Juan 1 - Porciones del Nuevo Testamento

Cristora Bedꞌeata Beubari Bape bꞌadꞌa

¹ Jẽdebara bꞌasia Bedꞌeata, maʉ̃ Bedꞌeara Daizeze ũme bꞌasia, Bedꞌeara Daizeze basia.

² Izhira jẽde wedꞌauba Daizeze ũme bꞌasia.

³ Izhikꞌareuba Daizezebara ne jõma osia, izhikꞌareuba obʉrʉ ẽãrã miã kꞌãrẽsidꞌa o ẽbasia.

⁴ Izhira dazhi bꞌʉ kꞌarra, mawũã dazhi bꞌʉ kꞌarrata Daizezedꞌebema kꞌawuabiga bꞌʉba zhãrãĩta ʉ̃nata bꞌʉa.

⁵ Izhira ʉ̃nata pãrĩguadꞌe ʉ̃na bꞌʉa, izhira pãrĩguabara kia ẽã.

⁶ Iabꞌa bꞌasia Daizezeba zokꞌadꞌata, maʉ̃ Juan Burukꞌoemiã abazhidꞌa.

⁷ Maʉ̃ zesia ʉ̃nanebemata jarakꞌaita, aramaʉ̃ne jõmaʉ̃ba ĩjãnamarẽã izhidꞌeba.

⁸ Juan ʉ̃nata bꞌa ẽbasia, awuarabʉrʉ bꞌasia ʉ̃nanebemata jarakꞌaita.

⁹ Wãrĩnu ʉ̃nabara Daizezedꞌebema kꞌawuabiga bꞌʉba zhãrã jõma ʉ̃nabi bꞌʉra zeita bꞌasia naʉ̃ ẽjũãẽna.

¹⁰ Maʉ̃ ʉ̃narã naʉ̃ ẽjũãne bꞌasia, ẽjũãrã Daizezebara izhikꞌareuba osia, mawũãmina ẽjũãne bꞌebara ũdukꞌawadꞌa ẽbasia.

¹¹ Izhidꞌerãma zesia, mawũãmina izhidꞌerãbara bia edadꞌa ẽbasia.

¹² Mawũãmina izhita bia edadꞌapeadꞌara, izhidꞌebemata ĩjãnapeadꞌara Daizeze warrarãta duanebisia.

¹³ Mawũã Daizeze warrarãta duanebi ẽbasia beubari bꞌeba todꞌadꞌeba, awuarabʉrʉ zhi warrarãta duanebisia Daizezeba.

¹⁴ Bedꞌeara Beubari Bape dazhirãne edꞌa bꞌasia, kʉãgꞌaba bira bꞌʉba kꞌawuabiga bꞌasia Daizezedꞌebema wãrãta. Daibara ũdusidꞌa izhira zhi zromata, zhi Warra abꞌa bꞌʉta zhi zroma basia zhi Zezedꞌeba.

¹⁵ Juanbara izhidꞌebemata mawũãsia: Naʉ̃ jarabʉrʉta mʉãrã mawũãsia: Mʉ tẽã urura mʉ audre zhi zroma mʉ nawedꞌa bꞌadꞌaba.

¹⁶ Izhi bꞌʉdꞌebema biaba dazhirã jõma bia erunʉmʉã, aramaʉ̃ne bia erunʉma tau ẽã.

¹⁷ Daizezebara izhi ũrãgꞌara diasia Moisédꞌeba, mawũãmina izha zhãrã kʉãgꞌa bꞌʉra izhidꞌebemata wãrĩnurã dajada nʉmesia Jesucristodꞌeba.

¹⁸ Daizezera miõba ũdukꞌa, mawũãmina zhi Warra abꞌa bꞌʉta zhi Zeze ũme bꞌʉba dazhirãã kꞌawuabisia sãwũã bꞌʉta.

Jesúsdꞌebemata jaradꞌa Juan Burukꞌoemiãba

¹⁹ Jesúsdꞌebemata Juanba jarasidꞌera, nokꞌorã judíorãba Jerusalénneba sacerdoterãta levitarã bawara zokꞌasidꞌa widꞌi mawũãnamarẽã: ¿Bʉra kꞌaipe?

²⁰ Mawũãnaĩ merã ẽã jarabʉrʉta mawũãsia: Mʉ ẽã zhãrã Ẽdrʉbiira.

