Juan 10 - Porciones del Nuevo Testamento

Ne jaradꞌa ovejarã akʉbaridꞌeba

¹ Jesúsbara mawũãsia: Mʉã wãrĩnu marãã jaraya: Ovejarãne kꞌorrata nʉmʉ maẽ puertadꞌe edꞌa wãbʉrʉ ẽãrã, awuarabʉrʉ jãpe wãrĩze edꞌa wãbʉrʉra nezrʉgamiã.

² Mawũãmina puertadꞌe edꞌa wãbʉrʉra ovejarã akʉbaria.

³ Puerta jʉ̃ã bꞌʉbara maʉ̃ edꞌa wãmarẽã ewabaria, ovejarãbara izhi nemirã ũrĩkꞌawua bꞌea, izhi ovejarã trʉ̃ jara ãĩ jʉre edebaria.

⁴ Aramaʉ̃ne izhi ovejarã jõma ãĩ zebigape ãzhi naa wãbaria, mawũẽ ovejarã izhi kꞌaidꞌu wãbada izhi nemita ũrĩkꞌawua bꞌeba.

⁵ Mawũãmina ũdudꞌakꞌara pẽwãna ẽã, awuarabʉrʉ maʉ̃ kꞌareara merũ wãẽba panʉã ũdudꞌakꞌa nemirã ũrĩnakꞌaba.

⁶ Jesúsbara mawũã ne jarakꞌasia, mawũãmina ãzhara kꞌawuadꞌa ẽbasia kꞌãrẽta jara krĩñabʉrʉra.

Jesúra bigaua izhidꞌerã akʉira

⁷ Mawũẽ Jesúsbara wakusa mawũãsia: Mʉã wãrĩnu marãã jaraya: Mʉta puerta ovejarãneã.

⁸ Jõma mʉ nawedꞌa zedꞌapeadꞌara nezrʉgamiãta bꞌea, mawũẽ ãzhi bedꞌeara ũrĩna ẽbasia mʉrẽta bꞌebara.

⁹ Mʉta puerta. Mʉneba edꞌa wãbʉrʉra ẽdrʉya. Aramaʉ̃ne adu-a bꞌaya mʉã bia erunʉmʉba.

¹⁰ Nezrʉgamiã zebaria nezrʉgaita, zhãrã beaita, zhãrã jõbiita. Mawũãmina mʉrã zesia Daizeze ũme bꞌai jõ ẽãta adꞌuba erubꞌeamarẽã.

¹¹ Mʉrã bigaua ovejarã akʉira. Ovejarã akʉita bigaura beubaria ovejarã kꞌarea.

¹² Mawũãmina pagꞌa bꞌʉkꞌãrĩnata ovejarã akʉbari ẽãbara ovejarã izhidꞌe ẽbaera usa pã zebʉrʉta ũdubʉrʉdꞌera ovejarã ãmaẽkua wãẽba wãbaria, mawũẽ usa pãbara ovejarã kꞌa jãrãzoabibaria.

¹³ Pagꞌa bꞌʉkꞌãrĩnarã mawũã wãẽba wãbaria, plata kꞌarea nʉmʉ baera sopua ẽã ovejarã kꞌarea.

¹⁴ Mʉrã ovejarã akʉira bigaudꞌeba ũdukꞌawua bꞌʉa mʉ ovejarã, mʉrẽta bꞌebidꞌa mʉrã ũdukꞌawua bꞌea.

¹⁵ Aramaʉ̃ kĩrãkꞌa mʉ Zezebara mʉrã ũdukꞌawua bꞌʉa, mʉ Zezera mʉãbidꞌa ũdukꞌawua bꞌʉa. Mʉrã beuya ovejarã kꞌarea.

¹⁶ Mʉã dewara erubꞌʉa ovejarã naʉ̃ kꞌorradꞌebema ẽãta. Maʉ̃rãsidꞌa mʉãrã wei baraba maʉ̃rãbara mʉ bedꞌeara ũrĩnaña. Aramaʉ̃ne ãba duaneña, ãzhi akʉbarira abꞌa bꞌaya.

¹⁷ Mʉ Zezebara mʉrã kʉãgꞌa mʉrã beui baera wakusa piradrʉita.

¹⁸ Mʉrã miõba beadꞌa ẽã, awuarabʉrʉ mʉrã mʉzhi biaba beuya. Mʉãrã erubꞌʉa beui zareara, mʉãrã erubꞌʉa wakusa piradrʉi zareara. Maʉ̃ta omarẽã jarasia mʉ Zezeba.

¹⁹ Judíorã wakusa krĩcha abꞌarika zedꞌa ẽbasia maʉ̃ bedꞌeaba.

²⁰ Ãzhirãnebema biobara mawũãsidꞌa: Jaiba erunʉmʉba kĩrãne bꞌʉ ẽã. ¿Maʉ̃ba izhi bedꞌeara kꞌãrẽã ũrĩnaĩpe?

²¹ Waya awʉrʉrãbara mawũãsidꞌa: Mawũãrã bedꞌea ẽã jaiba erunʉmʉrã. ¿Jaibara ne ũdubiga bꞌeika daʉbꞌerrea bꞌera?

