Juan 12 - Porciones del Nuevo Testamento

Jesús jẽrũne kerata weadꞌapeadꞌa

¹ Egiptodꞌeba ẽzoadꞌata krĩcha fiesta obadata ewari seis wãẽã nʉmʉne, Jesús Betania pʉwʉrʉedꞌa zesia Lázaro bꞌʉ maẽ, maʉ̃ beudꞌata izha piradrʉbidꞌa basia.

² Mama Jesúita zhiko osidꞌa, Martaba ne jedꞌekasia, Lázaro jewedꞌa kꞌobꞌasia zhãrã Jesús bawara nekꞌo duanune edꞌa.

³ Maríabara kera nardo izhiawa kiruta botelladꞌe nʉmʉta ne ʉ̃tʉta jiraedape weasia Jesús jẽrũne, mobe izhi budꞌaba põãsã jaresia, aramaʉ̃ne dera jõma tũã nʉmesia keraba.

⁴ Maʉ̃ne Jesúsba jʉrʉkuadꞌata abꞌa Juda Iscariote Simón warraba Jesús chãbꞌariita bꞌʉba mawũãsia:

⁵ ¿Naʉ̃ kera kꞌãrẽã nendo ẽbasi, ewari treciento trajadꞌabari nendoidꞌe bꞌasi ẽka denario trecientobari, mobe platara diaidꞌe bꞌasi ẽka zuburia bꞌea?

⁶ Judabara mawũã ẽbasia zuburia bꞌeta krĩcha bꞌʉba, awuarabʉrʉ mawũãsia nezrʉgamiãta bꞌʉ baera. Zũbita izha erubꞌʉba zrʉga bꞌasia ãzhi jõmaʉ̃ĩta plata edꞌa kenabꞌari panʉnebemata.

⁷ Mawũẽ Jesúsbara mawũãsia: Idaribirua, Maríabara mʉ wuagꞌa bꞌʉdꞌai ewariita wuagꞌa erubꞌasia naʉ̃ kerara.

⁸ Zuburia bꞌera marã bawara ewariza bꞌeaya, mawũãmina mʉrã marã bawara ewariza bꞌa ẽã.

Krĩcha jʉrʉdꞌapeadꞌa beadꞌaita Lázaro

⁹ Judíorãbara kꞌabanaba kꞌawuasidꞌa Jesús Betania pʉwʉrʉdꞌe bꞌʉta, mawũẽ maĩnu zesidꞌa, bari Jesús akʉdꞌe zedꞌa ẽbasia, awuarabʉrʉ Lázarosidꞌa akʉdꞌe zesidꞌa, beudꞌata Jesúsba piradrʉbidꞌata.

¹⁰ Mawũẽ sacerdoterã nokꞌorãbara krĩchasidꞌa beadꞌaita Lázarosidꞌa.

¹¹ Maʉ̃ẽnabema Lázarodꞌeba judíorã bioba ãzhira kenabꞌarisidꞌa, mobe ĩjãsidꞌa Jesúsdꞌebemata.

Jesús edꞌa wãna Jerusalénne

¹² Jerusalén pʉwʉrʉedꞌa kꞌabanata fiesta badꞌe zedꞌapeadꞌabara nrũẽmane ũrĩsidꞌa Jesúsidꞌa uruta.

¹³ Mawũẽ pãrãrã kiduata tʉdꞌape kĩrãzhu wãsidꞌa, maʉ̃nerã nemi jĩgua mawũãsidꞌa: ¡Daizezera ibia jaradꞌaya! ¡Ibia jaradꞌaya Daizezedꞌeba zebʉrʉra, izhira Rey Israel bꞌedꞌea! (Salmos 118:25-26)

¹⁴ Jesúsbara burro kũrãta ũdupe ʉ̃rʉ̃ bꞌarisia, maʉ̃ẽnabemata zhi bꞌʉmata mawũã bꞌʉa:

¹⁵ Perarãũdua marã Jerusalénne bꞌera, marã Reyra urua, burro kũrãne ʉ̃rʉ̃ bꞌari urua. (Zacarías 9:9)

¹⁶ Izha jʉrʉkuadꞌabara maʉ̃ naarara sãwũãrã kꞌawuadꞌa ẽbasia, mawũãmina Jesús ʉ̃taa wãna tẽãne bude basidꞌa maʉ̃ izhi ʉ̃rʉ̃bemata bꞌʉ tabꞌedꞌe odꞌapeadꞌata.

¹⁷ Zhãrã Jesús bawara kꞌobꞌeadꞌabara awʉrʉa nebʉrʉsidꞌa Lázaro trʉ̃bʉrʉdꞌera beudꞌata piradrʉbidꞌata.

