Mark 6 - Chishemanituu Utayimuwin: Kaa Uskaach Testament

Jesus kaa aataweyimaakanuut tipiiwe utihtaawinihch

¹ Chii nakatam Jesus aniyuu anit kaa ihtaat ekw kaa ituhtet anite aniyuu ihtaawiniyuu kaa nihtaauchinaakanuut, Nazareth kaa ishinihkaateyich. Chii wiicheukuu maak uchischinuhamuwaakanh.

² Aniyuu maak kaa Jewa ayimiheuchiishikaayich chii chiskutamaacheu anite ayimiheukamikuhch. Chii mihchetiyuu aweyuu anit kaa ihtaayich e nituhtaakut. Misiwe maak anichii iinuuch chii miskaashtuweuch taan kaa itweyich. “Taanite wehtinahk uyuu kaa itwet,” chii itituuch. Kaye chii itweuch, “Taapwe kachehtaaweyihtamuuhtaakusuu.” Chii itweuch kaye, “Taanite wehchii ihtuutahk uyuuh maamishkaach chekwaayuuh.

³ Namui aa eukw uyuu kaa mistikunaapewiyich Mary ukusisa. Namui aa eukw uyuu wiichiinuuwaau James, Joses, Judas ekw maak Simon. Namui aa utah wiichiyuu kaye uwiichishaaniskwemh.” Eukw uyuu kaa ishi kakwechimitutwaau wesh taapaa uhchi nahiiskaakuuch taan kaa ihtiyich Jesus.

⁴ Ekw Jesus kaa itaat, “An awen kaa uchischiwehiichesuut chisteyimaakanuu aihch ihtaawinihch ekw anit tipiiwe utaschiihch e ihtaat namui aapateyimaakanuu. Namui mechim chisteyimikuu uwaahkumaakan kaye aniyuuh anit e peyakuteusiit kaa ihtaayich.”

⁵ Aniyuu maak ekaa uhchi taapwehtamiyich namui uhchi ihtuutam maamishkaach chekwaayuuh anit, mikw pasch aniyuuh kaa aahkusiitwaauh chii saamineu, chii miinuwaachiheu maak.

⁶ Chii maamishkaateyimeu maak aniyuu e ishpish ekaa taapweyimikut. Chii achineskam maak aniyuuh ihtaawinisha e papaa chiskutamaachet.

Jesus kaa chihchitishahwaat uchischinuhamuwaakanh

⁷ Chii wiishaameu aniyuu niishushaap uchischinuhamuwaakanh ekw kaa chihchitishahwaat e naaniishuhteyich. Chii miyeu tipeyihchichewiniyuu kaye suuhkaatisiiwiniyuu chechii tipeyimaayich machiahchaahkwa.

⁸ Chii itashumeu maak ekaa mitun chekwaayuu chechii ayaayich, mikw siskahuun chechii ayaayich. Chii itashumeu ekaa mechim miichimiyuu chechii ayaayich, maak niimuutaaniyuu chechii ayaayich kaye ekaa mechim chechii niimishuuliyaaweyich.

⁹ Chii iteu mikw aniyuu maschisin kaa chichishkamiyich che ayaayich. Kaye ekaa kutachiyuu pachuuyaaniyuu chechii ayaayich.

¹⁰ Chii iteu kaye, “Anit che piihtakahiikwekwe waaskaahiikan ekut anit ihtaakw paatish nakatamekwe an ihtaawin.

¹¹ Ekaa maak wii piihtakahiikuyekwe maak ekaa wii nituhtaakuyekwe, nakatamekwe an ihtaawin che pahpuusiteshimuyekw. Eukuu che ihtiyekw e nuukuhtaayekw e ayaakwaamimekuch anichii iinuuch anit kaa ihtaatwaau.”

¹² Ekw maak kaa chistuhtetwaau anichii chischinuhamuwaakanich kaa nituu kacheschimaatwaau aweyuu chechii kweskaatisiyich.

¹³ Chii wiiwiitishihuweuch machiahchaahkwa kaa piihchishkuwaayich aweyuu kaye chii tuumineuch mihchetu aweyuu kaa aahkusiyich, chii miinuwaatisiyuu maak.

John siikahaahtaacheu kaa nipahaakanuut

¹⁴ Chisheuchimaau Herod maak chii pehtam taan kaa ispayiyich, wesh chii mishihtepayiyuu taan e itaachimaakanuut Jesus. Pasch awenichii chii itweuch, “John siikahaahtaacheu iskachii uu, chii wanishkaanaakanuukupane nipuwinihch uhchi. Eukw uyuu wehchii ihtit uyuuh maamishkaach chekwaayuuh chechii ihtuutahk.”