²¹ Mawũãĩ widꞌi mawũãsidꞌa: ¿Mobera bʉra kꞌaipe? ¿Bʉra Elíakꞌa? Mawũãnaĩ mawũãsia: Mʉrã maʉ̃ ẽã. Mawũãĩ mawũãsidꞌa: ¿Mobera bʉra Daizezeba bedꞌeata jarabibarita zeita bꞌadꞌakꞌa? Mawũãnaĩ panaʉ̃ mawũãsia: Mʉrã maʉ̃ ẽã.

²² Mawũãĩ mawũãsidꞌa: ¿Mobera bʉra kꞌaipe? Dai zokꞌadꞌapeadꞌarãã daibara jaradꞌaibara bʉra kꞌaita. ¿Bʉdꞌebema bʉara daia kꞌãrẽta jaraipe?

²³ Mawũãnaĩ Juanbara mawũãsia: Mʉrã iabꞌa nemi jĩgua bedꞌeaidꞌebemata drua drudrua tabꞌʉ maẽ mawũãĩnebema: Bia ẽãrã ãmabʉdaba jipa obʉdakꞌaudua Nokꞌo zei ota. (Isaías 40:3) Mawũãĩnebema Daizezeba bedꞌeata jarabibariba Isaíaba jaradꞌa kĩrãkꞌa.

²⁴ Juanma zokꞌakuadꞌapeadꞌara fariseorãnebema basia.

²⁵ Maʉ̃rãbara widꞌi mawũãsidꞌa: ¿Bʉara kꞌai bedꞌeadꞌeba zhãrã buru kꞌoe bꞌʉ, zhãrã Ẽdrʉbiita bʉ ẽbʉrʉ, miã Elía ẽbʉrʉ, miã Daizezeba bedꞌeata jarabibari ẽbʉrʉ?

²⁶ Mawũãnaĩ Juanbara panaʉ̃ mawũãsia: Mʉãrã zhãrã buru kꞌoe bꞌʉa baniãba. Mawũãmina iabꞌa marãne edꞌa bꞌʉa marãba ũdukꞌawadꞌa ẽãta.

²⁷ Maʉ̃ mʉ tẽã urua, izhira mʉ audre zhi zroma, nezokꞌaba obari kĩrãkꞌara mʉãrã ẽnaĩne bꞌʉ ẽã izha jẽrũne jʉ̃ bꞌʉra.

²⁸ Maʉ̃ Betania pʉwʉrʉdꞌe mawũã berabꞌarisia, do Jordán kĩrãrẽ Juanba zhãrã buru kꞌoekua nʉmana maẽ.

Jesúra Oveja zake Daizezedꞌea

²⁹ Nrũẽma Juanbara Jesús izhima uruta ũdupe mawũãsia: Akaudua, kꞌãʉ̃ta Oveja zake Daizezedꞌea, naʉ̃bara kꞌazhirua ne ẽã oya ẽjũãne zhãrã bꞌeta.

³⁰ Naʉ̃ta jarabʉrʉta mʉãrã mawũãsia: Mʉ tẽã urura mʉ audre zhi zroma mʉ nawedꞌa bꞌadꞌaba.

³¹ Jesús kꞌaira mʉãrã kꞌawua ẽbasia, mawũãmina Israel bꞌeba ũdukꞌawadꞌamarẽã mʉãrã zhãrãta buru kꞌoe zebʉrʉa baniãba.

³² Juanbara dewara mawũãsia: Jawurebia Daizezedꞌeta mʉã ũdusia ʉ̃treba pusirã kĩrãkꞌa uruta, maʉ̃ bꞌarisia Jesú ʉ̃rʉ̃.

³³ Jesús kꞌaira mʉãrã kꞌawua ẽbasia, mawũãmina baniãba zhãrã buru kꞌoemarẽã Daizezeba mʉta zokꞌadꞌabara mʉãã mawũãsia: Iabꞌaʉ ʉ̃rʉ̃ Jawurebia uruta bʉa ũdubʉrʉdꞌera izhi ʉ̃rʉ̃ bꞌariya, maʉ̃bara Jawurebiata diaya Daizezedꞌeta.

³⁴ Mawũã jaradꞌata mʉãrã izhira ũdubʉrʉa, mawũẽ mʉãrã jarabʉrʉa naʉ̃ Daizeze Warrata.

Jesúsba naara jʉrʉkuadꞌa

³⁵ Nrũẽma Juan wakusa mama bꞌasia izha jʉrʉkuadꞌata ũme bawara.

