga mʉrã wãĩta, mʉta wã ẽbʉrʉ Kꞌarebara marãma ze ẽã, mawũãmina mʉta wãrã mʉã marãma zokꞌaya

⁸ Izhi zebʉrʉdꞌera ẽjũãne bꞌea kꞌawuabigaya kꞌazhiruadꞌe bꞌeta, waya mʉrã bedꞌea ne ẽã bꞌʉta, kꞌawuabigaya zhãrã Daizezebara kꞌawua oita.

⁹ Kꞌawuabigaya kꞌazhirua bara bꞌeta ĩjãna ẽãba mʉnebemata.

¹⁰ Kꞌawuabigaya mʉrã bedꞌea ne ẽã bꞌʉta mʉrã wãĩ baera mʉ Zezema, aramaʉ̃ne marãbara mʉrã wueta ũdudꞌa ẽbaya.

¹¹ Kꞌawuabigaya zhãrã Daizezebara kꞌawua oita, izhara ãtõmiã naʉ̃ ẽjũãne nokꞌora ya kꞌawua osi baera.

¹² Mʉãrã wadꞌi ne bio erubꞌʉa marãã jaraita, mawũãmina aritiara marãbara sãwũãta kꞌawuadꞌa ẽbaya.

¹³ Mawũãmina Jawurebia wãrãnebemata zebʉrʉdꞌera, marã erunʉmaña Daizezedꞌebema wãrãne. Izhara jara ẽbaya izhikusaudꞌebemata, awuarabʉrʉ jõma jaraya mʉneba ũrĩbʉrʉta, aramaʉ̃ne jõma marãã kꞌawuabiya kꞌãrẽ berabꞌariita.

¹⁴ Jawurebiabara kꞌawuabigaya mʉrã zhi zromata, mʉ bedꞌeata ũrĩpe marãã kꞌawuabigaya.

¹⁵ Jõma mʉ Zezeba erubꞌʉra mʉrẽã. Maʉ̃ba mʉãrã jarabʉrʉa Jawurebiabara mʉ bedꞌeata ũrĩpe marãã kꞌawuabigaita.

Sopuara sobia baya

¹⁶ Dããrã ẽãne marãbara mʉrã ũdudꞌa ẽbaya, mawũãmina dããrã ẽãne mʉrã wakusa ũdudꞌaya mʉrã wãĩ baera mʉ Zezema.

¹⁷ Mawũãĩ izha jʉrʉkuadꞌata ʉ̃kʉrʉbara ãzhirãĩnu mawũãsidꞌa: ¿Kꞌãrẽta mawũã dazhirãã mawũãbʉrʉ: Dããrã ẽãne marãbara mʉrã ũdudꞌa ẽbaya, mawũãmina dããrã ẽãne wakusa ũdudꞌaya mʉrã wãĩ baera mʉ Zezema?

¹⁸ ¿Kꞌãrẽta jara krĩñabʉrʉ mawũã dããrã ẽãne abʉrʉbara? Sãwũãta kꞌawuadꞌa ẽã izha jarabʉrʉra.

¹⁹ Jesúsbara kꞌawuasia widꞌi krĩña kꞌobꞌeta, mawũẽ mawũãsia: ¿Marãbara mazhirãĩnu widꞌi kꞌobꞌe ẽka mʉã mawũãnata: Dããrã ẽãne marãbara mʉrã ũdudꞌa ẽbaya, mawũãmina dããrã ẽãne mʉrã wakusa ũdudꞌaya?

²⁰ Mʉã wãrĩnu marãã jaraya, marã jẽgadꞌaya, sopuadꞌaya, waya mʉnebema ẽãta ẽjũãne bꞌera sobiadꞌaya. Mawũãmina marã sopuadꞌaimina marã sopuara sobia baya.

²¹ Wũẽrã toira puabaria toi ewarita arababʉrʉba. Mawũãmina wũãwũã tobʉrʉdꞌera pua kꞌobꞌadꞌara sobiaba kĩrãduabaria wũãwũãta tobʉrʉba naʉ̃ ẽjũãne.

²² Aramaʉ̃ kĩrãkꞌa marãsidꞌa kꞌãwũãwedꞌara sopua bꞌea. Mawũãmina mʉã marã wakusa ũdubʉrʉba sobiadꞌaya, mobebaira miõba jãrĩ ẽã marã sobiara.

²³ Maʉ̃ ewadera marãbara mʉãã widꞌidꞌa ẽã miã kꞌãrẽta. Mʉã wãrĩnu marãã jaraya, jõma kꞌãrẽ mʉ Zezea mʉneba widꞌibʉdara izha marãã diaya.

²⁴ Wadꞌi marãbara mʉnebara kꞌãrẽ widꞌidꞌa ẽã. Kꞌãrẽ widꞌiudua, mobedꞌeba jidadꞌaya, aramaʉ̃ne marã jipadꞌe sobia bꞌeaya.

Mʉã edre bꞌaebisia zareata ẽjũãnebema

²⁵ Maʉ̃ mʉãrã ne jarakꞌa jarabʉrʉa. Ewarita zeya mʉã jarabʉrʉra ne jarakꞌa jara ẽãta, awuarabʉrʉ marãã jipa jaraya mʉ Zezedꞌebemata.

²⁶ Maʉ̃ ewadera marãbara mʉneba kꞌãrẽ widꞌidꞌaya. Maʉ̃bara mʉãrã jara kꞌobꞌʉ ẽã mʉta mʉ Zezea zuburia bedꞌeaita marãbari.

²⁷ Mʉ Zezebara marã kʉãgꞌa bꞌʉa marãba mʉta kʉãgꞌa bꞌe baera, aramaʉ̃ne ĩjã bꞌea mʉrã zesita Daizeze maẽba.

²⁸ Mʉrã mʉ Zeze maẽba zesia naʉ̃ ẽjũãẽna, mʉãrã naʉ̃ ẽjũãrã ãmaẽña, mʉrã wakusa wãña mʉ Zezema.

²⁹ Mawũãĩ izha jʉrʉkuadꞌabara mawũãsidꞌa: Idꞌibʉrʉ bʉa jarabʉrʉra jipa jara kꞌobꞌʉa, ne jarakꞌa jara ẽã.

³⁰ Idꞌibʉrʉ daibara kꞌawuabʉda bʉara ne jõma kꞌawua bꞌʉta, mawũẽ miõba kꞌãrẽ widꞌidꞌaira nesidꞌa ẽã, kꞌãʉ̃ba daibara ĩjã bꞌea bʉra zesita Daizeze maẽba.

³¹ Mawũãnaĩ Jesúsbara panaʉ̃ mawũãsia: ¿Idꞌibʉrʉ ĩjãbʉdakꞌa?

³² Ewarita arabaidꞌebema ya arabasia, mawũẽ marã abꞌa abꞌakꞌa wãẽbadꞌaya mazhi wãbʉrʉma, aramaʉ̃ne mʉrã ãmaẽnaña dobꞌa. Mawũãmina mʉrã dobꞌa bꞌʉ ẽã mʉ Zezeta bꞌʉba mʉ ũme.

³³ Mʉã maʉ̃ta marãã jarabʉrʉa mʉneba adu-a bꞌeamarẽã. Naʉ̃ ẽjũãnerã marã zuburiaya, mawũãmina wãnigua bꞌeaudua, mʉã edre bꞌaebisia ãtõmiã zareata ẽjũãne nʉmʉrã.