Juan 11 - Porciones del Nuevo Testamento

Lázaro beudꞌa

¹ Lázaro abadata kꞌaya nʉmʉta Betania pʉwʉrʉdꞌebema basia, zhi nawekꞌaurãsidꞌa Maríata, Marta ũme maʉ̃ pʉwʉrʉdꞌebema basia.

² Maʉ̃ Maríara Lázaro kꞌaya nʉmʉ nawekꞌaubara tẽãne kerata Jesús jẽrũne ʉ̃rʉ̃ weape izhi budꞌaba põãsã jaresia.

³ Zhi nawekꞌaurãbara bedꞌeata jarabuesidꞌa Jesúa mawũãnamarẽã: Nokꞌó, bʉa kʉãgꞌara kꞌaya nʉmʉã.

⁴ Jesúsbara maʉ̃ta ũrĩpe mawũãsia: Maʉ̃ mawũã kꞌaya nʉmʉrã bari beuidꞌebema ẽã, awuarabʉrʉ Daizeze zhi zromata kꞌawuadꞌaidꞌebema, mʉ Daizeze Warrata zhi zromata kꞌawuadꞌaidꞌebema.

⁵ Martara, Maríara, Lázarora Jesúsbara kʉãgꞌa basia.

⁶ Lázaro kꞌaya nʉmʉta ũrĩbʉrʉdꞌera wadꞌi ewari ũme bꞌesia izhi bꞌadꞌa maẽ.

⁷ Mobe maʉ̃ tẽã izha jʉrʉkuadꞌaa mawũãsia: Wakusa wãdrʉ Judea druaedꞌa.

⁸ Mawũãĩ izha jʉrʉkuadꞌabara mawũãsidꞌa: Miã Ũrãgꞌabari, dããrã ba ẽã judíorãba bʉra mongꞌaraba tabꞌaridꞌai badꞌapeadꞌara. ¿Maʉ̃ta wakusa maĩnu wãĩka?

⁹ Mawũãnaĩ Jesúsbara panaʉ̃ mawũãsia: ¿Ewarira doce hora ʉ̃na nʉmʉ ẽka? Ewaridꞌe nimirã tenedrʉ ẽã ẽjũã ʉ̃nata ũdu bꞌʉba.

¹⁰ Mawũãmina diamase nimirã tenedrʉya ʉ̃na nʉmʉ ẽãba.

¹¹ Mawũãpe mawũãsia: Dazhirã bawara zhibiara Lázaro kꞌãĩ nʉmʉã, mawũãmina mʉrã wãña ʉ̃rʉ̃mane.

¹² Mawũãĩ izha jʉrʉkuadꞌabara mawũãsidꞌa: Nokꞌó, mawũã kꞌãĩ nʉmʉbʉrʉ bꞌeya.

¹³ Mawũã jarabʉrʉbara Jesúsbara jara krĩñasia Lázaro beusita, mawũãmina ãzhara krĩchasidꞌa jarabʉrʉta ẽnaʉ̃ kꞌãĩ nʉmʉta.

¹⁴ Mawũẽ Jesúsbara jipa jara mawũãsia: Lázaro beusia.

¹⁵ Mʉrã marã kꞌarea sobia bꞌʉta mama bꞌa ẽbadꞌaba marãbara mʉnebema audre ĩjãnaña, mawũẽ wãnaña izhima.

¹⁶ Mobebʉrʉ Tomás Memerã abadabara dewaraurã Jesúsba jʉrʉkuadꞌaa mawũãsia: Dazhirãsidꞌa wãnaña izhi bawara beudꞌe.

Jesúsbara beudꞌara piradrʉbiya

¹⁷ Jesús zebʉrʉdꞌera Lázaro wuagꞌadꞌapeadꞌara ya ewari kĩmarẽ nʉmasia.

¹⁸ Betania pʉwʉrʉra bꞌasia Jerusalén kꞌaita, zhi wawarata bꞌasia kilómetro ũbea.

¹⁹ Judíorã bio zesidꞌa Martama, Maríama, aramaʉ̃ne kꞌopayadꞌaita ãzhi mebeata beusi baera.

²⁰ Martabara Jesús uruta ũrĩbʉrʉdꞌera kĩrãzhu wãsia, mawũãmina Maríara bꞌesia dedꞌa.

²¹ Martabara Jesúa mawũãsia: Nokꞌó, bʉta nama bꞌasibʉrʉ mʉ nawewaura beu ẽbakꞌausia.

