Mark 7 - Chishemanituu Utayimuwin: Kaa Uskaach Testament

Taan muush kaa pechi ihtitwaau Phariseech

¹ Pasch Phariseech ekw maak pasch anichii wiishuwewiniyuu kaa chischinuhamaachetwaau Jerusalemihch kaa uhtuhtetwaau chii pechi maaushukukaapuuch anit Jesus e ihtaayich.

² Naashch chii chiihkaayaapameuch aniyuu chischinuhamuwaakanh aniyuu e kaa uhchi kaasiitihcheyich eshkw ekaa miichisuyich. E chii maak itashuweyich Phariseeh chechii kaasiitihcheyich aweyuu eshkw ekaa miichisuyich.

³ Wesh Phariseech ekw maak misiwe Jewa iinuuch naashch yaakwaau chii nanaakataweyihtamuch chechii ihtuutahkwaau kaye wiyawaau taan kaa chii pechi ihtuutamiyich aniyehkaanaan uhtaawiiwaauh. Namui uhchi miichisuuch paatish kaa ihtuutahkwaau aniyuu taan chipaa ihtuuch e chishtaapautaatwaau utihchiiwaau.

⁴ Namui kaye uhchi miichuuch chekwaayuu anite e ataamitunaanuyich e chii uhtinikanuyich paatish kaa chishtaapautaatwaau. Nanaahkuu kaye ihtakuniyuu kutak itashuwewinh e naanaakachihtaatwaau chechii ihtuutahkwaau aniyuuh taan kaa ishi miyaakanuutwaau chechii nanihiihtahkwaau, muyaam aniyuu taan nihaau chipaa ihtuuch e chishtaapautaatwaau uminihkwaakanawaauh ekw maak upiywaapiskuyaakanawaauh. Kaye maak taan chipaa ihtuutaweuch e chishtaapawiyaatwaau utaschihkuwaauh.

⁵ Ekw anichii Phariseech ekw maak anichii wiishuwewiniyuu kaa chiskutamaachetwaau kaa kakwechimaatwaau Jesus e itaatwaau, “Uchii maa chichischinuhamuwaakanich, chekwaayuu wehchi ekaa ihtuutahkwaau taan kaa ishi pechi aashuu naanaakachihtaatwaau kuuhtaawiinuuch chechii ishi naanaakachihtaakanuyich. Mikw ishi miichisuuch ekaa mechim ihtuutahkwaau aniyuu chipaa ihtuuch e chishtaapautaatwaau utihchiiwaau.”

⁶ Jesus maak chii ishi nishkweushiheu e itaat, “Chii taapwekupane aniyaa Isaiah kaa wiihtahk taan kaa ishi wiihtamaakut Chishemanituu chechii ishi wiihtahk. Chiyawaau kaa ayimihehkaasuyekw chichii aayimuumikuwaau Chishemanituu kaa itwet, Uchii iinuuch utuuniwaahch nuuhchi chishtaachimikuch, mikw maak namui mitun nitaapateyimikuch utehiiwaahch.

⁷ Namui aapataniyuu aniyuu e pechi nuuchiishtuutwaau wesh teyakuch wiyawaau uwiishuwewinawaauh chiskutamaacheuch, namui wii aniyuuh Chishemanituu kaa pechi pachishtinamiyich. eukw uyuu kaa itisinahahk aniyaa Isaiah.”

⁸ Jesus chii itweu, “Ekun maak e ihtiyekw chiyawaau. Namui chitaapateyihtamuwaanaawaau taan e itashuwet Chishemanituu ekw aniyuu taan e ishi chiskutamaachet naapeu eukun an teyakuch nenihiihtamekw.”

⁹ Chii ati itweu miin Jesus, “Taapwe chikaschihunaawaau an e ihtiyekw ekaa aapateyihtamuwekw aniyuu taan kaa itashuwet Chishemanituu chiyawaau taan e ishi chiskutamaacheyekw teyakuch chechii chisteyihtamihiikuyekw.

¹⁰ Wesh chii itweu aniyaa Moses, Chisteyim kuuhtaawii kaye chikaawii kaye chii itashuweu, An awen che maayeyimaakwe uhtaawii maak ukaawii ekush chika nipuu.”

