Juan 14 - Porciones del Nuevo Testamento

Jesústa oa wãĩta Daizezema

¹ Sopuarãũdua. Ĩjãũdua Daizezedꞌebemata, ĩjãũdua mʉnebemasidꞌa.

² Mʉ Zeze dedꞌara sãma bꞌaira bio bꞌʉa, mawũã bꞌʉ ẽbʉrʉ mʉã marãã jarakꞌausia. Mawũẽ mʉrã wãña sãma bꞌaita aribꞌaedꞌe marãĩta.

³ Mʉrã mawũã wãpe sãma bꞌaita aribꞌaepe mʉrã wakusa zeya marã mʉzhi bawara jʉre edeita, aramaʉ̃ne mʉ bꞌʉ maẽ marãsidꞌa bꞌeamarẽã.

⁴ Marãbara kꞌawua bꞌea mʉ sãmaã wãĩrã, kꞌawua bꞌea ora.

⁵ Mawũãĩ Tomásba mawũãsia: Nokꞌó, daibara kꞌawuadꞌa ẽã bʉ sãmaã wãĩrã, ¿mawũẽ daibara sãwũã kꞌawuadꞌaipe ora?

⁶ Mawũãĩ Jesúsbara mawũãsia: Mʉta oa, mʉta wãrã, mʉta bꞌai jõ ẽãnebema. Mawũẽ miõta mʉ Zezema jũẽ ẽã, awuarabʉrʉ jũẽña mʉneba.

⁷ Marãba mʉta ũdukꞌawua bꞌeasibʉrʉ, mʉ Zezesidꞌa ũdukꞌawua bꞌeakꞌausia, nane wedꞌauba ũdukꞌawadꞌaya ũdu bꞌeba.

⁸ Mawũãĩ Felipeba mawũãsia: Nokꞌó, daia ũdubigarua bʉ Zezeta, daira bari maʉ̃baa.

⁹ Mawũãĩ Jesúsbara mawũãsia: ¿Mʉrã marã bawara bꞌʉta ewari bio bata, bʉa mʉrã ũdukꞌawa ẽka Felipe? Mʉta ũdu bꞌʉbara mʉ Zezeta ũdu bꞌʉa, ¿maʉ̃ta bʉara sãwũã mawũãbʉrʉ: Daia ũdubigarua bʉ Zezeta?

¹⁰ ¿Bʉara ĩjã ẽka mʉrã mʉ Zezedꞌe bꞌʉta, mʉ Zezera mʉne bꞌʉta? Mʉã bedꞌeata marãã jara nʉmʉrã mʉzhikusauba jara nʉmʉ ẽã, awuarabʉrʉ mʉ Zeze mʉne bꞌʉba mʉneba kꞌãrẽ onʉmʉã.

¹¹ Ĩjãrũã mʉrã mʉ Zezedꞌe bꞌʉta, mʉ Zezera mʉne bꞌʉta. Maʉ̃ta ĩjã ẽbʉrʉ, ĩjãrũã mʉã kꞌãrẽ onʉmʉneba.

¹² Mʉã wãrĩnu marãã jaraya: Mʉnebemata ĩjã bꞌʉbara mʉã kꞌãrẽ onʉmʉta izhabidꞌa oya. Kꞌãrẽ audre oya mʉta wãĩ baera mʉ Zezema.

¹³ Jõma kꞌãrẽ mʉ Zezea widꞌibʉdata mʉneba widꞌibʉdara mʉã aribꞌaeya, aramaʉ̃ne mʉ Zezeta zhi zromata ũdukꞌawadꞌamarẽã mʉ zhi Warradꞌeba.

¹⁴ Mʉãã kꞌãrẽta widꞌidꞌara mʉãrã aribꞌaeya.

Jesúsba zokꞌaita jaradꞌa Jawurebiata

¹⁵ Mʉta kʉãgꞌa bꞌebʉrʉ aribꞌaeudua mʉã jara bꞌʉta.

¹⁶ Mawũãrã mʉta zuburia bedꞌeaya mʉ Zezea, mobedꞌeba marãã diaya awʉrʉ marã Kꞌarebata, aramaʉ̃ne marã bawara bꞌamarẽã ewariza.