²² Mawũãmina mʉãrã kꞌawua bꞌʉa jõma bʉa Daizezea widꞌibʉrʉra izhara aribꞌaeya.

²³ Mawũãĩ Jesúsbara mawũãsia: Bʉ nawewaura beudꞌata piradrʉya.

²⁴ Mawũãĩ Martabara mawũãsia: Mʉãrã kꞌawua bꞌʉa beudꞌata piradrʉita beudꞌapeadꞌata piradrʉbʉdadꞌe ewari jõbʉrʉdꞌe.

²⁵ Mawũãĩ Jesúsbara mawũãsia: Beudꞌara mʉã piradrʉbipe Daizeze ũme bꞌai jõ ẽã bꞌabiya. Mʉnebemata ĩjã bꞌʉra beubʉrʉsidꞌa zokꞌai bꞌaya.

²⁶ Zokꞌai bꞌeba mʉnebemata ĩjã bꞌera jipa beu ẽã. ¿Maʉ̃ bʉara ĩjãĩka?

²⁷ Mawũãĩ izhara mawũãsia: Ããjã Nokꞌó, mʉãrã ĩjã bꞌʉa bʉra zhãrã Ẽdrʉbita Daizeze Warrata zesia naʉ̃ ẽjũãẽna.

Jesús jẽgadꞌa Lázaro wuagꞌadꞌapeadꞌa maẽ

²⁸ Mawũãpe Martabara zhi mebea María trʉ̃ne wãpe chupea mawũãsia: Miã Ũrãgꞌabarira nama bꞌʉa, bʉta trʉ̃ kꞌobꞌʉa.

²⁹ Maríabara maʉ̃ta ũrĩpe ĩñabasia piradrʉpe zesia Jesúsma.

³⁰ Jesús wadꞌi pʉwʉrʉdꞌe edꞌa ze ẽbasia, awuarabʉrʉ bꞌasia Martaba ũdudꞌa maẽ.

³¹ Dedꞌa judíorã María kꞌopaya bꞌebara María ĩñabasia piradrʉpe wãbʉrʉta ũdudꞌai, kꞌaidꞌu wãbʉdata mawũãsidꞌa: Zhi mebea wuagꞌadꞌapeadꞌaidꞌu jẽgadꞌe wã.

³² María Jesús kꞌobꞌʉ maẽ zebʉrʉdꞌe ũdui, izhi jẽrũ kꞌaita sãkꞌokꞌodꞌe kꞌobꞌepe mawũãsia: Nokꞌó, bʉta nama bꞌasibʉrʉ mʉ nawewaura beu ẽbakꞌausia.

³³ Jesúsbara María jẽga bꞌʉta ũdubʉrʉdꞌe, judíorã izhi kꞌopaya bꞌesidꞌa jẽga kꞌobꞌeta ũdui kꞌãbãẽã sopuasia.

³⁴ Mawũẽ mawũãsia: ¿Sãma wuagꞌasidꞌa? Mawũãĩ mawũãsidꞌa: Nokꞌó, akʉdꞌe zerua.

³⁵ Jesús jẽgasia.

³⁶ Mawũẽ judíorãbara mawũãsidꞌa: Akaudua sãwũã kʉãgꞌa basita.

³⁷ Maʉ̃rã ʉ̃kʉrʉbara mawũãsidꞌa: ¿Naʉ̃bara daʉbꞌerrea bꞌʉta ne ũdubidꞌara, Lázarosidꞌa beubi ẽbaidꞌe bꞌasi ẽka?

Beudꞌata piradrʉdꞌa Lázaro

³⁸ Jesús wakusa kꞌãbãẽã sopua zesia Lázaro wuagꞌadꞌapeadꞌa maẽ. Mama zobꞌeata nʉmʉta mongꞌara zromaba tapa nʉmasia.

³⁹ Mawũẽ Jesúsbara mawũãsia: Mongꞌara ãĩ edaudua. Maʉ̃ne Marta zhi beudꞌa nawekꞌaubara mawũãsia: Nokꞌó, ya ʉ̃siasia ewari kĩmarẽ basi baera.

⁴⁰ Mawũãĩ Jesúsbara mawũãsia: ¿Mʉã bʉaa jarasi ẽka bʉa mʉnebemata ĩjãrã ũduita zarea Daizezedꞌera?

⁴¹ Mobebʉrʉ beudꞌata bꞌʉdꞌapeadꞌa maẽbara mongꞌara ãĩ edasidꞌa. Mawũẽ Jesúsbara ʉ̃taa akʉ mawũãsia: Zeze, mʉã bʉaa zhibia jiya mʉã widꞌidꞌara bʉa ũrĩbʉrʉba.