¹⁵ Ekw kutakach awenichii kaa itwetwaau, “Elijah uu.” Ekw miin kutakach kaa itwetwaau, “Eukuu peyakw uchischiwehiichesuu anite weskach kaa chii chischiwehiichet.”

¹⁶ Herod maak piyehtahk uyuu e iinaanuyich chii itweu, “John siikahaahtaacheu uu. Eukuu kaa chimistikwaanehuuk, miin kaau pimaatisiyuu.”

¹⁷ Wiya Herod chii itashuweche chechii maakunaakanuyich John kaye chechii maahkupitaakanuyich ekw maak chipahutuukamikuhch chechii chipahwaakanuyich. Wiichiskweu Herodias chii ihtuutamuweu uyuu wehchii ihtuutawaat John. Uyuu iskweu kaa wiichimaat Herod wiichiinuu Philip aniyuu chii wiichiskwewiyuu.

¹⁸ John chii Iteche aniyuu Herod, “Chipiikunen wiishuwewin e wiichiskwewiyin chiichiinuu wiichiskeu.”

¹⁹ Ekw an Herodias namui uhchi nahiiskaakuukupane aniyuu taan kaa itweyich John ekw kaa nituweyimaat chechii nipahaakanuyich. Mikw maak namui uhchii ihtuutam uyuu,

²⁰ wesh Herod chii kushteu aniyuu John, e chii chischeyimaat e kuiskutaatisiyich kaye e payehchisiyich. Eukw maak uyuu wehch ekaa uhchi wii pischeyimaat. Chii miyeyimeu e nituhtawaat aat muush e chii mukushkaateyihtamihiikuwaat taan kaa itweyich tahtwaau e nituhtawaat.

²¹ Chek maak chii nihiipayuu Herodias chechii ihtit taan kaa wii ihtit. Herod chii tipiskam. Chii wiishaameu misiwe aweyuu maauch niikaan kaa iteyihtaakusiyich e chisheuchimaau aapatisiyich. Chii wiishaameu kaye nitupayuu uchimaauh, kaye naapeuh kaa uchimaaweyihtaakusiitwaau anit Galilee aschiihch kaa ihtaayitwaauh.

²² Aniyuu maak Herodias utaanisa chii pechi niimiyuu ekw naashch kaa miyeyihtamiyich Herod kaye misiwe aniyuu aweyuu kaa wiishaamaakanuyich. Ekw chisheuchimaau Herod kaa itaat aniyuu ishkwesha, “Pechi wiihtamuu chekwaan chipaa miyeyihten ayaayin. Mikw che ishi nituweyihtamuwane eukun an che miitaan.”

²³ Chii itweu kaye cheshtinaash che ihtuutamuwaat che ishi nitaweyihtamiikwen. Chii iteu, “Mikw chekwaan che nitaweyihtamuwane chika miitin, aat aapihtuu an aschii anite wechimaawiyaan nitaweyihtamane yaapach chika miitin.”

²⁴ Ekw kaa wiiwiit an ishkwesh kaa nituu kakwechimaat ukaawii e itaat, “Chekwaan che nituweyihtamaan.” Ekw kaa itikut, “John siikahaahtaacheu ustikwaan.”

²⁵ Ekw an ishkwesh tiiwehch kaa ispahtaat anite aniyuu chisheuchimaau Herod e ihtaayich kaa nituu itaat, “Anuhchiish nitaweyihtamuwaan John siikahaahtaacheu ustikwaan chechii petaakanuyich wiyaakanihch e asteyich.”

²⁶ Nuwach chii macheyihtam an chisheuchimaau uyuu kaa ishi kakwechihcheyimuyich, waawaach wii shaash e chii itaat cheshtinaash che ihtuutamuwaat mikw taan che ishi nitaweyihtamiikwen kaye maak aniyuu e chii mihchetinaanuyich anit mekwaach uyuu kaa itaat kiipaa namui uhchi wii piikunam aniyuu taan kaa itaat.

²⁷ Tiiwehch kaa chihchitishahwaat shimaakanisha e chii itashumaat chechii petaayich John ustikwaaniyuu. Ekw an shimaakanish kaa ituhtet anite chipahutuukamikuhch anite John kaa ihtaayich kaa nituu chimistikwaaneshwaat.

