एफिसि 1 - चितवनिया थारु1 मुइ पावल, परमेस्वरक इछासे चुनाइल येसु ख्रिस्टक एक जन प्रेरित हखहि। मुइ एफिसस सहरवामा रहलाहर परमेस्वरक जनसभ, जुने पुरा हृदयसे येसु ख्रिस्टक पाछा लागल बडइ, हुनुकाके इअ चिठिया लिखइ बडहिँ। 2 हमार परमेस्वर पिता हसे प्रभु येसु ख्रिस्ट तोहराके सबदिन दाया देखोइय हसे तोहार मनवामा सान्ति दिय। आत्मिक आसिस 3 हमार प्रभु येसु ख्रिस्टक परमेस्वर पिताक प्रसंसा हखइ। हमरा ख्रिस्टमा एक भेलेसे हुने हमराके स्वरगमा भेलि जम्मे आत्मिक आसिस देले बडसि। 4 हुने संसारके सिरिस्टि करलिसे पहिला ख्रिस्टमा हमराके यापन लजरियामा पवितर हसे निरदोस बनावेके तहिँया छानलसि। 5 हुने यापन खुसिसे येसु ख्रिस्टमा हमराके प्रेम करलेसे यपने सन्तान बनावेके तहिँया पहिलाहिँ निरनय करले बडसि। 6 उहेसे परमेस्वरक यतहर महान दायाक तहिँया हुनेक प्रसंसा हखइ, केहकेकि हुने उअ दाया हमराके यापन सोगावल पुतरसे मोल हइने लेके देलसि। 7 परमेस्वरक महान दायाक कारनसे ख्रिस्ट मरलेसे हमरा उद्धार हसे पापक छमा पउले बडहुँ। 8 इहे दायासाङे हुने हमराके बहुत ग्यान हसे समझ देलसि तके 9 ख्रिस्टमा पुरा करे चाहलि यापन गुप्त योजना फेनि यापन खुसिसे हमराके देखोलसि। 10 परमेस्वरक योजना इअ हखइ कि, ठिक समय यइलि पाछा हुने स्वरग हसे धरतियामा भेलि जम्मे चिजुवा ख्रिस्टक अदलमा यनबसि। 11 परमेस्वर हमराके ख्रिस्टसाङे एक बनाके हमराके यापन तहिँया छानलसि। परमेस्वर यसनुक करलसि, केहकेकि इअ हुनेक योजना रहलइ हसे इअ करेके तहिँया पहिलहिँ निरनय करले रहलसि, 12 ताकि हमरा यहुदियाह जतेक जन ख्रिस्ट वपरा पहिला यापन यासा रखले बडहुँ, हुनेक प्रसंसा करे सकुँ कहके हमराके नियुक्त करलसि। 13 यसने तोहरा अयहुदियाह फेनि मुक्ति देलाहर सत्य वचन, सुसमाचार सुनके ख्रिस्टमा विस्वास करलह। जब तोहरा विस्वास करलह, परमेस्वर तोहराके यापन प्रतिग्या करलि पवितर-आत्मा देके यापन मन्से बनोलसि। 14 परमेस्वरक प्रतिग्या करलि पुरा मुक्ति नाहिँ पवइलइ पवितर-आत्मा त बइना नहिँया हखिय। इअ बतवाक तहिँया हुनेक प्रसंसा हसे महिमा हखइ। धन्यवाद हसे परथाना 15 उहेसे, प्रभु येसुमा भेल तोहार विस्वास हसे जम्मे ठउरियामा भेलि परमेस्वरक जनसभक तहिँया तोहार प्रेमक बारेमा सुनके, 16 मुइ सबदिन तोहार तहिँया परमेस्वरके धन्यवाद चढोसहिँ हसे मुइ परथाना करइकि तोहराके सम्झइरहसहिँ। 17 मुइ हमार प्रभु येसु ख्रिस्टक महिमाक पिता, परमेस्वरके इअ परथाना करसहिँ कि, हुने तोहराके बुद्धि हसे प्रकासक आत्मा दिय, ताकि तोहरा हुनेके याको डउलसे चिने सकह। 18 मुइ तोहार तहिँया इअ फेनि परथाना करसहिँ कि, परमेस्वर तोहराके कुन यासाक तहिँया बलोले बडसि हसे पवितर जनसभक हुनेमा पउना हकक सम्मान कतहर महान बडइ कहके तोहराके बुझेके समझ दिय। 19 हमरा ख्रिस्टमा विस्वास करलहराह हुनेक महान सक्ति कतहर जबड बडइ कहके अनुमान करे नाहिँ सकबहुँ। इअ बतवा तोहरा थाह पउह कहके मुइ परथाना करसहिँ। 20 उहे महान सक्तिसे हुने येसुजिके मरलिसे फेरि जिउतोलसि हसे स्वरगमा यापन दहिनिकलहरवावरि बेठोलसि। 21 ख्रिस्ट जम्मे सासन, अधिकार, सक्ति वपरा राज करबसि, हुने जम्मे प्रभुक फेनि प्रभु हखसि। इअ जुगवामा मतरे हइने, बाकि यावेवाला जुगवामा फेनि परमेस्वर हुनेके सबसे वपरा रखबसि। 22 परमेस्वर जम्मे चिजु हुनेक अदलमा राखदेलसि हसे हुनेके जम्मे बिसयमा मन्डलियाक प्रमुख बनोलसि। 23 मन्डलिक विस्वासिसभ कहले ख्रिस्टक देहि नहिँया हखइ हसे इअ देहियाके जम्मे चिजुसे भरल हुनेक पुरा रुप हखइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.