¹¹ Ekw miin kaa ati itwet Jesus, “Chiyawaau maak chit ishi chischinuhamaachenaawaau ekaa wanipayit awen aniyuu ekaa naatamuwaat uniichihiikw tepiyaahch itaate, ‘Nimihchiiwesin, taapaa chichii wiichihiitinaawaau wesh shaash Chishemanituu nichii miyaau taan chipaa ishi miitinaawaau chiyawaau.’

¹² Namui wanipayuu chititaawaau uyuu e ihtit.

¹³ Uu maak e ishi aashuu chischinuhamaacheyekw chipiikunamuwaanaawaau Chishemanituu utayimuwin. Ihtakun maak mihchetu kutak chekwaayuu e ihtiyekw ekaa kuiskw ishinaakuhkwaauh.”

Aniyuuh chekwaayuu e ihtuutaakut awen chechii machituutahk

¹⁴ Ekw Jesus miin kaa wiishaamaat aniyuu iinuuh chechii pechi ituhteyich ekw kaa itaat, “Nituhtuukw maa, misiwe e tashiyekw, kaye wii nisituhtuukw taan che itweyaan.

¹⁵ Namui wii chekwaayuu e miichit maak e minihkwet awen kata chii ihtuutaakuu chechii machaatisiit. Aniyuu taan e ishi machayimit maak e ishi machi maamituneyihtahk eukun aniyuu che ihtuutaakut chechii machituutahk.

¹⁶ Chiishpin maak awen piyehtamukwe ekush kata nituhtam.”

¹⁷ Iskutak maak nekataat aniyuu kaa pechi maausikukaapuushtaakut chii piihcheu anit waaskaahiikanihch. Ekw aniyuuh uchischinuhamuwaakanh kaa kakwechimikut chechii wiihtamuwaat taan e ishi wiihtamaachemakaniyich aniyuu kaa itwet.

¹⁸ Jesus maak chii itweu, “Namui aa chinisituhtenaawaau kaye chiyawaau. Namui aa chichischeyihtenaawaau taapaa namayeyuu miichimiyuu kaa ihtuutaakut awen wehchi machituutahk,

¹⁹ wesh taapaa utehiihch piihchipayiniyuu aniyuu miichimiyuu anite utatisiihch ekute e ispayiyich ekw maak weyawiipayihtaat.” Uyuu kaa itwet Jesus chii wiihtam misiwe e ishinaakuniyich miichimiyuu e payehkaniyich chechii miichinaanuyich.

²⁰ Jesus miin chii ati itweu, “Aniyuu taan e ishi machayaat awen utehiihch eukun aniyuu che ihtuutaakut chechii machituutahk maak chechii machayimit.

²¹ Wesh anite utehiihch ekute awen naashch nitamukw chechii iteyihtahk kaye nitamukw chechii ihtit, maak chechii kachemutit, chechii nipahiiwet,

²² maak che pisikwaatisiit, maak chechii mushteneyihtamuwaat aweyuu chekwaayuu e ishi ayaayich, maak chechii machihtwaat, maak chechii wiyeshihiiwet, maak chechii wiinishuwaatisiit, maak chechii uhteyihtahk, kaye chechii machaayimuumaat aweyuu, maak naashch chihchiwe chechii iteyimisut, kaye chechii chiishkwe pimaatisiit.

²³ Misiwe maak uyuu e ishi machituutahk awen piihch anite e ihtaat uhchipayiniyuu eukw maak uyuu mechinaakuhiikut.”

Utaapwehtamuwin iskweu Phoenicia kaa uhchiit

²⁴ Jesus maak chii chistuhteu. Anite aniyuu aschiiyuu peshuch Sidon nesht Tyre kaa ihtakuniyich ekute kaa ituhtet. Tekushinit maak chii piihcheu waaskaahiikaniyuu ekw kaa itashuwet ekaa chechii wiihtamuwaakanuyich aweyuu anit e ihtaat. Mikw maak namui chineush uhchii ishinaakuniyuu uyuu kaa ishi nitaweyihtahk.