²⁸ Wiyaakanihch kaa ashtaawaat aniyuu ustikwaaniyuu ekw kaa nituu miyaat aniyuu ishkwesha ekw an ishkwesh ukaawii kaa miyaat.

²⁹ John maak uchischinuhamuwaakanh iskutak piyehtamiyich uyuu chii nituwaapahtamuweuch wiiyuuyuu ekw kaa nituu nahiikamuwaatwaau.

Jesus kaa ashamaat niyaayinwaau chishemitaahtumitanuu aweyuuh

³⁰ Jesus utapwaastalimh miin wiyaapamikut chii wiihtamaakuu misiwe taan kaa aihtiyiyich kaye taan kaa ishi chiskutamaacheyich.

³¹ Naashch maak chii mihchetiyuu aweyuu e takushiniyich e pechi nituwaapamikutwaau ekw namui mechim uhchi ishpishiyuuch chechii miichisutwaau. Ekw Jesus kaa itaat aniyuu uchischinuhamuwaakanh, “Aashtamukw mikw chiyawaau anite ekaa ihtaanuuhch, che aashteyeskusiyekw.”

³² Ekw kaa aashuuhahkwaau, anite kaa ati isichimetwaau ekaa ihtaanuyich.

³³ Mihchetu maak aweyuu chii waapamikuuch kaye tiiwehch chii nisituunaakuuch kaa waapamikutwaau. Nanaahkuu maak ihtaawinihch chii uhchipahiituuch e wii utihtahkwaau anite kaa wii isichimeyich Jesus neshta aniyuuh uchischinuhamuwaakaniyuuh. Anichii maak iinuuch chii wii atushkuweuch nete che naatakahamiyich.

³⁴ Iskutak Jesus kepaat aniyuu utiyuu chii waapameu aniyuu iinuuh e mihchetiyich. Naashch maak chii muushihtaau e chistimaacheyimaat mwehch maanishchaanishach ekaa ayaawaatwaau maanishchaanishuiinuu che naanaakachihiikutwaau e ishinaakusitwaau. Ekw kaa chiskutamuwaat mihchetu chekwaayuuh.

³⁵ Aniyuu maak e ati utaakushiyich anichii chischinuhamuwaakanich chii naateuch Jesus ekw kaa itaatwaau, “Shaash chihchiwe utaakushuu kaye maak namui ihtakun ihtaawin utah uu kaa ihtaayihkw.

³⁶ Chihchitishahuuch uchii iinuuch chechii nituu utinahkwaau chekwaayuu che miichitwaau anite aniyuuh ihtaawinh peshuch utah waaskaa kaa ihtakuniyikwaauh.”

³⁷ Jesus maak chii nishkweushiheu e itaat, “Chiyawaau miyaahkuch chekwaayuu che miichitwaau.” Kaa kakwechimaatwaau e itaatwaau, “Niyaan aa chinitaweyiminaan niishwaau mitaahtumitanuu shuuliyaawaanaapiskushach chechii ishpish aapachihiichihtwaau e utinachiht aaihkunaau chechii miichisutwaau uchii iinuuch.”

³⁸ Ekw Jesus kaa itaat, “Taan maak e ishpish ayaawekw aaihkunaau. Maachiih nituu chischeyihtamukw.” Iskutak maak kaa nituu chischeyihtahkwaau ekw kaa nituu wiihtamuwaatwaau Jesus, “Niyaayinuuch aaihkunaauch ekw maak niishu namesach ihtaauch.”

³⁹ Ekw maak Jesus kaa itaat uchischinuhamuwaakanh chechii itaayich aniyuuh iinuuh chechii maminepiyich anit mashkushiihch.

⁴⁰ Kaa ati waweyapihiisutwaau anichii iinuuch, e maamitaahtumitanewepitwaau kaye e naaniyaainumitanewepitwaau.

⁴¹ Ekw Jesus kaa utinaat aniyuu niyaayin aaihkunaau kaye aniyuu niishu namesa, ishpimihch kaa ishi tastasaapit e nanaaskumaat Chishemanituu. Chii pahpihkwepiteu misiwe aniyuuh aaihkunaauh, ekw kaa miyaat uchischinuhamuwaakan chechii maatinaweyich. Kaye aniyuuh niishu namesa chii maatinamuweu chechii maatinamuwaayich misiwe aweyuuh anit kaa ihtaayich chechii miichisuyich.