Judíorãbara Jesús seribidꞌa ẽbasia

²² Jerusalénne fiesta obʉdata Daizeze dedꞌebemata osidꞌa. Maʉ̃nerã kũrãsã ewari basia.

²³ Daizeze dedꞌa ewara maẽ Jesús tebasia Salomón abada maẽ.

²⁴ Maʉ̃ne judíorãba bʉredrʉdꞌape mawũãsidꞌa: ¿Bʉara daira sõmbeedꞌa bʉdꞌebema bia kꞌawuabiga ẽã erunʉmaĩpe? Bʉta zhãrã Ẽdrʉbibʉrʉ daia jipa jaradua.

²⁵ Mawũãnaĩ Jesúsbara panaʉ̃ mawũãsia: Mʉrã maʉ̃ta mʉã marãã jarasimina marãbara ĩjãna ẽã. Mʉ Zezedꞌeba mʉã kꞌãrẽ onʉmʉba jipa kꞌawuabi bꞌʉa mʉrã maʉ̃ta.

²⁶ Mawũãmina marãbara ĩjãna ẽã mʉrẽnebemata duanu ẽbaera mʉã marãã jaradꞌa kĩrãkꞌa.

²⁷ Mʉ ovejarãbara mʉ bedꞌeara ũrĩ bꞌea, mʉãrã ãzhira ũdukꞌawua bꞌʉa, mʉrã aramaʉ̃ne pẽwã bꞌea.

²⁸ Mʉãrã dedꞌekaya Daizeze ũme bꞌai jõ ẽãta, mawũẽ aduadꞌa ẽã, miõba jãrĩkua ẽã mʉ juwuadꞌebara.

²⁹ Mʉ Zezera ãzhita mʉãã diadꞌara jõmaʉ̃ audre zhi zroma, mawũẽ miõba jãrĩkua ẽã mʉ Zeze juwuadꞌebara.

³⁰ Mʉrã mʉ Zeze ũme abꞌaʉta panʉã.

³¹ Mawũãbʉrʉ kꞌarea judíorãbara wakusa mongꞌarata jirakua edasidꞌa tabꞌari beadꞌaita.

³² Mawũẽ Jesúsbara mawũãsia: Mʉãrã mʉ Zezedꞌeba biata bio onʉmʉta marãã ũdubiga nʉmʉã. ¿Mawũẽ maʉ̃rãnebema sãʉ̃ kꞌarea mʉrã mongꞌaraba tabꞌaridꞌaipe?

³³ Mawũãĩ judíorãbara panaʉ̃ mawũãsidꞌa: Bʉa biata obꞌʉ kꞌarea mongꞌaraba tabꞌaridꞌaita kꞌopanʉ ẽã, awuarabʉrʉ tabꞌaridꞌaya Daizezema mitia bedꞌea bꞌʉdꞌeba, aramaʉ̃ne bʉra beubari bꞌʉta Daizezea abꞌʉa.

³⁴ Mawũãnaĩ Jesúsbara panaʉ̃ mawũãsia: ¿Marã ũrãgꞌata bꞌʉ tabꞌʉdꞌera Daizezebara mawũãsi ẽka: Mʉã zhi jarama marã dai zezerãta?

³⁵ Mawũã dai zezerãta jarasia izha bedꞌeata jarakꞌadꞌata, maʉ̃ta zhi bꞌʉmarã mawũã ẽã abꞌedꞌa ẽã.

³⁶ ¿Maʉ̃ne mʉrã mʉ Zezeba jʉrʉpe naʉ̃ ẽjũãẽna zokꞌadꞌata, marãbara bʉra Daizezema mitia bedꞌeabʉrʉa abʉda ẽka, bari mʉã jarabʉrʉdꞌeba mʉrã Daizeze Warrata?

³⁷ Mʉ Zezeba obꞌʉta mʉã o ẽbʉrʉ, mʉã jara nʉmʉrã ĩjãrãũdua.

³⁸ Mawũãmina mʉã onʉmʉbʉrʉ, mʉã jara nʉmʉta ĩjãna ẽãsidꞌa, maʉ̃ mʉã onʉmʉta ĩjãũdua, aramaʉ̃ne kꞌawuadꞌaya mʉ Zezera mʉne bꞌʉta, mʉrã mʉ Zezedꞌe bꞌʉta.

³⁹ Mawũãbʉrʉ kꞌarea wakusa jida krĩñasidꞌa, mawũãmina Jesús ẽdrʉsia ãzhi juwuadꞌebara.

⁴⁰ Mobe wakusa wãsia Jordán do kĩrãrẽ, naara Juanba zhãrã buru kꞌoe bꞌadꞌaidꞌu, mobe bꞌesia mama.

⁴¹ Maʉ̃nerã bio izhima ze nʉmʉbara mawũã duanasia: Ũdudꞌakꞌara Juanbara o ẽbasia, mawũãmina naʉ̃ Jesúsdꞌebemata Juanba jaradꞌara jõma wãrĩnu basia.

⁴² Aramaʉ̃ne Jesúsdꞌebema mama bioba ĩjãsidꞌa.