⁴² Mʉãrã kꞌawua bꞌʉa bʉara mʉ bedꞌeara baridua ũrĩ bꞌʉta, mawũãmina mʉrã mawũã bedꞌeabʉrʉa kꞌabanata za kꞌobꞌe kꞌarea, aramaʉ̃ne ĩjãnamarẽã mʉrã bʉa zokꞌadꞌata.

⁴³ Mawũãpe nemi jĩgua mawũãsia: ¡Lázaro ãĩ zerua!

⁴⁴ Mawũãĩ beudꞌara ãĩ zesia, juwuata jẽrũta bʉra chubꞌasia wuaba, kĩrãsidꞌa bʉra chubꞌasia pañueloba. Mawũẽ Jesúsbara mawũãsia: Ẽnaʉ̃dua tebamarẽã.

Krĩcha jʉrʉdꞌapeadꞌa beadꞌaita Jesús

⁴⁵ Mobebʉrʉ judíorã bio María kꞌopayadꞌaita zedꞌapeadꞌabara Jesúsba mawũã obʉrʉta ũdudꞌape ĩjãsidꞌa izhidꞌebemata.

⁴⁶ Mawũãmina maʉ̃rãnebema ʉ̃kʉrʉra fariseorãma wãpe jarasidꞌa Jesúsba mawũã obʉrʉta.

⁴⁷ Mawũẽ sacerdoterã nokꞌorãbara, fariseorãbara, nokꞌorã wagꞌaurãta ãba jʉredꞌape mawũãsidꞌa: ¿Kꞌãrẽta odꞌaipe? Jesúsbara bio onʉmʉã ũdudꞌakꞌata.

⁴⁸ Kꞌãwũã idaribidꞌara izhidꞌebemata jõmaʉ̃ba ĩjãnaña, kꞌãwũãrã Roma bidꞌarãta zedꞌape Daizeze de dazhirãnerã ãrĩnaña, dazhirãsidꞌa beakuadꞌaya.

⁴⁹ Mawũãnaĩ ãzhirãnebema abꞌa Caifás maʉ̃ añone sacerdote wagꞌauta bꞌʉba mawũãsia: Marãbara miã kꞌãrẽta kꞌawuadꞌa ẽã.

⁵⁰ Miã marãbara kꞌawuadꞌa ẽã ũmakĩrã abꞌa jõmaʉ̃bari beuita audre bigata, Roma bidꞌarãba judíorã jõma beadꞌai kꞌãñabara.

⁵¹ Mawũãbʉrʉra izhikusauba mawũã ẽbasia, awuarabʉrʉ maʉ̃ añone izhita sacerdote wagꞌauta bꞌʉ baera Daizezedꞌeba mawũãsia Jesús beuita judíorã jõmaʉ̃bari.

⁵² Bari judíorãbari beuita ẽã, awuarabʉrʉ beuita Daizeze warrarã abꞌa nʉmʉĩta druaza bꞌeta.

⁵³ Aramaʉ̃ne maʉ̃ ewadeba krĩchasidꞌa Jesús beadꞌaita.

⁵⁴ Maʉ̃ kꞌarea judíorãne edꞌara Jesús ya dajada nimiba ẽbasia, awuarabʉrʉ mamaʉ̃bara wãsia drua drudrua tabꞌʉ kꞌaita, pʉwʉrʉta Efraín abadaidꞌu wãsia, mobe mama bꞌesia izha jʉrʉkuadꞌa bawara.

⁵⁵ Kꞌaita bata nʉmasia Egiptodꞌeba ẽzoadꞌata krĩcha fiesta obadata judíorãba, mawũẽ fiesta nawedꞌa bio wãrĩzesidꞌa Jerusalén pʉwʉrʉedꞌa, Daizeze kĩrãbita nene ẽã kꞌobꞌaidꞌebemata odꞌai kꞌarea.

⁵⁶ Zhãrãbara Jesús jʉrʉ bꞌeta Daizeze dedꞌa ewara maẽ ãzhirãĩnu mawũãsidꞌa: ¿Marãma sãwũãpe? ¿Fiesta badꞌera zeibʉka?

⁵⁷ Sacerdoterã nokꞌorãbara, fariseorãbara jarasidꞌa iabꞌaʉba sãma bꞌʉta kꞌawuara jaramarẽã jidadꞌaita.