⁴² Misiwe maak awen chii miichisuu kaye chii tepimiichisuu.

⁴³ Ekw anichii chischinuhamuwaakanich kaa maamuushtinahkwaau ishkushtawaaniyuu. Niishushaap maak utapiiwath chii saakashchinihtaauch aniyuu kaa ishpish iskupuwaakanuyich aaihkunaauh kaye namesa.

⁴⁴ Niyaayinwaau chishe mitaahtumitanuu maak chii itashuwaakupanenich naapeuch kaa ashamaakanuutwaau.

Jesus nipiihch kaa pimuhtet

⁴⁵ Jesus maak tiiwehch chii itashuwaateu uchischinuhamuwaakanh chechii puusiyich, niikaan chechii isichimeyich nete aniyuu ihtaawiniyuu akaamihch kaa ihtakuniyich, Bethsaida kaa ishinihkaateyich. Ekut kaa ihtaat wiya, kaa itaat aniyuuh iinuuh anit kaa ihtaayich chechii chiiweyich.

⁴⁶ Iskutak maak kaa waachiyemaat aniyuuh iinuuh ekw wachiyuu kaa shaakachuwet Jesus, kaa nituu ayimihaat anite.

⁴⁷ E ati utaakushiyich maak tetaaukaam chii ihtaauch anichii chischinuhamuwaakanich. Mekwaach paahkwaahch chii ihtaau wiya Jesus.

⁴⁸ Chii waapameu uchischinuhamuwaakanh naashch e maastaayich e pimiskaayich, wesh chii nakaayaasiyuuh. Ekw maak eshkw e tipiskaashiyich wiyesh chistuuch nishtu ekw maak kutwaashch e ispayiyich Jesus chii naateu uchischinuhamuwaakanh nipiihch e pimuhtet. Chipaa ati miyaaskaweu kiipaa,

⁴⁹ mikw maak chii waapamikuu anit nipiihch e pimuhtet. “Chiipai” chii iteyimikuu ekw kaa aashihkweyich.

⁵⁰ Misiwe chii sechisuuch anichii chishtinuhamuwaakanich iskutak wiyaapamaatwaau Jesus. Jesus maak tiiwehch chii ayimiheu e itaat, “Chiyaameyihtamukw, eukw wesin niya. Ekaawii kushtaachikw.”

⁵¹ Kaa puusitutawaat. Aniyuu maak e ati puusitutawaat ekun tiiwehch kaa ati nachiiweyich. Nuwach maak chii miskaateyihtamuch anichii chischinuhamuwaakanich uyuu e ispayihch.

⁵² Wesh taapaa uhchi nisituhtamuch taan e ishi wiihtamaachemakaniyich aniyuu aaihkunaauh kaa ashamaakanuyich niyaayinwaau chishemitaahtumitanuu iinuuh. Namui uhchii nisituhtamuch wesaa e chii maskuutehetwaau.

Jesus kaa miinuwaachihiiwet anite Gennesaret

⁵³ Chii aashuuhamuch aniyuu saakahiikaniyuu chek kaa misakaatwaau nete Gennesaret kaa ishinihkaateyich. Kaa maahkupitahkwaau aniyuu utuutuwaau.

⁵⁴ E ati nakatahkwaau maak aniyuu utuutuwaau tiiwehch chii nisituunaakuu Jesus aweyuu.

⁵⁵ Ekw anichii iinuuch misiwe kaa aispahiitutwaau aniyuu ihtaawiniyuu e ishpishaayich kaye anite wiiwiitamihch e waawiihtamuwaatwaau aweyuu taanite e ihtaayich Jesus. Taanite maak kaa ati ihtaayich Jesus ekute kaa peshuwaatwaau iiniimuwaauh tehtahiikanihch e pimishiniyich.

⁵⁶ Misiwe maak taanite kaa ati ituhtet Jesus ihtaawinihch kaye e utenaauniyich, maak nihtaauchihchikan aschiihch, anichii iinuuch anit kaa ihtaatwaau chii ituhtaheuch utaahkusiiniimuwaau anite muush kaa chii nishtawiinaanuyich e ataawaanuyikwaauh chekwaayuuh. Ekw anichii kaa aahkusitwaau kaa nitutamuwaatwaau Jesus chechii pachishtinikutwaau mikuchik chechii taahtinamuwaatwaau e wanishkwekaniyich utakuhp. Misiwe maak aweyuuh kaa taahtinamiyich utakuhp chii miinuwaatisiyuu.