Hebreu 1 - MUKANDA USANDU WA ZAMBI 1975

¹ Zambi, se wahanjikile ha shakulu kuli tulamba ni makanwa ja aprofeta ku yihanda yeka ni yeka, ni ndako jeka ni jeka,

² ha kusula songo lia matangwa ano, hanahanjika kuli yetu muli Mwanenyi, yoze hanamupwisa swana ya yuma yeswe, ku tachi jenyi nawa watangile miaka.

³ Mwenawo che kupeyima cha uhenya wenyi; ni che kulifwa cha kupwa chenyi; iye mukwa kukolesa yuma yeswe ku liji lia tachi jenyi, muze te hamanununa kupemesa ha milonga, Watwamine ku kwoko lia chindume lia Ulamba mwilu.

⁴ Se yahiana chikolo angelo, chizechene ngwe hanahingi jina lia kwahiana.

⁵ Mumu kuli iya hakachi ka angelo wambile iye ha mwaka umwe ngwenyi, Yena uli mwanami, tangwa lino hingunakuseme? Cheka nawa ngwenyi, Mungukapwa kuli iye Tato, iye kumakapwa kuli yami mwanami?

⁶ Cheka nawa muze maneha mutangu hano hashi mamba ngwenyi, Ni angelo eswe a Zambi amuwayile.

⁷ Ha kutwala kuli angelo kanambe ngwenyi, Yoze wakupwisa angelo jenyi maspiritu, ni tuvumbi twenyi mulengi wa kahia;

⁸ alioze ha kutwala kuli mwe Mwana kanambe ngwenyi, Ngunja ye, Zambi, kuyili ndo ku miaka yeswe ya mutolo. Mwe lukanda wa wanangana we, lukanda wa ululi.

⁹ Hiunazange ululi, ni ungulungulu wakukupihila; kashika Zambi, iye Zambi ye, hanakuwayisa ni maji a kulikwiza kuhiana akwenu.

¹⁰ Chikwo ngwenyi, Yena, Mwene, ha uputukilo wasele fundamentu ya hashi, ni malilu anapu ye yitanga ya moko je.

¹¹ Yino kumuyikahwa; alioze yena kuwakulinduluka: neyo yeswe kumuyikapapujoka ngwe hina;

¹² ngwe mazalo mukayivunga, ngwe hina, neyo kumuyikalumuka; alioze yena kuwapwa chizechene, ni miaka ye kuyichi kahwa.

¹³ Alioze ha kutwala kuli mungelo muka ambile ha mwaka umwe ngwenyi, Twama ku kwoko liami lia chindume, ndo mungusa akwa kole je chitwamo cha yiliato ye?

¹⁴ O eswe te hi maspiritu a kuvumbika ko, a kutumiwa mukuvumbika, mumu hali waze makahinga ulamwino, nyi?