³⁶ Maʉ̃ne Jesústa mama taita ũdui mawũãsia: ¡Akaudua, naʉ̃ta Oveja zake Daizezedꞌea!

³⁷ Juanba jʉrʉkuadꞌata ũmebara mawũãbʉrʉta ũrĩnape Jesús kꞌaidꞌu wãsidꞌa.

³⁸ Maʉ̃ne Jesúsbara jẽrũya akʉbʉrʉdꞌe kꞌaidꞌu taidꞌata ũdui mawũãsia: ¿Marã kꞌãrẽta jʉrʉ panʉ? Mawũãĩ ãzhara mawũãsidꞌa: Rabí, bʉra ¿sãma bꞌʉ? Rabí bedꞌeabara jara krĩña bꞌʉa Miã Ũrãgꞌabarita.

³⁹ Mawũãnaĩ mawũãsia: Akʉdꞌe zeudua. Mawũãĩ wãnape sãma bꞌʉta akʉsidꞌa, mobe maʉ̃ ewadera izhi ũme panesia kewara a las cuatro basi baera.

⁴⁰ Andrés basia, Simón Pedro mebeara, ũmenebema abꞌa Andrés basia Juanba jarabʉrʉta ũrĩnape wãnapeadꞌara Jesús kꞌaidꞌu.

⁴¹ Andrésbara naara zhi mebea Simónta jʉrʉ wãpe ũdui mawũãsia: Daibara ũdusidꞌa zhãrã Ẽdrʉbira.

⁴² Aramaʉ̃ne wesia Jesúsma. Jesúsbara ũdui mawũãsia: Bʉra Simón Jonás warra, bʉ trʉ̃rã Cefa baya. Maʉ̃ trʉ̃bara jara krĩña bꞌʉa Pedrota o Peñata.

Jesúsba jʉrʉdꞌa Felipeta Natanaelta

⁴³ Nrũẽma Jesús Galilea druaedꞌa wãĩta babʉrʉdꞌera, Felipeta ũdupe mawũãsia: Mʉ kꞌaidꞌu bꞌadua.

⁴⁴ Felipera Betsaidadꞌebema basia, dewara maʉ̃ pʉwʉrʉdꞌebema basia Andrésta Pedrota.

⁴⁵ Felipebara Natanael jʉrʉ wãpe ũdui mawũãsia: Daibara ũdusidꞌa jari Moiséba ũrãgꞌadꞌe bꞌʉdꞌara, jari Daizezeba bedꞌeata jarabibarirãba jara bꞌʉdꞌapeadꞌara. Izhira Jesúa, José warra Nazaredꞌebema.

⁴⁶ Mawũãĩ Natanaelbara mawũãsia: ¿Nazaredꞌebara biara ʉ̃tʉ zeita bꞌʉka? Mawũãĩ Felipebara mawũãsia: Zerua akʉdꞌe.

⁴⁷ Jesúsbara Natanael izhi kꞌaita zebʉrʉta ũdui mawũãsia: Akaudua, naʉ̃ wãrĩnu israelitarãã, zhãrã izhara sewa ẽã.

⁴⁸ Mawũãĩ Natanaelbara mawũãsia: ¿Bʉara mʉnebema sãwũã kꞌawua bꞌʉ? Mawũãĩ Jesúsbara panaʉ̃ mawũãsia: Felipeba bʉ trʉ̃ĩ nawedꞌa bʉra higuera bakuru edre bꞌʉta mʉã bʉra ũdusia.

⁴⁹ Mawũãĩ Natanaelbara mawũãsia: Miã Ũrãgꞌabari, bʉra Daizeze Warra, bʉra Israel duanu Rey.

⁵⁰ Mawũãĩ Jesúsbara mawũãsia: ¿Mʉrã maʉ̃ta bʉara ĩjãbʉrʉka mʉã bʉra higuera bakuru edre bꞌʉta ũdusia abʉrʉdꞌeba? Maʉ̃ kꞌãñabara bʉara kꞌãrẽ audre waibꞌʉata bio ũduya.

⁵¹ Mawũãpe mawũãsia: Mʉã wãrĩnu marãã jaraya, idꞌidꞌeba marãbara ũdudꞌaya bãjã ewa nʉmʉta, ũdudꞌaya ángelerã Daizezedꞌeta wãrĩze bꞌeta udꞌubꞌae bꞌeta mʉ Beubari Bape bꞌʉma.