²⁵ Chii ihtaayuuh iskweu e chii pehtamiyich anit e ihtaat ekw tiiwehch kaa nituwaapamikut e pechi pahchishimipayihuyich anite usitihch ishi. Wesh uu iskweu chii ihtaayuuh utaanisa e piihchishkaakuyich machiahchaahkwa.

²⁶ Uu maak iskweu Greek chii itiskaanesuu, anite Phoenicia kaa ishinihkaateyich ihtaawiniyuu anite itehche Syria aschiihch kaa ihtakuniyich ekute chii pimaatisiiche. Naashch chii aayihkamisiyuu e nitutamuwaat Jesus chechii wiiwiitishihwaayich aniyuu machiahchaahkwa kaa piihchishkaakuyich utaanisa.

²⁷ Jesus maak chii iteu, “Niishtam anichii Jewa kaa itiskaanesitwaau nipaa wiichihaauch. Namui kuiskw ishinaakun atimuch chechii ishiwepinamuwaakanuutwaau awaasha umiichimiyuu.”

²⁸ Ekw kaa itwet an iskweu, “Ehe, chitaapwen, tepeyihchicheyin. Mikw maak waawaach anichii atimuch shiipaa miichisuunaahtikuhch kaa ihtaatwaau maamuushkahtamuweuch taan e ishi pinihtaweyich aniyuu awaasha.”

²⁹ Ekw Jesus kaa itaat, “An e chii ishi nishkweushihiiweyin, maachiih, namui shaash piihchishkaakuu chitaanis aniyuu machiahchaahkwa.”

³⁰ Chii chiiweu maak an iskweu kaa waapamaat aniyuu utaanisa unipewiniihch e pimishiniyich, taapwe e chii nakatikuwiikupanen aniyuu machiahchaahkwa.

Jesus kaa miinuwaachihaat naapeuh ekaa uhchii pehtamiyich kaye ekaa uhchi nihtaaweyich

³¹ Jesus maak chii chistuhteu anit Tyrehch uhchi. Iskutak wetihtahk Sidon mikw chii shaapuhtaweshkam. Ekw anite aniyuu aschiiyuu Mitaahtu Ihtaawinh kaa ihtakuniyikwaauh kaa ishi pimuhtet chek kaa utihtahk Galilee saakahiikaniyuu.

³² Ekute maak anite kaa ihtaayich aweyuu e petwaakut naapeu ekaa pehtamiyich kaye ekaa nihtaaweyich. Suuhk maak chii wii aayihkamiheuch Jesus chechii saaminaayich aniyuuh naapeu.

³³ Ekw Jesus kaa chistuhtahaat aniyuuh naapeu mikw wiyawaau chechii niishitwaau, ekw kaa puuhchishtuukayenaat, kaye chii shihkuu ekw kaa taahtinamuwaat uteiniyuu.

³⁴ Ishpimihch maak chii ishi tastasaapuu Jesus e yahkataamut, ekw kaa itaat aniyuu naapeu, “Ephphatha.” Uyuu maak kaa itwet, “Aapahiipayih, ishi itweshtamuwaataakanuu.”

³⁵ Chii aapahiipayiniyuuh uhtaukaih an naapeu. Kaye aniyuu uteinii kaa aapahkupayiniyiyich ekw naashch kaa uhchi miyu ayimit.

³⁶ Ekw Jesus kaa itaat aniyuuh iinuuh ekaa chechii wiihtamuwaayich kutak aweyuu uyuu e chii ispayiyich. Mikw maak aat suuhk e chii chistahamuwaat aahch etituu chii papaamaachimuyuuh e waawiihtamuwaayich aweyuuh.

³⁷ Misiwe maak aweyuu kaa pehtamiyich uyuu naashch chii miskaateyihtamihiikuyuu. Chii itweyuuh maak, “Misiwe chekwaayuu chii miyutuutam. Waawaach chii ihtuutamuweu ekaa kaa pehtamiyich chechii pehtamiyich kaye aniyuuh ekaa kaa nihtaaweyich chechii nihtaaweyich.”