¹⁸ Maʉ̃ kꞌarea zhãrãbara Jesús kĩrãzhu zesidꞌa, ũrĩsidꞌa baera izha odꞌata maʉ̃ ũdudꞌakꞌata.

¹⁹ Mawũãmina fariseorãbara ãzhirãĩnu mawũãsidꞌa: Marãba akʉ bꞌe kĩrãkꞌara dazhirãbara miã kꞌãrẽta obꞌedꞌa ẽã. Akaudua sãwũã jõmaʉ̃ba pẽwã duaĩnata.

Griegorã ʉ̃kʉrʉba jʉrʉdꞌapeadꞌa Jesús

²⁰ Ʉ̃kʉrʉ griegorãta duanasia Jerusalén pʉwʉrʉedꞌa wãrĩzekuadꞌara Daizeze ibia jaradꞌaita fiestadꞌe.

²¹ Maʉ̃rãbara Felipeta orrasidꞌa, Felipera Betsaida pʉwʉrʉdꞌebema basia, maʉ̃ pʉwʉrʉra Galilea druadꞌebema, mawũã orradꞌape zuburia bedꞌea mawũãsidꞌa: Daibara ũdu krĩña panʉã Jesústa.

²² Felipera wãpe jarasia Andrea, aramaʉ̃ne Andrésba Felipe ũmeba jarasidꞌa Jesúa.

²³ Mawũẽ Jesúsbara panaʉ̃ mawũãsia: Ewarira arabasia mʉ Beubari Bape bꞌʉra beudꞌata piradrʉpe ʉ̃taa wãĩta.

²⁴ Mʉã wãrĩnu marãã jaraya, trigo ta egorodꞌe ubudata pãwãrãĩta beu ẽbʉrʉ abꞌabai bꞌaya, mawũãmina pãwãrãĩta beura, waripe bio zauya.

²⁵ Bꞌa krĩñaba mʉ kꞌarea beu ẽãrã aduaya, mawũãmina naʉ̃ ẽjũãne bꞌa krĩña ẽkĩrãkꞌa mʉ kꞌarea beubʉrʉra Daizeze ũme bꞌai jõ ẽã bꞌaya.

²⁶ Iabꞌaʉba mʉ bedꞌeata aribꞌae nʉmʉbara mʉta pẽwãdua, mawũãrã mʉ bꞌʉ maẽ bꞌaya mʉ bedꞌeata aribꞌae bꞌʉra. Iabꞌaʉba mʉ bedꞌeata aribꞌae bꞌʉra mʉ Zezebara bia edaya.

Jesúsba jaradꞌa izhi beuita

²⁷ Mʉrã sopua kꞌobꞌʉa. ¿Mʉãrã kꞌasia aipe? ¿Zeze mʉrã kꞌarebarua, mʉrã zuburiabirãrũã aika? Mawũãmina mʉrã zesia maʉ̃ kꞌarea.

²⁸ Mawũẽ mʉãrã mawũãña: Zeze, bʉra zhi zromata ũdukꞌawabigarua. Maʉ̃ne Daizeze ʉ̃treba bedꞌeabʉrʉta mawũãsia: Mʉrã zhi zromata ũdukꞌawabiga bꞌʉta mʉãrã wakusa ũdukꞌawabigaya.

²⁹ Kꞌabanata mama kꞌobꞌebara maʉ̃ bedꞌeata ũrĩbʉdadꞌera jarasidꞌa bata. Waya awʉrʉrãbara mawũãsidꞌa: Ángelta Jesúa bedꞌeabʉrʉa.

³⁰ Mawũãnaĩ Jesúsbara mawũãsia: Mawũã bedꞌeabʉrʉra mʉĩtabema ẽã, awuarabʉrʉ marãĩtabema.

³¹ Arababʉrʉa Daizezebara kꞌawua okuaita naʉ̃ ẽjũãne bꞌera, arababʉrʉa ãtõmiã naʉ̃ ẽjũãne nokꞌota bꞌʉra Daizezebara ãĩ jʉretaita.

³² Mʉta druadꞌe cruzdꞌe jirabꞌʉdꞌai mʉãrã jõmaʉ̃ã ĩjãbigaya mʉnebemata.

³³ Mawũã jarabʉrʉbara Jesúsbara jara krĩñasia sãwũã beuita.

³⁴ Zhãrãbara mawũãsidꞌa: Daiba ũrĩbadara ũrãgꞌadꞌera jara bꞌʉa zhãrã Ẽdrʉbira beukꞌata. ¿Maʉ̃ta bʉara sãwũã Beubari Bape bꞌʉra cruzdꞌe jirabꞌʉdꞌaya abʉrʉ? ¿Mobera kꞌaipe maʉ̃ Beubari Bape bꞌʉra?

