यहुदा 1 - चितवनिया थारु1 मुइ यहुदा, येसु ख्रिस्टक दास हसे याकुबक भाइ, परमेस्वरसे बलोलि मन्सावानिके इअ चिठिया लिखइ बडहिँ। परमेस्वर पिता तोहराके प्रेम करससि हसे येसु ख्रिस्टमा रछा करससि। 2 परमेस्वर तोहराके दाया, सान्ति हसे प्रेम प्रसस्तसे दिय। झुठा सिछकसभक दन्ड 3 प्रिय सङहातिसभ, हमार जम्मे जनक पउलि मुक्तिक बारेमा लिखेके मोर खाँ इछा रहलइ, बाकि परमेस्वर यापन पवितर जनसभके एकपल्टा सबदिनक तहिँया देलि विस्वासक तहिँया लडके हउसला देवे परतइ नहिँया मोर लगलइ। 4 केहकेकि बहुत यागा दन्डक भागिदार ठहरल कतेक जन मन्सेसभ तोहार बिचा चुपे-चुपे पेससकल बडइ। हुनुका परमेस्वरके यादर हइने करसइ हसे हुनेक देलि अनुग्रहके अनइतिक काम करना मउका बनोले बडइ। हुनुका हमार एक मतरे येसु ख्रिस्टके प्रभु हसे मालिक हखसि कहके इन्कार करसइ। 5 तोहार यगाहेसे थाह भेले फेनि मुइ किहो बात याद करावे चाहबहिँ कि, प्रभुजि यापन मन्सावानिके मिस्र देसवासे मुक्त करके बचोलसि, बाकि विस्वास हइने करलहरा इस्राएलियानिके पाछेसे नास करलसि। 6 तोहरा सम्झे परना बात इअ हखइ कि, यापन पउलि अधिकारमा हइने रहलाहर हसे यापन रहनवा ठउरिया छडलाहरा स्वरगदुतवानिके परमेस्वर सबदिनक तहिँया बान्हके धरले बडसि। हुने न्यायक दिनवामा सजाय देवेके तहिँया हुनुकाके पतालक यन्हारिमा धरले बडसि। 7 सदोम हसे गमोरा तके यासपासक सहरवामा भेलि घटनवा झिन बिसरोइह। हुनुका अनइतिक हसे अस्वाभाविक खलिक घिन लगना धुचुड काम करइ रहइ। हुनुका कबहुँ हइने बुतइना यागिमा दन्ड पउलहरानिक एगुडा उदाहरन बनल बडइ। 8 वसने करके सपना देखलहरा इअ झुठा सिछकसभ यापन देहियाके असुद्ध बनोसइ, प्रभुक अधिकार इन्कार करसइ हसे स्वरगक प्रानिसभक निना करसइ। 9 बाकि प्रधान स्वरगदुतवा मिखाएल, मोसाक लासक बिसयमा सइतनवासाङे विवाद करइखुनि, उअ निना करके वकरेके दोस लगावेके सहास हइने करलिय। बरु उअ कहलिय, “प्रभुजि तोरके डटबसि!” 10 बाकि इअ मन्सावाह त यापन हइने बुझलि बतवाक निना करसइ। हुनुका त बुद्धि हइने भेल पसु नहिँया जथि मन लगसइ उहे करसइ। हुनुकर इहे व्यबहार हुनुकाके नास करबिय। 11 हुनुकर तहिँया कसनुक डर लगना बात बडइ! केहकेकि हुनुका हत्यारा कयिनक देखासिखि करसइ। हुनुका बालामक नहिँया मन्सावानिके पइसाक तहिँया खराब काम करलइ। हुनुका कोरहक नहिँया विरोध करलेसे नास हतइ। 12 तोहार प्रिति-भोजमा इअ झुठा सिछकसभ कलंक नहिँया हखइ, केहकेकि हुनुका तोहारसाङे जेउना करइकि, तोहराके यादर हइने करके यपने पेटवा मतरे भरे खोजसइ। हुनुका पानि हइने भेल बादर नहिँया हखइ, जकरेके बयरवा उडियाके लिगसइ। हुनुका फर हइने भेल गाछ, जरियासे उखराइल पुरा रुपमा मरल बडइ हसे फर फरोना समयमा फेनि फर हइने फरोसइ। 13 हुनुका समुनदरक डर लगना मचाल हखइ हसे यापन लाज लगना व्यबहार समुनदरवाक फुवाफुइ नहिँया देखोसइ। इअ मन्सावाह योग्य यगुवा यतेवते घुमलाहर तरगन नहिँया बडइ, जाकर तहिँया पतालक किट-किटवा यन्हारि सबदिनक तहिँया रखाइल बडइ। 14 आदमसे सात पुस्तामा जरमल हनोक फेनि इअ मन्सावानिक बारेमा अगमवाडि करले रहलिय। उअ यसके कहलिय “हेरह, प्रभुजि यापन हजार-हजार पवितर दुतसभसाङे यवइ बडसि। 15 हुने याके जम्मे मन्सावानिक न्याय करबसि, हुने जम्मे अधरमि मन्सावानिक अधरमि रितसे करलि हुनुकर जम्मे दुस्ट काम हसे इस्वरहिन पापि मन्सावाह हुनेक विरोधमा फदकलि निनाक बातक बिसयमा गल्ति देखोबसि।” 16 इअ मन्सावाह बुदबुदेसइ, याको जनक दोस खोजइ रहसइ, यापन खराब इछासभमा चलसइ, यपनहिँके जबड सम्झसइ हसे यापन फाइदाक तहिँया मन्सावानिसाङे चिपुलचापुल करलाहर हिनिकहिँ हखइ। विस्वासमा डटके रहिह 17 बाकि प्रियसभ, तोहरा हमार प्रभु येसु ख्रिस्टक प्रेरितवानिक कहलि बतवा सम्झिह। 18 हुनुका तोहराके कहले रहलइ, “याखिर समयमा ठाठा करलहरा यापन भक्तिहिन अभिलासा यनुसार चलतइ।” 19 तोहार बिचा फुट यनलाहर, संसारिक मन्सेसभ हसे पवितर-आत्मा हइने भेल मन्सेसभ हिनिकहिँ हखइ। 20 बाकि प्रियसभ, तोहरा यापन पवितर विस्वासमा बरियार भके बढते जइह हसे पवितर-आत्माक सक्तिमा परथाना करइरहिह। 21 यसनेकरके परमेस्वरसाङे सबदिन रहना जिवनक तहिँया हमार प्रभु येसु ख्रिस्टक दयाके इसियाइकि परमेस्वरक प्रेममा लागल रहिह। 22 जुने सक करसइ, हुनुकाके दाया देखोइह। 23 याको जनके यगियासे तानके बचोइह। ककरहुँके दाया देखोइकि चेतले रहिह। उअ लुगवाके घिना करिह जुन देहियाक कारनसे अपवितर भेल रहसइ। यासिरवादक परथाना 24 परमेस्वरक प्रसंसा हखइ, जुने तोहराके ढुस लागेकेसे बचावे सकबसि हसे तोहराके आनन्दसे हुनेक महिमाक यागा निसकलङक पुगावे सकबसि। 25 प्रभु येसु ख्रिस्टसे हमराके मुक्ति देलाहर हमार एक मतरे परमेस्वरके यादर, सम्मान, सक्ति, अधिकार सुरुसे याखिरलइ सबदिन हखइ। आमेन। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.