یوحنا دوّمین نامَه 1 - کتاب مقدس به زبان تالشي - گویش مرکزی

¹ ایسبیَه ریشی طَرَفیکا، اینتخاب آبَه خَنِمی را و چَی خِردَنون را کن ’حقیقتی کا‘ اَوون رَی بَداشتیم- و نِه تاکَه اَز، بَسکَم گِردِ اَیِنی کن حَییقتی آزنِستَشونَه-

² اَ حَییقتی خونه کن اَمَکا هِستَه و زَیرون اَمَنَه دَرِ بَبییَه.

³ فیض و رحمت وسلامتی خدای دَدَ و عیسی مسیح طَرفیکا، اَ ددَ زوعَه، حَییقت و محبَتی دلَکا اَمَنَه بمندیَه.

موحبت و حییقتی دلَکا زندَگی کَردِ

⁴ بَرک خَش آبیمَه کن سَر آگِنیمَه بعضی اِشتِه خِردَنونکا اَ حِکمی سَر کن دَدَ کا ویگَتَمون، واتنَه، حَییقتیکا زندگی بَکن.

⁵ ایسَه، خاجَتییَه خَنِم، بتکا چیی ایی بَپیمه. نِه اِمکن تازَ حِکمی تِرا بنوسم، بَسکم هَه حکمی کن اَوَلیکا داریمونَه، کن یَژَن یَندِ موحبَت بکَرم.

⁶ و موحبت اِمَه کن چَی حِکمون واتَنه زندَگی بکرم. هَتَه کن اَوَلیکا دَرَستَرون، چَی حِکم اِمه تا موحبتیکا زندگی بکرَ.

⁷ اِمی خونه کن بَرکَه حیلَه بازِنی دِنیا کا مَندین، کن عیسی مسیح آمِه اینسانی جندکی دِلَکا ایقرار نینَّکَرد. اِنتَرَ کَسِن، هَه ضد مَسیح و حیلَه بازِنینَه.

⁸ هواسرون ببو کن اَ کاری بَرَ، کن اَمه انجومِمون دوعیَه هیچ آنِکَرَ، بَلکَم ایله کامیلَه پاداش ویگِرَ.

⁹ هَر کَمی کن مَسیح آموجیکا کَفاتر بشو و اَیکا آمبَست نِمونِه، خِداش نییَه، اَ کن اَ آموجیکا آمبَست بومونه، هِم دَدَ بَداشتیَه و هِم زوعَه.

¹⁰ اَگَم کَسی شِمَه وَر با و اِم آموجی نِوَرِ، بَی اِشتَن کَکا را نِدَرَ و بَی خَش آمَش نِواجَه؛

¹¹ چون اَ کن، بَی خَش آمَش بواجِه، چَی آوشرَ اعمالیکا شَریک بَبیَه.

آخیر بَسر

¹² خَیلی چییون دارِم کن شِمَرا بِنوسم، ولی نِمَپی دَوات و کاغَذینَه ببو. بسکم امیدِ بَداشتیمه شِمَه وَر بام و رودَکَر گَفَه ژَنِه بکَرَم تا چَمَه خَشی کامیل آبو.

¹³ اِشتِه اینتخاب آبَه خالا، خِردَنِن، تِرا سلام دَرِن.