Ubutukilo 1 - MUKANDA USANDU WA ZAMBI 1975

¹ Ha uputukilo Zambi watangile malilu ni hashi.

² Hashi hapwile hahululu kanda hamokomoko mba helu lia jondo hapwile milima. Spiritu ya Zambi wapwile nikujingajinga helu lia meya.

³ Zambi yamba ngwenyi, Kupwe pangu, mba yikupwa pangu.

⁴ Zambi yamona pangu, ngwenyi, Linapeme, mba Zambi yahandununa hakachi ka pangu ni milima.

⁵ Zambi yaluka pangu ngwenyi, Tangwa. Milima yayiluka ngwenyi, Ufuku. Yikupwa chingoloshi, yikupwa chimene, tangwa litangu.

⁶ Mba Zambi yamba ngwenyi, Hakachi ka meya hapwe kuzazuluka chikahandunune meya ni meya.

⁷ Zambi yatanga kuzazuluka, yahandununa meya a kushi lia kuzazuluka ni meya a helu lia kuzazuluka, yichipwa chocho.

⁸ Zambi yaluka kuzazuluka ngwenyi, Lilu. Yikupwa chingoloshi, yikupwa chimene, tangwa liamuchiali.

⁹ Zambi yamba ngwenyi, Meya aze ali kushi lia lilu aswile muma mumuwika, mavu omu asoloke. Yichipwa chocho.

¹⁰ Zambi yaluka mavu omu ngwenyi, Hashi. Kuswila cha meya yachiluka ngwenyi, Kalunga-lwiji, mba Zambi yachimona ngwenyi, Chinapeme.

¹¹ Zambi yamba ngwenyi, Ha mavu hasoke mwambu, ni yiputa yakwima mbuto, ni mitondo ya mihuko yize yakwima mihuko nikulita ni milali yayo, yize yikwete mbuto yayo muchima ha mavu. Yichipwa chocho.

¹² Mba ha mavu hasokele mwambu, ni yiputa yakwima mbuto nikulita ni milali yayo, ni mitondo yakwima mihuko yikwete mbuto yayo muchima nikulita ni milali yayo. Mba Zambi yachimona ngwenyi, Chinapeme.

¹³ Yikupwa chingoloshi, yikupwa chimene, tangwa liamuchitatu.

¹⁴ Zambi yamba ngwenyi, Kupwe mapangu mwilu akahandunune mwalwa ni ufuku. Akapwe yilayi, ha tungonde, ni ha matangwa, ni ha miaka.

¹⁵ Akapwe mapangu mwilu mukupangwisa hashi. Mba yichipwa chocho.

¹⁶ Zambi yatanga e mapangu aali anene; pangu linene likayule mwalwa, pangu likepe likayule ufuku. Yatanga matongonoshi nawa.

¹⁷ Zambi waasele mwilu mukupangwisa hashi.

¹⁸ Akayule ha mwalwa ni ha ufuku, akahandunune hakachi ka pangu ni milima. Mba Zambi yachimona ngwenyi, Chinapeme.

¹⁹ Yikupwa chingoloshi, yikupwa chimene, tangwa liamuchiwana.

²⁰ Zambi yamba ngwenyi, Meya akazale ni yizavu ya akwa mwono. Tujila akahumuke helu lia hashi mu kuzazuluka cha lilu.

²¹ Zambi yatanga tushitu anene a mu kalunga-lwiji, ni akwa mwono eswe aze a kuliokesa mu meya nikulita ni mavungu jo, ni akwa mapulwa eswe nikulita ni mavungu jo. Mba Zambi yachimona ngwenyi, Chinapeme.

²² Mba Zambi yaawahisa ngwenyi, Semenu nuliokese, nukazalise meya a mu kalunga-lwiji. Tujila aliokese hashi.

²³ Yikupwa chingoloshi, yikupwa chimene, tangwa liamuchitano.

²⁴ Zambi yamba ngwenyi, Hashi hazale ni akwa mwono nikulita ni mavungu jo, ni yimuna, ni akwa kukalala, ni tushitu a hashi nikulita ni mavungu jo. Mba yichipwa chocho.

²⁵ Zambi yalinga tushitu a hashi nikulita ni mavungu jo, ni yimuna nikulita ni mavungu jo, ni akwa kukalala eswe nikulita ni mavungu jo. Mba Zambi yachimona ngwenyi, Chinapeme.

²⁶ Zambi yamba ngwenyi, Tulingenu mutu mu chano chetu, mwe mu kulifwa chetu. Akapwe ni chiyulo helu lia yishi a mu kalunga-lwiji, ni helu lia tujila a mwilu, ni helu lia yimuna, ni helu lia hashi heswe, ni helu lia akwa kukalala eswe aze akukalala hashi.

²⁷ Mba Zambi yatanga mutu mu chano chenyi; mu chano cha Zambi yamutanga. Lunga ni pwo yaatanga.

²⁸ Mba Zambi yaawahisa. Zambi yamba kuli ayo ngwenyi, Semenu nuliokese, nukazalise hashi, nukazeyeseho. Nukapwe ni chiyulo helu lia yishi a mu kalunga-lwiji, ni helu lia tujila a mwilu, ni helu lia tushitu eswe akwenda hashi.

²⁹ Zambi yamba ngwenyi, Talenu hinanwaha yiputa yakwima mbuto yili hashi heswe, ni mitondo yeswe yize yikwete mihuko yakwima mbuto. Yeswe muyipwa ya kulia kuli yenu.

³⁰ Ni kuli tushitu eswe a hashi, ni tujila eswe a mwilu, ni eswe akukalala hashi akwete mwono, hinaaha yiputa ya wisu ya kulia. Mba yichipwa chocho.

³¹ Mba Zambi yamona yuma yeswe yize halinga ngwenyi, Chinapeme chikolo. Yikupwa chingoloshi, yikupwa chimene, tangwa liamuchisambano.