³⁵ Mawũãnaĩ Jesúsbara mawũãsia: Wadꞌi ewari kꞌakutua mʉta ʉ̃nata marãne edꞌa bꞌʉa. Mʉ ũme nimibaudua wadꞌi eruduanuwedꞌa mʉta ʉ̃nata, mawũãrã marãĩtara keubʉrʉ kĩrãkꞌa toto ẽbaya, pãrĩguadꞌe nimibara kꞌawua ẽã sãmaã wãrã.

³⁶ Ʉ̃nata eruduanuwedꞌa ĩjãũdua ʉ̃nanebemata, aramaʉ̃ne bꞌeaita ʉ̃na warrarãta. Jesúsbara maʉ̃ta jarape wãpe merũsia zhãrã kꞌarea.

Ĩjã ẽã nʉmeãna judíorãbara

³⁷ Jesúsbara ũdudꞌakꞌata ãzhi kĩrãbita okuasiidꞌu ĩjãna ẽbasia izhidꞌebema.

³⁸ Aramaʉ̃ne arimaẽ berabꞌarisia Daizezeba bedꞌeata jarabibariba Isaíaba mawũãnata: Nokꞌó, ¿kꞌaiba ĩjãbʉrʉ bedꞌeata dazha jarabʉdara? ¿Kꞌaiba kꞌawuabʉrʉ bʉra zhi zromata? (Isaías 53:1)

³⁹ Maʉ̃neba ĩjã bꞌedꞌa ẽbasia, maʉ̃ẽnabemata Isaíabara dewara mawũãsia:

⁴⁰ Daizezebara mawũãsia: Ĩjãna ẽãba mʉãrã ãnatʉsia ãzhi dabʉra, zarea duanusia ãzhi sora, aramaʉ̃nerã ũdudꞌa ẽã dabʉbara, sãwũãta kꞌawuadꞌa ẽã sobara, miã kꞌazhiruara ãmape mʉ pẽwãna ẽã mʉã ẽdrʉbigaira. (Isaías 6:10)

⁴¹ Isaíabara maʉ̃ta jarasia kꞌãĩmokꞌaradꞌe kĩrãkꞌa ũdudꞌaba Jesús zhi zromata bꞌaita, mawũẽ jarasia izhidꞌebemata.

⁴² Isaíaba mawũã jarasimina judíorãta nokꞌorãbara bioba ĩjãsidꞌa Jesúsdꞌebema. Mawũãmina ĩjã bꞌea adꞌa ẽbasia wawia bꞌeba fariseorãta, aramaʉ̃ne edꞌa wãbi ẽã nʉmʉna ẽbamarẽã de zhi jʉrebada maẽ.

⁴³ Aramaʉ̃ne zhãrãba bia jaraita krĩña bꞌeasia Daizezea bia jarabidꞌai kꞌãñabara.

Jesús bedꞌeaba kꞌawua oya zhãrã bꞌera

⁴⁴ Jesúsbara nemi jĩgua mawũãsia: Mʉnebemata ĩjã bꞌʉra bari mʉnebemata ĩjã bꞌʉ ẽã, awuarabʉrʉ ĩjã bꞌʉa mʉ zokꞌadꞌadꞌebemata.

⁴⁵ Mʉta ũdu bꞌʉbara ũdu bꞌʉa mʉ zokꞌadꞌata.

⁴⁶ Mʉta ʉ̃nata zesia naʉ̃ ẽjũãẽna, mʉnebema ĩjãbʉdara pãrĩguadꞌe bꞌea ẽbamarẽã.

⁴⁷ Mʉ bedꞌeata ũrĩpe aribꞌae ẽãrã mʉãrã kꞌawua o ẽã, mʉrã zhãrã kꞌawua oita ze ẽbasi baera naʉ̃ ẽjũãẽna, awuarabʉrʉ mʉrã zesia zhãrã ẽdrʉbigaita ẽjũãne bꞌeta.

⁴⁸ Mʉta seribi ẽãba mʉ bedꞌeata ĩjã ẽãbara erubꞌʉa kꞌaiba pua kꞌawua oira, bedꞌeata mʉã jara nʉmʉba maʉ̃neba Daizezeba kꞌawua oya ewari jõbʉrʉdꞌe.

⁴⁹ Mʉrã bedꞌea nʉmʉ ẽã mʉzhikusauba, awuarabʉrʉ mʉ Zeze mʉ zokꞌadꞌaba jarasia kꞌãrẽ jarai bꞌʉra sãwũã jaraita.

⁵⁰ Mʉãrã kꞌawua bꞌʉa izha mʉãã jarabi nʉmʉrã izhi ũme bꞌai jõ ẽãnebema. Mawũẽ mʉã jara nʉmʉrã jara nʉmʉã mʉ Zezeba mʉãã jaradꞌadꞌe.