१ युहन्ना 1 - चितवनिया थारुजिवन देवेवाला वचन 1 हमरा सुरुसे रहलाहरक बारेमा तोहराके परचार करइ बडहुँ। हमरा हुनेक बात सुनले हसे हुनेके यपने यखियासे देखले बडहुँ, डउलसे हेरले तके यपने हथवासे छुअले फेनि बडहुँ। हुने जिवन देना वचन हखसि। 2 उअ जिवन देलाहर परकट भेलसि हसे हमरा हुनेके देखले बडहुँ। याबे उहे अनन्त जिवनक बारेमा तोहराके गवाहि देसहुँ हसे परचार करसहुँ। हुने पितासाङे रहलसि हसे हमार लघिना परकट भेलसि। 3 हमरा जथि देखले हसे सुनले बडहुँ, हमरा उअ तोहराके परचार करबहुँ, ताकि हमारसाङे तोहार सङगति हखइ। हमार सङगति त पिता हसे हुनेक पुतर येसु ख्रिस्टसाङे बडइ। 4 हमार आनन्द पुरा हखइ कहके तोहराके इअ बतवा हमरा लिखइ बडहुँ। परमेस्वर इजोर हखसि 5 जुन समाद हमरा येसुजिसे सुनलहुँ उअ तोहराके परचार करसहुँ। उअ इअ हखइ कि, परमेस्वर इजोर हखसि हसे हुनेमा इचिको फेनि यन्हार हइने बडइ। 6 यगर हमरा कुनहुँ परमेस्वरसाङे हमार सङगति हसइ कहके कहबहुँ, बाकि यन्हारिमा बुलबहुँ जउँ, हमरा झुठा फदकसहुँ हसे सत्य बात यनुसार हइने चलसहुँ। 7 बाकि हुने इजोरमा भेल नहिँया हमरा फेनि इजोरमा बुलबहुँ जउँ, हमार सङगति एक-दोसरि जनसाङे हसइ हसे हुनेक पुतर येसुजिक रकतवा हमराके जम्मे पापसे सुद्ध पारसिय। 8 यगर हमारमा पाप हइने बडइ कहके कहबहुँ जउँ, हमरा यपनहिँके धोखा देबहुँ हसे हमार मनवामा सत्य हइने रहसइ। 9 यगर हमरा यापन पाप स्विकार करबहुँ जउँ, हुने हमार पाप छमा करबसि हसे जम्मे अधरम कामसे हमराके सुद्ध पारबसि, केहकेकि हुने विस्वासयोग्य हसे धरमि बडसि। 10 यगर हमरा पाप हइने करले बडहुँ कहके कहबहुँ जउँ, हमरा हुनेके झुठा ठहरोबहुँ हसे हुनेक वचनक तहिँया हमार जिवनमा कुनहुँ ठउरि हइने बडइ। |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.