Kolosu 1 - MUKANDA USANDU WA ZAMBI 1975

¹ Yami Paulu, postolo wa Yesu Kristu ku upale wa Zambi, hamuwika ni ndumbwetu Timoteu,

² Kuli asandu kanda mandumbu amwenemwene muli Kristu, waze atwama mu Kolosu: Vumbi kuli yenu ni sambukila ya kuli Zambi Tata.

³ Twakusakwila kuli Zambi Tato ya Mwene wetu Yesu Kristu, matangwa eswe ha kulemba hali yenu,

⁴ se hitunevu ha Ufulielo wenu muli Kristu Yesu, ni zango lize nuli nalio kuli asandu eswe.

⁵ Mumu ha kutalatala chize hananutulikila mu malilu; ha chino nwevwile kulu mu liji lia umwenemwene wa sango lipema.

⁶ Lienalio hilineza kuli yenu, chizechene ngwe hilineza hano hashi heswe mukwima mihuko, nikutatuka chizechene ngwe muli yenu nawa, chize ku tangwa lize nwaliangile kwivwa ni kunyingika liakulu vumbi lia Zambi;

⁷ chizechene ngwe nwalilongesele kuli Epafwa, mukwa kulingila-ni-mukwetu, tunamuzange chikolo, yoze wapwa kavumbi wamwenemwene wa Kristu hali yenu.

⁸ Mwenawo nawa watulwezele zango lienu muli Spiritu.

⁹ Ha chikuma chino, ni yetu nawa, chize ku tangwa lize twachivwile, kutushi kulitwamina kunulembela ni kunwichila, hanga nukazale tò ni yinyingi yeswe ya upale wenyi ni mana eswe ni malinjekela ja uspiritu;

¹⁰ hanga nukende ngwe chinatela Mwene ku upemeno weswe, nukeme mihuko ha yitanga yeswe yipema, nukatatuke ni yinyingi yeswe ya Zambi:

¹¹ nukalikoleze ni tachi jeswe nikulita ni ndundo ja uhenya wenyi, hanga nukapwe ni utunu weswe ni uhomboloji hamwe ni uwahililo:

¹² nukasakwile kuli Tata, yoze hanatutesa ha kutambula chihanda cha chihinga cha asandu mu pangu;

¹³ mwenawo hanatupulula ku chiyulo cha milima, hanatututulwila ku wanangana wa mwe Mwana wa zango lienyi.

¹⁴ Muli iye ukule wetu tuli nawo ku manyinga jenyi, we ukonekeno wa milonga yetu.

¹⁵ Mwenawo che kulifwa cha Zambi, yoze keshi kumoneka, iye mutangu wa yuma yeswe ya kutanga:

¹⁶ mumu kuli iyo yuma yeswe yatangiwile, mu malilu ni hano hashi, yuma yize yakumoneka, ni yize kuyishi kumoneka, chipwe ngunja ja mianangana, hanji wene, hanji mawanangana, hanji yiyulo: yuma yeswe yatangiwile kuli iye, ni hali iye;

¹⁷ iye kapwa kulutwe lia yuma yeswe, ni yuma yeswe kuyakupwa muli iye.

¹⁸ Iye we mutwe wa mujimba, che chikungulwila: iye we uputukilo, mutangu kusemuka hakachi ka afu; hanga akapwe ni muhela utangu helu lia yuma yeswe.

¹⁹ Mumu che kupwa cheswe cha Uzambi chatwama muli iye nikuwaha.

²⁰ Muli iye kuwanyisa yuma yeswe kuli iye mwene, se hanalingi sambukila ku manyinga ja ku kulusu yenyi; kuli iye ngwami, Chipwe yuma ya hano hashi, hanji yuma ya mu malilu.

²¹ Ni yenu, se ha miaka ya kunyima nwahandunukine, nwapwile akwa kole mu kunyonga chenu mu yitanga yenu ya ungulungulu,

²² hindu haliapwila hananuwanyisa mu mujimba wa musunya ku kufwa, mukunutumbikila ku usandu, kunushi kapalia, akwa kusamba kumeso jenyi.

²³ Kachi mununyongonona mu Ufulielo, akwa kujikiza, akwa kukola; kachi kunushi kututuluka ku kutalatala cha sango lipema, lize nwevwile, lize ambujolele kuli atu eswe mushi lia lilu; ha liyo yami Paulu kunapwa kavumbi.

²⁴ Haliapwila nakuwahilila ha lamba liami hali yenu, nakuzalisa chize chinahono ku luyinda wa Kristu mu musunya wami, mumu ha mujimba wenyi, wenawo che chikungulwila.

²⁵ Ha chiyo yami kunapwa kavumbi nikulita ni uselo wa Zambi, uze anguhele hali yenu, mukumanununa liji lia Zambi.

²⁶ Chijimbikilo chino chahengamine chize ku miakulwila ni ku yisemuko: alioze haliapwila hanachisolola kuli asandu jenyi.

²⁷ Kuli ayo Zambi wafupile kulweza chize chapwa kulumbama cha uhenya wa chijimbikilo chino hakachi ka mavungu, chenacho Kristu muli yenu, che kutalatala cha uhenya.

²⁸ Iye twakumwambujola, nikukanyamisa mutu ni mutu, nikulongesa mutu mweswe ni mana eswe, hanga tukatumbikile mutu ni mutu mungunu muli Kristu.

²⁹ Ha chino nawa nakukilikita nikulitachika, nikulita ni kulinga chenyi chize chakulinga muli yami ni tachi.