اوّلین نامَه تیموتائوسیرا 1 - کتاب مقدس به زبان تالشي - گویش مرکزی1 پولوسی طَرَفیکا کن چَمَه نیجات اَدَر و خدا حِکمینَه و چَمَه اومید مسیح عیسی، مسیح عیسی رَسولَه؛ 2 چمن حَییقیَه خِردن ایمانی دِلَکا، تیموتائوسیرا: چَمَه دَدَ خدا و چَمَه خداوند مسیح عیسی طَرفیکا فیض و رحمت و صلح و سلامتی شِمرا ببو. دِروَعه موعَلیمون خونه هوشدار 3 هَتَه کن چمن شِه موقه مَقدونیَه منطقَه طَرَف بَتِکا خاشتو خازِم کردَ، هَنی بَتکا بَپیمَه شهر اَفِسوسیکا بومونی تا بعضیون فِرمون بَدری کن دییَرَ آموج نِدَرن. 4 و بَشتن اَفسانَه اونَّه و دَدارَ بونجوقونَّه کن تَمون آنیَبن، وقف نِکرِن، اِمی خونه کن اِمِن خدا کار کن ایمانی دلَکارَ، نار بَردِ عَوَض، گَفه ژِنَه باعیث بَبی کن چَیرا بَرَ ایی نییَه. 5 چَمَه هدف اِم فِرمونیکا، موحبتَه، موحبتی کن پاجا اَ دِلیکارَ و چاکَه ووژدان و خالیصَه ایمانیکارَ. 6 بَعضییِن اِمونکا ویگَردستَه اینَه، و دَدارَ گَفون دوملَه شِه خونه، اِشتَن راه کا بَرشَه اینَه، 7 و بَپیشونه شریعتی موعلیم ببون، ایسَه اِمکن نینَّزنی چِه باتین یا چِه چییکا اِنترَکه موطمئین گَف بَژَن. 8 ایسَه اَمه بَموستیمون کن شریعَت چاکَه، اَگَم کَسی بَی دِرِست اَنجوم بدَرِ. 9 و بَموستیمون کن شَریعت صالِحَه آدَمونرا نیَه، بَسکم اَینی کن قانونی پا بِن بَنان و نافِرمونون را، بی دینِن و گِناخکارونرا، و اَیِنیرا کن موقدَّس نینَّه و کفر اَواجونرا؛ اَیِنی کن اِشتَن دَدَ و نَنَه بَکِشتین، آدَمَه کِشونرا، 10 زیناکارِن و لواط کارونرا؛ اَیِنیرا کن بَردَ بَخِرین و بَخِرَتین، دِرو اَدَرِن و اَیِنی کن دروعَه قسَم بردین، و هنته نی هر چیی ایی کن درِستَه آموجی زِرَبَرا ببو، 11 اَ آموجی کن موتبارِکه خدا پور شکوه و جلالَه اِنجیلی واتنَه، کن چمن دستِشون دوعیَه. مسیح عیسی گِناخکارون نیجات دوعِه خونه آمَه 12 چَمَه خداوند مسیح عیسی شکر بَکم کن بَمن زبق داشَه و اِمی خونه کن بَمِنِش اَمین اَزنیَه و بَمن اینتِخاب کردشَه کن بَی خیدمت بکَم. 13 با امکِن گِذشتکا، کفر اَواجیم، عذاب اَدَریم و زبَون دَرَکَریم. ولی اِمی خونه کن بی ایمانی دلَکا نافَم گیری اَکَریمَه، چمن سَر رَحم بَه، 14 و چَمه خداوندی فیض، اَ ایمان و موحبتی کن مسیح عیسی کا اَ، فِرَوون چمن سَردِرِ ویکَردِش. 15 اِم گَفی ببَی ایتماد کردِ و هر وَریکا کامیل قبول بَبی، کن میسح عیسی دِنیارا آمَه تا گناخکارون نیجات بَدَرِ، کن اَز چَوون دلَکا یالَه گِلَه ایمَه. 16 ولی اِمی خاطر، بَمن رحم بَه تا عیسی مسیح اِشتَن صبر کن تَمون آنییَبن، مِرا کن یال تَرین گناخکار بیمَه، آمونِه، تا گِردِ اَیِنی را کن زَیرونَه زندَگی خونه ایمان بوعَردین سرمشق ببوم. 17 ایسَه اَ پادیشا دوورَ، اَ کن زَیرونَه و بَی نییَب ویندِ، اَ تاکَه خدارا تا اَبد و تا ابَد حورمت و شکوه و جلال ببو؛ آمین. 18 تیموتائوس، بلَمه، اِم حِکمی اَ پیشگویی اِنی واتنَه کن چیمی بَه نه تِرا اَیر آبَه، اِشتِه دَست آمَدا تا چَوون واسیطنَه، اَ چاکَه جنگی اَنجوم بدَری، 19 ایمان و پاجا اَ ووژدانی آچیک، چیرا کن بعضیین چَوون رَد کَردِ نَه، چَوون ایمانی کَشتی ویرَنجِستَه یَه. 20 هیمِنائوس و اسکندر اِم کاولَکاینَه، کن اَیِنم شیطونی دَست آدامَه تا آموج بیگِن کن کفر نِواجن. |
@ 2024 Korpu Company