¹⁷ Jawurebiara wãrãnebemata bꞌʉa, mʉnebema ẽãta ẽjũãne bꞌebara izhira jidadꞌaidꞌe bꞌʉ ẽã ũdudꞌa ẽbaera, miã ũdukꞌawadꞌa ẽbaera. Mawũãmina marãbara ũdukꞌawua bꞌea marã bawara bꞌʉ baera, aramaʉ̃ne marãne bꞌaya.

¹⁸ Mʉã marã dobꞌa ãmaẽkua ẽã jẽrãmarãta bꞌe kĩrãkꞌa, mʉrã marãma zeya.

¹⁹ Mʉnebema ẽãta ẽjũãne bꞌebara dããrã ẽãne mʉrã wueta ũdudꞌa ẽã. Mawũãmina marãbara mʉrã ũdudꞌaya. Mʉta bꞌʉba marãsidꞌa bꞌeaya.

²⁰ Mawũã ũdubʉda ewadera marãbara kꞌawuadꞌaya mʉrã mʉ Zezedꞌe bꞌʉta, marãta mʉne bꞌeta, mʉta marãne bꞌʉta.

²¹ Mʉã jara bꞌʉta aribꞌae bꞌʉbara mʉrã kʉãgꞌa bꞌʉa. Mʉta kʉãgꞌa bꞌʉra mʉ Zezeba kʉãgꞌa baya, mʉãbidꞌa kʉãgꞌa baya, mobe mʉnebemata kꞌawuabi nʉmaña.

²² Mawũãĩ Juda awʉrʉba Iscariote ẽãba mawũãsia: Nokꞌó, ¿bʉara sãwũã daiaabʉrʉ bʉdꞌebemata kꞌawuabi nʉmaĩne kꞌawuabi nʉma ẽpe bʉdꞌebema ẽãta bꞌeara ẽjũãne?

²³ Mawũãĩ Jesúsbara panaʉ̃ mawũãsia: Mʉta kʉãgꞌa bꞌʉbara mʉ bedꞌeata aribꞌaeya, mobedꞌeba mʉ Zezebara kʉãgꞌa baya, aramaʉ̃ne daira izhima zedꞌape izhi bawara panaña.

²⁴ Mʉta kʉãgꞌa ẽãbara mʉ bedꞌeara aribꞌae ẽã. Mʉã jara nʉmʉ bedꞌeata ũrĩ bꞌera mʉrẽ ẽã, awuarabʉrʉ mʉ Zeze mʉ zokꞌadꞌadꞌea.

²⁵ Mʉã maʉ̃ jõma marãã jarabʉrʉa marã bawara bꞌʉwedꞌa.

²⁶ Mawũãmina marã Kꞌarebata Jawurebiata mʉ Zezeba mʉbari zokꞌaibara maʉ̃bara marãã ne jõma jaradedꞌekaya, bude babigaya jõma mʉã marãã jaradꞌata.

²⁷ Adu-a bꞌaidꞌebemata mʉã marãĩta ãmaẽña, adu-a bꞌaidꞌebemata mʉrẽta mʉã marãã diaya. Maʉ̃ mʉãrã dedꞌeka ẽã ẽjũãne bꞌeba aritiaedꞌa diabada kĩrãkꞌa. Mawũẽ sopuarãũdua, miã perarãũdua.

²⁸ Marãbara ũrĩsidꞌa mʉã marãã mawũãnata: Mʉrã wãpe marãma zeya. Mʉta kʉãgꞌa bꞌebʉrʉ marã sobiadꞌaidꞌe bꞌʉa mʉã jarasi baera mʉrã mʉ Zezema wãĩta, mʉ Zezera zhi zromaneba mʉ audre.

²⁹ Mʉã maʉ̃ta marãã jarabʉrʉa mawũã berabꞌarii nawedꞌa, mawũã berabꞌaribʉrʉdꞌera ĩjãnamarẽã.

³⁰ Ya mʉrã marã bawara bio bedꞌea ẽã ãtõmiãta uru baera naʉ̃ ẽjũãne nokꞌota, izhira zarea ne ẽã mʉ ʉ̃rʉ̃rã.

³¹ Mawũãmina mʉãrã mʉ Zezera kʉãgꞌata ẽjũãne bꞌeba kꞌawuadꞌamarẽã, mʉãrã mʉ Zezeba jaradꞌa kĩrãkꞌa onʉmʉã. Pirabꞌariudua, wãdrʉ namaʉ̃bara.